1 Na, ya tagnaꞌ na paglongun ku kamayu, diliꞌ mayu pagkalingawan pagpanawagtawagan adti Tyumanem ya kadég na manga utaw. Padatengan mayu adti asdangan nan ya pigsekat mayu pada kanilan aw gayed tadun sakanan pasalamatan sa kadyaw na pig-imoꞌ nan adti kanilan. 2 Aw dun ni kanaten pagpanawagtawag adti Tyumanem, diliꞌ tadun kalingawan ya manga hariꞌ aw ya kadég na migdumala kanaten, pada awun kalinaw na pag-eyaꞌ tadun aw madalug tadun ya bet na Tyumanem aw walaꞌ ya pagsalaꞌ sa kanaten bet. 3 Yeiy ya madyaw na pagpanawagtawag, aw makatutuk sa Tyumanem na kanaten Magpaluwa-ay, 4 kay ya kaliman nan paluwa-en ya kadég na utaw aw maka-edeꞌ silan sa matinaw na palna-u. 5 Kay sambuk da oloꞌ ya Tyumanem, aw sambuk da ya migpatengaꞌ sa manga utaw adti Tyumanem, aw yeiy si Kristu Jisus na migpaka-utaw 6 aw migtumbay sa pagka-utawun nan na un paglekat sa kadég na manga utaw. Aw yanagaw, dun ni allaw na pigpamalliꞌ na Tyumanem na un matay si Jisus, pigmatinaw na kaliman na Tyumanem makaluwaꞌ ya kadég. 7 Aw yeiy ya du-an na pigpadala aku nan na un mag-ubat-ubat aw ma-imoꞌ apostol. Matinaw ya piglong ku aw bekeꞌ na galuꞌ. Aw pigsuguꞌ aku nan adti manga Héntil na un magpa-edeꞌ sa matinaw na palna-u kan Kristu pada mangintu-u silan.

8 Yanagaw ya kanak kaliman, pangkay kinunu ya pagkatipun mayu, ya manga eseg na manawagtawag adti Tyumanem ka-ilangan na malinis ya kanilan anenganeng, aw diliꞌ silan magkadaman, aw diliꞌ mati-ayil.

9 Aw maynan uman, ya manga ka͡ubayan, sa pagsambuk nilan dun ni pagpanawagtawag adti Tyumanem, madyaw galu pagsutun nilan ya kadégkadég na umbaꞌ sa pagsimba, bekeꞌ na kadégkadég na makamulamula kanilan. Aw diliꞌ nilan pagpasobla͡an ya pagpakanenggeya sa kanilan lugay aw ya pagsut sa manga bulawan aw pérlas aw kadégkadég na to-o dakulaꞌ ya alagaꞌ. 10 Manang yan baling ya pakanenggeya͡an nilan ya manga madyaw na imo-unun na umbaꞌ sa bet na ka͡ubayan na nyangintu-u la sa Tyumanem. 11 Aw kun awun magpalna-u, ka-ilangan matinep ya manga ka͡ubayan magpakanyeg aw ka͡agadan nilan ya matinaw na palna-u. 12 Diliꞌ ku tumbay ya manga ka͡ubayan na palna-uwan nilan ya manga eseg, manang magpakanyeg baling silan. Aw diliꞌ silan uman atagan na katundanan magdumala sa manga eseg. 13 Kay ya muna pig-imoꞌ na Tyumanem si Adan, aw tigkas yan si Iba. 14 Aw bekeꞌ ni Adan ya piggawayan ni Satanas, manang ya ka͡ubayan baling, aw kyalakadan nan ya pigpigil na Tyumanem. 15 Aw yeiy ya du-an na magti-is ya manga ka͡ubayan kun ka͡utawan silan. Manang makaluwaꞌ silan kun magpadeleg dun ni pagpangintu-u aw pagginawa sa eped, aw kun malinis ya anenganeng aw matadeng magdala sa pagkaka͡ubayan nilan.