1 Manang asini muna awun uman manga sallong kunu propita na migpalna-u sa galuꞌ adti manga utaw na Isra-él. Aw maynan uman, awun dun ni kamayu na un magpalna-u sa galuꞌ. Ya tud na palna-u nilan ya makapagkalat sa kamayu pagpangintu-u. Balyaw nilan si Kristu na Matas na Pangulu tadun na yan ya miglekat kanilan adti manga salaꞌ nilan. Aw asuntu sa palna-u nilan na galuꞌ, maksay dumateng kanilan ya pa-emel-emel na Tyumanem. 2 Aw madég ya dumalug sa imo-unun nilan na to-o malatay. Aw yanagaw madég ya maglong sa malatay adti matinaw na palna-u ni Kristu. 3 To-o silan magkalim sa kuwalta, yanagaw mag-imo-imoꞌ silan sa manga tingeg pada kapanguwalta͡an kamu nilan. Manang ya Tyumanem, dadan da nan pig-ukuman na un pa-emel-emelen ya manga magpalna-uway sa galuꞌ.

4 Pangkay pa ya manga anghil na nyakasalaꞌ asini muna, walaꞌ silan kallati na Tyumanem. Yanagaw pigkalabusu nan silan dun ni gawang na walaꞌ ya katantanan na yan ya banwa na to-o mangitngit. Aw dun pa silan mendaꞌ sa allaw na pag-ukum. 5 Aw maynan uman, walaꞌ na Tyumanem kallati ya manga utaw dun ni manga allaw ni Nuwi, kay gayed silan baling mig-imoꞌ sa malatay. Aw pig-apnas nan ya kadég nilan magi sa dakulaꞌ na lenep, pangkay piglongan silan dadan ni Nuwi na dalugun ya pagkaliman na Tyumanem. Oloꞌ si Nuwi aw ya pitu ya ka-epedanan nan ya pigpaluwaꞌ na Tyumanem. 6 Aw walaꞌ uman na Tyumanem kallati ya manga utaw adti syudad na Sodoma aw Gomora. Pigpa-ulanan nan na atulun ya duwa ya syudad yeiy aw nyapnas ya manga utaw na nyeyaꞌ dun. Aw nya-imoꞌ silan pundinganan adti manga utaw na dumadateng kun unu ya kagamakan na manga utaw na gayed mag-imoꞌ sa malatay. 7,8 Manang si Lot pigpaluwaꞌ na Tyumanem. Nyeyaꞌ sakanan dun ni tampid na manga makasasalaꞌ, manang walaꞌ sakanan sambuk sa kanilan manga imo-unun na malatay. Kada allaw pagkita-en nan aw pagdengegen nan ya to-o malatay na pigpan-imoꞌ na manga utaw, aw migkalat to-o ya ginawa ni Lot. Aw pigtabangan sakanan na Tyumanem aw pigpaluwaꞌ lekat dun ni syudad yan. Yanagaw, 9 kyalabetan da tadun na mabatug saba na Tyumanem tabangan ya kadég tadun na dyumalug sa pagkaliman nan lekat adti manga kalugan na un dumateng. Manang dun ni allaw na pag-ukum, mabatug nan ya pagpa-emel-emel sa manga utaw na walaꞌ dalug sa manga suguꞌ nan, 10 labi la ya manga utaw na dyumalug sa pagkaliman na kanilan pagka-utawun adti imo-unun na to-o malatay. Diliꞌ silan malim magpasakup sa migdumala kanilan. Gayed silan magpalibantug aw to-o silan mangkategel. Diliꞌ magkamulamula aw walaꞌ ya kakallekan nilan maglong sa malatay adti manga anghil na awun katulus. 11 Aw pangkay to-o pa mabagseg aw matulus ya manga anghil, manang adti asdangan na Tyumanem walaꞌ silan paglong sa malat na tingeg adti manga utaw yeiy.

12 Ya manga utaw yeiy na migpalna-u sa galuꞌ, kasiling silan na ayep na malyaw na diliꞌ matadeng mag-anenganeng na yan ya pagdatengan nilan ya pagdaliketen aw pagpatayen. Aw ya manga utaw yeiy, pig-odoy-odoy nilan ya pangkay unu ya walaꞌ nilan kalabeti. Yanagaw pa-emel-emelen saba silan na walaꞌ ya tyamanan. 13 Yeiy ya pagamak kanilan asuntu sa malat na pig-imoꞌ nilan adti kanilan manga eped. Aw pagleya͡an nilan ya pag-imoꞌ sa makamulamula pangkay allaw imo-un nilan. Aw pangkay adti kamayu pagkatipun, kasiling silan na taping, kay migpa-eyang silan kyuman aw nyinem. 14 Ya manga utaw yeiy, yan ya pagkaliman nilan ya mag-inunu sa manga ka͡ubayan aw alag malatay ya nyakaseled adti anenganeng nilan. Aw diliꞌ silan malim tumeneng sa pag-imoꞌ sa salaꞌ. Pigbuyu nilan ya manga utaw na diliꞌ pa to-o masalig ya pagpangintu-u. Ya pagkalim nilan sa kuwalta to-o la dyumalid adti kanilan anenganeng, aw pag-imo-un nilan ya pangkay unu pada makakuwalta silan. Aw asuntu sa bet nilan yan, kyatullunan baling silan! 15 Pig-ayawan nilan ya matinaw na palna-u aw nyakasuway silan. Pigdalug nilan baling ya pig-imoꞌ ni Bala-am na iseꞌ ni Bi-or. Pigginawa͡an to-o ni Bala-am ya kuwalta aw kaliman nan na tandanan sakanan sa pag-imoꞌ nan sa malat adti eped na manga utaw. 16 Manang pigsagda sakanan baling asuntu sa palpa nan na malatay, magi dun ni paglong na ayep nan na asnu na kasiling na tingeg na utaw. Ya syampetan yan, walaꞌ pakalos ya kamenengan na palpa nan.

17 Ya manga utaw na migpalna-u sa galuꞌ, kasiling silan na selep na walaꞌ da ya tubig. Kasiling silan uman na labun na pigtambel na mabandes na samet aw yanagaw walaꞌ paka-ulan. Aw pigtagilanan silan na Tyumanem sa banwa na to-o mangitngit. 18 Migpalibantug silan sa kanilan pigpan-imoꞌ manang walaꞌ ya guna na piglong nilan. Miglong silan na diliꞌ kunu malatay ya pagdalug na utaw sa pagkaliman na pagka-utawun nan. Aw pigbuyu nilan ya manga utaw na bagu pa tyumalikud sa malatay na pig-imoꞌ na manga eped nilan. 19 Pigpakangan nilan, law nilan, "Makaluwaꞌ kamu!" Manang sa kanilan, kenneꞌ nilan nya-allang na malatay. Kay kun unu ya dyumeg sa utaw, yan saba ya mag-allang kanan. 20 Yanagaw kun singalan ya nyangintu-u la sa kanaten Matas na Pangulu aw Magpaluwa-ay na si Jisu-Kristu, nyakaluwaꞌ da silan lekat adti pag-allang na malatay asini tas na lupaꞌ. Manang kun magpaliput aw magpa-allang silan salut sa malatay, to-o pa baling malat ya un nilan datengan kay sa idtu muna sa walaꞌ pa silan paka-edeꞌ kan Kristu. 21 Madyaw pa baling kun walaꞌ pa silan paka-edeꞌ sa pagdalug sa pagkaliman na Tyumanem kay sa nyaka-edeꞌ silan aw tigkas yan pigtalikudan nilan ya manga suguꞌ na pig-atag kanilan. 22 Kasiling saba silan na paglongun na manga utaw: "Ya iduꞌ, pagliku-an nan pagkanen ya pigsuka nan." Aw "ya takuꞌ na abus da sugbuwi, uman da lumikuꞌ lumubug dun ni pasak."