1 Asuntu na pigpaluwaꞌ da kitadun ni Kristu lekat adti pag-allang na Uldin, yanagaw pakasaligen tadun ya kanaten pagpangintu-u kanan, aw diliꞌ da kitadun magpa-allang salut sa Uldin.

2 Aku si Pablo ya miglong adti kamayu: Kun magpatuliꞌ kamu pada dawaten kamu na Tyumanem, kasiling na walaꞌ ya un mayu ma-untung sa pagkamatay ni Kristu adti krus! 3 Salutun ku uman ya paglong kamayu: Ya manga utaw na magpatuliꞌ pada dawaten silan na Tyumanem, ka-ilangan ubusun nilan uman tumanen ya kadakulaꞌ na Uldin. 4 Aw kun pigbetang mayu adti ginawa ya pagdalug sa Uldin pada dawaten kamu na Tyumanem, kya-eletan da kamu adti kan Kristu aw pigtalikudan mayu baling ya kanan kallat.

5 Manang adi kanaten, to-o dakulaꞌ ya pag-iman tadun magi sa Ispiritu Santo na dawaten kitadun nan kasiling na walaꞌ da ya salaꞌ, asuntu sa pagpangintu-u tadun kan Kristu. 6 Kay kun nyakasambuk da kitadun kan Kristu Jisus, walaꞌ da ya labet kun magpatuliꞌ kitadun aw diliꞌ. Yan saba oloꞌ ya ka-ilangan ya kanaten pagpangintu-u na mabatug kita-en dun ni pagginawa tadun sa manga utaw.

7 Idtu na muna, madyaw to-o ya pagdalug mayu sa palna-u ni Kristu. Singalan kaꞌ ya migbalabag kamayu sa pagdalug mayu sa matinaw na palna-u? 8 Ya pagbalabag yeiy, walaꞌ saba lekat adti Tyumanem na migtawag kamayu. 9 Ya palna-u na galuꞌ kasiling na tagbiꞌ na patulinay na pigdaliꞌ adti harina. Diliꞌ madugay, tumulin da ya kadakulaꞌ na harina. 10 Manang asuntu na nyakasambuk da kamu kan Kristu, kya-ede-an ku na yan saba ya dalugun mayu ya pigpalna-u ku kamayu idtu muna. Aw ya utaw na migpabelengbeleng kamayu, un sakanan pa-emel-emelen na Tyumanem.

11 Kay manga inulug ku, kun kenneꞌ pa aku migpalna-u na ka-ilangan magpatuliꞌ ya utaw pada dawaten na Tyumanem, na, anangaꞌ pa aku gayed pamulayaman na manga eped ku na Judiyu? Yan ya du-an, kay pigpalna-u ku na dawaten na Tyumanem ya manga utaw asuntu sa pagkamatay ni Kristu adti krus, aw yan baling ya magpakasungkul kanilan. 12 Aw ya manga utaw na migpabelengbeleng kamayu magi sa palna-u nilan na galuꞌ, madyaw pa baling na diliꞌ silan oloꞌ magpatuliꞌ manang kapunun nilan ya kanilan pagka-utawun!

13 Na, kay manga inulug ku, pigtawag da kamu na Tyumanem aw nyakaluwaꞌ da lekat adti pagdumala na Uldin. Manang diliꞌ kamu mag-anenganeng na pigtumbay pa nan kamayu ya pagdalug sa pagkaliman na pagka-utawun mayu adti pag-imoꞌ sa malatay. Madyaw pa baling na gayed kamu maggaginawa͡ay aw magtatabangay. 14 Kay ya kadég na suguꞌ na Tyumanem dun ni Uldin, alag da nyaluduk dun ni sambuk na suguꞌ: "Ginawayi ya eped mu na utaw kasiling na pagginawa mu sa kanmu pagka-utawun."* 15 Manang kun gayed kamu magtanam kasiling na manga ayep na mangkabulut, na, magpakatadeng kamu na diliꞌ mayu kalaten ya pagpangintu-u na eped.

16 Manang ini ya paglongun ku kamayu: Dun ni kadég na imo-un mayu, pagpagagad kamu sa Ispiritu Santo pada diliꞌ mayu ma-imoꞌ ya malatay na pagkaliman na pagka-utawun mayu. 17 Kay gayed nyatu ya pagkaliman na pagka-utawun tadun adti pagkaliman na Ispiritu Santo. Aw ya Ispiritu nyatu uman sa pagkaliman na kanaten pagka-utawun. Aw ya duwa yeiy gayed silan migtanam adti anenganeng tadun. Yanagaw malug kanaten ya pag-imoꞌ sa madyaw. 18 Manang kun piggagad da kamu na Ispiritu Santo, nyakaluwaꞌ da kamu adti pagdumala na Uldin.

19 Na, kun dalugun na manga utaw ya pagkaliman na kanilan pagka-utawun, maynini ya imo-unun nilan: Magkasala-enen silan aw gayed malatay ya nyakabetang adti anenganeng nilan. Aw pigpan-imoꞌ nilan ya manga imo-unun na makamulamula͡ay. 20 Magsimba silan sa manga tyumanem na galuꞌ. Mag-imoꞌ silan sa malatay adti eped na utaw magi sa katulus na busaw. Gayed nilan pagdumutan ya eped na utaw, mati-ayil silan, aw matikadaway silan. Maksay silan magkadaman, aw pag-olo-un nilan ya kanilan pagka-utawun, aw gayed mag-atu sa eped na utaw, aw yan oloꞌ ya ubaybayen nilan ya utaw na magka͡agad kanilan. 21 Aw mati-inga-ay silan. Pala-inem silan sa magpakalangulangu, aw magpa-iyeped silan sa manga utaw na mig-imoꞌ sa malatay. Aw madég pa ya kanilan pag-imo-un na diliꞌ madyaw. Salutun ku ya piglong ku kamayu idtu muna: Ya manga utaw na mig-imoꞌ sa maynan, diliꞌ saba maka-akup adti Kasakupan na Pighari-an na Tyumanem.

22 Manang maynini ya bunga na Ispiritu Santo na kita-en dun ni pagka-utawun tadun: Awun pagginawa tadun sa Tyumanem aw sa eped na utaw. Magleya kitadun pangkay unu ya dumateng. Awun kalinaw na kanaten anenganeng. Matas ya pasinsiya tadun sa kanaten eped aw pagkallatan tadun silan. Madyaw ya bet tadun adti eped aw magtabang kitadun kanilan. Aw kasaligan kitadun. 23 Pagpakadyawun tadun ya kadég na utaw. Aw magpakatagen kitadun sa pagkaliman na kanaten pagka-utawun. Kun imo-un tadun ya kadég yeiy, walaꞌ ya manga suguꞌ dun ni Uldin na kalakadan tadun.

24 Aw ya manga utaw na nyakasambuk da kan Kristu Jisus, nyaka-agad da pigkalabuwan adti krus ya pagkaliman na pagka-utawun nilan. 25 Asuntu na pigbagu la kitadun na Ispiritu Santo, yanagaw dalugun tadun ya kanan pagkaliman. 26 Diliꞌ kitadun magpatastas, aw diliꞌ gayed magkadaman sa eped tadun, aw diliꞌ kitadun mag-inga-inga-ay.