1 Pagkatigkas yan, pig-indegan ni Jisus ya banwa yan aw nyuliꞌ adti lunsud na Nazarit na yan ya pigtulinan nan,* aw nyagad kanan ya manga umagakan nan. 2 Pagdateng na Allaw na Paglagdeng, migpalekat si Jisus migpalna-u sa manga utaw dun ni sinagoga. Aw madég ya nyakadengeg sa palna-u nan aw to-o silan nyabelengbeleng, aw migsibalawbalaw silan, law nilan, "Ayin lekat ya katadeng na utaw yeiy? Aw pig-unu nan ya pagpaka-imoꞌ sa manga milagru? 3 Oloꞌ saba sakanan panday asini kanaten, aw iseꞌ sakanan ni Maria. Aw ya manga inulug nan, yan si Santiago, aw si José, aw si Judas, aw si Simon. Aw asini uman pag-eyaꞌ ya manga bubay nan!" Asuntu seiy, walaꞌ silan kalim pangintu-u kanan. 4 Aw miglong si Jisus kanilan, "Walaꞌ ya propita na pagbasa͡an adti kanan banwa aw kanan kadégan, manang pagbasa͡an baling sakanan adti eped na manga banwa." 5 Yeiy ya du-an na walaꞌ abay ya milagru na nya-imoꞌ nan dun ni kanilan. Tabay ya utaw na pigkaguli-an, taman oloꞌ na pigpandungan nan sa kanan palad. 6 Aw nya-enneng-enneng si Jisus asuntu na walaꞌ silan pangintu-u kanan. Yanagaw piglegeb nan baling ya eped na manga baranggay aw migpalna-u sa manga utaw adtu.

7 Pagkatigkas yan, pigpatawag ni Jisus ya sampuluꞌ tag duwa (12) ya manga umagakan nan aw un nan silan sugu-un na tag duwaduwa. Aw pig-atagan nan silan na katulus na un mag-alilin sa manga busaw na syumeled adti manga utaw. 8 Piglongan nan silan, "Diliꞌ kamu magdala sa pangkay unu. Diliꞌ kamu magdala sa makan aw kabil aw kuwalta. Oloꞌ bangkaꞌ ya dala͡a mayu. 9 Pagsandal kamu manang diliꞌ kamu magdala sa manga kadégkadég. 10 Aw ya tagtun sa balay na magpabantuk kamayu, dun da kamu pag-eyaꞌ mendaꞌ na indegan mayu ya lunsud yan. 11 Manang kun diliꞌ kamu dawaten na manga utaw adti sambuk na banwa, aw diliꞌ silan malim magpakanyeg sa ubat-ubat mayu, na, sa pag-indeg mayu sa banwa yan, taptapa ya alikabuk na siki mayu, kay yan ya pangilala adti kanilan na ukuman silan na Tyumanem adti kamoliyan na allaw." 12 Pagkatigkas ni Jisus maglong kanilan, nyanaw ya sampuluꞌ tag duwa (12) aw gayed silan mig-ubat-ubat na ka-ilangan magselsel ya manga utaw sa manga salaꞌ nilan. 13 Mig-alilin silan sa madég na busaw. Aw madég ya manga utaw na kyedelan na pig-asagan nilan na lana na olibo, aw dayaw silan kyaguli-an.

14 Dyengeg na hariꞌ na si Hérodés Antipas* ya kadég na pigpan-imoꞌ ni Jisus, kay ya ngalan ni Jisus to-o la migkadengganen. Awun manga utaw na miglong, "Yan si Juan na Magba͡utismuway na nyataw lekat adti pagkamatay. Yan ya du-an na nyaka-imoꞌ sakanan sa manga milagru." 15 Awun uman manga eped na miglong, "Yan si Éliyas." Aw miglong uman ya manga eped, "Propita sakanan na Tyumanem kasiling na manga propita asini muna." 16 Aw sa pagdengeg ni Hérodés sa madég na pigpan-imoꞌ ni Jisus, miglong sakanan, "Nyataw si Juan na pigpa-utudan ku sa ulu!" 17 Yan ya piglong ni Hérodés, kay idtu muna, pigpadakep nan si Juan aw pigpagapus aw pigpakalabusu. Ya du-an, kay pigpanga͡ubayan ni Hérodés si Hérodiyas na ka͡ubayan na inulug nan na si Pilipi, 18 aw gayed pigsagda ni Juan si Hérodés na miglong, "Pigpigil saba adti Uldin na manga Judiyu ya pagpanga͡ubayan sa ka͡ubayan na inulug mu." 19 Yanagaw to-o pigdumutan ni Hérodiyas si Juan, aw pigtibagsegan nan ya pagpapatay kanan, manang walaꞌ nan ka-imoꞌ asuntu na walaꞌ tumbayan ni Hérodés 20 kay nyallek sakanan kan Juan. Kay kya-ede-an nan na si Juan walaꞌ ya pagsalaꞌ kanan aw nyatibulluk adti pagdalug sa pagkaliman na Tyumanem. Yanagaw pigtamengan ni Hérodés si Juan aw kaliman nan uman na gayed magpakanyeg sa palna-u nan pangkay nyabelengbeleng sa pigdengeg nan.

21 Manang pagdateng na allaw ni Hérodés, mig-imoꞌ sakanan sa dakulaꞌ na katipun. Aw pyamilit nan ya manga pigsaligan nan, aw ya manga matas na sundalu, aw ya manga dakulaꞌ na utaw dun ni banwa na Galiliya. Aw yeiy da ya allaw na pigtagadan ni Hérodiyas. 22 Dun ni katipun yan, syumeled ya iseꞌ ni Hérodiyas na dalaga aw syumayaw adti asdangan na kadég na utaw. Aw to-o migleya si Hérodés aw ya manga pyamilit nan, yanagaw piglongan nan ya dalaga, "Pagsekat kaw sa pangkay unu na kaliman mu aw atag ku kanmu." 23 Tigkas yan, migsapaꞌ si Hérodés kanan, law nan, "Atag ku kanmu ya kadakulaꞌ na sekaten mu kanak, pangkay katengaꞌ pa na kasakupan ku." 24 Lyumuwaꞌ ya dalaga aw nyusip sa ina nan, "Unu ya un ku sekaten?" Aw tyumubag ya ina nan, "Yan ya sekata ya ulu ni Juan na Magba͡utismuway." 25 Nyaksay lyumikuꞌ ya dalaga adti kan Hérodés, aw law nan, "Yan ya kaliman ku sekaten ya ulu ni Juan na Magba͡utismuway. Atagan kanak adun ya ulu nan na dayaw betang adti dakulaꞌ na palatu!" 26 Pagdengeg ni Hérodés, migkalat ya ginawa nan. Manang asuntu na nyakasapaꞌ da sakanan dun ni asdangan na kadég na pyamilit nan, makamulamula kanan kun diliꞌ nan tumanen ya sapaꞌ nan. 27 Aw maksay ni Hérodés pigsuguꞌ ya sambuk na sundalu na angayen ya ulu ni Juan. Aw nyadtu ya sundalu ni kalabusuwanan aw pig-utudan nan si Juan sa ulu. 28 Aw pigbetang nan ya ulu ni Juan adti dakulaꞌ na palatu aw dyala nan adti dalaga, aw pig-atag na dalaga adti ina nan. 29 Pagdengeg na manga umagakan ni Juan sa nya-imoꞌ, pig-angay nilan ya lawas nan aw lebengan nilan.

30 Na, lyumikuꞌ ya manga apostolés adti tampid ni Jisus aw pigdandan nilan kanan ya kadég na pigpan-imoꞌ nilan aw pigpalna-u nilan. 31 Manang to-o madég ya utaw na migliku-likuꞌ adti sayid nilan aw walaꞌ ya selat nilan kyuman, yanagaw miglong si Jisus sa manga umagakan nan, "Naten madtu ni kaligbinan pada maglagdeng dagawdagaw." 32 Yanagaw syumakay silan sa balangay aw migpasinan adti kaligbinan na oloꞌ silan. 33 Manang sa pag-indeg da nilan, madég ya utaw na kyumitaꞌ aw kyumilala kanilan. Aw dyumalagan ya manga utaw na lekat adti eped na manga lunsud dun ni baklayan pasinan adti banwa na un kadtuwan ni Jisus aw nyaka-una pa silan dyumateng dun. 34 Pagpanog da ni Jisus lekat adti balangay, kyinitaꞌ nan ya to-o madég na utaw na migkatipun dun. Aw to-o sakanan nyallat kanilan kay kasiling silan na manga karniro na walaꞌ ya magdadiyaga͡ay. Yanagaw madég ya pigpalna-u ni Jisus kanilan.

35 Pagka͡ambung da, dyumulud kan Jisus ya kanan manga umagakan, aw miglong silan, "Ambung da to-o aw walaꞌ ya makan asini banwa ini. 36 Ayin ya madyaw kun papanawun da mu ya manga utaw pada makabayad silan sa kanilan makan dun ni manga baranggay?" 37 Manang tyumubag si Jisus kanilan, "Kamu baling ya matag sa un nilan makan." Aw miglong silan kanan, "Unu, manaw kami pada mayad sa makan na kadég na utaw yeiy? Ya kakan na maka-umbaꞌ kanilan, walumbulan na utaw talabahuwan!" 38 Aw miglong si Jisus kanilan, "Pilallapid ya pan mayu awun? Tanawa mayu kunu." Aw sa pagka-edeꞌ da nilan, piglongan nilan si Jisus, "Oloꞌ da limallapid ya pan aw duwambulus ya isdaꞌ."

39 Tigkas yan, pigpa-ingkud ni Jisus ya manga utaw na ubbung-ubbung dun ni sakati. 40 Aw yanagaw nyingkud silan na tag sanggatus (100) ya sangka-ubbung aw tag kaliman (50) ya sangka-ubbung. 41 Pigkamang ni Jisus ya limallapid ya pan aw duwambulus ya isdaꞌ. Aw lyumangad sakanan adti langit aw pigpasalamatan nan adti Tyumanem. Aw tigkas yan, pigtenga-tengaꞌ nan ya pan aw pig-atag nan adti kanan manga umagakan na un nilan atped-atped adti manga utaw. Maynan uman, pigtenga-tengaꞌ ni Jisus ya duwambulus ya isdaꞌ adti manga utaw. 42 Kyuman ya kadég nilan aw alag silan nyangkabiyag. 43 Aw pigpan-imun na manga umagakan ni Jisus ya nyasamaꞌ na pan aw isdaꞌ, aw nyangkatmuꞌ ya sampuluꞌ tag duwa (12) ya be-en. 44 Sa kadég na kyuman dun, manga limammalalan (5,000) ya eseg.*

45 Sa abus da pakakan ya manga utaw, maksay pigsuguꞌ ni Jisus ya kanan manga umagakan na lumikuꞌ sumakay adti balangay aw muna la silan adti Bétsayda, kay un pa nan papanawun ya kadég na manga utaw. 46 Pagkatigkas nan papanawun ya manga utaw, tyumukud si Jisus adti buntud na un manawagtawag adti Tyumanem. 47 Pagkalalem da na gabi, adtu la ni tenga-tengaꞌ na danaw ya balangay na pigsakayan na manga umagakan nan, aw dakman si Jisus ya adti buntud. 48 Pigtandawan nan silan aw kyinitaꞌ nan na migkalug silan nyamegsay kay gayed nilan pigsalumpak ya mabandes na samet. Aw sa pagpakallawunun da, nyanaw si Jisus adti tas na tubig aw migpasinan dun ni kanilan aw un da nan galu silan labayan. 49 Manang pagkitaꞌ nilan na awun nyanaw adti tas na tubig, iman nilan aw ma-allekay sakanan. Aw mig-ulangag silan 50 kay alag nilan pigkitaꞌ aw to-o silan nyallek. Manang maksay si Jisus migtawag kanilan, "Diliꞌ kamu magkallek! Aku saba ya ini! Pakabagsega ya ginawa mayu." 51 Aw syumakay si Jisus adti balangay aw dayaw tyumangkeꞌ ya mabandes na samet. Aw ya manga umagakan nan to-o nya-enneng-enneng. 52 Pangkay kyinitaꞌ da nilan ya katulus ni Jisus sa pig-imoꞌ nan sa pan, manang walaꞌ pa nilan kalabeti kun singalan sakanan, kay kenneꞌ na kategelan na anenganeng nilan.

53 Pagpakatalipag da nilan sa danaw, adtu silan dungguꞌ ni lunsud na Génésarét, aw dun da nilan eketan ya balangay. 54 Pagpanog nilan adti balangay, maksay na manga utaw pigkilala si Jisus. 55 Aw migkagallat silan nyangay sa manga pyangkedelan lekat adti manga banwa na nyakapalibed dun, aw pigdala nilan adti banwa na dyengeg nilan na adtu si Jisus. 56 Aw kun ayin si Jisus kadtu, pangkay adti baranggay aw adti lunsud aw adti palingki, adtu nilan uman dala͡a ya manga utaw na pyangkedelan. Aw nyanginayuꞌ silan kan Jisus na pa-awiden nan silan sa pangaway na pigsut nan. Aw ya kadég na nyaka-awid, alag silan kyaguli-an.