1 Kay manga inulug, kya-ede-an da mayu na awun bala-ud na magdumala sa utaw, aw kyalabetan mayu uman na kun matay da ya utaw, diliꞌ da magdumala ya bala-ud kanan. 2 Alimbawaꞌ, ya ka͡ubayan na awun da eseg, diliꞌ sakanan makaluwaꞌ dun ni kapangugnanay nilan kun utaw pa ya kanan eseg. Manang kun matay da ya eseg nan, makaluwaꞌ da sakanan dun ni bala-ud na migpa-iganget sa kapangugnanay nilan. 3 Yanagaw kun utaw pa ya kanan eseg aw magpa-agaw sakanan sa eped na eseg, na, tawagen sakanan na ka͡ubayan na miglakadenen. Manang kun matay da ya eseg nan, nyakaluwaꞌ da sakanan lekat adti bala-ud na mangugnanay, aw kun mangugnan sakanan sa eped na eseg, walaꞌ sakanan paglakadenen.

4 Kay manga inulug ku, maynan uman ya pagpakabetang mayu. Nyakaluwaꞌ da kamu lekat adti pagdumala na Uldin na manga Judiyu, kay nyaka-agad da kamu kan Kristu dun ni pagkamatay nan, aw nyakasambuk da kamu kanan dun ni pagkataw nan lekat adti pagkamatay. Yanagaw mabatug da tadun imo-un ya manga madyaw pada madeyen ya Tyumanem. 5 Idtu muna, sa walaꞌ pa kitadun pangintu-u kan Kristu, gayed tadun pigdalug ya pagkaliman na pagka-utawun tadun adti manga imo-unun na malatay. Aw to-o pa baling migkadakulaꞌ ya pagkalim tadun mag-imoꞌ sa malatay asuntu na pigka-ede-an tadun ya Uldin. Aw asuntu na pig-imoꞌ tadun yeiy, yan ya un tadun datengan na pa-emel-emelen na Tyumanem na walaꞌ ya tyamanan. 6 Manang adun, nyakaluwaꞌ da kitadun adti pagdumala na Uldin kay nyaka-agad da kitadun kan Kristu adti pagkamatay nan. Yanagaw diliꞌ da ka-ilangan na gelgelen pa kitadun dumalug sa Uldin na pigsulat asini muna. Kay pigbagu la kitadun na Ispiritu Santo pada mabatug tadun tumanen ya pagkaliman nan.

7 Na, pagaw awun utaw na maglong, "Malatay ya Uldin." Manang ya tubag ku kanan, "Diliꞌ saba!" Kun walaꞌ ya Uldin, diliꞌ ku ka-ede-an ya salaꞌ. Alimbawaꞌ, kun walaꞌ pa sulata dun ni Uldin na "Diliꞌ kamu magkaybeg,"* diliꞌ ku ka-ede-an na salaꞌ kadiꞌ ya pagkaybeg. 8 Manang sa pagka-edeꞌ ku na salaꞌ kadiꞌ adti Uldin ya pagkaybeg, nyakaselat baling dun ya salaꞌ aw to-o pa migkadakulaꞌ ya pagkaybeg ku. Ya kakawasan na piglong ku na kun walaꞌ ya manga suguꞌ dun ni Uldin, diliꞌ kapukawan ya pagkalim ku mag-imoꞌ sa salaꞌ. 9 Idtu muna, walaꞌ ya kyataga͡an ku sa Uldin. Manang sa pagka-edeꞌ da ku sa manga suguꞌ, dun da ku ka-ede-i na nyakasalaꞌ kadiꞌ aku aw nyapukaw baling ya pagkalim ku mag-imoꞌ sa salaꞌ. 10 Aw ya Uldin na mag-atag galu sa agiyanan pasinan adti ginawa na walaꞌ ya katigkasan, yeiy baling kadiꞌ ya du-an na pa-emel-emelen aku na Tyumanem na walaꞌ ya tyamanan. 11 Kay nyakaselat ya pagkalim ku mag-imoꞌ sa salaꞌ. Aw magi sa suguꞌ na piglakadan ku, kyagawayan baling aku aw yeiy ya migpatay kanak. 12 Yanagaw, kyalabetan tadun na ya Uldin lekat saba adti Tyumanem aw ya manga suguꞌ dun alag matulid aw matinaw aw to-o madyaw.

13 Na, pagaw awun utaw na musip, law nan, "Kun madyaw ya Uldin, unu, yan baling ya du-an na kya-eletan aku adti Tyumanem?" Aw ya kanak tubag kanan, "Diliꞌ saba!" Pigbukasan baling na Uldin ya manga salaꞌ ku. Madyaw ya Uldin aw umbaꞌ aku pa-emel-emelen na Tyumanem. Yanagaw magi sa Uldin kya-ede-an da tadun na to-o malatay ya salaꞌ.

14 Na, kya-ede-an da tadun na ya Uldin lyumekat adti Tyumanem. Manang aku utaw saba oloꞌ na nya-allang na salaꞌ. 15 Walaꞌ ku kalabeti kun unu ya pig-imoꞌ ku. Aw pangkay kya-ede-an ku kun unu ya madyaw imo-un manang diliꞌ ku baling ma-imoꞌ. Yan baling ya kanak pig-imoꞌ, ya manga imo-unun na walaꞌ ku kalimi. 16 Manang kun pig-imoꞌ ku ya malatay na diliꞌ ku kaliman imo-un, na, tyumandeꞌ aku na madyaw ya Uldin. 17 Yanagaw bekeꞌ da ku ya mig-imoꞌ sa malatay manang yan saba ya mig-imoꞌ ya salaꞌ na nyeyaꞌ asini kanaken. 18 Kay kya-ede-an ku na walaꞌ ya madyaw adi kanaken. Pangkay kaliman ku imo-un ya madyaw manang diliꞌ ku mabatug ya pag-imoꞌ. 19 Ya madyaw na kaliman ku imo-un, walaꞌ ku baling ka-imoꞌ. Yan baling ya pig-imoꞌ ku ya malatay na walaꞌ ku kalimi.

20 Na, kun imo-un ku ya diliꞌ ku kaliman imo-un, bekeꞌ da ku ya mig-imoꞌ, manang yan baling ya mig-imoꞌ ya salaꞌ na nyeyaꞌ asini kanak. 21 Yanagaw dun ku ka-ede-i na kun kaliman ku imo-un ya madyaw, magpalapit baling kanak ya malatay. 22 Adi kanak anenganeng to-o ku pigleya͡an ya Uldin na Tyumanem, 23 manang awun sangkamuluꞌ na gayed tyumanam adi kanak anenganeng. Aw pigdeg baling ya madyaw, aw nya-imoꞌ aku allang na salaꞌ. 24 Aw to-o migkabegat ya ginawa ku asuntu sa kanak pagpakabetang. Kun yan ya kanak datengan ya pa-emel-emelen na Tyumanem na walaꞌ ya tyamanan, singalan kaꞌ ya magpaluwaꞌ kanak lekat adti pagdumala na salaꞌ na asini kanak? 25 Manang pigpasalamatan ku ya Tyumanem kay magi sa pig-imoꞌ ni Jisu-Kristu na kanaten Matas na Pangulu, pigpaluwaꞌ da aku nan lekat adti kanak dadan na pagpakabetang.

Yanagaw ya kaliman na kanak anenganeng, yan ya pagdalug sa Uldin na Tyumanem, manang asuntu na pig-allang aku na salaꞌ, kya͡agadan ku baling ya pagkaliman na pagka-utawun ku na mag-imoꞌ sa salaꞌ.