1 Unu ya du-an na awun gayed pagtanam aw ya pag-ayil-ayil dun ni kamayu? Yan saba ya du-an nan, kay awun pagkaliman na pagka-utawun mayu na gayed miglinggal sa kamayu anenganeng. 2 Awun manga pigkaliman mayu tagtunun manang diliꞌ mayu mabatug, yanagaw kaliman da mayu magpatay sa utaw. Awun pagkaybegan mayu, manang diliꞌ mayu makamang, yanagaw nyanubbuk kamu sa ayil aw tyanam mayu ya eped na utaw. Manang yan ya du-an na diliꞌ mayu yeiy makamang ya pigkaliman mayu, kay walaꞌ mayu sekata adti Tyumanem. 3 Aw pangkay sekaten mayu adti kanan, diliꞌ kamu nan atagan asuntu na diliꞌ madyaw ya tud na pigsekat mayu. Kay un mayu oloꞌ dagwasen adti pagkaliman na pagka-utawun mayu. 4 Kasiling kamu na utaw na miglakadenen, kay nya-uman da ya ginawa mayu sa Tyumanem. Walaꞌ kaꞌ mayu ka-ede-i na kun ginawa͡an na utaw ya asini tas na lupaꞌ, ma-imoꞌ sakanan po-on na Tyumanem? Yanagaw, kun singalan ya magagad na malatay na asini tas na lupaꞌ, dun da sakanan ka-imoꞌ po-on na Tyumanem. 5 Diliꞌ kamu mag-anenganeng na walaꞌ ya ma-untung adti pigpasulat na Tyumanem na maglong, "Ya Ispiritu na pig-atag na Tyumanem aw pigpa-eyaꞌ nan adti kanaten, magkadaway sakanan." 6 Manang dakulaꞌ ya kallat na Tyumanem, yanagaw awun pigpasulat nan uman:

"Mulamula͡en na Tyumanem ya utaw na magpatastas,

manang kallatan nan ya utaw na magpadalem."

7 Yanagaw, ka͡agadi mayu ya pagkaliman na Tyumanem. Atuwi mayu si Satanas, aw malaguy sakanan lekat adti kamayu. 8 Pagpalapit kamu adti Tyumanem, aw ya Tyumanem magpalapit uman kamayu. Aw kamu na makasasalaꞌ, ayawi la mayu ya kadég na imo-unun na malatay. Aw kamu na migduwaduwa sa pagpangintu-u sa Tyumanem, tibulluka ya kamayu anenganeng adti kanan. 9 Kalata ya kamayu ginawa, aw to-o sugawi aw kamulamulayi ya manga salaꞌ na nya-imoꞌ mayu. Ya kamayu pagpaka-ikel, sayuwi na kakalatan na ginawa. Aw ya kamayu pagleya, sayuwi na kabegat na ginawa. 10 Pagpadalem kamu adti asdangan na kanaten Matas na Pangulu, aw patasen kamu nan.

11 Kay manga inulug, diliꞌ kamu maglong sa malatay adti eped mayu na mangintu-uway. Pangkay singalan ya maglong sa malatay adti eped nan, kasiling na piglongan nan na malatay ya suguꞌ na Tyumanem na ginawa͡an tadun ya kanaten eped. Aw kun paglongan mu na malatay ya suguꞌ nan, na, walaꞌ mu yan daluga aw nya-imoꞌ da kaw baling mag-ukumay. 12 Tyumanem saba oloꞌ ya mag-ukumay, kay yan ya mig-atag sa manga suguꞌ dun ni Uldin na manga Judiyu. Aw mabatug nan ya magpaluwaꞌ aw magpa-emel-emel sa utaw. Manang ikaw, singalan kaw kaꞌ na un mag-ukum sa eped mu?

13 Na, pakanyegi aku mayu, kamu na maglong, "Un kami adun madtu ni sambuk na lunsud, aw kun bekeꞌ yan, kunallaw, aw dun kami pag-eyaꞌ seled na sangka͡umay. Aw magbalikwat kami dun aw magtipun kami sa madég na kuwalta!" 14 Manang diliꞌ kamu maglong sa maynan, kay walaꞌ mayu ka-ede-i kun unu ya un dumateng kunallaw aw kun sangunu ya kadugay mayu asini tas na lupaꞌ. Kasiling kamu saba oloꞌ na labun na pagkita-en na maselem aw diliꞌ madugay malanas da uman. 15 Yan baling ya umbaꞌ mayu paglongun, "Kun tumbay na Tyumanem, aw utaw pa kami, yan ya imo-un nami." 16 Manang kenneꞌ mayu baling migpatastas aw migpalibantug sa un mayu imo-un, aw alag yeiy malatay adti Tyumanem. 17 Aw kun kya-ede-an na utaw ya madyaw na un nan galu imo-un manang walaꞌ nan baling imo-a, nyakasalaꞌ sakanan adti Tyumanem.