Mateus 21

Isa Apujia Mia Bhari Samakasuna i Yerusalem

1 Wakutuuna amakasumo i Yerusalem, manga incia akawamo i Bait Fagi i Gunu Zaitun. Iwe sumai o Isa atumpumo rua mia murina alingka porikana. 2 Isa asamea, "Lingka i kampo i aroamiu. Sakawamiu bheukamatamo sambaa keledai bhawine atobhoke tee sambaa anana. Bungkalea kabhokena manga kasiimpo bhawaaka Iaku. 3 Ande dhaangia o mia moabhakikomiu, paumbaia, 'Opu afaraluua,' sumaimo o mia incia sumai bhealausaka atumpukomiu to ubhawa keledai sumai."

4 Giu incia sumai bheamembali mamudhaakana amondo o firimani mopadhana ipakawaakana alaloi nabiina,

5 ✝ 21:5 Zak. 9:9. "Paumbaakea i Puteri Sion:*21:5 Puteri Sion: Sarona to Kota Yerusalem, roonamo atobhangu i Gunu Sion.

'Kamatea! Rajamu aumbatiko,

Incia amalulu o ngangarandana tee asawiki sambaa keledai,

tee sambaa anana keledai momangura."

6 Kasiimpo alingkamo rua miaia murina sumai tee aose opea isameaakana Isa to manga incia. 7 Manga incia abhawea o keledai sumai tee anana. Kasiimpo alempesiakea tee jubana o torukuna keledai sumai, kasiimpo Isa akompa i bhawona. 8 Abhari mpuu o mia iwe sumai mobhakesakana jubana i dhala, tee dhaangia uka o mia mosagaanana motumpona manga rahana kau to kalempesi i dhala mamudhaakana ahoromati Isa. 9 ✝21:9 Zab. 118:26.Mia bhari modhalana i aroa tee i talikuna Isa akagora-gora,

"Bhari-bharia kapujia to Anana Daud!

Atobarakatimo Incia moumbana i nuncana sarona Kawasana Opu!

Pujimo Aulataʼala i Tampana Momalanga!"

10 Wakutuuna Isa apesua i Kota Yerusalem, atobungkemo saangua kota sumai, tee manga mia aabha, "Incema buaka o mia incia sii?" 11 Alawanimo o mia bhari sumai, "Incia o Isa, nabii mominaakana i kampo Nazaret i Galilea."