1 Bhari-bharia mia tabeana atungku tee pamarinta modhaangiana i bhawona, roonamo inda dhaangia o pamarinta mopotibhaakana kuasa inda mominaakana i Aulataʼala, tee o pamarinta modhaangiana sii-sii atantuakea Aulataʼala. 2 Rampaakanamo sumai, incemapo uka mobhalina pamarinta, satotuuna incia abhali tutura mopadhana itantuakana Aulataʼala, tee manga mia mobhalina giu incia sumai bheapotibhaaka kahukumu. 3 Roonamo pamarinta sumai amembali saangu giu imaekaakana manga mia mopewauna kadhaki, maka inda amaekaia manga mia mopewauna kalape. Buaka ingkomiu gaumiu utorambasaka minaaka i kaekamiu tee pamarinta sumai? Pewaumo giu malape, sumaimo ingkomiu bheutarima kapujia minaaka i manga incia moparintakomiu sumai. 4 Roonamo pamarinta sumai o bhatuana Aulataʼala moumbaakana kalape to ingkomiu. Maka ande upewau giu madhaki, sumaimo ingkomiu tabeana umaeka tee pamarinta sumai, roonamo manga incia tee kuasana to ahukumu mia. Pamarinta sumai o bhatua ipatotapuakana Aulataʼala to mobalasina tee mopekandawuakana pamuruna to bhari-bharia mia mopewauna kadhaki. 5 Siitumo sababuna ingkomiu tabeana utungku tee pamarinta, mencuana rampaakanamo soo umaeka tee pamuruna Aulataʼala, maka roonamo i nuncana ngangarandamiu uka umataua ande o giu incia sumai tabeana upewaua.

6 ✝Giumo incia sumai uka ipomeaakamiu balasitee. Roonamo pamarinta sumai o pagawe iparacaeana Aulataʼala to moʼurusuna manga tugasina pamarinta. 7 Jadi upomeamea opea molaengana ipomeamiu to mia molaengana motarimaia: Pomeamo balasitee i mia molaengana motarimaia, pomeamo weti i mia molaengana motarimaia, maekamo tee mia molaengana imaekamiu, tee uhoromatimea o mia molaengana ihoromatimiu.

8 Bholi ukodhosa tee incemapo uka, maka tabeana ukodhosaaka kaasimiu i nuncana upomaamaasiaka podho-podho ingkomiu. Roonamo incemapo uka momaasiakana maanusia rangana, incia padhamo apamondo Hukumuna Taurati. 9 ✝Roonamo i nuncana Hukumuna Taurati atoburi, "Bholi upewau zina, bholi upekamate mia, bholi umanako, bholi usintai mokopewauana," tee ande dhaangia o parinta mosagaanana, bhari-bharia adhaangiamo i nuncana parinta incia sii, "Maasiakea o maanusia rangamiu mboomo umaasiaka karomiu." 10 Kaasi inda apewau kadhaki tee maanusia rangana. Jadi kaasi sumai kapamondona Hukumuna Taurati.

11 Giu incia sii tabeana upewaua roonamo umataumea o kadhaangia sii-sii, ande akawamo wakutuumiu to ubhangu minaaka i koleamiu. Roonamo kasalaamati sumai alabhimo apomakasu tee ingkita, aposala tee wakutuuna bhaa-bhaana tapepuu taparacaea tee Isa Al Masi. 12 Malo padhaaka alapamo, tee o eo amakasumo. Rampaakanamo sumai maimo tabholiaka bhari-bharia pewau momadhaki mominaakana i kagalapu. Maimo tapasiapuaka karota tee tapake ewangata mominaakana i kainawa sumai. 13 Dhadhita tabeana abanara mboomo laengana mia modhadhina i nuncana kainawa. Bholi tadhadhi mboomo mia mokokariaa, atawa tadhadhi mboomo mia mopekalango-lango, bholi tadhadhi mboomo pande pebula atawa mboomo mia moosena nawusuuna, tee bholi tapogera-gera atawa tapogigibulu tee mia mosagaanana. 14 Maka taroakamo Isa Al Masi Oputa Momalanga motantuakana opea to ipewaumiu. Tee bholi uose feʼelina maanusia moosena nawusuuna karona.