ROMA 13

Tataʼati tee Pamarinta

1 Bhari-bharia mia tabeana atungku tee pamarinta modhaangiana i bhawona, roonamo inda dhaangia o pamarinta mopotibhaakana kuasa inda mominaakana i Aulataʼala, tee o pamarinta modhaangiana sii-sii atantuakea Aulataʼala. 2 Rampaakanamo sumai, incemapo uka mobhalina pamarinta, satotuuna incia abhali tutura mopadhana itantuakana Aulataʼala, tee manga mia mobhalina giu incia sumai bheapotibhaaka kahukumu. 3 Roonamo pamarinta sumai amembali saangu giu imaekaakana manga mia mopewauna kadhaki, maka inda amaekaia manga mia mopewauna kalape. Buaka ingkomiu gaumiu utorambasaka minaaka i kaekamiu tee pamarinta sumai? Pewaumo giu malape, sumaimo ingkomiu bheutarima kapujia minaaka i manga incia moparintakomiu sumai. 4 Roonamo pamarinta sumai o bhatuana Aulataʼala moumbaakana kalape to ingkomiu. Maka ande upewau giu madhaki, sumaimo ingkomiu tabeana umaeka tee pamarinta sumai, roonamo manga incia tee kuasana to ahukumu mia. Pamarinta sumai o bhatua ipatotapuakana Aulataʼala to mobalasina tee mopekandawuakana pamuruna to bhari-bharia mia mopewauna kadhaki. 5 Siitumo sababuna ingkomiu tabeana utungku tee pamarinta, mencuana rampaakanamo soo umaeka tee pamuruna Aulataʼala, maka roonamo i nuncana ngangarandamiu uka umataua ande o giu incia sumai tabeana upewaua.

6 ✝ 13:6 Mat. 22:21; Mrk. 12:17; Luk. 20:25. Giumo incia sumai uka ipomeaakamiu balasitee. Roonamo pamarinta sumai o pagawe iparacaeana Aulataʼala to moʼurusuna manga tugasina pamarinta. 7 Jadi upomeamea opea molaengana ipomeamiu to mia molaengana motarimaia: Pomeamo balasitee i mia molaengana motarimaia, pomeamo weti i mia molaengana motarimaia, maekamo tee mia molaengana imaekamiu, tee uhoromatimea o mia molaengana ihoromatimiu.