Tapomalape tee Aulataʼala Rampaakanamo Isa Al Masi
1 Ingkita tatoabhi tabanara i aroana Aulataʼala roonamo kaparacaeata tee Isa, sumaimo ingkita tadhadhi tapomalape tee Aulataʼala alaloi Isa Al Masi Oputa Momalanga. 2 Rampaakanamo taparacaea tee Isa, sumaimo Incia mangadhawuaka rahumatina Aulataʼala, tee o rahumatimo incia sumai idhadhiakata sii-sii. Tee uka tabangga roonamo kaharaputa bheimembaliakata bhetapotibhaaka kamuliangina Aulataʼala. 3 Mencuana soo incia sumai! Ingkita uka bhetabangga i nuncana kanarakaa, roonamo tamataua ande o kanarakaa sumai aumbaaka kasabara. 4 Sapadhana incia sumai, kasabara aumbaaka katangkana inca, tee o katangkana inca aumbaaka kaharapu. 5 Tee o kaharapu incia sumai inda bheamaidhiidhiakea incata, roonamo kaasina Aulataʼala sumai padhamo aantokia i nuncana ngangarandata alaloi Rohina Aulataʼala mopadhana irahumatiakana to ingkita.