16 Ingkomiu dhaanamo umataua, ande bheupasaraakaaka karomiu to umembali bhatuana mia mosagaanana, ingkomiu bheumembali bhatuana mia itaʼatimiu sumai; malape umembali bhatuana dosa to mokapalaikomiu uporopeaka i dhala i mateaka atawa o bhatuana kataʼati to mokapalaikomiu uporopeaka i dhalana kabanara. 17 Maka usukurumo tee Aulataʼala, roonamo i piamo itu ingkomiu umembali manga bhatuana dosa, maka sii-sii tee kampuu-mpuuna incamiu uose kaadhari mobanara mopadhana iadhariakana to ingkomiu. 18 Ingkomiu padhamo utopabebasi minaaka i dosa, tee sii-sii umembalimo manga bhatuana kabanara.
20 Wakutuuna dhaangiapo apabhatuakomiu dosa, inda dhaangia o fikirimiu to udhadhi uose dhalana kabanara. 21 Maka o faʼedana opea ipotibhaakamiu minaaka i manga giu imembaliakamiu umaea sii-sii? Roonamo kapadhaana minaaka i bhari-bharia giu incia sumai soo aumbaaka mate. 22 Maka sii-sii ingkomiu ubebasimo minaaka i dosa tee umembalimo manga bhatuana Aulataʼala, sabutuna ingkomiu upotibhaaka faʼeda moumbaakana kangkilo tee o kapadhaana upotibhaaka dhadhi mobakaa. 23 Roonamo ponambona dosa sumai o mate, maka o rahumatina Aulataʼala sumai o dhadhi mobakaa mominaakana i Isa Al Masi Oputa Momalanga.