1 ଏ ନା କଡ଼ର୍‌, ମିଙ୍ଗିଁ ନାନୁ ଇୟା ସିଟି ରାସ୍‌ନି ବିଷୟ, ଇକା ପଡ଼ାଜି ଏଣ୍ତେସ୍‌ମାରି ପାପ୍‌ କିଇଦେର୍‌ । ମାରି ମିର୍‌ ଏଣ୍ତେସ୍‌ ନେସ୍‌ନିଦେର୍‌, ଏନ୍‌ ଜଦି ପାପ୍‌ କିନାନ୍‌, ମା ଉଣ୍ତିଙ୍ଗ୍ ବୁବା ମାପୁରୁଦି ଲାକ୍‌ତୁ ମା ଅରେନ୍‌ ପେରି ଲୋକ୍‌ ମାନାନ୍‌ ଆୟା ଦାର୍ମୁଦି ଜିସୁ କ୍ରିସ୍ତ । 2 ମାରି ଆୟା କ୍ରିସ୍ତ ନିଜେ ମା ପାପ୍‌ ଉଣ୍ତିଙ୍ଗ୍‌, କେବଲ୍‌ ମା ପାପ୍‌ ଉଣ୍ତିଙ୍ଗ୍‌ ସିଲେ, ମାତର୍‌ ସାରାଦୁନିଆଦି ପାପ୍‌ ଉଣ୍ତିଙ୍ଗ୍‌ ବା ଜିବନ୍‌ ସିତାମାନାନ୍‌ ।

3 ଜଦି ମାପୁ ୱାନି ମାଟା ମାନାନାପ୍‌, ଆର୍‌ତିଙ୍ଗ୍‌ ଆୟାମାଣୁକୁ ନେସ୍‌ତେଙ୍ଗ୍‌ ଆଟ୍‌ନାପ୍‌ ଜେ, ମାପୁ ୱାନିଙ୍ଗ୍‌ ନେସ୍‌ନାପ୍‌ । 4 ୱାନି ମାଟା ମାନାଏଣ୍‌ଗା ୱାନିଙ୍ଗ୍‌ ନେସ୍‌ତାମାନା ଇଜି ଏନ୍‌ ଇନ୍‌ନାନ୍‌, ୱାନ୍‌ ଅରେନ୍‌ ମିଚ୍‌ୱେର୍‌ନିକାନ୍‌ ମାରି ୱାନିମାନୁ ସତ୍‌ ସିଲେତ୍‌ । 5 ମାତର୍‌ ଏନ୍‌ ୱାନି ବାକ୍ୟ ମାନାନାନ୍‌, ୱାନିମାନୁ ମାପୁରୁଦି ଜିବନ୍‌ନୋନିକା ସତ୍‌ତାନ୍‌ ପୁରା ଆତାମାନାତ୍‌ । ଆୟାମାଣୁକୁ ମାପୁ ନେସ୍‌ନାପ୍‌ ଜେ, ମାପୁ ୱାନିମାନୁ ମାନାପ୍‌ । 6 ଏନ୍‌ ମାପୁରୁଦି ମାନୁ ମାନା ଇଜି ଇନାନ୍‌, ୱାନ୍‌ କ୍ରିସ୍ତ ଜିସୁଦି ୱାଜା ଜିବନ୍‌ ଯାପନ କିନିକା ମାନାତ୍‌ ।

7 ✝ଏ ନା ତଡ଼୍‍କୁ, ନାନୁ ମି ଲାକ୍‌ତୁ ଆମା ପୁନି ମାଟା ରାସ୍‌ଏ, ମାତର୍‌ ଆଗ୍‌ଡ଼ିରାନ୍‌ ଆମା ପାଡ଼ିଇ ମାଟା ମିର୍‌ ନେସ୍‌ତିମାନିଦେର୍‌, ଆକା ରାସ୍‌ସିନା; ମାପୁ ପ୍ରଚାର୍‍ କିଜିମାନି କାବୁର୍‌ତୁ ଆୟା ମାଟା ୱେର୍‌ଇମାନିଦେର୍‌ । 8 ମାତର, ନାନୁ ପୁନି ମାଟା ମି ଲାକ୍‌ତୁ ରାସ୍‌ସିନା, ଇକା କ୍ରିସ୍ତଦିମାନୁ ନି ମିମାନୁ ସତ୍‌ ଇଜି ୱେଙ୍ଗେନାତ୍‌ । ଇରିଙ୍ଗ୍‌ ସିକାଟି ଗୁସାଜିସୋଲ୍‌ସିନାତ୍‌ ମାରି ସତ୍‌ତି ଜାୟ୍‌ ଇଲେ ତରିତାତ୍‌ନି ।

9 ଜଦି ଏନ୍‌ ନିଜେଦି ତଡ଼ାନ୍‌ତିଙ୍ଗ୍‌ କାଡ଼ାଜି ଇନାନ୍‌ ଜେ, ୱାନ୍‌ ଜାୟ୍‌ତୁ ମାନାନ୍‌, ୱାନ୍‌ ଇୟାସାନ୍ଧିବା ସିକାଟିଦୁ ମାନାନ୍‌ । 10 ଏନ୍‌ ନିଜେଦି ତଡ଼ାନ୍‌ତିଙ୍ଗ୍‌ ଜିବନ୍‌ନୋନାନ୍‌, ୱାନ୍‌ ଜାୟ୍‌ତୁ ତେବାନାନ୍‌, ମାରି ୱାନିମାନୁ ତାକାନି ଇନି ପାଣି ସିଲେତ୍‌ । 11 ମାତର୍‌ ଏନ୍‌ ନିଜେଦି ତଡ଼ାନ୍‌ତିଙ୍ଗ୍‌ କାଡ଼ାନାନ୍‌, ୱାନ୍‌ ସିକାଟିଦୁ ମାନାନ୍‌, ମାରି ସିକାଟିଦୁ ବୁଲାଜି ଆମା ତରିନ୍‌ ସୋଲ୍‌ସିନାନ୍‌, ଆକା ନେସ୍‌ଏନ୍‌, ଇରିଙ୍ଗ୍‌ ସିକାଟି ୱାନି କାଣା କିତାମାନାତ୍‌ ।

12 ଏ କଡ଼ର୍, ନାନୁ ମି ଲାକ୍‌ତୁ ରାସ୍‌ସିନା, ଇରିଙ୍ଗ୍‌ କ୍ରିସ୍ତଦି ଦର୍‌ତି ଉଣ୍ତିଙ୍ଗ୍‌ ମି ପାପ୍‌ କେମା ଆତାମାନାତ୍‌ । 13 ଏ ବୁବାର୍‌, ନାନୁ ମି ଲାକ୍‌ତୁ ରାସ୍‌ସିନା, ଇରିଙ୍ଗ୍‌ ଏନ୍‌ ପୁର୍ବେକାଡ଼ାଦାନ୍‌ ମାନାର୍‌, ୱାନିଙ୍ଗ୍‌ ମିରୁ ନେସ୍‌ତିମାନିଦେର୍‌ । ଏ ମୁର୍‌କଡ଼ର୍‌, ନାନୁ ମି ଲାକ୍‌ତୁ ବା ରାସ୍‌ସିନା, ଇରିଙ୍ଗ୍‌ ମିରୁ ପାପ୍‌ ଆତ୍ମାଦିଙ୍ଗ୍‌ ଜିଣାତି ମାନିଦେର୍‌ ।

14 ଏ କଡ଼ର୍‌, ନାନୁ ମି ଲାକ୍‌ତୁ ରାସ୍‌ସିନା, ଇରିଙ୍ଗ୍‌ ମିରୁ ବୁବେଙ୍ଗ୍‌ ନେସ୍‌ତିମାନିଦେର୍‌ । ଏ ବୁବାର୍‌, ନାନୁ ମି ଲାକ୍‌ତୁ ରାସ୍‌ସିନା, ଇରିଙ୍ଗ୍‌ ଏନ୍‌ ପୁର୍ବେକାଡ଼ାଦାନ୍‌ ମାନାନ୍‌, ମିରୁ ୱାନିଙ୍ଗ୍‌ ନେସ୍‌ତିମାନିଦେର୍‌ । ଏ ମୁର୍‌କଡ଼ର୍‌, ନାନୁ ମି ଲାକ୍‌ତୁ ବା ରାସ୍‌ସିନା, ଇରିଙ୍ଗ୍‌ ମିରୁ ସାକ୍ତିମାନିଦେର୍‌, ମାରି ମାପୁରୁଦି ବାକ୍ୟ ମିମାନୁ ମାନାତ୍‌ ମାରି ମିରୁ ପାପ୍‌ତିଙ୍ଗ୍‍ ଜିଣାତି ମାନିଦେର୍‌ ।

15 ଇୟା ଦୁନିଆ ମାରି ଆବେନୁ ମାନି ବିସୟ୍‌ତିଙ୍ଗ୍‌ ୱିଜୁ ଜିବନ୍‌ନୋମାଟ୍, ଜଦି ମିରୁ ଜଗତ୍‌ତିଙ୍ଗ୍‌ ଜିବନ୍‍ନୋନିଦେର୍‍, ବୁବାଦି ଉଣ୍ତିଙ୍ଗ୍‌ ଜିବନ୍‌ନୋନିକା ମିଙ୍ଗିଁ ସିଲେତ୍‌ । 16 ଇୟା ଜଗତ୍‌ତି ଆମାୱିଜୁ ମେନ୍ଦଲ୍‌ ବିସୟ୍‌ ୱେଡ଼ିକା କିଦେଙ୍ଗ୍‌ ଲୋକୁ ଆସାଆନାର୍‌, ଲୋକୁ ଆମାୱିଜୁ ସୁନ୍ଦର୍‌ତି ବିସୟ୍‌ ସୁଡ଼ୁଜି ଆସାୟ୍‌ ଆନାର୍‌ ମାରି ଆମା ୱିଜୁ ଦୁନିଆଦି ବିସୟ୍‌ ଅସି ଲୋକୁ ଗର୍ବ କିନାର୍‌, ଆକା ୱିଜୁ ବିସୟ୍‌ ବୁବାଦିମାଣୁକୁ ସିଲେ, ମାତର୍‌ ଦୁନିଆଦାନ୍‌ ୱାତା ମାନାତ୍‌ । 17 ଲୋକୁ ଜଗତ୍‌ ମାରି ୱାନି ଆମା ୱିଜୁ ବିସୟ୍‌ ପାଣି କିନାନ୍‌, ୱାନ୍‌ ସାନିକା ଗଟାନାତ୍‌, ମାତର୍‌ ଏନ୍‌ ମାପୁରୁଦି ବଦା ମାନାନାନ୍‌, ୱାନ୍‌ ୱିଜୁଦିନ୍‌ତିକାନ୍‌ ।

18 ଏ କଡ଼ର୍‌, ସାରାସାରି ଦିନ୍‌ ଇଗା ୱାତାତ୍‌ନି, କ୍ରିସ୍ତଦି ସାତ୍ରୁ ୱାନାନ୍‌ ଇଜି ମିରୁ ୱେର୍‌ଇମାନିଦେର୍‌, ଆୟାୱାଜା କ୍ରିସ୍ତଦି ଗାଦିଲୋକ୍‌ ସାତ୍ରୁରୁ ଇଲେଇ ତରିତାର୍‌ନି; ଇୟାଉଣ୍ତିଙ୍ଗ୍‌ ମାପୁ ନେସ୍‌ସିନାପ୍‌ ଜେ, ସାରାସାରି ଦିନ୍‌ ଇଗା ୱାତାତ୍‌ନି । 19 ଇୟାକାର୍‌ ସତ୍‌ତାନ୍‌ ମା ଦଲ୍‌ତି ଲୋକୁ ଆଏର୍‌, ଆୟାଉଣ୍ତିଙ୍ଗ୍‌ ୱାର୍‌ ମା ଲୋଇରାନ୍‌ ସତାସର୍ହାର୍‌, ମା ଲୋକୁ ଆତିମାରିଙ୍ଗ୍‌, ଆର୍‌ତିଙ୍ଗ୍‌ ୱାର୍‌ ମା ୱାଲେ ତେବାତାର୍‌ ମାନ୍ଧି, ମାତର୍‌ ୱାର୍‌ ମା ଦଲ୍‌ତିକାର୍‌ ଆଏର୍‌ ଇଜି ଇକା ଏଣ୍ତେସ୍‌ ୱେଙ୍ଗ୍‌ନାତ୍‌, ଇୟାଉଣ୍ତିଙ୍ଗ୍‌ ୱାର୍‌ ଆକ ସର୍ହାର୍‌ ।

20 ମାତର୍‌ ମିରୁ କ୍ରିସ୍ତଦି ଦୟାଦାନ୍‌ ପବିତ୍ରଆତ୍ମାଦି ମାଣୁକୁ ସାକା ଆତିମାନିଦେର୍‌; ମିରୁ ୱିଜିଦେର୍‌ ସତ୍‌ ଇନିକା ନେସ୍‌ତିମାନିଦେର୍‌ । 21 ମିରୁ ସତ୍‌ ନେସ୍‌ଇତି ମାନିଙ୍ଗ୍‌ ନାନ୍‌ ଜେ ମି ଲାକ୍‌ତୁ ରାସ୍‌ସିନା, ଆକା ସିଲେ; ମାତର୍‌ ମିରୁ ସତ୍‌ ନେସ୍‌ତିମାନିଙ୍ଗ୍‌ ମାରି ଆମା ମିଚ୍‌ ମାଟା ସତ୍‌ତାନ୍‌ ସଏତ୍‌ ଇଜି ନେସ୍‌ତିମାନିଙ୍ଗ୍‌ ନାନୁ ମି ଲାକ୍‌ତୁ ରାସ୍‌ସିନା ।

22 ଆର୍‌ତିଙ୍ଗ୍‌ ମିଚ୍‌ୱେର୍‌ନିକାନ୍‌ ଏନ୍‌ ? ଜିସୁଙ୍ଗୁଁ ରକ୍‌ୟାକର୍ତ୍ତା କ୍ରିସ୍ତ ଇଜି ଏନ୍‌ ମାନାଏନ୍‌, ମାରି ୱାନ୍‌ କ୍ରିସ୍ତଦି ସାତ୍ରୁ ବୁବା ମାରି ୱାନି ମାରିନ୍‌ତିଙ୍ଗ୍‌, ରିଏରିଙ୍ଗ୍‌ବା ୱାନ୍‌ ଡ଼ିସ୍‌ନାନ୍‌ । 23 ଏନ୍‌ ମାରିସିଙ୍ଗ୍‌ ଡ଼ିସ୍‌ନାନ୍‌, ୱାନ୍‌ ବୁବେଙ୍ଗ୍‌ ବା ଡ଼ିସ୍‌ନାନ୍‌; ଏନ୍‌ ମାରିସିଙ୍ଗ୍‌ ମାନାନାନ୍‌, ୱାନ୍‌ ବୁବେଙ୍ଗ୍‌ ବା ମାନାତା ମାନାନ୍‌ ।

24 ମାରି, ମିରୁ ଆରାମ୍‌ତାନ୍‌ ଆମା କାବୁର୍‌ ୱେର୍‌ଇମାନିଦେର୍‌, ଆକା ମିମାନୁ ତେବାପିତ୍‌ । ମିରୁ ଆରାମ୍‌ତାନ୍‌ ଆମା କାବୁର୍‌ ୱେର୍‌ଇମାନିଦେର୍‌, ଆକା ଜଦି ମିମାନୁ ତେବାନାତ୍‌, ଆର୍‌ତିଙ୍ଗ୍‌ ମିରୁ ବା ମାରିନ୍‌ ନି ବୁବାଦିମାନୁ ତେବାନି । 25 ମାରି କ୍ରିସ୍ତ ମାଙ୍ଗିଁ ଆମାକା ପାର୍‌ମାଣ୍‌ କିତାମାନାନ୍‌, ଆକାନେ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ।

26 ଆମାକାର୍‌ ମିଙ୍ଗିଁ ତିଲିସ୍‌ କିଦେଙ୍ଗ୍‌ ସେସ୍ଟା କିଜିନାର୍‌, ୱାରି ବିସୟ୍‌ତାନ୍‌ ନାନୁ ମି ଲାକ୍‌ତୁ ଇୟାୱିଜୁ ରାସ୍‌ସିନା । 27 ମାତର୍‌ ମିଙ୍ଗିଁ କ୍ରିସ୍ତ ଜିସୁ ୱାନି ପବିତ୍ରଆତ୍ମାଦୁ ପୁରାବର୍ତି ଇଟ୍‌ତାମାନାନ୍‌, ଆମା ସାନ୍ଧି ଇୟା ପବିତ୍ରଆତ୍ମା ମିମାନୁ ମାନାତ୍‌, ମାରି ଏନ୍‌ଆପିନ୍‌ ମିଙ୍ଗିଁ ସିକ୍‌ୟା ସିନାନ୍‌, ଇକା ମିଙ୍ଗିଁ ଦର୍‌କାର୍‌ ସିଲେତ୍‌ । ପବିତ୍ରଆତ୍ମା ମିଙ୍ଗିଁ ୱିଜୁ ବିସୟ୍‌ତାନ୍‌ ଆମା ସିକ୍‌ୟା ସିନାତ୍‌, ଆକା ସତ୍‌, ମିଚ୍‌ ସିଲେ । ଆୟା ଆତ୍ମାଦି ସିକ୍‌ୟା ମାନାଜି କ୍ରିସ୍ତଦି ୱାଲେ ମିସାଜି ତେବାଦୁ ।

28 ମାରି, ଏ କଡ଼ର୍‌, ୱାନିମାନୁ ତେବାଦୁ, ଏଣ୍ତେସ୍‌ ୱାନ୍‌ ଏସ୍ତିୱାଲେ ତରାନାନ୍‌, ନାସ୍ତିୱାଲେ ୱାନି ୱାନିଦିନ୍‌ତି ବେଡ଼ାଦୁ ୱାନି ଆଗ୍‌ଡ଼ି ମାଡୁ ସେମାର୍‌ ଆଏଣ୍‌ଗା ସାହାସ୍‌ ପୟ୍‌ନିକା । 29 ମିରୁ ନେସ୍‌ନିଦେର୍‌, କ୍ରିସ୍ତ ପୁରା ନ୍ୟାୟ୍‌କିନିକାନ୍‌ । ମାରି ଇକାବା ନେସ୍‌ନି ମାନିକା ମାନାତ୍‌ ଜେ, ଆମାକାର୍‌ ସତ୍‌ପାଣି କିନାର୍‌, ୱାର୍‌ ନେ ମାପୁରୁଦି କଡ଼ ।