ମାପୁରୁଦି ଆତ୍ମା ମାରି ଟକେକିନି ଆତ୍ମା
1 ଏ ନା ତଡ଼୍କୁ, ୱିଜୁ ଆତ୍ମେଆଙ୍ଗ୍ ବିସ୍ବାସ୍ କିମାଟ୍; ୱାର୍ ପୟ୍ତିମାନି ଆତ୍ମା ମାପୁରୁଦିମାଣୁକୁ ୱାତିକା ନୋ ସିଲେ, ଆଗ୍ଡ଼ି ୱାରିଙ୍ଗ୍ ପରିକା କିଜ ସୁଡ଼ୁଦୁ । ଇରିଙ୍ଗ୍ ଜଗତ୍ଦୁ ଗାଦିଲୋକ୍ ବଣ୍ତ୍ ବାବବାଦିର୍ ସତାମାନାର୍ । 2 ୱାର୍ ମାପୁରୁଦି ଆତ୍ମା ପୟ୍ତାମାନାର୍ ନୋ ସିଲେ, ଆକା ନେସ୍ନି ଉପାୟ୍ ଆଜିନାତ୍ ଆମା ଲୋକ୍ତିମାନୁ ମାପୁରୁଦି ଆତ୍ମା ମାନାତ୍, ୱାନ୍ ପେରି ୱେୟୁଦାନ୍ ମାନାନାନ୍ ଜେ, ଜିସୁ କ୍ରିସ୍ତ ଲୋକା ୱାଜା ୱାତା ମାର୍ହାନ୍ । 3 ମାତର୍ ଏନ୍ ଜିସୁଙ୍ଗୁଁ ମାନାଏନ୍, ୱାନ୍ ଏସ୍କାଙ୍ଗ୍ବା ମାପୁରୁଦି ଆତ୍ମା ପୟ୍ଏନ୍ । କ୍ରିସ୍ତଦି ସାତ୍ରୁଦି ମାଣୁକୁ ୱାନ୍ ଆୟା ଆତ୍ମା ପୟ୍ତାମାନାନ୍, ଆମାୱାନି ୱାନିଦିନ୍ତି ମାଟା ମିରୁ ୱେର୍ଇମାନିଦେର୍, ମାରି ଆକା ଇଲେଇ ଇୟା ଜଗତ୍ଦୁ ୱାତାମାନାତ୍ ।
4 ଏ କଡ଼ର୍, ମିରୁ ମାପୁରୁଦିମାଣୁକୁ ଜନମ୍, ମାରି ମିରୁ ଆୟା ବଣ୍ତ୍ ବାବବାଦିରିଙ୍ଗ୍ ଆରାକିତିମାନିଦେର୍, ଇରିଙ୍ଗ୍ ମି ଜିବନ୍ତୁ ବାସାତି ମାନି ମାପୁରୁଦି ଆତ୍ମା, ଜଗତ୍ଦି ଲୋକା ଆତ୍ମାଆଙ୍ଗ୍ ମାଣୁକୁ ନାଣ୍ତ୍ ସାକ୍ତି । 5 ବଣ୍ତ୍ ବାବବାଦିର୍ ଜଗତ୍ତାନ୍ ୱାତାମାନାର୍, ମାରି ବଣ୍ତ୍ ବାବବାଦିର୍ ଦୁନିଆଦି ମାଟା ୱେର୍ସି ବୁଲାଜିନାର୍ ମାରି ଦୁନିଆଦି ଲୋକୁ ୱାରି ମାଟା ୱେନ୍ଞ୍ଜିନାର୍ । 6 ମାତର୍ ମାଡୁ ମାପୁରୁଦିମାଣୁକୁ ଜନମ୍; ଏନ୍ ମାପୁରୁଦି ନେସ୍ନାନ୍, ୱାନ୍ ମା ମାଟା ୱେନାନ୍ । ଏନ୍ ମାପୁରୁଦିମାଣୁକୁ ଜନମ୍ ଆଏନ୍, ୱାନ୍ ମା ମାଟା ୱେନ୍ଏନ୍ । ଇୟାମାଣୁକୁ ମାଡୁ ସତ୍ତି ଆତ୍ମା ମାରି ବାୟାକିନି ଆତ୍ମାଦିଙ୍ଗ୍ ସିନିସ୍ କିଦେଙ୍ଗ୍ ଆଟ୍ନିକା ।
ମାପୁରୁ ଜିବନ୍ନୋନିକା
7 ଏ ନା ତଡ଼୍କୁ, ମାଡୁ ନିଜେନିଜେଦିଙ୍ଗ୍ ଜିବନ୍ନୋଜିସାନିକା, ଇରିଙ୍ଗ୍ ଜିବନ୍ନୋନିକା ମାପୁରୁଦିମାଣୁକୁ ୱାତାମାନାତ୍, ମାରି ଏନ୍ ଜିବନ୍ନୋନାନ୍, ୱାନ୍ ମାପୁରୁଦି ମାରିନ୍ ମାରି ୱାନ୍ ମାପୁରୁଙ୍ଗୁଁ ନେସ୍ନାନ୍ । 8 ଏନ୍ ଜିବନ୍ନୋଏନ୍, ୱାନ୍ ମାପୁରୁଙ୍ଗୁଁ ନେସ୍ଏନ୍, ଇରିଙ୍ଗ୍ ମାପୁରୁନେ ଜିବନ୍ନୋନିକାନ୍ । 9 ଇବେନୁ ମାପୁରୁଦି ଜିବନ୍ନୋନିକା ମା ଉଣ୍ତିଙ୍ଗ୍ ତର୍ତାମାନାନ୍, ମାପୁରୁ ଜେ ନିଜେଦି ମାରିନ୍ତିଙ୍ଗ୍ ଜଗତ୍ଦୁ ପୋକ୍ତାତାନ୍, ଏଣ୍ତେସ୍ ମାପ୍ ୱାନିମାଣୁକୁ ୱିଜୁଦିନ୍ ଜିବନ୍ ପୟ୍ନାପ୍ । 10 ଇକାନେ ସତ୍ତି ଜିବନ୍ନୋନିକା, ମାଡୁ ମାପୁରୁଙ୍ଗୁଁ ଜିବନ୍ନୋଇକା, ମାତର୍ ୱାନ୍ ମାଙ୍ଗିଁ ଜିବନ୍ନୋଜି, ମାରି ନିଜେଦି ମାରିନ୍ତିଙ୍ଗ୍ ମା ପାପ୍ତିଙ୍ଗ୍ ପିଣ୍ଡିନି ଅନିଉଣ୍ତିଙ୍ଗ୍ ପୋକ୍ତାତାନ୍ । 11 ଏ ନା ତଡ଼୍କୁ, ମାପୁରୁ ଜଦି ମାଙ୍ଗିଁ ଇୟାୱାଜା ଜିବନ୍ନୋତା ମାନାନ୍, ଆର୍ତିଙ୍ଗ୍ ମାଡୁ ବା ନିଜେନିଜେଦିଙ୍ଗ୍ ଜିବନ୍ନୋଜିସାନିକା ମାନାତ୍ । 12 ୪:୧୨ ଜୋହନ ୧:୧୮.ମାପୁରୁଙ୍ଗୁଁ ଏନ୍ ଏସ୍କାଙ୍ଗ୍ ସୁଡ଼ୁଏନ୍, ମାତର୍ ମାଡୁ ଜଦି ନିଜେନିଜେଦିଙ୍ଗ୍ ଜିବନ୍ନୋଜିସାନିକା, ଆର୍ତିଙ୍ଗ୍ ମାପୁରୁ ମାମାନୁ ମାନାନ୍ ମାରି ୱାନି ଜିବନ୍ନୋନିକା ମାମାନୁ ପୁରାତେବାତା ମାନାତ୍ । 13 ମାଡୁ ଜେ ମାପୁରୁଦିମାନୁ ମାନିକା ମାରି ୱାନ୍ ମାମାନୁ ମାନାନ୍, ଇକା ମାଡୁ ନେସ୍ନିକା, ଇରିଙ୍ଗ୍ ୱାନ୍ ମାଙ୍ଗିଁ ନିଜେଦି ଆତ୍ମାଦି ୱାଲେ ସିତାମାନାନ୍ । 14 ବୁବା ଜେ ମାରିସିଙ୍ଗ୍ ଜଗତ୍ଦି ରକିୟାକର୍ତ୍ତା ଆନି ଉଣ୍ତିଙ୍ଗ୍ ପୋକ୍ତାତା ମାନାନ୍, ଇକା ମାଡୁ ସୁଡ଼ୁତି ମାନିକା ମାରି ୱାନି ବିସୟ୍ତାନ୍ ଆଇୱାରିଙ୍ଗ୍ ସାକିୟ୍ ୱେର୍ସିନିକା । 15 ଏନ୍ ଜିସୁଙ୍ଗୁଁ ମାପୁରୁଦି ମାରିନ୍ ଇଜି ମାନାନାନ୍, ମାପୁରୁ ୱାନିମାନୁ ମାନାନ୍ ମାରି ୱାନ୍ ମାପୁରୁଦିମାନୁ ମାନାନ୍ । 16 ମାରି ମା ଉଣ୍ତିଙ୍ଗ୍ ମାପୁରୁଦି ଆମା ଜିବନ୍ନୋନିକା ମାନାତ୍, ଆକା ମାଡୁ ନେସ୍ତି ମାନିକା ମାରି ବିସ୍ବାସ୍ କିତାମାନାପ୍ । ମାପୁରୁନେ ଜିବନ୍ନୋନିକାନ୍ । ଆମାୱାନି ଜିବନ୍ତୁ ଜିବନ୍ନୋନିକା ପୁରା ତେବାତା ମାନାତ୍, ୱାନ୍ ମାପୁରୁଦିମାନୁ ତେବାନାନ୍ ମାରି ମାପୁରୁ ୱାନିମାନୁ ତେବାନାନ୍ । 17 ଇବେନୁ ଜିବନ୍ନୋନିକା ମାମାନୁ ପୁରାତେବାତା ମାନାତ୍ ଜେ, ବିଚାର୍ତି ନାଣ୍ତିଙ୍ଗ୍ ମାଡୁ ସାହାସ୍ ପୟ୍ନିକା, ଇରିଙ୍ଗ୍ କ୍ରିସ୍ତ ଏଣ୍ତେସ୍ ମାନାନ୍, ମାଡୁ ବା ଇୟା ଜଗତ୍ଦୁ ଆୟାୱାଜା ମାନିକା । 18 ଏମେମାନୁ ଜିବନ୍ନୋନିକା ମାନାତ୍, ଆବେନୁ ତିଲାନିକା ସିଲେତ୍, ମାତର୍ ସତ୍ତି ଜିବନ୍ନୋନିକା ତିଲାନି ତାନିଙ୍ଗ୍ ଆକ କିନାତ୍, ଇରିଙ୍ଗ୍ ତିଲାନିକା ଦଣ୍ତ୍ତି ୱାଲେ ସିମାନାତ୍, ମାରି ଏନ୍ ତିଲାନାନ୍, ୱାନିମାନୁ ଜିବନ୍ନୋନିକା ପୁରା ସିଲେତ୍ ।
19 ମାଡୁ ଜିବନ୍ନୋନିକା ଅଜାତାମାନାପ୍, ଇରିଙ୍ଗ୍ ମାପୁରୁ ନେ ଆଗ୍ଡ଼ି ମାଙ୍ଗିଁ ଜିବନ୍ନୋତା ମାନାନ୍ । 20 ମାପୁରୁଙ୍ଗୁଁ ଜିବନ୍ନୋଜିନା ଇଜି ୱେର୍ସି ଜଦି ଏନ୍ ନିଜେଦି ବିସ୍ବାସିରି ତଡ଼ାନ୍ତିଙ୍ଗ୍ ନି ତାଙ୍ଗିଁକ୍ କାଡ଼ାନାନ୍, ଆର୍ତିଙ୍ଗ୍ ୱାନ୍ ମିଚ୍ୱେର୍ନିକାନ୍ । ଲାକ୍ତୁ ସୁଡ଼ୁଜିମାନି ଅରେନ୍ ତଡ଼ାନ୍ତିଙ୍ଗ୍ ଏନ୍ ଜିବନ୍ନୋଦେଙ୍ଗ୍ ଆଟ୍ଏନ୍, ୱାନ୍ ତର୍ଇ ମାପୁରୁଙ୍ଗୁଁ ଏସ୍କାଙ୍ଗ୍ବା ଜିବନ୍ନୋଦେଙ୍ଗ୍ ଆଟ୍ଏନ୍ । 21 ଇୟା ଆଦେସ୍ କ୍ରିସ୍ତ ମାଙ୍ଗିଁ ସିତାମାନାନ୍, ଏନ୍ ମାପୁରୁଙ୍ଗୁଁ ଜିବନ୍ନୋନାନ୍, ୱାନ୍ ନିଜେଦି ତଡ଼ାନ୍ତିଙ୍ଗ୍ ବା ଜିବନ୍ନୋପିନ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)