1 କ୍ରିସ୍ତ ମେନ୍ଦଲ୍‌ତୁ ଦୁଃକ୍‌ ପୟ୍‍ତିମାନିଙ୍ଗ୍‌ ମିର୍‌ ବା ୱାନି ୱାଜା ମୋନ୍‌ତିଙ୍ଗ୍‌ଡ଼େପ୍‌ସି ନେଗେନ୍‌ ଆଦୁ ଜେ, ଇରିଙ୍ଗ୍‌ ଏନ୍‌ ମେନ୍ଦଲ୍‌ତୁ କାସ୍ଟୁ ସାସ୍‌ କିନାନ୍‌, ୱାନ୍‌ ମାରି ପାପ୍‌ତୁ ତେବାଏନ୍‌ । 2 ଏଣ୍ତେସ୍‌ ମିର୍‌ ଇଲେଇରାନ୍‌ ଜିବନ୍‌ତୁ ତେବାନି ଦିନ୍‌ ଲଇ ଲୋକ୍‌ତି ମେନ୍ଦଲ୍‍ତି ଆସା ଇସାବ୍‌ତାନ୍‌ ସାଲାଏଣ୍‌ଗା ମାପୁରୁଦି ବଦାଦାନ୍‌ ସାଲାଦୁ । 3 ଆଗିଡ଼ି ମିର୍‌ ଅଣଜିହୁଦିରି ୱାଜା ପାଣି କିଜି ନାଣ୍ତ୍‌ ବେଡ଼ା କାଟେକିତି ମାନିଦେର୍‌ । ମି ଜିବନ୍‌ ଲୋଇ ୱିଜୁ ରକମ୍‍ତି ପାପ୍‍, ଲାଲାୟ୍‌ଆନିକା, କାଡ଼ୁ ଉଣିକା, ରସ୍‌ୟାଆନିକା, ସୋସ୍‌ନିକା ମାରି କାଡ଼୍‌ନି ବମା ପୁଜାଦୁ ଜିଜିମାର୍‌ଇଦେର୍‍ । 4 ମିର୍‌ ଇଲେଇ ଆୟାୱାଜା ପେରି ତାଗ୍‍ଇ ପାଣିଦୁ ୱାରି ୱାଲେ ମିସାଏତିଙ୍ଗ୍‌ ୱାର୍‌ କାବାଆଜି ମିଙ୍ଗିଁ ନାଣ୍ତ ନିନ୍ଦା କିତାର୍‌ । 5 ମାତର୍‌ ଆମା ମାପୁରୁ ଜିବନ୍‌ ମାରି ସାତିୱାରିଙ୍ଗ୍‌ ବିଚାର୍‌ କିଦେଙ୍ଗ୍‌ ମାନାନ୍‌, ୱାନି ଲାକ୍‌ତୁ ୱାରିଙ୍ଗ୍‌ ଇସାବ୍‌ ସିଦେଙ୍ଗ୍‌ ପଡ଼ାନାତ୍‌ । 6 ଇରିଙ୍ଗ୍‌ ଇୟାଉଣ୍ତିଙ୍ଗ୍‌ ସାତିୱାରି ଲାକ୍‌ତୁ ବା ସୁସମାଚାର୍‌ ପ୍ରଚାର୍‌ କିତାମାର୍ହାର୍‌, ଏଣ୍ତେସ୍‌ ୱାର୍‌ ଲୋକା ୱାଜା ମେନ୍ଦଲ୍‌ତାନ୍‌ ବିଚାର୍‌ ଆତିଙ୍ଗ୍‌ବା, ମାପୁରୁଦି ୱାଜା ଆତ୍ମାଦୁ ଜିବନ୍‌ ଆନାର୍‌ ।

7 ମାତର୍‌ ୱିଜୁ ବିସୟ୍‌ତି ୱିଜ୍‌ନି ଦିନ୍‌ ଲାକ୍‌ତୁ ୱାତାତ୍‌ନି । ମାରି ମିର୍‌ ମନ୍‍ତିଙ୍ଗ୍‍ ତିର୍‍ ଇଡ୍‍ଜି, ପାର୍‍ତନା କିଦେଙ୍ଗ୍‌ ଜାଗାର୍‌ତା ମାନ୍‌ଡ୍ରୁ, 8 ୱିଜେରିୱାଜା ନିଜେନିଜେଦିଙ୍ଗ୍‌ ଜିବନ୍‌ତାନ୍‌ନୋଦୁ, ଇରିଙ୍ଗ୍‌ ଜିବନ୍‌ନୋନିକା ପିଡ଼ିକ୍‍ନାତ୍‌ ପାପ୍‌ତିଙ୍ଗ୍‍ । 9 ଗୁଜୁ ଗୁଜୁ ଆଏଣ୍‌ଗା ଲୋକାଙ୍ଗ୍‍ ମି ଇଲ୍‌କାଙ୍ଗ୍‌ କୁକ୍‍ତୁ । 10 ଏନ୍‍ ଏମେ ଦାନ୍‍ ପୟ୍‌ତା ମାନାନ୍‍, ତାନି ଜଗ୍‌ତି ନେଗେନ୍‌ ପାଣିକିନିୱାଜା ଆଇୱାରି ନେଗେନ୍‌ ଉଣ୍ତିଙ୍ଗ୍‌ ଆୟା ଦାନ୍‌ତି ନେଗି ସେବା କିନିକା ମାନାତ୍‌ । 11 ଏନ୍‌ ପ୍ରଚାର୍‌ କିନାନ୍‌, ୱାନ୍‌ ମାପୁରୁଦି ବାକ୍ୟ ପ୍ରଚାର୍‌ କିପିନ୍‌ । ଏନ୍‌ ଜଦି ସେବା କିନାନ୍‌, ୱାନ୍‌ ମାପୁରୁଦିମାଣୁକୁ ସାକ୍ତି ପୟ୍‍ତିମାନି ଲୋକ୍‌ ୱାଜା ସେବା କିପିନ୍‌, ଏଣ୍ତେସ୍‌ ଜିସୁ କ୍ରିସ୍ତଦି ମାଣାନ୍‌ ମାପୁରୁ ଦନ୍ୟବାଦ ଆନାନ୍‌; ଜୁଗ୍‌ ଜୁଗ୍‌ ଗୌରବ୍‌ ମାରି ପରିସାକ୍ତି ୱାନିଦି ଆପିତ୍‌ । ଆମେନ୍‍ ।

12 ଏ ନା ତଡ଼୍‍କୁ ନି ତାଙ୍ଗିଁକ୍‌ ଏମେ ସିସୁ ପରିକାଦୁ ମିର୍‍ ଦୁଃକ୍‌ ପୟ୍‍ଜିନିଦେର୍‍, ଆକା ଉଣ୍ତ୍ରି ପେରିମାଟା ଇଜି ଅଡ଼୍‍ବିଜି କାବା ଆମାଟ୍‌ । 13 ମାରି ୱେଡ଼ିକା ଆଦୁ, ଇରିଙ୍ଗ୍‌ ମିର୍‌ କ୍ରିସ୍ତଦି ଦୁଃକ୍‌ ପୟ୍‍ନିମାନୁ ମିସାଜିନିଦେର୍‌, ଆୟା ପାଣିଦିଙ୍ଗ୍‌ ୱେଡ଼ିକା ଆଦୁ, ୱାନି ମହିମା ତରାନି ୱାଲେ ବା ମିର୍‌ ନାଣ୍ତ୍‌ୱେଡ଼ିକାଦାନ୍‌ ୱେଡ଼ିକା ଆଦୁ । 14 ଜଦି ମିରୁ କ୍ରିସ୍ତଦି ୱେନ୍‌କାସୋନି ଉଣ୍ତିଙ୍ଗ୍‌ ନିଦା ପୟ୍‌ତିଙ୍ଗ୍‍, ମିରୁ ଆସିର୍ବାଦ୍‍ତି ଲୋକୁ, ଇରିଙ୍ଗ୍‌ ମାପୁରୁଦି ଗୌରବ୍‌ମୟ୍‌ ଆତ୍ମା ମିମାନୁ ତେବାତା ମାନାତ୍‌ । 15 ମି ଲୋଇରାନ୍‌ ଏନ୍‌ ଲୋକାଙ୍ଗ୍‌ ସାୟାମାର୍‌ଗା ଡାକ୍‌ନିକା, ଡଙ୍ଗାଁର୍‌ଏନ୍‌ ମାରି ତାଗ୍‌ଇପାଣି, ନି ଜାଟିକିନି ଉଣ୍ତିଙ୍ଗ୍‌ ଦୁଃକ୍‌ ପୟ୍‍ମାକିନ୍‌ । 16 ମାତର୍‌ ମିରୁ ଜଦି କ୍ରିସ୍ତବିସ୍‌ବାସ୍‌ ଆତିଉଣ୍ତିଙ୍ଗ୍‌ ଦୁଃକ୍‌ ପୟ୍‍ଜିନିଦେର୍‌, ଆର୍‌ତିଙ୍ଗ୍‌ ସେମାର୍‌ ଆମାଟ୍‌ । ମାପୁରୁଙ୍ଗୁଁ ଦନ୍ୟବାଦ୍‌ ସିଦୁ, ଇରିଙ୍ଗ୍‌ ମିର୍‌ କ୍ରିସ୍ତଦି ଦରୁ ଆସ୍‌ତିମାନିଦେର୍‌ । 17 ବିଚାର୍‌କିନି ଦିନ୍‌ ଇଗା ୱାତାତ୍‍ ମାରି ମାପୁରୁଦି ଲୋକୁ ଆଗ୍‌ଡ଼ି ବିଚାର୍‌ କିଆୟ୍‌ଆନାର୍‌ । ଜଦି ମାବାଣାନ୍‍କୁ ଆକା ଆରାମ୍‍ ଆନାତ୍‍, ଆର୍‍ତିଙ୍ଗ୍‍ଁ ଏମେକାର୍‍ ମାପୁରୁଦି ସୁସମାଚାର୍‌ ବିସ୍‌ବାସ୍‌ କିଏର୍‌, ୱାରି ସାରାସାରିଦି ଦଣ୍ତ୍‌ ଏସା ପେରିକା ଆଏତ୍‌ ? 18 ଦାର୍ମୁସାସ୍ତ୍ରଦୁ ରାସ୍‌ତାମାନାତ୍‌ :

ଜଦି ଦାର୍ମୁଦିଲୋକୁ ରକିୟା ପୟ୍‌ଦେଙ୍ଗ୍‌ ନିସା କାସ୍ଟୁ,

ଆର୍‌ତିଙ୍ଗ୍‌ ଅଦାର୍ମୁଦିଲୋକୁ ମାରି ପାପି ଲୋକା ଦଣ୍ତ୍‌ ଏସ ଆଏତ୍‌ ମାନାତ୍‌ ?

19 ମାରି, ଆମାକାର୍‌ ମାପୁରୁଦି ଇଚ୍ଛାଦାନ୍‌ ଦୁଃକ୍‌ବୋଗ୍‌ କିନାର୍‌, ୱାର୍‌ ନେଗି ପାଣି କିଜି ୱାନିମାନୁ ପୁରାଦାନ୍‌ ଆସା ଇଡିର୍‌ । ୱାରିଙ୍ଗ୍‌ ତିଆର୍‌କିତି ବିସ୍‌ବାସ୍‌ତି ମାପୁରୁ ୱିଜୁଦିନ୍ ୱାନି ପାର୍‌ମାଣ୍‌ ରକିୟା କିନାନ୍‌ ।