1 ଡକ୍ରାଦାଦାରିଙ୍ଗ୍‍ ବୁବାୱାଜା ଅଡ଼୍‌ବିଦୁ, ମାତର୍‌ ୱାରିଙ୍ଗ୍‌ ଲାଗାଏଣ୍‌ଗା ନେଗେନ୍‌ତାନ୍‌ ମାନାଦୁ । ମୁରୁଲିଆଙ୍ଗାଁ ଉଣ୍ତିଙ୍ଗ୍‌ ତଡ଼ାନ୍‌ ୱାଜା ବ୍ୟବ୍‌ହାର୍‌ କିଦୁ । 2 ଡକ୍ରିବିବିକାଙ୍ଗ୍‌ ୟାୟାୱାଜା ମାରି ଆଇଲିକଡ଼କାଙ୍ଗ୍‌ ତାଙ୍ଗିଁକି ୱାଜା ଅଡ଼୍‌ବିଜ ୱାନିକା ଉଣ୍ତିଙ୍ଗ୍‌ ପବିତ୍ର ୱାଜା ମିର୍‌ ବ୍ୟବ୍‌ହାର୍‌ କିଦୁ ।

3 ଅରେତ୍‌ନେ ଆଜି କାକୁର୍ତିଦାନ୍‌ ସାଲାଜିମାନି ରାଣ୍ତିଆଇମେକାଙ୍ଗ୍‌ ଜାତୁନ୍‍ ଅତୁ । 4 ମାତର୍‌ ଏସ୍‌କାଙ୍ଗ୍‌ ଆମା ରାଣ୍ତିଆଇମାଦି କଡ଼ ନି ଆଇଲିକଡ଼୍‌ ମାର୍ହିଙ୍ଗ୍‌, ଆର୍‌ତିଙ୍ଗ୍‌ ୱାର୍‌ ଆଗ୍‍ଡ଼ିନେ ନିଜେଦି ଇଲୁପରିବାର୍‌ ଉଣ୍ତିଙ୍ଗ୍‌ ଜିବନ୍‌ନୋନିକା ତର୍‌ତେଙ୍ଗ୍‍ଁ ମାରି ୟାୟାବୁବା ଉଣ୍ତିଙ୍ଗ୍‌ ଜିବନ୍‌ନୋନିକା ସିକିୟା କିଦୁ; ଇରିଙ୍ଗ୍‌ ଇକା ମାପୁରୁଦି କାଣ୍‌କାଙ୍ଗ୍‌ ନେଗିକା ଆନାତ୍‌ । 5 ଆମା ରାଣ୍ତିଆଇମା ସତ୍‌ତାନ୍‌ ଅରେଦେ ମାରି ସିଲିସାତିକାତ୍‌, ୱାଦ୍‌ ମାପୁରୁ ଆସା ଇଡ୍‌ଜି ୱେଡ଼େନାଡ଼ା ମାଡ଼ିସ୍‌କିଜି ମାରି ପାର୍‌ତାନାଦାନ୍‌ ତେବାପିତ୍‍ । 6 ମାତର୍‌ ଏଦ୍‌ ରାଣ୍ତି ଆତିଙ୍ଗ୍‌ବା ୱେଡ଼ିକାଦାନ୍‌ ଦିନ୍‌କାଟେକିଜିନାତ୍‌, ୱାଦ୍‌ ଜିବନ୍‌ ମାରିଙ୍ଗ୍‌ବା ସାତିକାତ୍‌ ଇଜି ଅଡ଼୍‌ବିଦେଙ୍ଗ୍‌ ଆନାତ୍‌ । 7 ରାଣ୍ତିଆଇମେକାଙ୍ଗ୍‌ ଇୟା ବିସୟ୍‌ତାନ୍‌ ଜାଗ୍‌ରାତା କିଦୁ, ଏନ୍‌ ଏଣ୍ତେସ୍‌ ୱାନିକା ବିରୁଦ୍‌ତାନ୍‌ ଇନି ମାଟା ୱେର୍‌ତେଙ୍ଗ୍‌ ସାରି ପୟ୍‌ଏନ୍‌ । 8 ମାତର୍‌ ଜଦି ଏନ୍‌ ନିଜେଦି ଲୋକାଙ୍ଗ୍‌, ନିଜେଦି ଇଲୁପରିବାର୍‌ତିଙ୍ଗ୍‌ ଜାତୁନ୍‍ କିଏନ୍‌, ୱାନ୍‌ ଦାର୍ମୁ ବିସ୍‌ବାସ୍‌ତିଙ୍ଗ୍‌ ମାନାଏଜିନାନ୍‌ ମାରି ୱାନ୍‌ ଅବିସ୍‌ବାସିରି ମାଣୁକୁ ନାଣ୍ତ୍‌ ନିନ୍ଦାଆଜିନାନ୍‌ ।

9 ଇୟାନାନି ଜଗ୍‍ ମାନି ରାଣ୍ତିଆଇମେକାଙ୍ଗ୍‌ ଉନ୍‌ଡ୍ରି ଦାଡ଼ି କିଦୁ ଆମାୱାନିକା ବୟସ୍‌ ସାଟେ ବାର୍ସେକ୍‌ତାନ୍‌ ମୁସ୍‍କୁ ଆନାତ୍‍, ଆଇମେକ୍‍ ଉନ୍‌ଡ୍ରେଦେବା ମାତର୍‌ ପେଡ଼ି ଆନେମାନେ, 10 କଡ଼ରି ନେଗେନ୍‌ ଜତନ୍‌ ଅନିକା, କୁଡ଼ାଆଙ୍ଗାଁ ସନ୍‌ମାନ୍‌ କିନିକା, କ୍ରିସ୍ଟାନ୍‌ ତଡ଼ାନ୍‌ ତାଙ୍ଗିଁକା ଉଣ୍ତିଙ୍ଗ୍‌ ସାନ୍ତିଦାନ୍‌ ବ୍ୟବ୍‌ହାର୍‌ କିନିକା, ସିଲିସାତି ଲୋକାଙ୍ଗ୍‌ ସାହାଜ୍ୟ କିନିକା ଇନି ଇନିକା ୱିଜୁ ସତ୍‌ପାଣି ଉଣ୍ତିଙ୍ଗ୍‌ ଆମାକାର୍‌ କୁଟୁମ୍‌ତୁ ୱେଙ୍ଗିଁନା ମାନାର୍‌ ।

11 ମାତର୍‌ ଉଣା ବୟସ୍‌ତି ରାଣ୍ତିଆଇମେକାଙ୍ଗ୍‌ ଇୟା ଦାଡ଼ିଦୁ ଇଡ଼୍‌ମାଟ୍‌; ଇରିଙ୍ଗ୍‌ ୱାକୁ ମେନ୍ଦଲ୍‍ତୁ ଲାଲାୟ୍‌ ଆଜି କ୍ରିସ୍ତଦି ମାଣାନ୍‌ ୱେର୍‌ଏ ଆଜି ପେଡ଼ି ଆଦେଙ୍ଗ୍‌ ବଦା କିନେ; 12 ମାରି ୱାକୁ ୱାନିକା ଆଗ୍‌ଡ଼ିରି ପାର୍‌ମାଣ୍‌ ମାନାଉତେ ଆକା ଦଣ୍ତ୍‌ ପୟ୍‌ନେ । 13 ମାରି ବା ୱାକୁ ଇଲୁକୁ ଇଲୁକୁ ବୁଲାଜି ସମୟ୍‌ ଉପ୍‌କା କିନେ, ମାତର୍‌ ନାଣ୍ତ୍‌ ନାମ୍‌ଇ କାତେଙ୍ଗ୍‌ ମାରି ଆଇ ଲୋକା ସୁରି ମାଟା ୱେର୍‌ସି ତାଗ୍‌ଇ ମାଟେଙ୍ଗ୍‌ ୱିଜୁ ୱେର୍‌ନେ । 14 ମାରି, ଉଣା ବୟସ୍‌ତି ରାଣ୍ତିଆଇମେକ୍‌ ପେଡ଼ି ଆପିୱି, କଡ଼ ଜନମ୍‌ କିପିୱି, ଇଲୁ ପାଣି ନେଗେନ୍‌ତାନ୍‌ ସାଲା କିପିୱି, ନିନ୍ଦା କିନି ଉଣ୍ତିଙ୍ଗ୍‌ ସାତ୍ରୁଦିଙ୍ଗ୍‌ ଇନି ସାରି ସିମାକିୱି । 15 ଇଲେଇବା ଏସଲୋକ୍‌ ରାଣ୍ତିଆଇମେକ୍‌ ସୟ୍‌ତାନ୍‌ତି ୱେନ୍‌କା ଆଜି ସାରିବାଣାତେ ମାନେ । 16 ଜଦି ଆମା ବିସ୍‌ବାସ୍‌ତି ଆଇମା ଇଲୁଦୁ ରାଣ୍ତିଆଇମେକ୍‌ ତେବାନେ, ଆର୍‌ତିଙ୍ଗ୍‌ ୱାନିକା ଦୁଃକ୍‌ତି ବୋଜୁ ନିଜେ ପିଣ୍ତିୱି, ମାରି ଏଣ୍ତେସ୍‌ ମଣ୍ତଲି ଇୟାୱାନିକା ଉଣ୍ତିଙ୍ଗ୍‌ ବେକାର୍‌ ବୋଜୁ ଆମାକିତି, କାକୁର୍ତି ରାଣ୍ତିଆଇମେକାଙ୍ଗ୍‌ ଜାତୁନ୍‍ ଅତେଙ୍ଗ୍‌ ଆଟ୍‌ନାତ୍‌ ।

17 ଆମା ନେତାର୍‌ ନେଗେନ୍‌ତାନ୍‌ ଜାତୁନ୍‍ କିନାର୍‌, ଆମାକାର୍‌ କାସ୍ଟୁ ପୟ୍‌ଜି ବାକ୍ୟ ୱେର୍‌ନାର୍‌ ମାରି ସିକିୟା ପାଣି କିଜିମାନାର୍‌, ୱାର୍‌ ଦୁଇ ଗୁଣୁ ମୁସ୍‌କୁ କାସ୍ଟୁ କିତିକା ପୟ୍‌ନାର୍‌ । 18 ✝୫:୧୮ ମାତିଉ ୧୦:୧୦; ଲୁକ ୧୦:୭.ଇରିଙ୍ଗ୍‌ ଦାର୍ମୁସାସ୍ତ୍ର ୱେର୍‌ନାତ୍‌ : "ପାସି ଉଣ୍ତା କିଜିମାନିୱାଲେ କଡି ୱେୟୁଦୁ ନାସୁ ତର୍‌ମାଟ୍‌ ।" ମାରି "ପାଣିକିନିକାନ୍‌ ଟିକ୍‌ତାନ୍‌ ପାଣିକିତିକା ପୟ୍‌ଦେଙ୍ଗ୍‌ ଆଟ୍‌ନାନ୍‌ ।" 19 ରିଏର୍‌ ବା ମୁଏର୍‌ ଲୋକ୍‌ ସାକି ସିଲେଏଣ୍‌ଗା ମଣ୍ତ୍‌ଲିଦି ଅରେନ୍‌ ପେରି ନେତା ବିରୁଦ୍‌ତାନ୍‌ ଇନି ମାଟା ବିଚାର୍‌ତୁ ଅମାଟ୍‌ । 20 ଆମାକାର୍‌ ସତ୍‌ତାନ୍‌ ପାପ୍‌ ପାଣିଦୁ ମାନାର୍‌, ଆଇୱାରିଙ୍ଗ୍‌ ଜାଗାର୍‌ତା କିନି ଉଣ୍ତିଙ୍ଗ୍‌, ୱାରିଙ୍ଗ୍‌ ନେସ୍‌ନିୱାଜା ସେତା କିଦୁ ।

21 ମାପୁରୁଦି କ୍ରିସ୍ତ ଜିସୁଦି ମାରି ଆସ୍‌କିତି ମୁସ୍‌କୁପୁର୍‌ତି ଦୁତ୍‍କା ଆଗ୍‌ଡ଼ି ନାନ୍‌ ଡାଟ୍‌ତାନ୍‌ ମାଟା ୱେର୍‌ସିନା, ମିର୍‌ ଆଗ୍‌ଡ଼ିରି ଇସାବ୍‌ତାନ୍‌ ସାଲାଏଣ୍‌ଗା ଇୟାୱିଜୁ ମାନାଦୁ, ମାରି ଏ ବିରୁଦ୍‌ତାନ୍‌ ମକମ୍‌ ସୁଡ଼ୁଜି ଇନି ପାଣି କିମାଟ୍‌ । 22 ତର୍‌ବର୍‌ ଆଜି ଏ ମୁସ୍‌କୁ କିୟୁ ଇଡ୍‍ଜି ସର୍‌ପେ କିମାଟ୍‌, ଆଇୱାରି ପାପ୍‌ତୁ ନିଜେଦିଙ୍ଗ୍‌ ମିସା କିମାଟ୍‌; ମିର୍‌ ନିଜେଦିଙ୍ଗ୍‌ ପୁରା ପବିତ୍ର ଇଡ୍‌ଦୁ ।

23 କେବଲ୍‌ ଏରୁ ଉଣୁଏଣ୍‌ଗା, ମି ଜିରାନିସାକ୍ତି ପିରିସ୍‌ କିଦେଙ୍ଗ୍‌ ଉବୁଡ଼ିନେ ମାତର୍‌ ଅଙ୍ଗୁର୍‍ରସ୍‍ ଉଣୁଆ, ଇରିଙ୍ଗ୍‌ ନିନ୍‍ ଜାରିଦିଙ୍ଗ୍‌ଜାରି ନବ୍‌ ଆଜିନି ।

24 ଏସଲୋକ୍‌ ପାପ୍‌ପାଣି ୱିଜୁଲୋକାମାନୁ ୱେଙ୍ଗିଁନାତ୍‌, ୱାର୍‌ ଆୟାଉଣ୍ତିଙ୍ଗ୍‌ ଦାପ୍ରେନେ ବିଚାର୍‍ତୁ ସାମ୍‌ନା ଆଦେଙ୍ଗ୍‌ ପଡ଼ାନାତ୍‌ । ମାରି ଏସଲୋକ୍‌ ପାପ୍‌କିତିକାର୍‌ ନାଣ୍ତ୍‌ ଦିନ୍‌ତାନ୍‌ ଦରାପଡ଼େ ଆନାର୍‌ । 25 ଆୟାୱାଜା ଏସଲୋକ୍‌ଦି ଦାର୍ମୁପାଣି ଉସାସ୍‌ତାନ୍‌ ୱିଜେରେ ସୁଡ଼ୁନାର୍‌, ମାତର୍‌ ମାରି ଏସଲୋକା ସତ୍‌ପାଣି ଆୟାୱାଜା ନେସ୍‌ଇତିଙ୍ଗ୍‌ ବା, ୱିଜୁଦିନ୍‌ତିଙ୍ଗ୍‌ ମାର୍‌ଗିଜ ମାନ୍‌ଡ୍ରେଙ୍ଗ୍‌ ଆଟ୍‌ଏତ୍‌ ।