ପ୍ରକାଶିତ 18

ବାବିଲନ୍‌ଦି ଦଂସ ଆନିକା

1 ତାନିୱେନ୍‌କା ନାନୁ ମାରି ଉନ୍‌ଡ୍ରି ଦୁତ୍‌ଦିଙ୍ଗ୍ ମୁସ୍‌କୁପୁରୁତାନ୍ ରେତାଜି ୱାଜିନିକା ସୁଡ଼ୁତା । ୱାଦ୍‌ ନାଣ୍ତସାକ୍ତିଦିକାତ୍ ମାରାତ୍ ମାରି ତାନି ମହିମାଦାନ୍‌ ସାରାଦୁନିଆଦିଙ୍ଗ୍‌ ଜାୟ୍‌ କିଜିମାରାତ୍ । 2 ✝୧୮:୨ ପ୍ରକାଶିତ ୧୪:୮.ୱାଦ୍‌ ପେରି ବଲୁଦାନ୍ ଇଜିନାତ୍, "ୱାନିଦି ସାନିକା ଗଟାତାତ୍ । ପେରି ବାବିଲନ୍ ଦଂସ ଆତାମାନାତ୍ ! ଆକା ଇଲେଇ ଦୁକି ମାରି ତାଗ୍‍ଇ ଦୁବେଙ୍ଗ୍‌ ମାନି ଜାଗା ଆତାମାନାତ୍‌ । ୱିଜୁ ଜାତି ଅସୁଚି ମାରି କାଡ଼୍‌ନି ପୋଟିଙ୍ଗ୍ ଆବେନୁ ବାସା ତୋରିସି ମାନେ । 3 ଇରିଙ୍ଗ୍‌ ୱାଦ୍‌ ସାରା ପୃତିବିଦି ଜାତିଦି ଲୋକାଙ୍ଗ୍‌ ତାନି ସାକ୍ତି କାମୋଦିପକ ସୁରା ଉଟ୍‌ପିସ୍‌କିଜି, ପୃତିବିଦି ରାଜାରିଙ୍ଗ୍‌ ୱାନି ୱାଲେ ଦାରିପାଣିଦି ପାପ୍‍ଦୁ ମିସା କିତାମାନାତ୍, ପୃତିବିଦି ବେପାର୍‍ଙ୍ଗୁଁ ୱାନି ୱେଡ଼ିକାଦି ଉଣ୍ତିଙ୍ଗ୍‌ ଦନି ଆତାମାନାର୍‌ ।"

4 ତେନିୱେନ୍‌କା ନାନୁ ୱେର୍‌ଆ, ମୁସ୍‌କୁପୁର୍‌ଦାନ୍‌ ଆଇ ଉଣ୍ତ୍ରି ମାଟା ୱେଙ୍ଗିଁଜିନାତ୍ :

"ନା ଲୋକୁ ୱିଜେରେ ସୋସି ରାଦୁ ! ତାନି ଲାକୁତୁରାନ୍ ସୋସି ରାଦୁ !

ମିର୍‌ ତାନି ପାପ୍‍ଦୁ ମାରି ମିସାଜ ମାନାମାଟ୍‍ନି;

ୱାଦ୍‌ ଆମା ସାସ୍ତି ପୋଇନାତ୍‌, ଆବେନୁ ମିସାମାଟ୍ !

5 ତାନି ପାପ୍‌ୱିଜୁ ମୁସ୍‌କୁପୁର୍‌ ସାନ୍ଦି ନିଙ୍ଗିଁଜିନାତ୍ ।

ତାନି ପାପ୍‍ପାଣି ୱିଜୁ ମାପୁରୁ ମନ୍‍ତୁ ଇଟ୍‌ତାମାନାନ୍‌ ।

6 ୱାଦ୍‌ ଏଣ୍ଡେସ୍ ମି ଉଣ୍ତିଙ୍ଗ୍‌ ବ୍ୟବହାର୍‌ କିତାମାନାନ୍‌,

ମିର୍‌ ତାନି ଉଣ୍ତିଙ୍ଗ୍‌ ଟିକ୍ ଆୟାୱାଜା ବ୍ୟବହାର୍‌ କିଦୁ ।

ୱାଦ୍‌ ଆମାକା କିତାମାନାନ୍‌, ୱାନିଙ୍ଗ୍‌ ତାନି ଦୁଇଗୁଣ ଦଣ୍ଡ୍‌ ସିଦୁ ।

ମିଙ୍ଗିଁ ଉଟ୍‍ପିସ୍‍କିନି ଉଣ୍ତିଙ୍ଗ୍‌ ୱାଦ୍‌ ଆମା ଏରୁ ତିଆର୍‍ କିତାମାର୍ହାତ୍‌, ଆୟାତାନି ଦୁଇଗୁଣ ସୁରିୱାର୍‌ଗିନି ଏରୁ ୱାନି ଉଣିଡୁବାଇଦୁ ବର୍ତି କିଦୁ ।

7 ୱାଦ୍‌ ନିଜେଦିଙ୍ଗ୍‌ ଏସ ଗୌରବ୍‌ କିଜିମାର୍ହାତ୍‌

ମାରି ୱେଡ଼ିକାଦୁ ୱେଡ଼ିକା କିଜି ମାନିଜିମାର୍ହାତ୍‌,

ଆୟା ଇସାପ୍‍ତାନ୍ ତାନିଙ୍ଗ୍‌ ଦୁଃକ୍‌ କାସ୍ଟୁ ସିଦୁ ।

ଇରିଙ୍ଗ୍‌ ୱାଦ୍‌ ନିଜେଦିଙ୍ଗ୍‌ ପିରିସିକିଜି ଇଜିନାତ୍,

‘ନାନୁ ଇବେନୁ ରାଣି ୱାଜା ବାସ୍‌ତାମାନା ! ନାନୁ ରାଣ୍ଡି ଆଇମା ଆଏ ।’

ନାନ୍ଦି ଏସାଙ୍ଗ୍‍ବା ଦୁଃଖ ଆଏତ୍‌ ।

8 ତାନି ଇୟାୱିଜୁ ପାପ୍‌ ଉଣ୍ତିଙ୍ଗ୍‌

ରୋଗ୍‌, ଆଡ଼୍‌ବାନିକା, ଦୁର୍ଭିକ୍ଷ, ମହାମାରି ଅର୍‍ଲେନ୍‍ ତାନିଙ୍ଗ୍‌ ଉଣ୍ତ୍ରେ ଦେବାନେ ଡାକ୍‌ନାତ୍ ।

ମାରି ୱାଦ୍‌ ସିସୁଦୁ ୱିଜୁ ଦଂସ ଆନାତ୍ ।

ଇରିଙ୍ଗ୍‌ ତାନିଙ୍ଗ୍‌ ଏନ୍‌ ବିଚାର୍‌ କିଜିନାନ୍, ଆୟା ପ୍ରବୁ ମାପୁରୁ ୱିଜେରିଙ୍ଗ୍‌ପେରି ସର୍ବସକ୍ତିମାନ୍ ।"

9 ଦୁନିଆଦି ଆମା ରାଜାପେରିରାଜାର୍ ତାନି ୱାଲେ ଦାରିପାଣି ନି ପାପ୍‌ପାଣି କିତାମାର୍‌ଆର୍‌, ୱାର୍‌ ତାନି ଦଂସ ଆଜିମାନି ମେନ୍ଦଲ୍‌ତାନ୍‌ ନିଙ୍ଗିଁଜିମାନି ଗୋଇ ସୁଡ଼ିଜି ଆଡ଼୍‌ବାନାର୍ । 10 ତାନି ଦୁଃଖ କଷ୍ଟଦୁ ମିସାଦେଙ୍ଗ୍‌ ତିଲାଜି ୱାର୍‌ ତାନି ମାଣ୍‌କୁ ନାଣ୍ତ ଆକ ନିଲ୍‍ଜି ତେବାନାର୍‌ ମାରି ହାୟ୍‌, ହାୟ୍‌ ଇଜି ଇନାର୍‌ : "ଏସ ବୟ୍‌ଙ୍କାର୍‌ ! ନିନୁ ଇନିକା ଆୟା ସାକ୍ତିମାନି ପେରିଗାଡ଼୍‌ ବାବିଲନ୍ ! ମାତ୍ର ଉଣ୍ତ୍ରି ଗୋଣ୍ଟା ଲୋଇ ଇୟାୱାଜା ସାସ୍ତି ପୋୟ୍‌ତି !"

11 ମାରି ଦୁନିଆଦି ବେପାରାଙ୍ଗୁଁ ତାନି ଉଣ୍ତିଙ୍ଗ୍‌ ଆଡ଼୍‌ବାଜି ସିନ୍ତା କିନାର୍, ଇରିଙ୍ଗ୍‌ ମାରି ଏନ୍‌ ୱାରି ପର୍‌ନିଜିନିସ୍‌ କଡ଼ଏର୍‌, 12 ୱାରି ବାଙ୍ଗାଁରାମ୍‍, ୱେଣ୍ତି, ହିରାକାଲୁ, ମୁକ୍ତା, ୱାରି ଇସ୍ରି ଆରାନି ଆଙ୍ଗିଁ, ସେର୍‌ଗା ରଙ୍ଗ୍‌ତି ଆଙ୍ଗିଁ ମାରି ଲାଲ୍ ରଙ୍ଗ୍‌ତି ଆଙ୍ଗିଁ; ୱିଜୁ ରକମ୍‌ତି ଛନ୍ଦନ ୱେରୁକୁ, ଏନିପାଲ୍‌କୁଦି ୱିଜୁ ରକମ୍‌ତି ଜିନିସ୍‌କୁ, ନାଣ୍ତଦାରାଦି ମାରାକ୍‌ଦାନ୍‌ ତିଆର୍‌ଆତି ଜିନିସ୍‌କୁ; ପିତଲ୍‌, ଲୁହା ମାରି ମର୍ମର କାଲୁ ମାର୍ବଲ୍‌ ତିଆର୍‌କିତି ୱିଜୁ ରକମ୍‌ତି ଜିନିସ୍‌କୁ, 13 ଦାରୁଚିନି, ଆଇଆଇ ମସଲା ଜିନିସ୍‌କୁ, ଦୁପୁଣି, ବାସ୍‌ନାଦି ଉସାନି ଜିନିସ୍‌କୁ, କୁନ୍ଦୁରୁ, ଅଙ୍ଗୁର୍‍ରସ୍‍, ନିୟୁ, ମଈଦା, ଗଦ୍‍ମୁ, ଡ଼ାକୁ, ମେଣ୍ଡେଙ୍ଗ୍‌, ଗଡ଼ା, ରତ୍‌, ଇୟାୱାଜା ଚାକର୍‍ଙ୍ଗୁଁ ମାରି ଆତ୍ମାଦୁମାନି ଲୋକାଙ୍ଗ୍‌ ବା କଣି ଉଣ୍ତିଙ୍ଗ୍‌ ଏନ୍‌ କଣିକାନ୍‌ ସୋଏର୍‌ । 14 ବେପାର୍‌ଙ୍ଗୁଁ ୱାନିଙ୍ଗ୍ ଇନାର୍ "‍ମି ପାଣ୍ତିତି ପଲ୍‌ ୱିଜୁ ନେଗି ଜିନିସ୍‌କୁ ଆକ ଆତାମାନାତ୍ ମାରି ମି ଦନ୍‌ସମ୍ପତିଦିଙ୍ଗ୍‌ ଆକ ଅସି ନାସ୍ଟୁ ଆତାମାନାତ୍‌, ମାରି ଏସାଙ୍ଗ୍‍ବା ଆୟାୱିଜୁ ଉଦେସ୍‍ ପୁଟ୍‌ଏତ୍‌ ।" 15 ଆମା ବେପାର୍‌ଙ୍ଗୁଁ ଆୟା ଗାଡ଼୍‌ଦୁ ବେପାର୍‌ କିଜି ଦନି ଆତାମାର୍ହାର୍‌, ୱାର୍‌ ତାନି ଦୁଃକ୍‌ବୋଗଦୁ ମିସାଦେଙ୍ଗ୍‌ ତିଲାଜି ନାଣ୍ତ ଆକ ନିଲିଜି ତେବାନାର୍‌ । 16 ୱାର୍‌ ଆଡ଼୍‌ବାଜି ଇନାର୍, "ହାୟ୍‌ ! ପେରିଗାଡ଼୍‌ଦି ଅବସ୍ତା ଇଲେଇ ଏସା ବୟଙ୍କାର୍, ଏସା ଚିନ୍ତାଦି ବିସୟ୍‌ ! ୱାନ୍‌ ଇସ୍ରି ଆଙ୍ଗିଁ, ସେର୍‌ଗା ରଙ୍ଗ୍‌ତି ମାରି ଲାଲ୍‌ ରଙ୍ଗ୍‌ତି ଆଙ୍ଗିଁ ଆରାତା ମାର୍ହାତ୍‌, ମାରି ବାଙ୍ଗାଁରାମ୍‍, ହିରାକାଲୁ ମାରି ମୁକ୍ତାଦାନ୍‌ ପୁରା ଆରାତା ମାର୍ହାତ୍‌ । 17 ମାତର୍‌ ଉଣ୍ତ୍ରି ଗନ୍‍ଟା ଲୋଇ ୱାଦ୍‌ ଇୟାୱିଜୁ ସମ୍ପତ୍ତି ହାରାକିତାତ୍‌ !" ଜାହାଜ୍‍ଦି ପେରିକାନ୍‌, ସୋନିକାର୍‌, ଡଙ୍ଗାଁସାଲାକିନି ଲୋକୁ ମାରି ସାମ୍‌ଦୁର୍‌ତୁ ବେପାର୍‌କିନିକାର୍‌ ନାଣ୍ତ ଆକ ନିର୍‌ଆର୍‌ । 18 ମାରି କାସ୍‌ସିମାନି ଗାଡ଼୍‌ତି ଗୋଇ ସୁଡ଼ୁଜି ଇର୍ହାର୍‌, "ଇୟା ପେରିଗାଡ଼୍‌ତି ୱାଜା ମାରି ଆମା ଗାଡ଼୍‌ ସିଲେତାତ୍ ।" 19 ୱାର୍‌ ତାଲା ମୁସୁକୁ ଦୁଡ଼ି ୱାକ୍‍ସି ଆଡ଼୍‌ବାଜି ଇର୍ହାର୍‌, "ଏସା ନାଣ୍ତ ବୟଙ୍କାର୍‌ ! ଗାଡ଼୍‌ ଇକା ଏସ ଦୁଃକ୍ କାସ୍ଟୁ ! ସାମ୍‌ଦୁର୍‌ତୁ ସୋଲ୍‌ସିମାନି ଏରୁଜାହାଜ୍‍କୁ ତାନି ଦନ୍‌ତାନ୍ ଦନି ଆତାମାର୍‌ଆର୍‌ ! ମାତର୍‌ ଉଣ୍ତ୍ରି ଗନ୍‌ଟା ଲୋଇ ଆୟାକା ଦଂସ ଆତାମାନାତ୍ !"

20 ଏ ମୁସ୍‌କୁପୁର୍‌ଦି ଲୋକୁ ! ଆୟାକା ଦ୍ୱଂସ ଆତିମାନିଙ୍ଗ୍‌ ୱେଡ଼ିକା କିଦୁ । ଏ ସାଦୁଲୋକୁ; ପ୍ରେରିତ ସିସୁର୍‍ ମାରି ବାବବାଦିରି ! ୱେଡ଼ିକା କିଦୁ, ଇରିଙ୍ଗ୍‌ ମି ଉଣ୍ତିଙ୍ଗ୍ ୱାଦ୍‌ ଏମେକା କିତାମାରାତ୍, ଆୟାଉଣ୍ତିଙ୍ଗ୍‌ ମାପୁରୁ ତାନିଙ୍ଗ୍‌ ଦଣ୍ତ୍‌ ସିତାମାନାନ୍‌ ।

21 ତାନିୱେନ୍‍କା ଅରେନ୍‌ ନାଣ୍ତ ସାକ୍ତିଦି ଦୁତ୍‌ ଜାତାକାଲୁଦି ୱାଜା ଉଣ୍ତ୍ରି କାଲୁ ଅସି ସାମୁଦୁର୍‌ତୁ ପୋକ୍‍ତାନ୍‌ ମାରି ଇର୍ହାନ୍‌, "ପେରିଗାଡ଼୍‌ ବାବିଲନ୍ ଇୟାୱାଜା ପୋକାଇ ଆନାତ୍ ମାରି ତାନିଙ୍ଗ୍‌ ମାରି ଏନ୍‌ ଏସାଙ୍ଗ୍‌ ବା ସୁଡ଼ୁଦେଙ୍ଗ୍‌ ଆଟ୍‍ଏର୍‌ନି । 22 ଇନି ଟଇଲା, ଇନି ପାଟାପାର୍‌ନିକାନ୍‌, ପିରଡ଼ି ମାରି ବାଜାମରି ଏସାଙ୍ଗ୍ ମାରି ନି ମାଣ୍‌କୁ ୱେନ୍‌ଡ୍ରେଙ୍ଗ୍‌ ଆଏତ୍ । ଆମା ତିଆର୍‌କିନିକାନ୍‌ ନି ମାଣ୍‌କୁ ମାରି ତରାୟ୍‌ଆଏତ୍‌; ମାରି ଜାତା କାଲୁଦି ଆଉଲି ବା ୱେନ୍‌ଡ୍ରେଙ୍ଗ୍‌ ଆଏତ୍‌ । 23 ନି ମାଣ୍‌କୁ ଏସାଙ୍ଗ୍ ଦିୱା କାସ୍‌ଏତ୍‍; ମାରି କାନ୍ୟାମୁରୁଲିଦି ଆଉଲି ୱେନାଇଆଏତ୍‌ । ଇରିଙ୍ଗ୍‌ ନି ବେପାର୍‌ଙ୍ଗୁଁ ଦୁନିଆଦୁ ନାଣ୍ତସାକ୍ତି ଆତାମାର୍ହାର୍‌ ନି ବେମ୍‌ରିଦାନ୍‌ ନିନ୍‌ ଦୁନିଆଦି ୱିଜେରିଙ୍ଗ୍ ବାୟାକିଜି ଆସ୍‌ତିମାର୍ହି ।"

24 ମାରି ଇୟା ଗାଡ଼୍‌ତୁ ଦୁନିଆଦି ନାଣ୍ତ ବାବବାଦିର୍ ମାରି ସାଦୁର୍‌ ସାତାମାର୍ହାର୍‌ । ଇୟାୱିଜୁ ପାପ୍‌ଦି ଉଣ୍ତିଙ୍ଗ୍‌ ୱାଦ୍‌ ସାନିନାନି ଦଣ୍ଡ୍‌ ପୋଇତାତ୍ ।