ପ୍ରକାଶିତ 8

ସାତ୍‍ଗୋଟା ସିଲ୍‌ଆତିକେଙ୍ଗ୍‌

1 ମେଷସାବକ ସାତ୍‌ଗୋଟା ସିଲ୍‌ଆତିକେଙ୍ଗ୍‌ ରୁକିତି ଦାପ୍ରେ ମୁସ୍‌କୁପୁର୍‍ତୁ ଉଣ୍ତ୍ରି ଅଦଗଣ୍ଟା ସାନ୍ଦି ସିମ୍ରା ଆତାସରାର୍ । 2 ତାନିୱେନ୍‍କା ମାପୁରୁଦି ଆଗିଡ଼ି ନିନିମାନି ସାତ୍‌ଗୋଟା ଦୁତ୍‍କାଙ୍ଗ୍ ନାନୁ ସୁଡ଼ୁତା; ୱାନିକାଙ୍ଗ୍‌ ସାତ୍‌ଗୋଟା ମରିଙ୍ଗ୍‌ ସିଆୟ୍‍ଆତେ ।

3 ମାରି ଅରେନ୍‌ ଦୁତ୍‍ ଉଣ୍ତ୍ରି ବାଙ୍ଗାଁରାମ୍‍ତି ଦୁପିଣିଆଡ଼୍‌ନିକା ଅସି ବେଦି ଆଗିଡ଼ି ୱାଜି ନିରାତ୍ । ସିଂହାସନ୍ ଆଗିଡ଼ି ମାନି ବାଙ୍ଗାଁରାମ୍ ବେଦି ମୁସୁକୁ, ମାପୁରୁଦି ଲୋକା ପାର୍‍ତନାଦି ଦୁପୁଣିଦି ୱାଲେ ମିସାକିଜି ସିନି ଉଣ୍ତିଙ୍ଗ୍‌, ୱାନିଙ୍ଗ୍‌ ନାଣ୍ତ ଇସାପ୍‍ତାନ୍ ଦୁପୁଣି ସିଆୟ୍‍ଆତାତ୍‍ । 4 ଆୟା ଦୁତ୍‍ଦି କିୟୁଦୁ କାସ୍‍ସିମାନି ଦୁପୁଣିଦି ଗୋଇଦି ୱାଲେ ମାପୁରୁଦି ଲୋକା ପାର୍‍ତନାଦୁ ମିସାଜି ମୁସୁକୁ ନିଙ୍ଗିଁତାତ୍‍ । 5 ✝୮:୫ ପ୍ରକାଶିତ ୧୧:୧୯; ୧୬:୧୮.ତାନିୱେନ୍‍କା ଦୁତ୍‍, କାସ୍‍ନିଦୁପିଣିଦାନ୍‍ ବେଦିଦୁ ସିସୁ ବର୍ତି କିଜି ଆକା ଦୁନିଆ ମୁସୁକୁ ପୋକ୍‍ତା ସିତାତ୍ । ତେନି ଉଣ୍ତିଙ୍ଗ୍‍ ଡିଡ଼ିତାତ୍‌, ବାଦଡ଼ ମିରିସ୍‌ତାତ୍‌ ମାରି ଭୁମିକମ୍ପ ଆତାତ୍ ।

ମୋରିଙ୍ଗ୍‍ଁ

6 ତାନିୱେନ୍‍କା ସାତଗୋଟା ମୋରି ଆସ୍‍ତିମାନି ସାତଗୋଟା ଦୁତ୍‍କୁ ମରି ଉକୁତେ ତିଆର୍ ଆତେ ।

7 ପାର୍‍ତୁମ୍‍ ଦୁତ୍ ମୋରି ଉକୁତି ଦାପ୍ରେ ଆଣ୍ତ୍‍ରାଗା କାଲୁକୁ, ସିସୁ ମାରି ନେତେର୍‌ ଦେସ୍‍ ମୁସୁକୁ ଆର୍‍ତେ । ତେନି ୱେନେକା ୱିଜୁ ମାରାକ୍‌, ପାସି ଲାଟାଦି ୱାଲେ ଦୁନିଆଦି ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ୱେତାତ୍ ।

8 ତାନିୱେନ୍‍କା ମାରିଉଣ୍ଡ୍ରି ଦୁତ୍‍ ତାନି ମୋରି ଉକୁନି ଦାପ୍ରେ ଗୋରନ୍‌ ୱାଜା ତର୍‍ନି ଉଣ୍ତ୍ରି ପେରି ସିସୁ ସାମୁଦୁର୍‍ତୁ ପୋକାୟାଆତାତ୍ ମାରି ସାମୁଦୁର୍ ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ନେତେର୍‍ ଆତା ସର୍ହାତ୍‍, 9 ସାମୁଦୁର୍‍ତି ଜିଜିମାନି ଜାତୁଙ୍ଗାଁ ମାଡ଼ାନ୍‍କୁ ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ସାତେସର୍‍ଏ ମାରି ସାମୁଦୁର୍‍ତୁ ମାନି ଜାହାଜ୍‍କା ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ଦଂସ ଆତାସର୍‍ଆତ୍‍ ।

10 ତାନିୱେନ୍‌କା ମୁନ୍‌ଡ୍ରି ଦୁତ୍‍ ତାନି ମୋରି ଉକୁତାତ୍‍ । ଦାପେ ଦାପେ ବାଦଡ଼ତାନ୍ ଦିୱା ନାନି ଉଣ୍ତ୍ରି ନାଣ୍ତ କାସ୍‍ନି ସୁକା ୱିଜୁ ଗାଡେଙ୍ଗାଁ ମାରି ଜଲେଙ୍ଗାଁ ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ମୁସୁକୁ ୱାଙ୍ଗ୍‍ଜି ଆର୍‍ତାତ୍ । 11 ଆୟା ସୁକାଦି ଦରୁ "କେୟ୍‍ନିକା ।" ଆବେଟ୍‌କୁ ଉଣି ଏରୁଦି ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ କେୟ୍‌ତା ସର୍ହାତ୍‍ ମାରି ଆୟା ଏରୁ ଉଣିଜି ନାଣ୍ତ ଲୋକୁ ସାତାସରାର୍ ।

12 ତାନିୱେନ୍‌କା ନାଲିଗି ନମ୍ୱର୍‌ତି ଦୁତ୍‍ ତାନି ମୋରି ଉକୁନି ଦାପେ ଦାପେ, ୱେଡ଼ାଦି ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌, ଲେଜୁଦି ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌ ମାରି ସୁକେଙ୍ଗାଁ ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌ ନାସ୍ଟୁ ଆତାତ୍ । ଆଦେଙ୍ଗ୍‌ ଜାୟ୍‌ତି ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌ ସିକାଟି ଆତାତ୍ । ୱେଡ଼େରି ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌ ଜାୟ୍‌ଆଏତାତ୍‌ ମାରି ନାଡ଼ା ବା ଆୟାୱାଜା ଆତାତ୍ ।

13 ତାନିୱେନ୍‌କା ନାନୁ ମାର୍‌ଜି ବେସ୍‌ତା, ବାଦଡ଼ତି ବେସି ମୁସୁକୁରାନ୍ ଉଣ୍ତ୍ରି ଡେଗାପଟି ଇମିଜି ଇମିଜି ପେରିବଲୁଦାନ୍ ଇଜିନାତ୍, "ହାୟ ! ଏସା ବୟଙ୍କାର୍‌ ! ଆଇ ମୁଣ୍ତ୍ରି ଦୁତ୍‍କୁ ମରି ଉକୁନି ବେଡ଼ାଦୁ ଦୁନିଆଦି ଲୋକା ଅବସ୍ତା ଏସା କାସ୍ଟୁ ଆଏତ୍‍ ମାନାତ୍ ।"