ପ୍ରକାଶିତ 17

ପେରି ଦାରିପାଣି

1 ତାନିୱେନ୍‌କା ସାତ୍‌ଗୋଟା ଡୁବାଇଆସ୍ତିମାନି ସାତ୍‌ଗୋଟା ଦୁତ୍‌କା ଲୋଇରାନ୍‌ ଅରେନ୍‌ ନା ଲାକୁତୁ ୱାଜି ଇର୍ହାନ୍‌, "ଇବେନୁ ରାଆ ! ନାଣ୍ତ ଗାଡେଆଙ୍ଗ୍‌ଁ ଲାକୁତୁ ତିଆର୍‌ ଆତିମାନି ଦାରିପାଣି ୱାଜା ଆୟା ପେରିଗାଡ଼୍‌ ଏସ ଦଣ୍ତ୍‌ ପୋଇନାତ୍‌, ଆକା ତୋର୍‌ନା । 2 ଆମାୱାନି ୱାଲେ ଦୁନିଆଦି ରାଜାର୍‌ ଆୟା ଦାରିପାଣିଦି କିତାମାନାର୍‌ ମାରି ପୃଥିବିଦି ଲୋକ୍‌ ୱିଜେରେ ୱାନି ଦାରିପାଣିୱାଜା କାଡ଼ୁ ଉଣୁଜି ସୋସତା ମାନାର୍‌ ।"

3 ✝ ୧୭:୩ ପ୍ରକାଶିତ ୧୩:୧. ନାସ୍ତିୱାଲେ ପବିତ୍ରଆତ୍ମା ନାମାନୁ ବାସାତାତ୍‌ ମାରି ଆୟା ଦୁତ୍ ନାଙ୍ଗିଁ ଉଣ୍ତ୍ରି ବାଲିଜାଗାଦୁ ଅତାତ୍ । ଆବେନୁ ନାନୁ ସୁଡ଼ୁତା, ଅରେତ୍ ଆଇମା ଲୋକୁ ଉଣ୍ତ୍ରି ଲାଲ୍ ରଙ୍ଗ୍‌ତି ଜାତୁ ମୁସୁକୁ ବାସ୍‌ତାମାନାତ୍ । ଜାତୁଦି ୱିଜୁମେଦଲ୍‍ତୁ ମାପୁରୁଦି ନିନ୍ଦାସିନି ଦର୍‌କୁ ରାସାତେମାନେ ମାରି ତାନିଙ୍ଗ୍‌ ସାତ୍‌ଗୋଟା ତାଲେକ୍ ମାରି ଦାସ୍‌ଗୋଟା କମୁକୁ ମାନେ । 4 ଅରେତ୍ ଆଇମା ସେର୍‍ଗାନାନିକା ମାରି ପୁରା ଲାଲ୍ ରଙ୍ଗ୍‌ତି ୱାତି ପିଡ଼ିଗିତାମାର୍ହାତ୍‌ ମାରି ବାଙ୍ଗାଁରାମ୍‍ତି ସରେଙ୍ଗ୍‌, ନାଣ୍ତଦାରାଦି ମଣିମାଣିକ ମାରି ୱେଡିଦାନ୍‌ ଆରାତାମାର୍ହାତ୍ । ୱାନି ନାସ୍ଟୁକିନି ପଲ୍‌ ୱାଜା ଦାରିପାଣି ନି ତାଗ୍‍ଇ ବିସୟୱିଜୁ ଉଣ୍ତ୍ରି ବାଙ୍ଗାରାମ୍‌ତି ଡୁବାଇ ୱାନ୍‌ ଆସ୍ତାମାର୍ହାନ୍‌ । 5 ତାନି କାପାଲ୍‌ତୁ ଉନ୍‌ଡ୍ରି ମାର୍‌ଗିତିମାନି ଦର୍‌ ରାସାତାମାନାତ୍, "ପେରି ବାବିଲନ୍, ଦୁନିଆଦି ୱିଜୁ ଦାରିପାଣି ମାରି ନାସ୍ଟୁକିନିୱାରି ଆଇସି ।" 6 ନାନୁ ମାରି ସୁଡ଼ୁତା, ଆୟା ଆଇମା ସାଦୁରି ମାରି ଜିସୁଦି ଉଣ୍ତିଙ୍ଗ୍‌ ବିସ୍‌ବାସ୍‌ ତେବାଜି ସାତି ମାନି ଲୋକାରି ନେତେର୍ ଉଣୁଜି ସୋସ୍‍ତାମାରାତ୍ । ତାନିଙ୍ଗ୍‌ ସୁଡ଼ିଜି ନାନୁ କାବାଆତା ସୋର୍‌ଆ । 7 ଦୁତ୍‍ ଇର୍ହାତ୍, "ଏନ୍ଦାନିଙ୍ଗ୍‌ କାବାଆଜିନି ? ଆୟା ଆଇମା ମାରି ସାତଗୋଟା ତାଲେକ୍ ମାରି ଦାସ୍‌ଗୋଟା କମୁକୁ ୱାଦ୍‌ ବୁଲାନି ଜାତୁଦି ମାର୍‌ଗିତିମାନି ଅର୍ତ ନାନୁ ନିଙ୍ଗିଁ ଇଜିନା, ୱେନ୍ଆ ! 8 ଜାତୁ ଅର୍‍ଲେନ୍‍ ଜିତାମାର୍‌ଆତ୍‌; ଇଲେ ମାରି ଜିଏତ୍‌, ମାତର୍‌ ଆୟାଦାପ୍ରେନେ ପାତାଲ୍‍ପୁର୍‌ତାନ୍ ନିଙ୍ଗିଁଜି ୱାନାତ୍‌ ମାରି ଉଣ୍ତ୍ରି ଦେବା ନାସ୍ଟୁ ଆନାତ୍ । ତିଆର୍‌ଆତି ପୁର୍ବେଦାନ୍‌ ଏମେୱାରି ଦରୁକୁ ଜିବନ୍‌ ବଇଦୁ ରାସାଏତ୍, ଦୁନିଆଦି ଲୋକୁ ଆୟାୱିଜେରେ ଜାତୁଦିଙ୍ଗ୍‌ ସୁଡ଼ିଜି କାବାଆତାର୍‌ । ୱାଦ୍‌ ଅର୍‍ଲେନ୍‍ ଜିବନ୍‌ ମାର୍ହାତ୍‌, ଇଲେଇ ମାରି ସିଲେତ୍‌, ମାତର୍‌ ମାରିଡ଼େସି ୱାଦ୍‌ ୱାନାତ୍‌ ।

9 "ଇୟାୱିଜୁ ବିସୟ୍‌ ବୁଜାନି ଉଣ୍ତିଙ୍ଗ୍‌ ବୁଦି ଦରକାର୍ । ଜାତୁଦି ସାତ୍‌ଗୋଟା ତାଲେକ୍ ସତ୍‌ତାନ୍‌ ସାତ୍‌ଗୋଟା ଗୋରକ୍, ଏମେ ମୁସୁକୁ ଆଇମା ବାସ୍ତାମାର୍ହାତ୍‌ । ଆୟାୱିଜୁ ବା ସାତ୍‌ଗୋଟା ରାଜାରି ସିନେଙ୍ଗ୍‌ । 10 ୱାରି ଲୋଇରାନ୍‌ ପାସ୍‌ ଲୋକୁ ସାତା ସରାମାନାର୍‌ । ଅରେନ୍‌ ଇଲେ ସାସନ୍‌ କିଜିନାନ୍, ମାରି ଅରେନ୍‌ ଇଲେ ସାନ୍ଦି ରେଏନ୍‍ନେ । ୱାନ୍‌ ୱାଜି ସାଣେକ୍‌ତି ଉଣ୍ତିଙ୍ଗ୍‌ ସାସନ୍‌ କିନାନ୍ 11 ମାରି ଆମା ଜାତୁ ଅର୍‍ଲେନ୍‍ ଜିତାମାର୍ହାତ୍, ମାତର୍‌ ଇଲେ ମାରି ସିଲେତ୍‌, ୱାନ୍‌ ଆଜିନାତ୍ ଆଟ୍‌ ନମ୍ୱର୍‌ ରାଜା; ଆୟା ସାତ୍‌ଗୋଟା ରାଜାରି ଲୋଇରାନ୍‌ ଅରେନ୍‌ ମାରି ୱାନ୍‌ ବା ବେଗି ସାନାସନାନ୍ ।

12 "ମିର୍‌ ସୁଡ଼ିତିମାନି ଦାସ୍‌ଗୋଟା କମୁକୁ, ଦାସ୍‌ଗୋଟା ରାଜାରି ସିନେଙ୍ଗ୍‌, ୱାର୍‌ ଇୟାସାନ୍ଦି ସାସନ୍‌ କିଏର୍‌ । ମାତର୍‌ ଜାତୁ ୱାଲେ ସାସନ୍‌ କିନି ଉଣ୍ତିଙ୍ଗ୍‌ ଉନ୍‌ଡ୍ରେ ଗନ୍‌ଟା ଉଣ୍ତିଙ୍ଗ୍‌ ୱାରିଙ୍ଗ୍‌ ଅଦିକାର୍‌ ସିଆୟ୍‌ଆନାତ୍ । 13 ଇୟା ଦାସ୍ ଲୋକା ରାଜାରି ଉଦେସ୍‌ ଉନ୍‌ଡ୍ରେ । ୱାର୍‌ ନିଜେଦି ୱିଜୁ ସାକ୍ତି ମାରି ଅଦିକାର୍ ଜାତୁଦିଙ୍ଗ୍‌ ସର୍ପେ କିନାର୍ । 14 ୱାର୍‌ ମେଷସାବକଦି ବିରୁଦ୍‌ତାନ୍ ଜୁଦ୍‍ କିନାର୍; ମାତର୍‌ ମେଷସାବକ ୱାନି କୁକାୟ୍‌ଆତାମାନା, ବାସେଆତାମାନା, ବୁଲାନିକାର୍ ମାରି ବିସ୍‌ବାସ୍‌ତି ଲୋକା ସାହାଜ୍ୟଦାନ୍ ୱାରିଙ୍ଗ୍‌ ଆରାକିନାର୍ । ଇରିଙ୍ଗ୍‌ ୱାନ୍‌ ପ୍ରବୁରି ପ୍ରବୁ ମାରି ରାଜାରି ରାଜା ।"

15 ଦୁତ୍ ନାଙ୍ଗିଁ ମାରି ଇର୍ହାତ୍‌, "ନିନ୍‌ ଏମେ ଏରୁତୁମାନିକେଙ୍ଗ୍‌ ସୁଡ଼ୁତି, ଏମେ ମୁସୁକୁ ଆୟା ଦାରିପାଣିକିନିକାତ୍‌ ବାସ୍ତାମାର୍ହାତ୍, ଆକା ଆଜିନାତ୍ ଆଇ ଆଇ ଦେସ୍, ଜାତି, କୁଟୁମ୍‌ ମାରି ଭାସାବାସିଦି ଲୋକୁ ମାନାର୍‌ । 16 ମିର୍‌ ସୁଡ଼ିତିମାନି ସାତ୍‌ଗୋଟା କମୁକୁ ମାରି ଆୟା ଜାତୁ, ଦାରିପାଣିଦିଙ୍ଗ୍‌ କାଡ଼୍‌ନାର୍‌; ୱାର୍‌ ତାନିମାଡ଼ାନ୍‌କୁ ତାନି ୱିଜୁ ଡ଼ିବିସ୍‍କିଜି ଅସି ତାନିଙ୍ଗ୍‌ ନାଗାଡ଼ା କିଜି ଡ଼ିସ୍‍ନାସିନାର୍ । ୱାର୍‌ ତାନି କାଣ୍ତା କୁତ୍‌ସି, ତାନିଙ୍ଗ୍‌ ସିସୁଦୁ ପୋକ୍‌ସି ଦଂସ କିନାର୍‌ ।" 17 ଇରିଙ୍ଗ୍‌ ମାପୁରୁ ନିଜେଦି ଉଦେସ୍‌ ପୁରାକିନି ଉଣ୍ତିଙ୍ଗ୍ ୱାରିଙ୍ଗ୍‌ ଇୟା ଆଦେସ୍‌ ସିତାମାନାନ୍‌ । ୱାର୍‌ ଉନ୍‌ଡ୍ରେ ମୋନ୍‌ଆଜି ପାଣି କିନାର୍ ମାରି ମାପୁରୁଦି ବାକ୍ୟ ସତ୍‌ତାନ୍‌ ପୁରାଆଇ ସାନ୍ଧି ଦେସ୍‍ତି ସାସନ୍‌ ବଜୁ ଆୟା ଜାତୁ କିୟୁଦୁ ଡ଼ିସ୍‍ନାସିନାର୍ ।

18 ନିନ୍‌ ଏମେ ଆଇମାଦିଙ୍ଗ୍‍ ସୁଡ଼ୁତି, ୱାଦ୍‌ ଆଜିନାତ୍, ଦୁନିଆଦି ରାଜାରି ମୁସୁକୁ ସାସନ୍‌ କିଜିମାନି ଆୟା ପେରିଗାଡ଼୍‌ ।