1 ସାରାସାରିୱେନ୍‌କା, ଏ ନା ତଡ଼ାନ୍‌କୁ ନି ତାଙ୍ଗିଁକି, ପ୍ରବୁଦିମାନୁ ମିସାତି ମାନିଙ୍ଗ୍‌, ପ୍ରବୁଦିମାନୁ ୱେଡ଼ିକା କିଦୁ । ଆଗ୍‍ଡ଼ିରାନ୍‍ ଆମାକା ରାସ୍‌ତା ମାନାତ୍‌, ଆୟାତାନିଙ୍ଗ୍‌ ମାରିଡ଼େସି କିଦେଙ୍ଗ୍‌ ନାନ୍‌ ୱାଦ୍‌ନିକା ଅଡ଼ବିଏ, ଇରିଙ୍ଗ୍‌ ମି ସୁରକ୍ଷା ଉଣ୍ତିଙ୍ଗ୍‌ ଇକା ସାହାଜ୍ୟ କିନାତ୍‌ । 2 ଆମାକାର୍‌ ସତ୍‌ସିଲି ପାଣିଦୁ ମିସାତାମାନାର୍‌, ନୁକୁଡ଼ିଆମାଣ୍‌କୁ ଜାଗ୍‌ରାତା, ତାଗ୍‌ଇ ପାଣିକିନି ୱାରିମାଣ୍‌କୁ ଜାଗ୍‌ରାତା, ସୁନ୍ନତ୍‌କିନି ଲୋକାମାଣ୍‌କୁ ଜାଗ୍‌ରାତା; 3 ଇରିଙ୍ଗ୍‌ ମାପ୍‌ ସତ୍‌ତାନ୍‌ ସୁନ୍ନତ୍‌ପୟ୍‌ତି ଲୋକୁ, ମାପୁ ମାପୁରୁଦି ଆତ୍ମାଦାନ୍‌ ଉପାସନା କିଜିନାପ୍‌, ମାରି ଆତ୍‌ରେରି ରିତିନୀତି ମୁସ୍‌କୁ ଆସା କିଏଣ୍‌ଗା କ୍ରିସ୍ତ ଜିସୁଦିମାନୁ ଗର୍ବ କିନାପ୍‌ । 4 ନାନ୍‌ ଆତ୍‌ରେରି ବିସୟ୍‌ ମୁସ୍‌କୁ ବା ଆସା କିଦେଙ୍ଗ୍‌ ଆଟ୍‍ନା, ଜଦି ଆଇକାନ୍‍ ଏନ୍‌ ଆତ୍‌ରେରି ରିତିନୀତି ମୁସ୍‌କୁ ଆସା କିଦେଙ୍ଗ୍‌ ଆଟ୍‍ନାନ୍‍ ଇଜି ଏତ୍‌ କିନାନ୍‌, ଆର୍‌ତିଙ୍ଗ୍‌ ନାନ୍‌ ନାଣ୍ତ କିଦେଙ୍ଗ୍‌ ଆଟ୍‍ନା; 5 ✝ନା ଜନମ୍‍ତି ଆଟ୍‌ଦିନ୍‌ତି ନାଣ୍ତିଙ୍ଗ୍‌ ନାନ୍‌ ସୁନ୍ନତ୍‌ ଆତାମାର୍‌ଆ, ନାନ୍‌ ଇସ୍ରାଏଲତି ଲୋକ୍‌, ବିନ୍ୟାମିନ୍ କୁଡ଼ା, ପୁରାନେଗି ଏବ୍ରିୟ, ନିୟମ୍‌ ମାନାନି ବିସୟ୍‌ତାନ୍‌ ଅରେନ୍‍ ପାରୁସି ମାର୍‌ଆ, 6 ✝ନା ତାଗ୍‌ଇ ବ୍ୟବ୍‌ଆର୍‌ତି ଉଣ୍ତିଙ୍ଗ୍‌ କ୍ରିସ୍ଟାନ୍‌ ମଣ୍ତଲିଦିଙ୍ଗ୍‌ କାସ୍ଟୁ ସିଜି ମାର୍‌ଆ, ମାରି ବ୍ୟବସ୍ଥାଦି ମାଟା ମାନାନି ମାଣୁକୁ ଜଦି ଅରେନ୍‌ ଦାର୍ମୁଦିକାନ୍‌ ଆନାନ୍‌, ଆର୍‌ତିଙ୍ଗ୍‌ ନାନ୍‌ ଦୋସ୍‌ ସିଲେତା । 7 ମାତର୍‌ ଆମାକାୱିଜୁ ନା ଉଣ୍ତିଙ୍ଗ୍‌ ନେଗେତ୍‌ ଇଜି ଅଡ଼୍‍ବିଜି ମାର୍‌ଆ, ଆୟାୱିଜୁ ନାନ୍‌ କ୍ରିସ୍ତଦି ଉଣ୍ତିଙ୍ଗ୍‌ ତାଗ୍‌ଇକା ଇଜି ଅଡ଼୍‌ବିଜିନା । 8 କେବଲ୍‌ ନାସ ସିଲେ; ନା ପ୍ରବୁ ଜିସୁ କ୍ରିସ୍ତଙ୍ଗ୍‌ ନେସ୍‌ନି ମାଣ୍‌କୁ ଆମା ନାଣ୍ତ ବୁଦି ପୟ୍‌ତାମାନା, ତାନି ବାଦ୍‌ଲୁ ୱିଜୁ ବିସୟ୍‌ତିଙ୍ଗ୍‌ ତାଗ୍‌ଇକା ଇଜି ଏତ୍‌କିନା; ୱାନି ଉଣ୍ତିଙ୍ଗ୍‌ ନାନ୍‌ ୱିଜୁ ବିସୟ୍‌ତିଙ୍ଗ୍‌ ଡ଼ିସ୍‍ତାମାନା, ଏଣ୍ତେସ୍‌ ନାନ୍‌ କ୍ରିସ୍ତଙ୍ଗ୍‌ ପୟ୍‌ଦେଙ୍ଗ୍‌ ଆଟ୍‌ନାନ୍‌ । 9 ମାରି ୱାନି ୱାଲେ ପୁରା ମିସାନି ଉଣ୍ତିଙ୍ଗ୍‌, ମାରି ଆୟାୱିଜୁ ବିସୟ୍‌ତିଙ୍ଗ୍‌ କାସ୍‌ରା ଇଜି ଅଡ଼୍‌ବିଜିନା । ମାରି, ଆମା ଦାର୍ମୁଦି ନିୟମ୍‌ ମାନାନି ମାଣ୍‌କୁ ପୟ୍‌ଦେଙ୍ଗ୍‌ ଆଟ୍‌ନିକା, ଆୟା ନାନି ଇନି ନିଜେଦି ଦାର୍ମୁ ନାଦି ସିଲେତ୍‌ । ଇଲେଇ ନାଦି ଆମା ଦାର୍ମୁ ମାନାତ୍‌, ଆକା କ୍ରିସ୍ତଦିମାନୁ ବିସ୍‌ବାସ୍‌ କିନି ମାଣ୍‌କୁ ପୟ୍‌ତାମାନା; ଆକା ମାପୁରୁଦିମାଣୁକୁ ୱାନାତ୍ ମାରି ଆକା ବିସ୍‌ବାସ୍‌ତି ମୁସ୍‌କୁ ତିଆର୍‌ଆତାମାନାତ୍‌ । 10 ଏଣ୍ତେସ୍‌ ନାନ୍‌ କ୍ରିସ୍ତଙ୍ଗ୍‌ ନେସ୍‌ନା ମାରି ୱାନି ମାରିଡ଼େସିଜିବନ୍‌ଆଜିନିଙ୍ଗିଁନି ସାକ୍ତି ଏତ୍‌କିନା; ୱାନି କାସ୍ଟୁ ବୋଗ୍‌ତି ଦଣ୍ତ୍‌ ଏତ୍‌କିଜି ସାନିମାନୁ ବା ୱାନି ୱାଜା ଆନା, 11 ମାରି ସାତିୱାରି ମାଣ୍‌କୁ ମାରିଡ଼େସିନିଙ୍ଗିଁନିକା ପୟ୍‌ଦେଙ୍ଗ୍‌ ଆସା କିଜିନା ।

12 ନାନ୍‌ ଜେ ଇଲେଇ ଆୟାୱିଜୁ ପୟ୍‌ତା ମାନା ମାରି ପୁରା ପୟ୍‌ତା ମାନା, ଆକା ସିଲେ, ମାତର୍‌ ନାନ୍‌ କ୍ରିସ୍ତ ଜିସୁଦି ମାଣ୍‌କୁ କୁକାୟ୍‍ ଆତିମାନିଙ୍ଗ୍‌ ଆକା ଆସିନି ଉଣ୍ତିଙ୍ଗ୍‌ ଉର୍‌କୁସିନା । 13 ଏ ତଡ଼ାନ୍‌କୁ ନି ତାଙ୍ଗିଁକି, ଇୟାସାନ୍ଧି ନାନ୍‌ ଇତି ବାଡିଦୁ ଇଏନେ, ମାତର୍‌ ଉନ୍‌ଡ୍ରି ପାଣିଦୁ ପୁରାମାନ୍‌ଞ୍ଜି, ୱେନ୍‌କା ଡ଼ିସ୍‌ତିୱାତିମାନି ବିସୟ୍‌କୁୱିଜୁ ମୋନ୍‌ତାନ୍‌ ଆକ କିଜି ଆଗ୍‌ଡ଼ି ମାନି ବିସୟ୍‌କୁ ପୟ୍‌ନି ଉଣ୍ତିଙ୍ଗ୍‌ ସାନିଜିନିୱାଜା ସେସ୍ଟା କିଜିନା । 14 ଆଦେଙ୍ଗ୍‌ କ୍ରିସ୍ତ ଜିସୁଦି ୱାଲେ ଆମା ମୁସ୍‌କୁପୁର୍‌ତି ଜିବନ୍‌ ପୟ୍‌ନି ଉଣ୍ତିଙ୍ଗ୍‌ ମାପୁରୁ ନାଙ୍ଗିଁ କୁକ୍‌ତାମାନାନ୍‌, ଆୟା ପୁରସ୍କାର୍‌ତି ଉଣ୍ତିଙ୍ଗ୍‌ ଆସା ଇଡ୍‌ଜି ନାନ୍‌ ଇତି ବାଡିଦୁ ଉର୍‌କୁସିନା । 15 ମାରି, ମା ଲୋଇ ଏସଲୋକ୍‌ ଆତ୍ମାଦାନ୍‌ ଜିଣାତିମାନିକା, ୱାରି ଇୟାୱାଜା ମୋନ୍‌ଅଡ଼୍‌ବିନିକା ତେବାନିକା ନେଗେତ୍‌, ମାରି ଜଦି ଇନି ବିସୟ୍‌ତୁ ମି ଅଡ଼୍‌ବିନିକା ଅଲଗା ନାନିକା ମନ୍‌ଅଡ଼୍‌ବିନିକା ମାନାତ୍‌, ଆର୍‌ତିଙ୍ଗ୍‌ ମାପୁରୁ ମିଙ୍ଗିଁ ୱିଜୁ ମାଟା ନେସ୍‌ନିୱାଜା ୱେର୍‌ନାନ୍‌ । 16 କେବଲ, ନେର୍‌ସାନ୍ଧି ମାଡୁ ଆମା ନିୟମ୍‌ ମାନାଜି ୱାଜିନିକା, ଆୟା ଇସାବ୍‌ତାନ୍‌ ଆଗ୍‌ଡ଼ି ସନିକା ମାନାତ୍‌ ।

17 ✝ଏ ତଡ଼ାନ୍‌କୁ ନି ତାଙ୍ଗିଁକି, ମିର୍‌ ଅର୍‌ସେ ମିସାଜି ନା ୱେନ୍‌କା ରାଦୁ, ମାରି ମାମାନୁ ଆମା ସାନ୍ତି ସୁଡ଼ୁଜିନିଦେର୍‌, ଆମାକାର୍‌ ଆୟାଇସାବ୍‌ତାନ୍‌ ବୁଲାସାଲାଜିନାର୍‌, ୱାରିଙ୍ଗ୍ ସୁଡ଼ୁଦୁ । 18 ଇରିଙ୍ଗ୍‌ ଇୟାୱାଜା ଗାଦିଲୋକ୍‌ ମାନାର୍‌, ଆମାୱାରି ବୁଲାସାଲାନି ବିସୟ୍‌ତାନ୍‌ ନାନ୍‌ ମିଙ୍ଗିଁ ଗାଦି ଦେବେଙ୍ଗ୍‌ ୱେର୍‌ତାମାନା, ମାରି ଇଲେଇବା ଆଡ଼୍‍ବାଜି ଆଡ଼୍‍ବାଜି ୱେର୍‌ସିନା, ୱାର୍‌ କ୍ରିସ୍ତଦି କ୍ରୁସକାଟ୍‌ତି ସାତ୍ରୁରୁ; 19 ନରକଦୁ ୱାରି ଜିବନ୍‌ ସାନି ଉଣ୍ତିଙ୍ଗ୍‌ ସଲ୍‌ସିନାତ୍‌, ମେନ୍ଦଲ୍‌ ଆସାନେ ୱାରି ଦିୟାମ୍‌, ୱାର୍‌ ନିଜେ ନିଜେଦି ସେମାର୍‌ତିଙ୍ଗ୍‌ ଗର୍ବଦି ବିସୟ୍‌ ଏତ୍‌ କିନାର୍‌, ମାରି କେବଲ ଦୁନିଆଦି ବିସୟ୍‌ତି ଉଣ୍ତିଙ୍ଗ୍‌ ୱାର୍‌ ସିନ୍ତା କିନାର୍‌ । 20 ମାଡୁ ମୁସ୍‌କୁପୁର୍‌ତି ଲକୁ, ଆୟା ବାଡିଦାନ୍‌ ବା ମାଡୁ ରକିୟାକର୍ତ୍ତା ପ୍ରବୁ ଜିସୁ କ୍ରିସ୍ତଦି ୱାନିଦିନ୍‌ତିଙ୍ଗ୍‌ ୱେଡ଼ିକାଦାନ୍‌ କାପ୍‌କିଜି ମାନାପ୍‌ । 21 ୱାନ୍‌ ନିଜେଦି ଆମା ପାଣିଦି ସାକ୍ତି ଦାନ୍‌ ୱିଜୁ ବିସୟ୍‌ତିଙ୍ଗ୍‌ ନିଜେଦି ଆଡ୍‍ଗି କିଦେଙ୍ଗ୍‌ ଆଟ୍‍ନାନ୍‍, ଆୟା ସାକ୍ତିଦାନ୍‌ ମା ସାକ୍ତିସିଲି ମେନ୍ଦଲ୍‌ତିଙ୍ଗ୍‌ ବାଦେଲ୍‌କିଜି ନିଜେଦି ଗୌରବ୍‌ମୟ୍‌ ମେନ୍ଧଲ୍‍ ୱାଜା କିନାନ୍‌ ।