ନିହିମିୟା 12

ଜାଜକର୍‌ ନି ଲେବିୟର୍‌

1 ଆମା ଜାଜକର୍‌ ନି ଲେବିୟର୍‌ ଶଲ୍‌ଟିୟେଲଦି ମାରିନ୍‌ ଜିରୁବ୍ବାବିଲ୍‌ ନି ଜେସୁୟ ୱାଲେ ବାବିଲତାନ୍‌ ୱାତାମାର୍ହାର୍‌, ୱାର୍‌ ଇୟାକାର୍‌, ସରାୟ, ଜିରିମିୟ, ଏଜ୍ରା, 2 ଅମରିୟ, ମଲ୍ଲୁକ, ହଟୁଶ୍‌, 3 ଶଖନିୟ, ରହୁମ୍‌, ମରେମୋତ୍‌; 4 ଇଦ୍ଦୋ, ଗିନ୍ନତୋୟ, ଅବିୟ; 5 ମିୟାମିନ୍‌, ମୋୟଦିୟ, ବିଲ୍‌ଗା; 6 ଶମୟିୟ ନି ଯୋୟାରିବ୍‌, ଯିଦୟିୟ; 7 ସଲ୍ଲ, ଆମୋକ, ହିଲ୍‌କିୟ, ଯିଦୟିୟ । ଇୟାକାର୍‌ ଜେସୁୟଦି ବେଡ଼ାଦୁ ଜାଜକର୍‌ ନି ନିଜେ ନିଜେଦି ତଡ଼ାନ୍‌କା ମାନୁ ପେରିକାନ୍‌ ମାର୍ହାନ୍‌ । 8 ମାରି ଲେବିୟର୍‌, ଜେସୁୟ, ବିନ୍ନୁୟି, କଦ୍‌ମିୟେଲ, ଶେରେବିୟ, ଜିହୁଦା ନି ମତ୍ତନିୟ, ଇୟା ମତ୍ତନିୟ ନି ୱାନି ତଡ଼ାନ୍‌କୁ ଦନ୍ୟବାଦ୍‌ ସେବାକିନି ପେରିକାନ୍‌ ମାର୍ହାନ୍‌ । 9 ୱାରି ତଡ଼ାନ୍‌ ବକ୍‌ବୁକିୟ ନି ଉନ୍ନି ୱାରି ଆଗ୍‌ଡ଼ି କାପ୍‌କିନିପାଣି କିତାର୍‌ ।

ପେରି ଜାଜକ ଜେସୁୟଦି କୁଟୁମ୍‌

10 ମାରି, ଜେସୁୟଦି ମାରିନ୍‌ ଯୋୟାକିମ୍‌, ଯୋୟାକିମ୍‌ଦି ମାରିନ୍‌ ଇଲିୟାସିବ ନି ଇଲିୟାସିବଦି ମାରିନ୍‌ ଯୋୟାଦ୍‌, 11 ଯୋୟାଦ୍‌ଦି ମାରିନ୍‌ ଯୋନାତନ ନି ଯୋନାତନଦି ମାରିନ୍‌ ଜଦ୍ଦୁୟ ।

ପେରିଜାଜକରି ଦର୍‌କୁ

12 ମାରି, ଯୋୟାକିମ୍‌ଦି ବେଡ଼ାଦୁ ଇୟା ଜାଜକର୍‌ ପୁର୍ବେଦି ଡକ୍ରାଦାଦାରି କୁଟୁମ୍‌ତୁ ପେରିକାନ୍‌ ମାର୍ହାନ୍‌, ସରାୟ କୁଟୁମ୍‌ତି ମରାୟ, ଜିରିମିୟ କୁଟୁମ୍‌ତି ହନାନିୟ; 13 ଏଜ୍ରା କୁଟୁମ୍‌ତି ମଶୁଲ୍ଲମ୍‌; ଅମରିୟ କୁଟୁମ୍‌ତି ଯିହୋହାନନ୍‌; 14 ମଲ୍ଲୁକି କୁଟୁମ୍‌ତି ଯୋନାତନ, ଶବନିୟ କୁଟୁମ୍‌ତି ଜୋସେପ; 15 ହାରିମ କୁଟୁମ୍‌ତି ଅଦନ୍‌; ମରାୟୋତ୍‌ କୁଟୁମ୍‌ତି ହିଲ୍‌କୟ; 16 ଇଦ୍ଦୋ କୁଟୁମ୍‌ତି ଜିକରିୟ; ଗିନ୍ନତନ କୁଟୁମ୍‌ତି ମଶୁଲ୍ଲମ୍‌; 17 ଅବିୟ କୁଟୁମ୍‌ତି ସିଖ୍ର; ମିନ୍ୟାମିନ କୁଟୁମ୍‌ତି, ମୋୟଦିୟ କୁଟୁମ୍‌ତି ପିଲ୍‌ଟେୟ; 18 ବିଲ୍‌ଗା କୁଟୁମ୍‌ତି ଶମ୍ମୁୟ; ଶମୟିୟ କୁଟୁମ୍‌ତି ଯିହୋନାତନ୍‌; 19 ମାରି, ଯୋୟାରିବ୍‌ କୁଟୁମ୍‌ତି ମତ୍ତନୟ; ଯିଦୟିୟ କୁଟୁମ୍‌ତି ଉସି; 20 ସଲ୍ଲୟ କୁଟୁମ୍‌ତି କଲ୍ଲୟ; ଆମୋକ କୁଟୁମ୍‌ତି ଏବର; 21 ହିଲ୍‌କିୟ କୁଟୁମ୍‌ତି ହଶବିୟ; ଯିଦୟିୟ କୁଟୁମ୍‌ତି ନତନେଲ ।

ଜାଜକ ନି ଲେବିୟରି କୁଡ଼ା

22 ଇଲିୟାସିବ, ଯୋୟାଦ୍‌ ନି ଯୋହାନନ୍‌ ନି ଜଦ୍ଦୁୟ ବେଡ଼ାଦୁ ଲେବିୟର୍‌, ବା ପାରସିକ ଦାରିୟାବସଦି ଅଦିକାର୍‌ ବେଡ଼ାଦୁ ଜାଜକର୍‌ ପୁର୍ବେଦି ଡକ୍ରାଦାଦାରି କୁଟୁମ୍‌ତୁ ପେରିକାନ୍‌ ୱାଜା କୁଡ଼ାଦୁ ରାସାତାର୍‌ । 23 ଲେବି କୁଟୁମ୍‌ତୁ ଜନମ୍‌ଆତି ଡକ୍ରାଦାଦାରି ପେରିୱାରି ଦର୍‌କୁ ଇଲିୟାସିବଦି ମାରିନ୍‌ ଯୋହାନନ୍‌ଦି ବେଡ଼ା ସାନ୍ଧି କୁଡ଼ାଦି ବଇଦୁ ରାସାତାତ୍‌ ।

ପାର୍‌ତନା ଇଲୁଦୁ ଆଇଆଇ ପାଣିକିନି ଦାଇତ୍‌

24 ଲେବିୟରି ପେରିକାର୍‌; ହଶବିୟ, ଶେରେବିୟ ନି କଦ୍‌ମିୟେଲଦି ମାରିନ୍‌ ଜେସୁୟ ନି ୱାରି ଆଗ୍‌ଡ଼ିରି ତଡ଼ାନ୍‌କୁ ମାପୁରୁଦି ଲୋକ୍‌ ଦାଉଦଦି ମାଟା ଇସାବ୍‌ତାନ୍‌ ଦଲ୍‌ ଦଲ୍‌ ଆଜି ପାର୍‌ତନା ନି ଦନ୍ୟବାଦ୍‌ ସିନି ଉଣ୍ତିଙ୍ଗ୍‌ ବାସେକିତାର୍‌ । 25 ମତ୍ତନିୟ ନି ବକ୍‌ବୁକିୟ, ଓବଦିୟ, ମଶୁଲ୍ଲମ୍‌, ଟଲ୍‌ମୋନ, ଅକ୍‌କୁବ, ସେର୍‌ଲା କାପ୍‌କିନିକାର୍‌ ଆଜି ସେର୍‌ଲା ଲାକ୍‌ତୁ କାଦି ଇଡ୍‌ନି ଇଲୁକୁ ୱିଜୁ କାପ୍‌କିନି ପାଣି କିତାର୍‌ । 26 ଇୟାକାର୍‌ ଯୋସାଦକଦି ନାତି ଜେସୁୟଦି ମାରିନ୍‌ ଯୋୟାକିମ୍‌ ବେଡ଼ାଦୁ, ମାରି ସାସନ୍‌କିନିକାନ୍‌ ନିହିମିୟା ନି ଅଜାକିନି ଏଜ୍ରା ଜାଜକଦି ବେଡ଼ାଦୁ ମାର୍ହାର୍‌ ।

ଜିରୁସାଲାମ୍‌ତି ଗଡାଦୁ ପାର୍‌ତୁମ୍‌ ଡ଼ୁଗୁନି ପଣ୍ତୟ୍‌

27 ଇୟାୱେନ୍‌କା ଜିରୁସାଲମଦି ଗଡା ପ୍ରତିସ୍ଟା କିନି ବେଡ଼ାଦୁ ଲୋକୁ ଟାପୁଡ଼ିଡାକ୍‌ସି, ଟଇଲା ନି ପିରଡ଼ି ଏସ୍‌ସି ଦନ୍ୟବାଦ୍‌ ନି ପାଟାଦି ୱାଲେ ୱେଡ଼ିକାଦାନ୍‌ ପଣ୍ତୟ କିନି ଉଣ୍ତିଙ୍ଗ୍‌ ଲେବିୟରିଙ୍ଗ୍‌ ଜିରୁସାଲମତୁ ତାନି ଉଣ୍ତିଙ୍ଗ୍‌ ୱାରି ୱିଜୁ ବାଡିଦୁ ୱାରିଙ୍ଗ୍‌ ପୟ୍‌ଜିଅତାର୍‌ । 28 ମାରି, ପାଟାପାର୍‌ନିୱାରି ମାରିନ୍‌କୁ ଜିରୁସାଲମଦି ସାରିବେଡ଼ିତି କିଡ଼ିଇ ବୁମିଦାନ୍‌ ନି ନଟୋପାତିୟରି ଆଇଆଇ ନାର୍‌କାଣ୍‌କୁ; 29 ବେତ୍‌ ଗିଲ୍‌ଗଲଦାନ୍‌, ଗେବା ନି ଅସ୍ମାବତ୍‌ କିଡ଼ିଇଦାନ୍‌ ଉଣ୍ତାତାର୍‌; ଇରିଙ୍ଗ୍‌ ପାଟାପାର୍‌ନିକାର୍‌ ଜିରୁସାଲମତି ସାରିବେଡ଼ିତି ନିଜେଦିୱାରି ଉଣ୍ତିଙ୍ଗ୍‌ ନାର୍‌କୁ ବାସାକିତା ମାର୍ହାର୍‌ 30 ମାରି, ଜାଜକର୍‌ ନି ଲେବିୟର୍‌ ନିଜେ ନିଜେଦିଙ୍ଗ୍‌ ସୁଚି କିତାର୍‌; ମାରି, ୱାର୍‌ ଲୋକାଙ୍ଗ୍‌ ନି ସେର୍‌ଲେଙ୍ଗ୍‌ ୱିଜୁ ମାରି ଗଡା ସୁଚି କିତାର୍‌ । 31 ଇୟାୱେନ୍‌କା ନାନୁ ଜିହୁଦାଦି ଅଦିପତିରିଙ୍ଗ୍‌ ଗଡା ମୁସ୍‌କୁ ତାତା, ମାରି ଦନ୍ୟବାଦ୍‌ ନି ପାଟାପାର୍‌ନି ଉଣ୍ତିଙ୍ଗ୍‌ ରୁଣ୍ତି ପେରି ଦଲ୍‌ ଆସ୍‌କିତା; ଆବେନୁ ଉନ୍‌ଡ୍ରି ଦଲ୍‌ ଡେବ୍‌ରି ତରିଟି ଗଡା ମୁସ୍‌କୁ ସିଜି ଗାତାମ୍‌ଗୁଟା-ସେର୍‌ଲା ତରିନ୍‌ ସର୍ହାର୍‌; 32 ମାରି, ୱାରି ୱେନ୍‌କା ହୋସୟିୟ ନି ଜିହୁଦାଦି ଅଦିପତିରି ଆଦାବାଗ୍‌, 33 ମାରି ଅସରିୟ, ଏଜ୍ରା ନି ମଶୁଲ୍ଲମ୍‌, 34 ଜିହୁଦା ନି ବିନ୍ୟାମିନ୍‌ ନି ଶମୟିୟ ନି ଜିରିମିୟ 35 ମାରି ଏସ ଜାଜକ ମାରିନ୍‌କୁ ମୋରି ଅସି ସର୍ହାର୍‌; ଆସପ କୁଟୁମ୍‌ତୁ ଜନମ୍‌ଆତି ସକ୍କୁରଦି ନାତି ମାରିନ୍‌, ମିଖାୟଦି ନାତି ମାରିନ୍‌, ମତ୍ତନିୟଦି ନାତି, ଶମୟିୟଦି ମାରିନ୍‌ ଜେ ଯୋନାତନ, ୱାନି ମାରିନ୍‌ ଜିକରିୟ 36 ନି ୱାନି ତଡ଼ାନ୍‌କୁ ଶମୟିୟ ନି ଅସରେଲ୍‌, ମିଲଲୟ, ଗିଲଲୟ, ମାୟିୟ, ନତନେଲ ନି ଜିହୁଦା, ହାନାନି, ଇୟାକାର୍‌ ମାପୁରୁଦି ଲୋକ୍‌ ଦାଉଦଦି ତିଆର୍‌ଆତି ଆଇଆଇ ଏସ୍‌ନିଜନ୍ତ୍ର ଅସି ସର୍ହାର୍‌; ଏଜ୍ରା ମାସ୍ଟର୍‌ ୱାରି ଆଗ୍‌ଡ଼ି ଆଗ୍‌ଡ଼ି ବୁଲାତାନ୍‌; 37 ମାରି, ୱାର୍‌ ଜଲା ଏରୁ ସେର୍‌ଲା ଲାକ୍‌ତୁ ଆଜି ନିଜେଦିୱାରି ଆଗ୍‌ଡ଼ି ସାଡ଼ୁକୁ ସାରିଦୁ ଦାଉଦ ଗାଡ଼୍‌ଦି ପାଉଚ ଦାନ୍‌ ଗଡାଦି ଏକ୍‌ନିମାନୁ ଏକ୍‌ସି ଦାଉଦଦି ଇଲୁ ମୁସ୍‌କୁ ସିଜି ଆଗ୍‌ଡ଼ି ତରିନ୍‌ ଏରୁ ସେର୍‌ଲା ସାନ୍ଧି ସର୍ହାର୍‌ ।

38 ମାରି, ୱାରି ଆଇ ଏମେ ଦଲ୍‌ ଦନ୍ୟବାଦ୍‌ ସିତାର୍‌, ୱାର୍‌ ୱାରିଙ୍ଗ୍‌ ବେଟ୍‌ ଆଦେଙ୍ଗ୍‌ ସର୍ହାର୍‌, ମାରି ମାପୁ ନି ଲୋକା ଆଦାବାଗ୍‌ ୱାରି ୱେନ୍‌କା ୱେନ୍‌କା ଗଡା ମୁସ୍‌କୁ ସିସୁ ଗୁଟା ମୁଣ୍ତା ସିଜି ଅସାର୍‌ ଗଡା ସାନ୍ଧି ସର୍ହାପ୍‌; 39 ମାରି, ଇପ୍ରୟିମ ସେର୍‌ଲା ନି ପାଡ଼ିଇ ସେର୍‌ଲା ନି ମିନି ସେର୍‌ଲା ନି ହନନେଲ କଟା ନି ହମିୟ ମୁଣ୍ତା ସିଜି ମେଣ୍ତା ସେର୍‌ଲା ସାନ୍ଧି ସର୍ହାପ୍‌; ମାରି, ୱାର୍‌ କାପ୍‌କିନି ସେର୍‌ଲାଦୁ ନିର୍‌ଆ ତେବାତାର୍‌ ।

40 ଇୟାୱାଜା ମାପୁରୁଦି ପାର୍‌ତନା ଇଲୁଦୁ ଦନ୍ୟବାଦ୍‌ ସିନିକାର୍‌ ଆୟା ରୁଣ୍ତି ଦଲ୍‌କୁ ନି ମାପୁ, ମାରି ମା ୱାଲେ ପେରିୱାରି ଆଦାବାଗ୍‌; 41 ମାରି ଇଲିୟାକିମ୍‌, ମାସେୟ, ମିନ୍ୟାମିନ, ମିଖାୟ, ଇଲିୟୋଐନୟ, ଜିକରିୟ, ହନାନିୟ, ମୋରିଉକୁନିକାର୍‌, ଇୟା ଜାଜକର୍‌; 42 ମାରି, ମାସେୟ ନି ଶମୟିୟ ନି ଇଲିୟାସର ନି ଉସି ନି ଯିହୋହାନନ୍‌ ନି ମଲ୍‌କିୟ ନି ଏଲମ୍‌ ନି ଏସର୍‌, ମାରି ମାପୁ ୱିଜେରେ ନିର୍‌ଆ ତେବାତାପ୍‌ । ନାସ୍ତିୱାଲେ ପାଟାପାର୍‌ନିକାର୍‌ ନି ୱାରି ପେରିକାର୍‌ ଯିଷ୍ରହିୟ ପେରି ୱେୟୁଦାନ୍‌ ପାରିତାନ୍‌ ।

43 ମାରି, ଆୟା ନାଣ୍ତିଙ୍ଗ୍‌ ଲୋକୁ ପେରି ବଲିଦାନ୍‌ କିଜି ୱେଡ଼ିକା କିତାର୍‌; ଇରିଙ୍ଗ୍‌ ମାପୁରୁ ୱାରିଙ୍ଗ୍‌ ୱେଡ଼ିକାଦୁ ୱେଡ଼ିକା କିତାମାର୍ହାର୍‌; ମାରି ଆଇମେକ୍‌, ବା ମାରି କଡ଼ର୍‌ ଆଇଲିକ୍‌ ୱେଡ଼ିକା କିତାର୍‌; ଆବେନୁ ଜିରୁସାଲମଦି ୱେଡ଼ିକାଦି ଆଉଲି ନାଣ୍ତ ଆକ ସାନ୍ଧି ୱେନାଇଆତାତ୍‌ ।

ପାର୍‌ତନା ଇଲୁଦୁ ସେବାକିନିକା

44 ମାରି, ଆୟା ନାଣ୍ତିଙ୍ଗ୍‌ ଦନ୍ ନି ପେର୍‌ଜିସିନି ଦାନ୍‌, ଆଗ୍‌ଡ଼ି ଆସ୍‌ତି ପଲ୍‌ ନି ଦାସ୍‌ବାଗ୍‌, ଜାଜକ ନି ଲେବିୟରି ଉଣ୍ତିଙ୍ଗ୍‌ ଆଇଆଇ ଗାଡ଼୍‌କାଣି କିଡ଼ିଇ ଇସାବ୍‌ତାନ୍‌ ନିୟମ୍‌ ତିଆର୍‌କିତି ବାଗ୍‌ ଉଣ୍ତା କିନି ଉଣ୍ତିଙ୍ଗ୍‌ ବାକ୍ରେଆଙ୍ଗ୍‌ ୱିଜୁ ଲୋକୁ ମିସାତାର୍‌; ଇରିଙ୍ଗ୍‌ ସେବାପାଣିକିନିକାର୍‌ ଜାଜକ ନି ଲେବିୟରି ଉଣ୍ତିଙ୍ଗ୍‌ ଜିହୁଦା ୱେଡ଼ିକା ଆତାମାର୍ହାନ୍‌ । 45 ମାରି, ୱାର୍‌ ଦାଉଦ ନି ୱାନି ମାରିନ୍‌ ଶଲୋମନଦି ମାଟା ଇସାବ୍‌ତାନ୍‌ ନିଜେଦିୱାରି ମାପୁରୁଦି ସେବା କିତାର୍‌ ନି ସୁଚି ଆତାର୍‌, ମାରି ପାଟାପାର୍‌ନିକାର୍‌ ନି ସେର୍‌ଲାକାପ୍‌କିନିକାର୍‌ ଆୟାୱାଜା କିତାର୍‌ । 46 ଇରିଙ୍ଗ୍‌ ପୁର୍ବେକାଡ଼ା ଦାଉଦ ନି ଆସପଦି ବେଡ଼ାଦୁ ପାଟାପାର୍‌ନିୱାରି ଅରେନ୍‌ ପେରିକାନ୍‌ ମାର୍ହାନ୍‌ ମାରି ମାପୁରୁଦି ଉଦେସ୍‌ତାନ୍‌ ପାର୍‌ତନା ନି ଦନ୍ୟବାଦ୍‌ସିନି ନାନି ପାଟା ମାର୍ହାତ୍‌ । 47 ମାରି, ଜିରୁବ୍ବାବିଲ୍‌ ନି ନିହିମିୟାଦି ବେଡ଼ାଦୁ ୱିଜୁ ଇସ୍ରାଏଲ ୱିଜୁ ଦିନ୍‌ତି ଦର୍‌କାର୍‌ ଇସାବ୍‌ତାନ୍‌ ପାଟାପାର୍‌ନିୱାରି ମାରି ସେର୍‌ଲାକାପ୍‌କିନିୱାରି ବାଗ୍‌ ସିତାର୍‌; ମାରି ଲୋକୁ ଲେବିୟରି ଉଣ୍ତିଙ୍ଗ୍‌ ଜିନିସ୍‌ ପଣ୍ତ୍‌ୟ କିତାର୍‌ ମାରି ଲେବିୟର୍‌ ହାରୋଣ ମାରିନ୍‌କା ଉଣ୍ତିଙ୍ଗ୍‌ ଜିନିସ୍‌ ପଣ୍ତୟ୍‌ କିତାର୍‌ ।