1 ଆୟା ଲେଜୁଦି କଡ଼େ ନାଲିଗି ଦିନ୍‌ତୁ ଇସ୍ରାଏଲତି ମାରିନ୍‌କୁ ଉଡ୍ରେମାନୁ ଆଜି ଉପାସ୍‌ କିଜି, ବାସ୍ତେଙ୍ଗ୍‌ ଆରାଜି ମାରି ନିଜେ ନିଜେଦି ତାଲା ମୁସ୍‌କୁ ଦୁଡ଼ି ୱାକାତାର୍‌ । 2 ମାରି, ଇସ୍ରାଏଲ କୁଟୁମ୍‌ ଆଇ ଦେସ୍‌ତି ୱିଜେରି ମାଣାନ୍‌ ନିଜେଦିୱାରିଙ୍ଗ୍‌ ୱେର୍‌ଏ କିତାର୍‌, ମାରି ନିରାରୋ ନିଜେ ନିଜେଦି ପାପ୍‌ ନି ନିଜେ ନିଜେଦି ପୁର୍ବେଦି ଡକ୍‌ରାଦାଦାରି ପାପ୍‌ ମାନାତାର୍‌ । 3 ମାରି, ୱାର୍‌ ନିଜେ ନିଜେଦି ବାଡିଦୁ ନିଲ୍‌ଜୋ ଦିନ୍‌ତି ତିନି ଗନ୍‌ଟା ସାନ୍ଧି ପ୍ରବୁ ନିଜେଦିୱାରିଙ୍ଗ୍‌ ମାପୁରୁଦି ନିୟମ୍‌ ବଇଦାନ୍‌ ପଡ଼ାତାନ୍‌ ମାରି ଆଇ ତିନି ଗନ୍‌ଟା ସାନ୍ଧି ୱାର୍‌ ପାପ୍‌ ମାନାଜି ପ୍ରବୁ ମାପୁରୁଙ୍ଗୁଁ ମାଡ଼ିସ୍‌ କିତାର୍‌ ।

4 ମାରି, ଲେବିୟର୍‌, ଜେସୁୟ ନି ବାନି, କଦ୍‌ମିୟେଲ, ଶବନିୟ, ବୁନ୍ନି, ଶେରେବିୟ, ବାନି ନି କନାନି ପାହାଚ୍‌ତୁ ନିଲ୍‌ସି ପ୍ରବୁ ମାପୁରୁଙ୍ଗୁଁ ପେରି ୱେୟୁଦାନ୍‌ କୁକ୍‌ତାର୍‌ ।

5 ଜେସୁୟ ନି କଦ୍‌ମିୟେଲ, ବାନି, ହସ୍‌ବନିୟ, ଶେରେବିୟ, ହୋଦିୟ, ଶବନିୟ, ପଥାହିୟ, ନି ଲେବିୟର୍‌ ଇର୍ହାର୍‌,

"ନିଙ୍ଗିଁଦୁ, ପୁର୍ବେ କାଡ଼ାଦାନ୍‌ ଏସ୍‌କାଙ୍ଗ୍‌ ୱିଜ୍‌ଇଦିନ୍‌ ସାନ୍ଧି ପ୍ରବୁ ମି ମାପୁରୁଦି ଦନ୍ୟବାଦ୍‌ କିଦୁ;

ମାରି, ୱିଜୁ ଦନ୍ୟବାଦ୍‌ତାନ୍‌

ପେରି ମାପୁରୁଦି

ଦରୁ ଦନ୍ୟ ଆପିତ୍‌ ।"

6 କେବଲ ନିନୁ ନେ ପ୍ରବୁ; ନିନୁ ମୁସ୍‌କୁପୁର୍‌, ମୁସ୍‌କୁପୁର୍‌ତି ମୁସ୍‌କୁପୁର୍‌ ନି ଆବେଣି ୱିଜୁ ଦୁତ୍‌କୁ, ଦୁନିଆ ନି ଆବେଣି ୱିଜୁ ଜିନିସ୍‌, ସାମ୍‌ଦୁର୍‌ ନି ଆବେଣି ୱିଜୁ ଜିନିସ୍‌ ତିଆର୍‌ କିତିମାନି ମାରି ନିନୁ ଆୟା ୱିଜୁଦିଙ୍ଗ୍‌ ଜିବନ୍‌ ସିତିମାନି ମାରି ମୁସ୍‌କୁପୁର୍‌ତି ଦୁତ୍‌କୁ ମିଙ୍ଗିଁ ମାଡ଼ିସ୍‌ କିନେ । 7 ନିନୁ ନେ ପ୍ରବୁ ମାପୁରୁ, ନିନୁ ଅବ୍ରାମଦିଙ୍ଗ୍‌ ଆସ୍‌କିତି ମାରି କଲଦିୟରି ଊର ଦେସ୍‌ତାନ୍‌ ୱାନିଙ୍ଗ୍‌ ସୋପ୍‌ତି ତାସି ଅବ୍ରହାମ ଦରୁ ସିତି; 8 ନିନୁ ନି ଆଗ୍‌ଡ଼ି ୱାନି ୱିଜୁଜିନିସ୍‌ ବିସ୍‌ବାସ୍‌ତାନ୍‌ ସୁଡ଼ୁତି, ମାରି କିଣାନିୟ, ହିତ୍ତୀୟ, ଇମୋରିୟ ନି ପରିସିୟ ନି ଜିବୁସିୟ ନି ଗିର୍ଗାସିୟ ଲୋକା ଦେସ୍‌ ସିଦେଙ୍ଗ୍‌, ମାରି ୱାନି କୁଟୁମ୍‌ତିଙ୍ଗ୍‌ ସିନି ଉଣ୍ତିଙ୍ଗ୍‌ ୱାନି ୱାଲେ ରାଜିମାନା କିତି, ମାରି ନିଜେଦି ମାଟା ପୁରା କିତିମାନି; ଇରିଙ୍ଗ୍‌ ନିନୁ ଦାର୍ମୁ ମାପୁରୁ । 9 ଇୟାୱେନେକା ନିନୁ ମିସର ଦେସ୍‌ତୁ ମା ପୁର୍ବେଦି ଡକ୍‌ରାଦାଦାରି କାସ୍ଟୁ ସୁଡ଼ୁତି ମାରି ସୁପ୍‌ ସାମ୍‌ଦୁର୍‌ ଲାକ୍‌ତୁ ୱାରି ଆଡ଼ାବାନିକା ୱେର୍‌ଇ; 10 ମାରି, ଫାରୋ ନି ୱାନି ୱିଜେରି ଦାସକୁ ନି ୱାନି ଦେସ୍‌ତି ୱିଜେରି ଲୋକା ଉଣ୍ତିଙ୍ଗ୍‌ ଆଇଆଇ ସିନା ନି କାବାଆନି ପାଣି ତର୍‌ତି; ଇରିଙ୍ଗ୍‌ ମିସ୍ରିୟର୍‌ ୱାରି ବିରୁଦ୍‌ତାନ୍‌ କାସ୍ଟୁ କିନିକା ନିନୁ ନେସ୍‌ତି; ଆଦେଙ୍ଗ୍‌ ନିନୁ ନେରୁ ସାନ୍ଧି ନିଜେଦି ଦରୁ ୱିକ୍‌ତି ମାନି । 11 ମାରି, ନିନୁ ୱାରି ଆଗ୍‌ଡ଼ି ସାମ୍‌ଦୁର୍‌ତିଙ୍ଗ୍‌ ଦୁଇ ବାଗ୍‌ କିତି, ଆବେଟ୍‌ ୱାର୍‌ ୱାର୍‌ତି ବୁମି ସିଜି ସନି ୱାଜା ସାମ୍‌ଦୁର୍‌ ଲୋଇ ବୁଲାତାର୍‌; ମାତର୍‌ ନାଣ୍ତ ଗୁମିଏରୁଦୁ କାଲୁ ୱାଜା ନିନୁ ୱାରି ୱେନେକା ପେର୍‌ନି ଲୋକାଙ୍ଗ୍‌ ନିର୍‌ଇ ସାମ୍‌ଦୁର୍‌ତୁ ପୋକ୍‌ତି । 12 ମାରିବା, ନିନୁ ୱେଡ଼େ ବାଦ୍‌ଡ଼ ମୁଣ୍ତା ଦାନ୍‌ ନି ନାଡ଼ା ୱାରି ବୁଲାନି ସାରିଦୁ ଜାୟ୍‌ ସିନି ଉଣ୍ତିଙ୍ଗ୍‌ ସିସୁ ମୁଣ୍ତା ଦାନ୍‌ ୱାରିଙ୍ଗ୍‌ ବୁଲାକିତି । 13 ମାରିବା ନିନୁ ମୁସ୍‌କୁପୁର୍‌ତାନ୍‌ ସିନୟ ଗରନ୍‌ତୁ ରେତାସି ୱାଜି ୱାରି ୱାଲେ ୱାର୍‌ଗିଜିସାତି ମାରି ୱାରିଙ୍ଗ୍‌ ଟିକ୍‌ ସାସନ୍ ନି ସତ୍‌ ନିୟମ୍‌, ବିଦି ମାଟା ୱେର୍‌ତି; 14 ମାରି, ୱାରିଙ୍ଗ୍‌ ନିଜେଦି ପବିତ୍ର ରମ୍‌ନି ନାଣ୍ତିଙ୍ଗ୍‌ ନେସିସ୍‌କିତି ମାରି ନିଜେଦି ସାକର୍‌ ମୋସାଦି କିୟୁଦୁ ୱାରିଙ୍ଗ୍‌ ମାଟା ନି ବିଦି ନି ନିୟମ୍‌ ୱେର୍‌ତି; 15 ମାରି, ୱାରିଙ୍ଗ୍‌ ବାଙ୍ଗାଁଦି ଉଣ୍ତିଙ୍ଗ୍‌ ୱାରିଙ୍ଗ୍‌ ମୁସ୍‌କୁପୁର୍‌ତାନ୍‌ କାଦି ସିତି ମାରି ୱାରି ଏର୍‌କି ସନି ଉଣ୍ତିଙ୍ଗ୍‌ ପିଡ଼ିପିଦାନ୍‌ ଏରୁ ସୋପ୍‌ତି, ମାରି ନିନୁ ୱାରିଙ୍ଗ୍‌ ଏମେ ଦେସ୍‌ ସିନି ଉଣ୍ତିଙ୍ଗ୍‌ କିୟୁ ପେର୍‌ତିମାର୍‌ଇ, ଆୟା ଦେସ୍‌ ଅଦିକାର୍‌ତାନ୍‌ ଆୟା ଲୋଇ ସନ୍‌ଡ୍ରେଙ୍ଗ୍‌ ୱେର୍‌ତି । 16 ମାତର୍‌ ୱାର୍‌ ନି ମା ପୁର୍ବେଦି ଡକ୍‌ରାଦାଦାର୍‌ ଗର୍ବ କିତାର୍‌ ମାରି ନିଜେ ନିଜେଦିଙ୍ଗ୍‌ ଆଟୁୱା କିତାର୍‌ ମାରି ନି ମାଟା ୱେନ୍‌ଏତାର୍‌, 17 ମାରି ୱାର୍‌ ମାନାଦେଙ୍ଗ୍‌ ବଦା ଆଏତାର୍‌, ମାରିବା ନିନୁ ୱାରି ମାନୁ ଏମେ କାବାଆନି ପାଣି କିତିମାର୍ହି, ଆକା ମନ୍‌ତୁ ଇଡ୍‌ଏତାର୍‌; ମାତର୍‌ ନିଜେ ନିଜେଦି ମନ୍‌ ଆଟ୍‌ୱା କିତାର୍‌ ମାରି ଦାସତି ଅବସ୍ତାଦାନ୍‌ ଡ଼େସିସନି ଉଣ୍ତିଙ୍ଗ୍‌ ଜୁଦ୍‌ ୱାଜା ଅରେନ୍‌ ୱାନିଙ୍ଗ୍‌ ପେରିକାନ୍‌ କିଜି ଆସ୍‌କିତାର୍‌; ମାରିବା ନିନୁ କେମା କିଦେଙ୍ଗ୍‌ ଆସା, ସାକା ନି ଲାଡ୍‌ସିତିଡ଼ି, ରିସାଦୁ ସାନ୍ତି ନି ଦୟାଦୁ ପୁରାବର୍ତି ମାପୁରୁ, ଆଦେଙ୍ଗ୍‌ ୱାରିଙ୍ଗ୍‌ ଡ଼ିସ୍‌ଇତି । 18 ହୁଁ, ଇୟାୱାଜାକି ୱାର୍‌ ବମା ଗାଡ଼ାଲ୍‌ପିଲା ତିଆର୍‌ କିଜି ଇର୍ହାର୍‌, "ଏମେ ଦିୟାମ୍‌ ମିଙ୍ଗିଁ ମିସର ଦେସ୍‌ତାନ୍‌ ସୋପ୍‌ତା ତାତାତ୍‌, ୱାଦ୍‌ ଇକାତ୍‌," ଇକା ଇନିଞ୍ଜି ପ୍ରବୁଙ୍ଗୁଁ ବେସି ଅପ୍‌ମାନ୍‌ କିତାର୍‌; 19 ନାସ୍ତିୱାଲେ ମିରୁ ନିଜେଦି ନାଣ୍ତ ଦୟାଦାନ୍‌ ୱାରିଙ୍ଗ୍‌ ବାଲିବୁମିଦୁ ଡ଼ିସ୍‌ଇତି; ସାରି ତର୍‌ନି ଉଣ୍ତିଙ୍ଗ୍‌ ୱେଡ଼େ ବାଦ୍‌ଡ଼ ମୁଣ୍ତା, ମାରି ୱାରିଙ୍ଗ୍‌ ଜାୟ୍‌ ନି ସିକାଟି ସାରି ତର୍‌ନି ଉଣ୍ତିଙ୍ଗ୍‌ ନାଡ଼ା ସିସୁ ମୁଣ୍ତା ୱାରି ଆଗ୍‌ଡ଼ିରାନ୍‌ ସଲ୍‌ଏତାତ୍‌ । 20 ମାରିବା, ନିନୁ ୱାରିଙ୍ଗ୍‌ ସିକିୟା ସିନି ଉଣ୍ତିଙ୍ଗ୍‌ ନିଜେଦି ନେଗି ଆତ୍ମା ସିତି ମାରି ୱାରି ୱେୟୁଦାନ୍‌ ନିଜେଦି ମାନ୍ନା ତେବାକିଏତି ମାରି ୱାରି ଏର୍‌କି ସନି ଉଣ୍ତିଙ୍ଗ୍‌ ୱାରିଙ୍ଗ୍‌ ଏରୁ ସିତି । 21 ନିନୁ ସାଲିସ୍‌ ବାର୍ସେକ୍‌ ସାନ୍ଧି ବାଲିବୁମିଦୁ ୱାରିଙ୍ଗ୍‌ ସେବାକିତି, ୱାରିଙ୍ଗ୍‌ ଇନିକାବା ଉଣା ଆଏତାତ୍‌; ୱାରି ୱାତିଗନ୍ଦା କିଜ୍‌ଏତାତ୍‌ ମାରି ୱାରି ପାଦାମ୍‌କୁ ୱାସ୍‌ଉତେ । 22 ମାରିବା, ନିନୁ ୱାରିଙ୍ଗ୍‌ ଆଇଆଇ ରାଜି ନି କୁଟୁମ୍‌ ସିତି ମାରି ଆକା ୱାରି ବାଟାକିନି ଇସାବ୍‌ତାନ୍‌ ତିର୍‌ କିତି; ଆବେଟ୍‌ ୱାର୍‌ ସିହୋନ ଦେସ୍‌, ମାରି, ହିସ୍‌ବୋନ ରାଜାଦି ଦେସ୍‌ ନି ବାଶନଦି ଅଗ୍‌ ରାଜାଦି ଦେସ୍‌ ଅଦିକାର୍‌ କିତାର୍‌ । 23 ମାରିବା, ନିନୁ ୱାରି ମାରିନ୍‌କାଙ୍ଗ୍‌ ବାଦ୍‌ଡ଼ତି ସୁକେଙ୍ଗ୍‌ ୱାଜା ନାଣ୍ତ କିତି ମାରି ଏମେ ଦେସ୍‌ ୱାର୍‌ ଅଦିକାର୍‌ କିଦେଙ୍ଗ୍‌ ସନାର୍‌ ଇଜି ନିନୁ ୱାରି ବୁବାସିରିଙ୍ଗ୍‌ ୱେର୍‌ତି ମାର୍ହି, ଆୟା ଦେସ୍‌ତୁ ୱାରିଙ୍ଗ୍‌ ତାତି । 24 ଇୟା ୱାଜା ଆୟା ମାରିନ୍‌କୁ ଦେସ୍‌ତୁ ସୋଲ୍‌ସି ଅଦିକାର୍‌ କିତାର୍‌, ମାରି ନିନୁ ୱାରି ଆଗ୍‌ଡ଼ି ଆୟା ଦେସ୍‌ତି କିଣାନିୟରିଙ୍ଗ୍‌ ଆରା କିତାର୍‌ ମାରି ୱାର୍‌ ଏଣ୍ତେସ୍‌ ନିଜେଦି ବଦାଦାନ୍‌ ସାଲାବୁଲା କିନାର୍‌, ଇୟାଉଣ୍ତିଙ୍ଗ୍‌ ୱାରିଙ୍ଗ୍‌ ନି ୱାରି ରାଜାରିଙ୍ଗ୍‌ ନି ଦେସ୍‌ତି ଆଇଆଇ କୁଡ଼ାଦିଙ୍ଗ୍‌ ୱାରି କିୟୁଦୁ ସର୍‌ପେ କିତି । 25 ଆବେଟ୍‌ ୱାର୍‌ ନିର୍‌ଇ ଗଡା ତିଆର୍‌ଆତି ଗାଡ଼୍‌କାଙ୍ଗ୍‌ ୱିଜୁ ମାରି ନେଗି ବୁମି ଅତାର୍‌, ୱିଜୁ ରକମ୍‌ତି ନେଗି ଜିନିସ୍‌ତାନ୍‌ ପୁରାବର୍ତି ଇଲୁ, କାରିତିମାନି କୁଇଁକାଲ୍‌, ଅଙ୍ଗୁର୍‌ କିଡ଼ିଇ ନି ଜିତ କିଡ଼ିଇ ମାରି ନାଣ୍ତ ପଲ୍‌ ମାରାକ୍‌ ଅଦିକାର୍‌ କିତାର୍‌; ଆବେଟ୍‌ ୱାର୍‌ ଉଣୁଜି ପାଜିତାର୍‌ ମାରି ବାଲ୍‌ସ୍‌ତାର୍‌ ମାରି ନି ଆର୍ସିବାଦ୍‌ତୁ ୱେଡ଼ିକା କିତାର୍‌ । 26 ମାରିବା ୱାର୍‌ ମାନାଏତାର୍‌ ମାରି ନି ବିରୁଦ୍‌ତାନ୍‌ ଜୁଦ୍‌ କିତାର୍‌ ମାରି ନି ନିୟମ୍‌ ନିଜେଦି ୱେନେକା ପୋକ୍‌ତାର୍‌, ମାରି ନି ଏମେ ବବିସ୍ୟଦ୍‌ବକ୍ତାର୍‌ ୱାରିଙ୍ଗ୍‌ ନି ଉଣ୍ତିଙ୍ଗ୍‌ ମାରିଡ଼େସି ୱାଦେଙ୍ଗ୍‌ ଇଜି ୱାରିଙ୍ଗ୍‌ ୱେର୍‌ତାର୍‌, ଆଦେଙ୍ଗ୍‌ ୱାରିଙ୍ଗ୍‌ ଡାକ୍‌ତାର୍‌ ମାରି ଅପ୍‌ମାନ୍‌ ପାଣି କିତାର୍‌ । 27 ଇୟାଉଣ୍ତିଙ୍ଗ୍‌ ମିରୁ ୱାରିଙ୍ଗ୍‌ ଆଇତରିଟି ୱାରି କିୟୁଦୁ ସର୍‌ପେ କିତି, ୱାର୍‌ ୱାରିଙ୍ଗ୍‌ କାସ୍ଟୁ ସିତାର୍‌; ମାତର୍‌ କାସ୍ଟୁ ବେଡ଼ାଦୁ ୱାର୍‌ ନି ଲାକ୍‌ତୁ ଆଡ଼ାବାତାର୍‌, ନିନୁ ମୁସ୍‌କୁପୁର୍‌ତାନ୍‌ ଆକା ୱେର୍‌ଇ; ମାରି, ନିଜେଦି ନାଣ୍ତ ଦୟା ଇସାବ୍‌ତାନ୍‌ ୱାରିଙ୍ଗ୍‌ ୱାରି ସାତ୍ରୁରି କିୟୁଦାନ୍‌ ୱାରିଙ୍ଗ୍‌ ରକିୟା କିତି । 28 ମାତର୍‌ ୱାର୍‌ ରମ୍‌ନିକା ପୟ୍‌ତି ୱେନେକା ମାରିଡ଼େସି ନି ଆଗ୍‌ଡ଼ି ତାଗ୍‌ଇ ପାଣି କିତାର୍‌; ଇୟାଉଣ୍ତିଙ୍ଗ୍‌ ନିନୁ ୱାରିଙ୍ଗ୍‌ ସାତ୍ରୁରି କିୟୁଦୁ ସର୍‌ପେ କିତି, ୱାର୍‌ ୱାରି ମୁସ୍‌କୁ ସାସନ୍ କିତାର୍‌, ମାରିବା ଏସ୍ତିୱାଲେ ୱାର୍‌ ଡ଼େସିୱାଜି ନି ଲାକ୍‌ତୁ ଆଡ଼ାବାତାର୍‌, ନାସ୍ତିୱାଲେ ନିନୁ ମୁସ୍‌କୁପୁର୍‌ତାନ୍‌ ୱେର୍‌ଇ; ମାରି, ନାଣ୍ତ ଦେବେଙ୍ଗ୍‌ ନିନୁ ନିଜେଦି ଦୟା ଇସାବ୍‌ତାନ୍‌ ୱାରିଙ୍ଗ୍‌ ରକିୟା କିତି । 29 ମାରି, ୱାରିଙ୍ଗ୍‌ ମାରିଡ଼େସି ନିଜେଦି ନିୟମ୍‌ଦି ରୁପ୍‌ ସାରିଦୁ ତାନି ଉଣ୍ତିଙ୍ଗ୍‌ ୱାରିଙ୍ଗ୍‌ ୱେର୍‌ତି; ମାରିବା ୱାର୍‌ ଗର୍ବ କିତାର୍‌ ମାରି ନି ମାଟାଦିଙ୍ଗ୍‌ ୱେନ୍‌ଏତାର୍‌, ମାତର୍‌ ଏମେକା ମାନାତିଙ୍ଗ୍‌ ଲୋକୁ ଜିନାନ୍‌, ନି ଆୟା ସାସନ୍ ବିରୁଦ୍‌ତାନ୍‌ ପାପ୍‌ କିତାର୍‌, ମାରି ମନ୍‌ ଦିୟାନ୍‌ କିଏତାର୍‌ ମାରି ନିଜେ ନିଜେଦି ମନ୍‌ ଆଟ୍‌ୱା କିତାର୍‌ ମାରି ୱେନ୍‌ଡ୍ରେଙ୍ଗ୍‌ ବଦା କିଏତାର୍‌ । 30 ମାରିବା ନାଣ୍ତ ବାର୍ସେକ୍‌ ସାନ୍ଧି ନିନୁ ୱାରି ମାଟାଦିଙ୍ଗ୍‌ ସାସ୍‌ କିତି ମାରି ନିଜେଦି ଆତ୍ମାଦି ମାଣାନ୍‌ ନିଜେଦି ବବିସ୍ୟଦ୍‌ବକ୍ତାରିଙ୍ଗ୍‌ ସିଜି ୱାରିଙ୍ଗ୍‌ ୱେର୍‌ତି; ମାତର୍‌ ୱାର୍‌ ୱେନ୍‌ଡ୍ରେଙ୍ଗ୍‌ ବଦା କିଏତାର୍‌; ଇୟାଉଣ୍ତିଙ୍ଗ୍‌ ନିନୁ ୱାରିଙ୍ଗ୍‌ ଆଇ ଦେସ୍‌ତି ଗସ୍ଟିଦିୱାରି କିୟୁଦୁ ସର୍‌ପେ କିତି । 31 ମାରିବା ନିନୁ ନିଜେଦି ନାଣ୍ତ ଦୟାଦାନ୍‌ ୱାରିଙ୍ଗ୍‌ ନାସ୍ଟୁ କିଏତି, ମାରି ୱାରିଙ୍ଗ୍‌ ଡ଼ିସ୍‌ଏତି; ଇରିଙ୍ଗ୍‌ ନିନୁ ସାକା ନି ଦୟାକିନି ମାପୁରୁ । 32 ଇୟାଉଣ୍ତିଙ୍ଗ୍‌ ଏ ମା ମାପୁରୁ, ପେରିକାନ୍‌, ନାଣ୍ତସାକ୍ତି ମାରି ବୟ୍‌ଙ୍କାର୍‌ତି ମାପୁରୁ, ନିନୁ ନିୟମ୍‌ ନି ଦୟା ମାନାନି, ଅସୁରିୟ ରାଜାରି ବେଡ଼ାଦାନ୍‌ ନେରୁ ସାନ୍ଧି ମା ମୁସ୍‌କୁ, ମା ପେରିୱାରି ମୁସ୍‌କୁ, ମା ଜାଜକରି ମୁସ୍‌କୁ ମାରି ମା ବବିସ୍ୟତ୍‌ବକ୍ତାରି ମୁସ୍‌କୁ ମାରି ମା ପୁର୍ବେଦି ଡକ୍ରାଦାଦାରି ମୁସ୍‌କୁ ମାରି ନି ୱିଜେରି ଲୋକା ମୁସ୍‌କୁ ଆମା ଆମା କାସ୍ଟୁ ଗଟାତାମାନାତ୍‌, ଆୟାୱିଜୁ ନି ଆଗ୍‌ଡ଼ି ଇସ୍ରିକା ତର୍‌ମାକିତ୍‌ । 33 ମାରିବା ମା ଉଣ୍ତିଙ୍ଗ୍‌ ଆମା ଆମାକା ଗଟାତାମାନାତ୍‌, ଆୟାୱିଜୁଦୁ ନିନୁ ଦାର୍ମୁ ମାପୁରୁ; ଇରିଙ୍ଗ୍‌ ନିନୁ ସତ୍‌ତାନ୍‌ ବ୍ୟବ୍‌ହାର୍‌ କିତିମାନି, ମାତର୍‌ ମାପୁ ତାଗ୍‌ଇପାଣି କିତାମାନା । 34 ମାରି, ମା ରାଜାର୍‌, ମା ୱିଜେରିଙ୍ଗ୍‌ ପେରିକାନ୍‌, ମା ଜାଜକର୍‌ ମାରି ମା ପୁର୍ବେଦି ଡକ୍ରାଦାଦାର୍‌ ମି ନିୟମ୍‌ ମାନାଏର୍‌, ମାରିବା ମିରୁ ନିଜେଦି ଆମା ମାଟା ନି ସାକି ଦାନ୍‌ ୱାରିଙ୍ଗ୍‌ ୱେର୍‌ତାପ୍‌, ଆବେଟ୍‌ ୱେନ୍‌ଏତାର୍‌ । 35 ଆବେଟ୍‌ ୱାର୍‌ ନିଜେଦିୱାରି ଦେସ୍‌ତୁ, ୱାରିଙ୍ଗ୍‌ ନି ସିତିମାନି ପେରିପାଣିଦୁ ମାରି ୱାରି ଆଗ୍‌ଡ଼ି ନି ସର୍ପେଆତି ଅସାର୍‌ ନି ନେଗି ବୁମିଦି ଦେସ୍‌ତୁ ନି ସେବା କିଏର୍‌, ମାରିବା ନିଜେ ନିଜେଦି ତାଗ୍‌ଇପାଣିଦାନ୍‌ ଡ଼େସି ରେଏର୍‌ । 36 ସୁଡ଼ୁଦୁ, ନେରୁ ମାପୁ ସାକର୍‌ ଆତାମାନାପ୍‌, ମାରି ମିରୁ ମା ପୁର୍ବେଦି ଡକ୍ରାଦାଦାରିଙ୍ଗ୍‌ ଆମା ଦେସ୍‌ତି ପଲ୍‌ ନି ନେଗି ଜିନିସ୍‌ ତିନ୍‌ଡ୍ରେଙ୍ଗ୍‌ ସିତିମାର୍‌ଇ, ସୁଡ଼ୁଦୁ, ଆୟା ଦେସ୍‌ତୁ ମାପୁ ସାକର୍‌ ଆତାମାନାପ୍‌ । 37 ମାରି, ମା ପାପ୍‌ ଉଣ୍ତିଙ୍ଗ୍‌ ନିନୁ ଆମା ରାଜାରିଙ୍ଗ୍‌ ମା ମୁସ୍‌କୁ ତିଆର୍‌ କିତିମାନି, ୱାର୍‌ ଆୟା ଦେସ୍‌ତି ନାଣ୍ତ ପଲ୍‌ ସୋପ୍‌ସି ତିନ୍‌ଞ୍ଜିନାର୍‌; ମାରିବା ମା ମେନ୍ଦଲ୍‌ ମୁସ୍‌କୁ ମାରି ମା ଜାତୁଙ୍ଗାଁ ମୁସ୍‌କୁ ୱାରି ନିଜେଦି ଅଦିକାର୍‌ ମାନାତ୍‌, ମାରି ମାପୁ ନାଣ୍ତକାସ୍ଟୁଦୁ ମାନାପ୍‌;

38 ଇୟାୱିଜୁ ଗଟାତିଙ୍ଗ୍‌ ବା ମାପୁ ଉନ୍‌ଡ୍ରି ଟିକ୍‌ ନିୟମ୍‌ କିଜି ଆକା ରାସ୍‌ତାମାନାପ୍‌; ମାରି, ମା ୱିଜେରିଙ୍ଗ୍‌ ପେରିକାର୍‌, ମା ଲେବିୟର୍‌ ମାରି ମା ଜାଜକର୍‌ ଆକା ଟାପ୍‌ ଡାକ୍‌ତାମାନାର୍‌ ।