1 ମାତର୍‌ ମାପୁ ଗଡା ତିଆର୍‌ କିଜିନାପ୍‌ ଇଜି ୱେନ୍‌ଞ୍ଜି ସନ୍‌ବଲ୍ଲଟ୍‌ ଗିଦିରି ମାରି ନାଣ୍ତ ରିସା ଆଜି ଜିହୁଦିୟରିଙ୍ଗ୍‌ ସେମାର୍‌ କିତାନ୍‌ । 2 ମାରି, ୱାନ୍‌ ନିଜେଦି ତଡ଼ାନ୍‌କୁ ନି ଶମରିୟା ସନ୍ୟଦଲ୍‌ ଆଗ୍‌ଡ଼ି ଇୟା ମାଟା ଇର୍ହାନ୍‌, "ଇୟା ସାକିସିଲି ଜିହୁଦିୟର୍‌ ଇନିକା କିଜିନିଦେର୍‌ ? ୱାର୍‌ ଇନିକା ଗାଡ଼୍‌ ବନ୍ଧ୍‌ କିଜି ତେବାନାର୍‌ ? ୱାର୍‌ ଇନିକା ବଲିଦାନ୍‌ କିନାର୍‌ ? ୱାର୍‌ ଇନିକା ଅର୍‌ଲେଟିଙ୍ଗ୍‌ ୱିସ୍‌ନାର୍‌ ? ୱାର୍‌ ଇନିକା ସାତ୍‌ଇଲୁଦାନ୍‌ ୱେତି କାଲୁ ଆଦ୍‌ଜି ଜିବନ୍‌ କିନାର୍‌ ?"

3 ଇୟା ବେଡ଼ାଦୁ ଅମ୍ମୋନିୟ ଟୋବିୟ ଆୟା ଲାକ୍‌ତୁ ମାର୍ହାନ୍‌, ମାରି ୱାନ୍‌ ଇର୍ହାନ୍‌, "ୱାର୍‌ ଆମାକା ତିଆର୍‌ କିଜିନାର୍‌, ଗଲୁ ଏକ୍‌ତିଙ୍ଗ୍‌ ୱାରି କାଲୁକୁ ଗଡା ରୁକୁନା ପୋକ୍‌ନାତ୍‌ ।"

4 ଏ ମା ମାପୁରୁ, ୱେନ୍‌ଆ; ଇରିଙ୍ଗ୍‌ ମାପୁ ସେମାର୍‌ କୁତାଜିନାପ୍‌; ୱାରି ସେମାର୍‌ ୱାରି ନିଜେଦି ତାଲାଦୁ ଆରିତ୍‌ ମାରି ୱାରିଙ୍ଗ୍‌ ଆଇଦେସ୍‌ତୁ ତର୍‌ସି ଡଙ୍ଗାଁ ଆଦେଙ୍ଗ୍‌ ସର୍‌ପେ କିଦୁ; 5 ମାରି ୱାରି ଅଦାର୍ମୁ ପିଡ଼ିକାମାଟ୍‌ ମାରି ମି ଆଗ୍‌ଡ଼ିରାନ୍‌ ୱାରି ପାପ୍‌ କେମା କିମାଟ୍‌; ଇରିଙ୍ଗ୍‌ ତିଆର୍‌କିନିୱାରି ଆଗ୍‌ଡ଼ି ୱାର୍‌ ମିଙ୍ଗିଁ ରିସା କିତାମାନାର୍‌ । 6 ଇୟାୱାଜା ମାପୁ ଗଡା ତିଆର୍‌ କିତାପ୍‌ ମାରି ଆବେଣି ଉଛାଦି ନାଣିମି ସାନ୍ଧି ୱିଜୁ ଗଡା ଉଡ୍ରେମାନୁ ମିସା କିତାର୍‌; ଆଦେଙ୍ଗ୍‌ ପାଣି କିଦେଙ୍ଗ୍‌ ଲୋକା ମନ୍‌ ମାର୍ହାତ୍‌ ।

7 ମାତର୍‌ ଜିରୁସାଲମତି ଗଡାଦି ତିଆର୍‌କିନି ପାଣି ନାଣ୍ତ ଆଜିନାତ୍‌ ମାରି ରୁଙ୍ଗିଁତି ବାଡିଙ୍ଗ୍‌ ୱିଜୁ ବନ୍ଧ୍‌ ଆଜିନେ, ଇକା ୱେନ୍‌ଞ୍ଜି ସନ୍‌ବଲ୍ଲଟ୍‌ ନି ଟୋବିୟ, ମାରି ଆରବିୟର୍‌ ନି ଅମ୍ମୋନିୟର୍‌ ନି ଅସ୍‌ଦୋଦିୟର୍‌ ନାଣ୍ତ ରିସା ଆତାର୍‌ । 8 ମାରି, ଆୟାୱିଜେରେ ଜିରୁସାଲମତୁ ସୋଲ୍‌ସି ଆୟା ବିରୁଦ୍‌ତାନ୍‌ ଜୁଦ୍‌ କିଦେଙ୍ଗ୍‌ ମାରି ଆୟା ଲୋଇ ଜାଟିଜଗଡ଼ା କିଦେଙ୍ଗ୍‌ ଅର୍‌ସେ ଉପାୟ୍‌ କିତାର୍‌ । 9 ମାତର୍‌ ମାପୁ ୱାରି ଉଣ୍ତିଙ୍ଗ୍‌ ମାପୁରୁଦି ଲାକ୍‌ତୁ ପାର୍‌ତନା କିତାପ୍‌ ମାରି ୱେଡ଼େନାଡ଼ା ୱାରି ବିରୁଦ୍‌ତାନ୍‌ କାପ୍‌କିତାପ୍‌ ।

10 ନାସ୍ତିୱାଲେ ଜିହୁଦା ଇର୍ହାନ୍‌,

"ବଜୁ ପିଣ୍ତିନିୱାରି ବପୁ ଉଣା ଆତାମାନାତ୍‌,

ମାରି ନାଣ୍ତ ରୁଙ୍ଗିଁତି ଗଡେଙ୍ଗ୍‌ ମାନେ;

ଆଦେଙ୍ଗ୍‌ ମାଡୁ ଗଡା ତିଆର୍‌ କିଦେଙ୍ଗ୍‌ ଆଟ୍‌ଏଜିନିକା ।"

11 ମାରି, ମା ସାତ୍ରୁର୍‌ ଇର୍ହାନ୍‌, "ମାଡୁ ୱାରି ଲୋଇ ତେବାଜି ୱାରିଙ୍ଗ୍‌ ଡାକ୍‌ନି ମାରି ୱାରି ପାଣି ବନ୍ଦ୍‌ କିନି ସାନ୍ଧି ୱାର୍‌ ନେସ୍‌ଏର୍‌ ମାରି ସୁଡ଼ୁଏର୍‌ ।" 12 ମାରି, ୱାରି ଲାକ୍‌ତୁମାନି ଜିହୁଦିୟର୍‌ ୱିଜୁ ବାଡିଦାନ୍‌ ୱାଜି ମାଙ୍ଗିଁ ଦାସ୍‌ ଦେବେଙ୍ଗ୍‌ ଇର୍ହାର୍‌, "ମିଙ୍ଗିଁ ମା ଲାକ୍‌ତୁ ଡ଼େସି ୱାଦେଙ୍ଗ୍‌ ଆନାତ୍‌ ।" 13 ଇୟାଉଣ୍ତିଙ୍ଗ୍‌ ନାନୁ ଗଡା ୱେନେକା ତରିନ୍‌ ଆଡ୍‌ଗିରି ମେଲା ବାଡିଦୁ ଲୋକାଙ୍ଗ୍‌ ୱାରି ଇଲୁ ଇସାବ୍‌ତାନ୍‌ ୱାରି କାଣ୍ତା ନି ଇଟା ମାରି ଦନୁତିର୍‌ଦି ୱାଲେ ମିସା କିତା ।

14 ଆବେଟ୍‌ ନାନୁ ସୁଡ଼ୁତା ମାରି ନିଙ୍ଗିଁଜି ପେରିୱାରିଙ୍ଗ୍‌ ମାରି ନେତାରିଙ୍ଗ୍‌ ମାରି ଆଇଆଇ ଲୋକାଙ୍ଗ୍‌ ଇର୍ହା; "ମିରୁ ୱାରି ବିସୟ୍‌ତାନ୍‌ ତିଲାମାଟ୍‌; ପ୍ରବୁଙ୍ଗୁଁ ଏତ୍‌ କିଦୁ, ୱାନ୍‌ ପେରିକାନ୍‌ ମାରି ବୟଙ୍କାର୍‌ତିକାନ୍‌, ମାରି ମିରୁ ନିଜେ ନିଜେଦି ତଡ଼ାନ୍‌କୁ, ମାରିନ୍‌ ନି ଗାଡ଼ିସିକ୍‌, ନିଜେ ନିଜେଦି ଆଡ଼ିସିକ୍‌ ନି ଇଲୁ ଉଣ୍ତିଙ୍ଗ୍‌ ଜୁଦ୍ଧ କିଦୁ ।"

15 ୱେନେକା ମା ସାତ୍ରୁରି ଉପାୟ୍‌ ମାଙ୍ଗିଁ ଜାଣା ଆତାମାନାତ୍‌ ମାରି ମାପୁରୁ ଆକା ୱେରେଏ କିତାମାନାନ୍‌, ଇକା ୱାର୍‌ ୱେର୍ହାର୍‌, ମାପୁ ୱିଜେରେ ଗଡାଦି ନିଜେ ନିଜେଦି ପାଣିଦୁ ଡ଼େସିସର୍ହାପ୍‌ ।

16 ମାରି, ଆୟା ନାଣ୍ତିରାନ୍‌ ମା ଦାସକୁ ଏସୋଲୋକୁ ପାଣି କିତାର୍‌ ମାରି ୱାରି ଏସୋଲୋକୁ ଇଟା, ଆଡ଼ୁକାଆନି ପାଟା, ଦନୁତିର୍‌, ମାରି ମେନ୍ଦଲତୁ ଆରାନି ସାଜୁ ଆସ୍‌ସି ତେବାତାର୍‌; ମାରି, ପେରିକାର୍‌ ଜିହୁଦାଦି ୱିଜୁ କୁଟୁମ୍‌ତି ୱେନେକା ତେବାତାର୍‌ । 17 ଏମେକାର୍‌ ଗଡା ତିଆର୍‌ କିତାର୍‌ ମାରି ଏମେକାର୍‌ ବଜୁ ପିଣ୍ତିତାର୍‌, ୱାର୍‌ ନିଜେ ନିଜେ ବଜୁ ନିକ୍‌ତାର୍‌, ୱିଜେରେ ଉଡ୍ରେ କିୟୁଦାନ୍‌ ପାଣି କିତାର୍‌ ମାରି ଆଇ କିୟୁଦୁ ସାମାନ୍‌ ଆସ୍‌ତାର୍‌; 18 ମାରି, ତିଆର୍‌କିନିକାର୍‌ ୱିଜେରେ ନିଜେ ନିଜେଦି ମେପିଦୁ କାଣ୍ତା ତର୍ରାଜି ଆୟାୱାଜା ପାଣି କିତାର୍‌ । ମାରି, ମରି ଉକୁନି ଲୋକୁ ମା ଡାଗୁରୁ ତେବାତାନ୍‌ । 19 ଇୟାୱେନେକା ମାପୁ ପେରିୱାରିଙ୍ଗ୍‌ ମାରି ନେତାରିଙ୍ଗ୍‌ ମାରି ଆଇଆଇ ଲୋକାଙ୍ଗ୍‌ ଇର୍ହାପ୍‌, ପାଣି ବଜୁ ନି ପାର୍‌ନିକା, ମାରି ମାପୁ ଗଡା ମୁସ୍‌କୁ ୱେରେଏ ଆଜି ଅରେନ୍‌ୱାନି ମାଣାନ୍‌ ମାରିଅରେନ୍‌ ଆକ ମାନାପ୍‌; 20 ଇୟାଉଣ୍ତିଙ୍ଗ୍‌ ଏମେ ବାଡିଦୁ ମରିଦି ଆଉଲି ୱେନିଦେର୍‌, ଆୟା ବାଡିଦାନ୍‌ ମା ଲାକ୍‌ତୁ ୱାନିଦେର୍‌; ମା ମାପୁରୁ ମା ତରିନ୍‌ ଜୁଦ୍‌ କିନାନ୍‌ । 21 ଇୟାୱାଜା ମାପୁ ଆୟା ପାଣିଦୁ କାସ୍ଟୁ କିତାପ୍‌, ମାରି ଉଟୁଲା ନାଡ଼ାରାନ୍‌ ସୁକେଙ୍ଗ୍‌ ନାଡ଼ା ତର୍‌ନି ସାନ୍ଧି ୱାରି ଏସୋଲୋକୁ ଇଟେଙ୍ଗ୍‌ ଆସ୍‌ତାର୍‌ । 22 ଆୟା ବେଡ଼ାଦୁ ମାପୁ ଲୋକାଙ୍ଗ୍‌ ମାରିଅର୍‌ସୁ ଇର୍ହାପ୍‌, ୱିଜେରେ ଲୋକୁ ନାଡ଼ା ନିଜେ ନିଜେଦି ଦାସତି ୱାଲେ ଜିରୁସାଲମ ଲୋଇ ତେବାପିର୍‌, ଆବେଟ୍‌କୁ ୱାର୍‌ ନାଡ଼ା ମା କାପ୍‌କିନିକାର୍‌ ଆଦେଙ୍ଗ୍‌ ଆଟ୍‌ନାର୍‌ ମାରି ୱେଡ଼େ ପାଣି କିଦେଙ୍ଗ୍‌ ଆଟ୍‌ନାର୍‌ । 23 ଇୟାୱାଜା ମାପୁ କି ମା ତଡ଼ାନ୍‌କୁ କି ମା ଦାସକୁ ମାରି ମା ୱେନେକାମାନି କାପ୍‌କିନିକାର୍‌ ଏନ୍‌ ନିଜେଦି ମେନ୍ଦଲତାନ୍‌ ଆଙ୍ଗିଁ କୁତ୍‌ଏତାପ୍‌, ୱିଜେରେ ନିଜେ ନିଜେଦି ସାମାନ୍‌ତି ୱାଲେ ଏରୁ ଲାକ୍‌ତୁ ସର୍ହାପ୍‌ ।