ଆଇଦେସ୍ତି ୱାରି ମାଣାନ୍ ଆକ ତେବାନିକା
1 ଆୟା ନାଣ୍ତିଙ୍ଗ୍ ୱାର୍ ଲୋକା ମାନୁ ମସାଦି ବଇଦାନ୍ ପଡ଼ାତାନ୍; ମାରି, ଆୟା ଲୋଇ ରାସାତି ଇୟା ମାଟା ପୟ୍ତାର୍ ଜେ, ଅମ୍ମୋନିୟ ମାରି ମୋୟାବିୟ ଲୋକୁ ୱିଜୁଦିନ୍ତି ମାପୁରୁଦି କୁଟୁମ୍ତୁ ଡ଼ୁଗୁଦେଙ୍ଗ୍ ଆଟ୍ଏର୍ । 2 ଇରିଙ୍ଗ୍ ୱାର୍ କାଦି ନି ଏରୁ ଅସି ଇସ୍ରାଏଲ ଲୋକାଙ୍ଗ୍ ବେଟ୍ ଆଏତାର୍, ମାତର୍ ୱାରିଙ୍ଗ୍ ଆନାଦୁରିଆ ସିଦେଙ୍ଗ୍ ଇଜି ୱାରି ବିରୁଦ୍ତାନ୍ ବିଲିୟମ୍ତିଙ୍ଗ୍ କୁଲି ସିତାର୍; ଆତିଙ୍ଗ୍ବା ମା ମାପୁରୁ ଆୟା ଆନାଦୁରିଆଦିଙ୍ଗ୍ ଆର୍ସିବାଦ୍ତୁ ବାଦ୍ଲେ କିତାନ୍ । 3 ନାସ୍ତିୱାଲେ ୱାର୍ ଇୟା ନିୟମ୍ ୱେନ୍ଜି ଇସ୍ରାଏଲ ଲୋଇରାନ୍ ୱିଜୁ ମିସାତି ଲୋକାଙ୍ଗ୍ ୱେର୍ଏ କିତାର୍ ।
ନିହିମିୟା ବାଦେଲେକିନିକା
4 ତେନିଆଗ୍ଡ଼ି ଇଲିୟାସିବ ଜାଜକ ମା ମାପୁରୁଦି ପାର୍ତନା ଇଲୁଦି ବାକ୍ରା ୱିଜୁଦି ନେତା ଇସାବ୍ତାନ୍ ବାସେ ଆତାନ୍ ମାରି ୱାନ୍ ଟୋବିୟଦି କୁଟୁମ୍ ମାର୍ହାନ୍ । 5 ଇଲିୟାସିବ ଟୋବିୟ ଉଣ୍ତିଙ୍ଗ୍ ଉଣ୍ତ୍ରି ପେରି ବାକ୍ରା ତିଆର୍ କିତାମାର୍ହାନ୍, ମାତର୍ ଆଗ୍ଡ଼ି ଲୋକୁ ଆୟା ବାଡିଦୁ କାଦି ପୁଜା, ଦୁପ୍ଣି ମାରି ସାଟି ୱିଜୁ ମାରି ମାଟା ଇସାବ୍ତାନ୍ ଲେବିୟ ମାରି ପାର୍ତନା ଇଲୁଦୁ ପର୍ନିକାର୍ ମାରି ସେର୍ଲାକାପ୍କିନିୱାରି ଉଣ୍ତିଙ୍ଗ୍ ସିନି ପାସି, ପୁନି ଅଙ୍ଗୁର୍ରସ୍ ମାରି ନିୟୁଦି ଦସ୍ ବାଗ୍ତାନ୍ ଉଣ୍ତ୍ରି ବାଗ୍; ମାରି, ଜାଜକରି ଉଣ୍ତିଙ୍ଗ୍ ପେର୍ଜିସିନି ଦାନ୍ ଇଡ୍ଜିମାର୍ହାର୍ । 6 ମାତର ନାନୁ ଇୟାୱିଜୁ ବେଡ଼ାଦୁ ଜିରୁସାଲାମ୍ତୁ ସିଲେତା, ଇରିଙ୍ଗାଁ ବାବିଲତି ଅର୍ତ୍ତକ୍ଷସ୍ତ ରାଜାଦି ସାସନ୍ତି ତିରିସ୍ ଦୁଇ ବାର୍ସେକ୍ତୁ ନାନୁ ରାଜାଦି ଲାକ୍ତୁ ସର୍ହା ମାରି ଏସ ଦିନ୍ ୱେନ୍କା ରାଜେଙ୍ଗ୍ ସନ୍ଡ୍ରେଙ୍ଗ୍ ଇଜି ସାରି ଲସ୍ତା । 7 ଇୟାୱେନ୍କା ନାନୁ ଜିରୁସାଲମତୁ ୱାଜି ଇଲିୟାସିବ, ଟୋବିୟ ଉଣ୍ତିଙ୍ଗ୍ ମାପୁରୁଦି ପାର୍ତନା ଇଲୁଦି ଦୁୱାର୍ତୁ ଉନ୍ଡ୍ରି ବାକ୍ରା କିଜି ଆମା ବୁଲ୍ କିତାମାର୍ହାନ୍, ଆକା ବୁଜାତା । 8 ଇବେନୁ ନାନୁ ନାଣ୍ତ ରିସା ଆଜି ଆୟା ବାକ୍ରାଦାନ୍ ଟୋବିୟଦି ୱିଜୁ ଇଲୁ ଜିନିସ୍ ସୋପ୍ସି ପୋକ୍ତା । 9 ଆବେଟ୍ ନାନୁ ୱେର୍ତା, ୱାର୍ ବାକ୍ରା ୱିଜୁ ପବିତ୍ର କିତାର୍; ଆଦେଙ୍ଗ୍ ନାନୁ ଆବେନୁ ମାରିଡ଼େସି ମାପୁରୁଦି ଇଲୁଦି ଡୁବାଇଙ୍ଗୁଁ ୱିଜୁ ମାରି କାଦି ପୁଜା ନି ଦୁପ୍ଣି ତାତା ।
10 ମାରିବା, ନାନୁ ସୁଡ଼ୁତା ଜେ, ଲେବିୟରି ବାଗ୍ ୱାରିଙ୍ଗ୍ ସିଆୟ୍ ଆଏତ୍ ମାର୍ହାତ୍; ଆଦେଙ୍ଗ୍ ୱିଜେରେ ପାଣିକିନିକାର୍ ଲେବିୟର୍ ନି ପାଟାପାର୍ନିକାର୍ ପାର୍ତନା ଇଲୁ ଡ଼ିସ୍ସି ନିଜେ ନିଜେ ବାଡିଦୁ ସର୍ହାର୍ । 11 ଆବେନୁ ଏନ୍ଦା ମାପୁରୁଦି ପାର୍ତନା ଇଲୁ ହେଲା ଆତାମାନାତ୍ ? ଇକା ୱେର୍ସି ନାନୁ ପେରିୱାରି ୱାଲେ ୱାର୍ଗିତା, ମାରି, ନାନୁ ୱାରିଙ୍ଗ୍ ଉଣ୍ତା କିଜି ନିଜେ ନିଜେ ପଦ୍ତୁ ୱାରିଙ୍ଗ୍ ଆସ୍କିତା । 12 ଆବେଟ୍ ୱିଜୁ ଜିହୁଦା ପାସି ନି ଅଙ୍ଗୁର୍ରସ ନି ନିୟୁଦି ଦସ୍ବାଗ୍ତାନ୍ ଉଡ୍ରେ ବାଗ୍ କାଦିଇଡ୍ନି ଇଲୁଦୁ ତାତାର୍ । 13 ଆବେଟ୍ ନାନୁ ଶେଲିମିୟ ଜାଜକଦିଙ୍ଗ୍ ନି ସାଦୋକ ପେରିୱାନିଙ୍ଗ୍ ନି ଲେବିୟରି ମାଣାନ୍ ପଦାୟଦିଙ୍ଗ୍ କାଦିଇଡ୍ନି ଇଲୁଦି ପେରିକାନ୍ କିତା; ୱାରି ଆଡ୍ଗି ମତ୍ତନିୟଦି ନାତି ସକ୍କୁରଦି ମାରିନ୍ ହାନନ୍ ତେବାତାନ୍; ଇରିଙ୍ଗ୍ ୱାର୍ ବିସ୍ବାସ୍ତିକାର୍ ମାର୍ହାର୍, ଆଦେଙ୍ଗ୍ ନିଜେଦି ତଡ଼ାନ୍କାଙ୍ଗ୍ ସାଲାକିନି ପାଣି ୱାରିନ୍ଦି ଆତାତ୍ ।
14 ଏ ନା ମାପୁରୁ, ଇୟା ବିସୟ୍ତାନ୍ ନାଙ୍ଗିଁ ଏତ୍ କିଦୁ, ମାରି ନାନୁ ନା ମାପୁରୁଦି ଇଲୁ ନି ଆବେଣି ମାନାନି ବିସୟ୍ ଉଣ୍ତିଙ୍ଗ୍ ଆମାକା କିତାମାନା, ନା କିତି ଆୟା ନେଗି ପାଣି ୱିଜୁ ବାଣାମା ।
15 ଆୟା ବେଡ଼ାଦୁ ନାନୁ ଜିହୁଦାଦୁ ବା ଏସ ଲୋକାଙ୍ଗ୍ ରମ୍ନିନାଣ୍ତିଙ୍ଗ୍ ଅଙ୍ଗୁର୍ ପିରିନିକା ନି କାଟେଙ୍ଗ୍ ଲୋଇ ତାନିକା ନି ଗଦ ମୁସ୍କୁ ଲାଦେ କିନିକା, ମାରିବା ରମ୍ନିନାଣ୍ତିଙ୍ଗ୍ ଅଙ୍ଗୁର୍ରସ୍, ଅଙ୍ଗୁର୍ ପଲ୍ ନି ତଗା ପଲ୍ ନି ୱିଜୁରକମ୍ତି ବୋଜୁ ଜିରୁସାଲମତୁ ତାନିକା ସୁଡ଼ୁତା; ମାରି, ଆମା ନାଣ୍ତିଙ୍ଗ୍ ୱାର୍ କାଦି ଜିନିସ୍ ପର୍ତାର୍, ଆୟା ନାଣ୍ତିଙ୍ଗ୍ ନାନୁ ୱାରିଙ୍ଗ୍ ଜାଗାର୍ତା କିତା । 16 ମାରି ଗାଡ଼୍ଦୁ ସୋରିୟ ଲୋକୁ ବାସା କିଜିମାର୍ହାର୍, ୱାର୍ ମିନୁକୁ ନି ୱିଜୁରକମ୍ତି ପର୍ନି ଜିନିସ୍ ତାସି ରମ୍ନିନାଣ୍ତିଙ୍ଗ୍ ଜିହୁଦାଦି ଲୋକା ମାନୁ ନି ଜିରୁସାଲମତୁ ପର୍ତାର୍ । 17 ଆବେଟ୍ ନାନୁ ଜିହୁଦାଦି ନେତାରି ୱାଲେ ଜାଟିଜଗଡ଼ା କିଜି ୱାରିଙ୍ଗ୍ ୱେର୍ତା, "ମିରୁ ରମ୍ନିନାଣ୍ତିଙ୍ଗ୍ ଅପବିତ୍ର କିଜି ଇୟା ନାନି ତାଗ୍ଇ ପାଣି କିଜିନିଦେର୍ ?" 18 ମି ପୁର୍ବେଦି ଡକ୍ରାଦାଦାର୍ ଇନିକା ଇୟାୱାଜା ପାଣି କିଏତାର୍ ? ମାରି, ଆୟାଉଣ୍ତିଙ୍ଗ୍ ମା ମାପୁରୁ ଇନିକା ମା ମୁସ୍କୁ ନି ଇୟା ଗାଡ଼୍ ମୁସ୍କୁ ଇୟାୱିଜୁ ତାଗ୍ଇ ପାଣି ଗଟେ କିଏନ୍ ? ମାରିବା ମିରୁ ରମ୍ନିନାଣ୍ତିଙ୍ଗ୍ ଅପବିତ୍ର କିଜି ଇସ୍ରାଏଲ ମୁସ୍କୁ ମାରିବା ନାଣ୍ତ ରିସା ତାସିନିଦେର୍ ।
19 ଇୟାୱେନ୍କା ରମ୍ନିନାଣ୍ତିଙ୍ଗ୍ ପୁର୍ବେ ଜିରୁସାଲମତି ସେର୍ଲା ୱିଜୁ ସିକାଟି ଆଦେଙ୍ଗ୍ ଆସ୍ତିୱାଲେ ନାନୁ ସେର୍ଲେଙ୍ଗ୍ ୱିଜୁ କେର୍ତେଙ୍ଗ୍ ୱେର୍ତା, ମାରିବା ରମ୍ନିଦିନ୍ ସଲ୍ଇ ସାନ୍ଧି ରେମାଟ୍ ଇଜି ୱେର୍ତା; ମାରି, ରମ୍ନିଦିନ୍ତୁ ଇନି ଜିନିସ୍ ଲୋଇ ତେଇ ଉଣ୍ତିଙ୍ଗ୍ ନାନୁ ନିଜେଦି ଦାସରି ଲୋଇରାନ୍ ଏସ ଲୋକାଙ୍ଗ୍ ସେର୍ଲା କାପ୍କିବିସ୍ତା । 20 ଆବେନୁ ବେପାର୍କିନିକାର୍ ନି ୱିଜୁରକମ୍ ଜିନିସ୍ ପର୍ନିକାର୍ ଅର୍ଲେନ୍ ରିନେନ୍ ଜିରୁସାଲମ ଆତ୍ରେ ନାଡ଼ା ତେବାତାର୍ । 21 ଆବେନୁ ନାନୁ ୱାରିଙ୍ଗ୍ ୱେର୍ସି ୱାରିଙ୍ଗ୍ ଇର୍ହା, "ମିରୁ ଏନ୍ଧା ଗଡା ଲାକ୍ତୁ ନାଡ଼ା ତେବାଜିନିଦେର୍ ? ମିରୁ ମାରି ଉନ୍ଡ୍ରି ଦେବା ଇୟାୱାଜା କିତିଙ୍ଗ୍ ନାନୁ ମିଙ୍ଗିଁ ଆସ୍ନା ।" ଆୟା ବେଡ଼ାଦାନ୍ ୱାର୍ ମାରି ରମ୍ନିନାଣ୍ତିଙ୍ଗ୍ ରେଏତାର୍ । 22 ଇୟାୱେନ୍କା ନାନୁ ଲେବିୟରିଙ୍ଗ୍ ରମ୍ନିଦିନ୍ ପବିତ୍ର କିନି ଉଣ୍ତିଙ୍ଗ୍ ନିଜେ ନିଜେଦିଙ୍ଗ୍ ସୁଚି ମାରି ୱାଜି ସେର୍ଲେଙ୍ଗ୍ ରକିୟା କିଦେଙ୍ଗ୍ ୱେର୍ତା । ଏ ନା ମାପୁରୁ, ନା ତରିନ୍ ଇକା ବା ଏତ୍ କିଆ ମାରି ନିଜେଦି ନାଣ୍ତ ଦୟା ଇସାବ୍ତାନ୍ ନାଙ୍ଗିଁ ରକିୟା କିଆ ।
23 ଆୟା ବେଡ଼ାଦୁ ବା ଆମା ଜିହୁଦିର୍ ଅସ୍ଦୋଦ, ଅମ୍ମୋନିୟ ନି ମୋୟାବିୟ ଦେସ୍ତି ଆଇମେକାଙ୍ଗ୍ ପେଡ଼ି ଆତାମାର୍ହାର୍, ୱାରିଙ୍ଗ୍ ନାନୁ ସୁଡ଼ୁତା; 24 ମାରି, ୱାରି କଡ଼ର୍ ଏସ ଲୋକ୍ ଅସ୍ଦୋଦିୟ ବାସାଦାନ୍ ୱାର୍ଗିଜିସାତାର୍ ମାରି ଜିହୁଦିୟ ବାସାଦାନ୍ ୱାର୍ଗିଜିସାଦେଙ୍ଗ୍ ଆଟ୍ଏତାର୍, ମାତର୍ ୱିଜେରି କୁଟୁମ୍ତି ବାସା ଇସାବ୍ତାନ୍ ମାଟା ଇର୍ହାର୍ । 25 ଆବେଟ୍ ନାନୁ ୱାରି ୱାଲେ ମାଟାଦିଙ୍ଗ୍ମାଟା କିତା ମାରି ୱାରିଙ୍ଗ୍ ଆନାଦୁରିଆ ଇଟ୍ତା ମାରି ୱାରି ମାଣାନ୍ ଏଙ୍ଗ୍ ଏଙ୍ଗ୍ ଡାକ୍ତା ମାରି ୱାରି କୁକୁଟି ରେଆ, ମାରି ମାପୁରୁଦି ଦର୍ତାନ୍ ପାର୍ମାଣ୍ କିବିସ୍କିଜି ଇର୍ହା, ମିରୁ ୱାରି ମାରିନ୍କାଙ୍ଗ୍ ନିଜେ ନିଜେଦି ଗାଡ଼ିକାଙ୍ଗ୍ ସିମାଟ୍, ମାରି ନିଜେ ନିଜେଦି ମାରିନ୍କା ଉଣ୍ତିଙ୍ଗ୍ କି ନିଜେଦିୱାରି ଉଣ୍ତିଙ୍ଗ୍ ୱାରି ଗାଡ଼ିକାଙ୍ଗ୍ ତାମାଟ୍ । 26 ଇସ୍ରାଏଲଦି ରାଜା ଶଲୋମନ ଇନିକା ଇୟାୱିଜୁ ପାଣି ଦାନ୍ ପାପ୍ କିଏନ୍ ମାର୍ହାନ୍ ? ନାଣ୍ତ କୁଟୁମ୍ ଲୋଇ ୱାରି ୱାଜା ରାଜା ଏନ୍ ସିଲେତାନ୍ ମାରି ୱାନ୍ ନିଜେଦି ମାପୁରୁଦି ମାଟା ମାନାନିକାନ୍ ମାର୍ହାନ୍, ମାରି ମାପୁରୁ ୱାନିଙ୍ଗ୍ ୱିଜୁ ଇସ୍ରାଏଲ ମୁସ୍କୁ ରାଜା କିତାର୍; ମାରିବା ଆଇଦେସ୍ତି ଆଇମେକ୍ ୱାନିଙ୍ଗ୍ ନେ ପାପ୍ କିବିସ୍ତେ । 27 ଆର୍ତିଙ୍ଗ୍ ଆଇଦେସ୍ତି ଆଇମେକାଙ୍ଗ୍ ପେଡ଼ି କିନି ମାଣାନ୍ ମା ମାପୁରୁଦି ବିରୁଦ୍ତାନ୍ ସତ୍ତିଙ୍ଗ୍ ମାନାଏଜି ଇୟାୱିଜୁ ପେରିପାପ୍ କିଦେଙ୍ଗ୍ ଇନିକା ମାପୁ ମି ମାଟା ୱେନାପ୍ ?
28 ଆବେଟ୍ ଇଲିୟାସିବ ପେରି ଜାଜକଦି ନାତି ଜିହୋୟାଦାଦି ଅରେନ୍ ମାରିନ୍ ହରୋଣିୟ ସନ୍ବଲ୍ଲଟ୍ଦି କନ୍ଲି ମାର୍ହାନ୍; ଆଦେଙ୍ଗ୍ ନାନୁ ୱାନିଙ୍ଗ୍ ନିଜେଦି ଲାକ୍ତୁରାନ୍ ପେରିତା ।
29 ଏ ନା ମାପୁରୁ, ୱାରିଙ୍ଗ୍ ଏତ୍ କିଦୁ, ଏଣ୍ତେସ୍କି ୱାର୍ ଜାଜକ ପଦ୍ତିଙ୍ଗ୍, ମାରି ଜାଜକ ପଦ୍ତି ମାରି ଲେବିୟରି ନିୟମ୍ତିଙ୍ଗ୍ ତାଗ୍ଇକା କିତାମାନାର୍ ।
30 ଇୟାୱାଜା ନାନୁ ୱାରିଙ୍ଗ୍ ଆଇ ଦେସ୍ତି ୱିଜେରି ମାଣାନ୍ ପବିତ୍ର କିତା ମାରି ୱିଜେରି ପାଣି ଇସାବ୍ତାନ୍ ଜାଜକରି ନି ଲେବିୟରି ପାଣି ତିର୍ କିତା; 31 ମାରି, ଟିକ୍ ବେଡ଼ାଦୁ ୱେର୍କୁ ନି ଆଗ୍ଡ଼ି ଆସ୍ତି ପଲ୍ ସିନି ଉଣ୍ତିଙ୍ଗ୍ ଲୋକାଙ୍ଗ୍ ଆସ୍କିତା, ଏ ନା ମାପୁରୁ, ନେଗି ଉଣ୍ତିଙ୍ଗ୍ ନାଙ୍ଗିଁ ଏତ୍ କିଆ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)