ନିହିମିୟାଦି ବିରୁଦ୍ତାନ୍ ଉପାୟ୍
1 ଇୟାୱେନେକା ନାନୁ ଗଡା ତିଆର୍ କିତାମାନା ମାରି ଆୟା ଲୋଇ ମାରି ରୁଙ୍ଗିଁତି ବାଡି ସିଲେତ୍, ଇୟା କାବୁର୍ ସନ୍ବଲ୍ଲଟ୍ ନି ଟୋବିୟ ନି ଆରବିୟ ଗେସମ୍ ମାରି ମା ଆଇଆଇ ସାତ୍ରୁରୁ ନେସ୍ତାର୍; ଇୟା ବେଡ଼ାଦୁ ନାନୁ ଗାଡ଼୍ତି ସେର୍ଲା ୱିଜୁଦୁ ସେର୍ଲା ଆସ୍ପିସ୍କିଏ ମାର୍ହା । 2 ନାସ୍ତିୱାଲେ ସନ୍ବଲ୍ଲଟ୍ ନି ଗେସମ୍ ନା ଲାକ୍ତୁ ଲୋକ୍ ପୋକ୍ସି ଇର୍ହାନ୍, "ରାଦୁ, ମାଡୁ ଓନୋ ସାମାନ୍ତି ବାଡି ଏମେ ଉଡ୍ରି ନାଟ ଉଣ୍ତାନାଟ୍ ।" ମାତର୍ ୱାର୍ ନା ଅନିସ୍ଟୁ କିଦେଙ୍ଗ୍ ଅଡ଼୍ବିତା ମାର୍ହାର୍ । 3 ଆବେଟ୍ ନାନୁ ୱାରି ଲାକ୍ତୁ କାବୁର୍ସିନିୱାନିଙ୍ଗ୍ ପୋକ୍ସି ଇର୍ହା, ନାନୁ ଉଡ୍ରି ପେରି ପାଣି କିଜିନା, ଇୟାଉଣ୍ତିଙ୍ଗ୍ ରେତାଜି ୱାଦେଙ୍ଗ୍ ଆଟ୍ଏ; ମି ଲାକ୍ତୁ ରେସି ସୋଲ୍ସି ଏନ୍ଧା ପାଣି ବନ୍ଦ୍ କିନା ? 4 ଇୟାୱାଜା ୱାର୍ ନାଲିଗି ଦେବେଙ୍ଗ୍ ନା ଲାକ୍ତୁ ଲୋକ୍ ପୋକ୍ତାନ୍; ମାତର୍ ନାନୁ ୱାରିଙ୍ଗ୍ ଆୟାୱାଜା ୱେର୍ତା ।
5 ଇୟାୱେନ୍କା ସନ୍ବଲ୍ଲଟ୍ ନିଜେଦି ଦାସଦି କିୟୁଦୁ କାଣ୍ତେକ୍ ରାସାତି ସିଟି ସିଜି ପାସ୍ ଦେବେଙ୍ଗ୍ ଆୟାୱାଜା ନା ଲାକ୍ତୁ ପୋକ୍ତାତାନ୍ । 6 ଆବେନୁ ଇକା ରାସାତା ମାର୍ହାତ୍, "କୁଟୁମ୍ତି ଲୋଇ ଇୟା ଆଉଲି ଆତାମାନାତ୍, ବା ଗେସମ୍ ଇକା ଇଜିନାନ୍ ଜେ, ମିରୁ ନି ଜିହୁଦିର୍ ରାଜା ବିରୁଦ୍ କିଦେଙ୍ଗ୍ ବିସାର୍ କିଜିନିଦେର୍; ଆୟାଉଣ୍ତିଙ୍ଗ୍ ମିରୁ ଗଡା ତିଆର୍ କିଜିନିଦେର୍; ଇୟା କାବୁର୍ ଇସାବ୍ତାନ୍ ମିରୁ ୱାରି ରାଜା ଆଦେଙ୍ଗ୍ ବଦା କିଜିନିଦେର୍ । 7 ମାରିବା, ଜିହୁଦାଦୁ ଅରେନ୍ ରାଜା ମାନାନ୍ ଇଜି ନିଜେଦି ବିସୟ୍ ଜିରୁସାଲମତୁ ୱେର୍ନି ଉଣ୍ତିଙ୍ଗ୍ ମିରୁ ବବିସ୍ୟଦ୍ବକ୍ତାରିଙ୍ଗ୍ ଆସ୍କିତିମାନିଦେର୍; ଇୟା କାବୁର୍ ରାଜାଦି ଲାକ୍ତୁ ଇନାତ୍ । ଇୟାଉଣ୍ତିଙ୍ଗ୍ ଇଲେଇ ରାଦୁ, ମାଡୁ ଉଡ୍ରେମାନୁ ୱାର୍ଗିଜିସାନାଟ୍ ।"
8 ଆବେଟ୍ ନାନୁ ୱାନି ଲାକ୍ତୁ ୱେର୍ତା ପୋକ୍ତା, "ନିନୁ ଆମାକା ଇଜିନି, ଆୟାୱାଜା ଇନି ପାଣି ଆଏଜିନାତ୍; ନିନୁ କେବଲ ନିଜେଦି ମନ୍ତାନ୍ ଆୟାୱିଜୁ ଏତ୍ କିଜିନିଦେର୍ ।"
9 ଇୟା ପାଣିଦୁ ୱାରି କିୟୁ ସାକିସିଲିକା ଆତିଙ୍ଗ୍ ଆକା ୱିଜିଏତ୍ ଇଜି ଆୟାୱିଜେରେ ମାଙ୍ଗିଁ ତିଲିସ୍ କିଦେଙ୍ଗ୍ ବଦା କିତାର୍; ଆଦେଙ୍ଗ୍ ଏ ମାପୁରୁ, ନା କିୟୁ ବପୁ କିଆ ।
10 ଇୟାୱେନେକା ମହେଟବେଲଦି ନାତି ଦଲୟିୟଦି ମାରିନ୍ ଏମେ ଶମୟିୟ ଇଲୁଦୁ କେରାତା ମାର୍ହାନ୍, ନାନୁ ୱାନି ଇଲୁଦୁ ସର୍ହା, ଆବେଟ୍ ୱାନ୍ ଇର୍ହାନ୍, "ମାଡ୍ ମାପୁରୁଦି ପାର୍ତନା ଇଲୁଦୁ, ପାର୍ତନା ଇଲୁ ଲୋଇ ଉଣ୍ତାନାଟ୍ ମାରି ପାର୍ତନା ଇଲୁ ସେର୍ଲେଙ୍ଗ୍ ୱିଜୁ କେର୍ନାଟ୍; ଇରିଙ୍ଗ୍ ୱାର୍ ନିଙ୍ଗିଁ ସାୟାମାର୍ଗା ଡାକ୍ତେଙ୍ଗ୍ ୱାନାର୍; ନାଡ଼ା ୱାର୍ ନିଙ୍ଗିଁ ସାୟାମାର୍ଗା ଡାକ୍ତେଙ୍ଗ୍ ୱାନାର୍ ।"
11 ଆବେଟ୍ ନାନୁ ଇର୍ହା, "ନା ୱାଜା ଲୋକୁ ଇନିକା ଉରୁକୁନାର୍ ? ନା ୱାଜା ଆଜି ଜିବନ୍ ଜିପିସ୍ନି ଉଣ୍ତିଙ୍ଗ୍ ଏନ୍ ମନ୍ଦିର୍ ଲୋଇ ସୋନାନ୍, ଇୟାୱାଜା ଏନ୍ ମାନାନ୍ ? ନାନୁ ଲୋଇ ସୋଲ୍ଏ ।"
12 ମାତର୍ ନାନୁ ସିନିସ୍ତା, ମାରି ସୁଡ଼ୁଦୁ, ମାପୁରୁ ୱାନିଙ୍ଗ୍ ପୋକ୍ଏନ୍ ମାର୍ହାନ୍; ମାରିବା ୱାନ୍ ନା ବିରୁଦ୍ତାନ୍ ଇୟା ବବିସ୍ୟଦ୍ ମାଟା ୱେର୍ତାନ୍; ମାରି, ଟୋବିୟ ନି ସନ୍ବଲ୍ଲଟ୍ ୱାନିଙ୍ଗ୍ ଡାବୁଙ୍ଗ୍ ସିତା ମାର୍ହାର୍ । 13 ନାନୁ ଏଣ୍ତେସ୍ ତିଲାନା ମାରି ଆୟା ପାଣି କିଜି ପାପ୍ କିନା, ମାରି ୱାର୍ ଏଣ୍ତେସ୍ ନାଙ୍ଗିଁ ସାପିସ୍ନି ଉଣ୍ତିଙ୍ଗ୍ ନା ତାଗ୍ଇ ପାଣି ପୟ୍ନାର୍, ଇୟା ଇସାବ୍ତାନ୍ ୱାନିଙ୍ଗ୍ ଡାବୁଙ୍ଗ୍ ସିଆୟ୍ଆତା ମାର୍ହାତ୍ ।
14 ଏ ନା ମାପୁରୁ, ଟୋବିୟ ନି ସନ୍ବଲ୍ଲଟ୍ଦି ଇୟାୱିଜୁ ପାଣି ଇସାବ୍ତାନ୍ ୱାରିଙ୍ଗ୍, ମାରି ନାଙ୍ଗିଁ ତିଲିସ୍ କିଦେଙ୍ଗ୍ ବଦା କିତାର୍ ଜେ ନୋୟଦିୟା ବବିସ୍ୟଦ୍ବକ୍ତ୍ରି ନି ଆଇଆଇ ବବିସ୍ୟଦ୍ବକ୍ତା, ୱାରିଙ୍ଗ୍ ଏତ୍ କିଦୁ ।
ଗଡାଦି ପାଣି ୱିଜିନିକା
15 ଆବେଟ୍ ପଚାସ୍ ଦୁଇ ଦିନ୍ ଲୋଇ ଇଲୁଲ6:15 ଇଲୁଲ ବାନ୍ଦାପାଣ୍ ଲେଜୁ ଲେଜୁଦୁ ପଚିସ୍ଦିନ୍ତି ନାଣ୍ତିଙ୍ଗ୍ ଗଡା ୱିଜିତାତ୍ । 16 ମାରି, ମା ସାତ୍ରୁରୁ ୱିଜେରେ ଇକା ୱେରାର୍, ଇୟାୱାଜା ଆତାତ୍ ଜେ, ମା ସାରିବେଡ଼ିତି ଆଇ ଦେସ୍ତି ୱିଜେରେ ତିଲାତାର୍ ମାରି ନିଜେଦିୱାରି ଆଗ୍ଡ଼ି ଏଣ୍ତେସ୍ବା ସେମାର୍ ଆତାର୍, ଇରିଙ୍ଗ୍ ଇୟା ପାଣି ଜେ ମା ମାପୁରୁଦି ତରିଟାନ୍ ଆତାତ୍, ଇକା ୱାର୍ ବୁଜାତାର୍ ।
17 ମାରିବା, ଆୟାୱେଡ଼ାଦୁ ଜିହୁଦାଦି ନେତାର୍ ଟୋବିୟ ଲାକ୍ତୁ ଏସ ସିଟି ପୋକ୍ତାର୍ ମାରି ଟୋବିୟଦି ଆଇଆଇ ସିଟି ୱାରି ଲାକ୍ତୁ ୱାତାତ୍ । 18 ଇରିଙ୍ଗ୍, ୱାନ୍ ଆରହଦି ମାରିନ୍ ଶଖନିୟଦି ଜୁଆଁଇ ଆତାନ୍ଆକା ମାରି ୱାନି ମାରିନ୍ ଯିହୋହାନନ୍ ବେରିଖିୟଦି ମାରିନ୍ ମଶୁଲ୍ଲମ୍ଦି ଗାଡ଼ିସିଙ୍ଗ୍ ପେଡ଼ି ଆତିମାନିଙ୍ଗ୍ ଜିହୁଦା ମାଣାନ୍ ଏସୋଲୋକୁ ୱାନି ତରିଟାନ୍ ପାର୍ମାଣ୍ କିତାମାର୍ହାର୍ । 19 ମାରିବା, ୱାର୍ ୱାନି ନେଗି ପାଣିଦି ମାଟା ନାଙ୍ଗିଁ ୱେର୍ତାନ୍ ମାରି ନା ମାଟାୱିଜୁ ୱାନିଙ୍ଗ୍ ୱେର୍ତାର୍ । ମାରି, ନାଙ୍ଗିଁ ତିଲିସ୍ କିନି ଉଣ୍ତିଙ୍ଗ୍ ଟୋବିୟ ଆଇଆଇ ସିଟି ପୋକ୍ତାନ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)