1 ଏ ବୁଦିସିଲି ଗାଲାତିୟଦି ଲୋକୁ ! ଏନ୍‌ ମି ମୁସ୍‌କୁ ଇୟା ଉପାୟ୍‌ ୱେର୍‌ତାମାନାନ୍‌ ? କ୍ରୁସକାଟ୍‌ ମୁସ୍‌କୁ ଜିସୁ କ୍ରିସ୍ତଦି ସାତି ବିସୟ୍‌ ପୁରାନେସ୍‌ନି ୱାଜା ମି ଲାକ୍‌ତୁ ୱେର୍‌ଆଇ ଆତାମାନାତ୍‍ । 2 ନାଙ୍ଗିଁ ଉନ୍‍ଣ୍ତ୍ରି ମାଟା ଇନ୍‍ଣ୍ତ୍ରୁ : ନିୟମ୍‍ ମାନାଜିନି ମାଣ୍‌କୁ ମିର୍‌ ପବିତ୍ରଆତ୍ମାଦିଙ୍ଗ୍‍ ପୟ୍‍ତିମାନିଦେର୍‍, ନୋ, ମିର୍‍ ସୁସମାଚାର୍‍ ୱେନ୍‍ଜି ଆବେନୁ ବିସ୍‍ବାସ୍‍ କିଜିନି ମାଣ୍‌କୁ ? 3 ମିର୍‍ ଇନିକା ନିସବା ବୁଜାଦେଙ୍ଗ୍‌ ଆଟ୍‌ଇଜିନିଦେର୍‌ ? ଆଇଆତ୍ମାଦି ସାକ୍ତିଦାନ୍‌ ମିର୍‌ ଆମା ଜିବନ୍‌ ଆରାମ୍‍ କିତିମାନିଦେର୍‍, ନିଜେଦି ସାକ୍ତିଦାନ୍‌ ଇନିକା ତାନିଙ୍ଗ୍‌ ପୁରା କିଦେଙ୍ଗ୍‌ ଅଡ଼୍‌ବିଜିନି ? 4 ଇୟାଉଣ୍ତିଙ୍ଗ୍‌ ମି ୱିଜୁ ଏତ୍‌କିତିମାଟା ଇନିକା ୱାର୍‌ଇକା ? ଆବେଣୁକୁ ଇନିକା ଅଡ଼୍‌ପବା ଅଜାଇଦେର୍‌ ? 5 ମିର୍‌ କେବଲ ନିୟମ୍‌ତୁ ବିସ୍‌ବାସ୍‌ କିଜିମାନିଙ୍ଗ୍‌ ଇନିକା ମାପୁରୁ ମିଙ୍ଗିଁ ୱାନି ଆତ୍ମା ସିତାମାନାନ୍‌ ମାରି ମି ଲୋଇ ସାକ୍ତିଦି ପାଣିୱିଜୁ ପୁରା କିନାନ୍‍, ନୋ, ମିର୍‌ ସୁସମାଚାର୍‌ ୱେନ୍‌ଜି ଆବେନୁ ବିସ୍‌ବାସ୍‌ କିଜିନିଦେର୍‌ ଇଜି ?

6 ✝ମାରି ଅବ୍ରାହାମତି ମାଟା ଏତ୍‌ କିଦୁ । ସାସ୍ତ୍ରଦୁ ରାସାତାମାନାତ୍‌, "ୱାନ୍‌ ମାପୁରୁଦିମାନୁ ବିସ୍‌ବାସ୍‌ କିତାନ୍‌ ମାରି ୱାନି ବିସ୍‌ବାସ୍‌ତି ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ଦାର୍ମୁଦିକାନ୍‌ ୱାଜା ମାନାତାନ୍‌ ।" 7 ✝ଇକା ମିର୍‌ ନେସ୍‌ତୁ, ଆମାକାର୍‌ ବିସ୍‌ବାସ୍‌ କିଦେଙ୍ଗ୍‌ ଡାଟ୍‌, କେବଲ ଆୟାକାର୍‌ନେ ଅବ୍ରାହାମତି ସତ୍‌ତି ମାରିନ୍‌କୁ, 8 ଆଗ୍‍ଡ଼ିରାନ୍‍ ଦାର୍ମୁସାସ୍ତ୍ରଦୁ ରାସାତାମାନାତ୍‍, ବିସ୍‍ବାସ୍‍ତାନ୍ ମାପୁରୁ ଅଣଜିହୁଦି ଲୋକାଙ୍ଗ୍‌ ବା ଦାର୍ମୁଦିଲୋକ୍‍ ଇଜି ମିସାକିନାନ୍‍ । ଅବ୍ରାହାମତି ଲାକ୍‍ତୁ ଇୟା ମାଟା ଆଗ୍‌ଡ଼ି ୱେର୍‌ଆୟ୍‌ଆତାମାରାତ୍‌, "ମି ମାଣ୍‌କୁ ମାପୁରୁ ଦୁନିଆଦି ୱିଜୁ ଲୋକାଙ୍ଗ୍‍ ଆସିର୍ବାଦ୍‌ କିନାନ୍‍ ।" 9 ଅବ୍ରାହାମ ବିସ୍‍ବାସ୍‌ କିଜି ଆସିର୍ବାଦ୍‌ ପୟ୍‍ତାମାର୍ହାନ୍‍; ଆଦେଙ୍ଗ୍‌ ଆମାକାର୍‍ ବିସ୍‍ବାସ୍‍ କିନାର୍‍, ୱାର୍‍ ୱିଜେରେ ୱାନି ୱାଜା ଆସିର୍ବାଦ୍‌ ପୟ୍‍ନାର୍‍ ।

10 ଏମେକାର୍‍ ନିୟମ୍‍ ମାନାନି ମୁସ୍‍କୁ ଆସା ଇଡ୍‍ନାର୍‍, ୱାର୍‍ ଆନାଦୁରିଆଦି ଲୋଇ ଜିନାର୍‍ । ଇରିଙ୍ଗ୍‌ ଦାର୍ମୁସାସ୍ତ୍ରଦୁ ରାସାତାମାନାତ୍‍, "ମସାଦି ନିୟମ୍‍ ବଇଦୁ ଆମା ୱିଜୁ ରାସାତାମାନାତ୍‍, ଜଦି ଏନ୍‍ ପୁରାଦାନ୍‍ ଆକା ମାନାଏନ୍‍, ୱାନ୍‍ ମାପୁରୁଦି ଆନାଦୁରିଆଦି ଲୋକୁ ଆନାନ୍‍ ।" 11 ଆଦେଙ୍ଗ୍‌ ଇବେଟ୍‌ତାନ୍‍ ପୁରାନେସ୍‌ନିୱାଜା ୱେରାୟ୍‍ଆନାତ୍‍, ନିୟମ୍‍ତାନ୍‍ ଏମେ ଲୋକୁ ମାପୁରୁଦି ଆଗ୍‍ଡ଼ି ଦାର୍ମୁଲୋକୁ ଆଦେଙ୍ଗ୍‌ ଆଟ୍‍ଏନ୍‍, ଇରିଙ୍ଗ୍‌ ଦାର୍ମୁସାସ୍ତ୍ରଦୁ ରାସାତାମାନାତ୍‍, "ବିସ୍‍ବାସ୍‍ତାନ୍ ମାପୁରୁଦି ଲାକ୍‍ତୁ ଦସ୍‍ସିଲିକାନ୍‍ ୱେଙ୍ଗିଁଜି ମାନି ଲୋକୁ ନେ କେବଲ ଜିନାନ୍‍ ।" 12 ମାତର୍‍ ନିୟମ୍‍ତି ୱାଲେ ବିସ୍‍ବାସ୍‍ତି ଇନି ମିସାବିଡ଼ା ସିଲେତ୍‍ । ଦାର୍ମୁସାସ୍ତ୍ରଦୁ ରାସାତାମାନାତ୍‍, "ଏମେ ଲୋକୁ ନିୟମ୍‍ତି ଦାବିଦି ୱିଜୁ ପାଣି କିନାନ୍‍, ୱାନ୍‍ ଜିନାନ୍‍ ।"

13 ମାତର୍‍ କ୍ରିସ୍ତ ମା ଉଣ୍ତିଙ୍ଗ୍‌ ଆନାଦୁରିଆ ପୟ୍‍ଜି ନିୟମ୍‍ତୁ ରାସାତି ଆନାଦୁରିଆଦାନ୍‌ ମାଙ୍ଗିଁ ମୁକୁଡ଼ା କିତାମାନାନ୍‍ । ଦାର୍ମୁସାସ୍ତ୍ରଦୁ ରାସାତାମାନାତ୍‍, "ଏନ୍‍ ମାରାତୁ ଡ଼ଆୟ୍ ଆଜି ସାନାନ୍‍, ୱାନ୍‍ ମାପୁରୁଦି ମାଣାନ୍‍ ଆନାଦୁରିଆ ଆନାନ୍‌ !" 14 ମାପୁରୁ ଅବ୍ରାହାମ୍‍ତିଙ୍ଗ୍‌ ଏମେ ଆସିର୍ବାଦ୍‌ ସିଦେଙ୍ଗ୍‍ ପାର୍‍ମାଣ୍‍ କିତାମାର୍ହାନ୍‍, ଅଣଜିହୁଦି ଲୋକୁ ବା ଏଣ୍ତେସ୍‍ ଆକା ପୟ୍‌ଦେଙ୍ଗ୍‌ ଆଟ୍‍ନାର୍‍, ଇୟାଉଣ୍ତିଙ୍ଗ୍‌ କ୍ରିସ୍ତ ଜିସୁ ଇୟା ପାଣି କିତାମାନାନ୍‍ । ଆଦେଙ୍ଗ୍‌ ବିସ୍‍ବାସ୍‍ତାନ୍ ମାପ୍‍ ବା ମାପୁରୁଦି ସିତିମାନିମାଟା ଇସାବ୍‍ତାନ୍‍ ପବିତ୍ର ଆତ୍ମା ପୟ୍‌ଦେଙ୍ଗ୍‌ ଆଟ୍‍ନାପ୍‍ ।

15 ତଡ଼ାନ୍‍କୁ ନି ତାଙ୍ଗିଁକ୍‌ ! ନାନୁ ଉନ୍‍ଣ୍ତ୍ରି ଉପାସ୍‌ ମାଟା ଇଜିନା, ଏସ୍ତିୱାଲେ ରିଏର୍‌ ଇନି ବିସୟ୍‍ତାନ୍‍ ଉନ୍‍ଣ୍ତ୍ରି ନିୟମ୍‌ ମାଟା ଇନାନ୍‌, ଏନ୍‍ ଆୟା ନିୟମ୍‌ ମାଟା ରୁକ୍‍ତେଙ୍ଗ୍‍ଁ ଆଟ୍‍ଏନ୍‍ ବା ଆବେ ଇନିକା ମିସାକିଦେଙ୍ଗ୍‍ଁ ଆଟ୍‍ଏନ୍‍ । 16 ଅବ୍ରାହାମ ନି ୱାନି କୁଟୁମ୍‍ତି ଲାକ୍‍ତୁ ମାପୁରୁ ୱାନି ପାର୍‍ମାଣ୍‍ କିତାମାର୍ହାନ୍ । ମାତର୍‍ ଇୟା ବିସୟ୍‌ତାନ୍‌ "ମି କୁଟୁମ୍‍ତିୱାରି ଉଣ୍ତିଙ୍ଗ୍‍," ଅର୍ତାତ୍‍ ନାଣ୍ତ ଲୋକା ଉଣ୍ତିଙ୍ଗ୍‍ ଇଜି ସାସ୍ତ୍ରଦୁ ରାସାଏତ୍‍ । କେବଲ "ମି କୁଟୁମ୍‍ ଉଣ୍ତିଙ୍ଗ୍‍ଁ" ଇଜି ରାସାତାମାନାତ୍‍ । ଆଦେଙ୍ଗ୍‍ଁ ଆୟା ସାସ୍ତ୍ରଦୁ ରାସାତିକା କେବଲ ଅରେନ୍‍ ଲୋକ୍‍, ଅର୍ତାତ୍‍ କ୍ରିସ୍ତଦି ଉଣ୍ତିଙ୍ଗ୍‍ଁ ଟିକ୍‍ । 17 ନାନୁ ଇନି ଅର୍ତ ଆଜିନାତ୍‍, ମାପୁରୁ ଅବ୍ରାହାମତି ୱାଲେ ଉନ୍‍ଣ୍ତ୍ରି ନିୟମ୍‌ ତିଆର୍‌ କିତାମାର୍ହାର୍‌ ମାରି ଆକା ରକିୟା କିନି ଉଣ୍ତିଙ୍ଗ୍‍ ପାର୍‍ମାଣ୍‍ କିତାମାର୍ହାର୍‌ । ଏମେ ନିୟମ୍‍ ସାରିସ ତିରିସ୍‌ ବାର୍‍ସେକ୍‍ ୱେନ୍‍କା ସିଆୟ୍‍ଆତାତ୍‍, ଆକା ଆୟା ରାଜିମାନାଦିଙ୍ଗ୍‍ ରୁକ୍‍ସି ମାପୁରୁଦି ପାର୍‍ମାଣ୍‍ତିଙ୍ଗ୍‍ ତେବାକିଦେଙ୍ଗ୍‍ ଆଟ୍‍ଏତ୍‍ । 18 ✝ମାପୁରୁଦି ପାର୍‍ମାଣ୍‍ତି ଆସିର୍ବାଦ୍‌ ଜଦି ନିୟମ୍‍ ମାନାନି ମୁସ୍‍କୁ ଆସା ଇଡିନାତ୍‍, ଆର୍‍ତିଙ୍ଗ୍‍ଁ ଆକା ୱାନି ପାର୍‍ମାଣ୍‍ତି ପଲ୍‍ ଇଜି ମାରି ଇନାୟ୍‍ ଆଦେଙ୍ଗ୍‍ଁ ଆଟ୍‍ଏତ୍‍ । ଆଦେଙ୍ଗ୍‍ଁ ମାପୁରୁ କେବଲ ୱାନି ପାର୍‍ମାଣ୍‍ତି ଇସାବ୍‍ତାନ୍‍ ଆୟା ଆସିର୍ବାଦ୍‌ ଅବ୍ରାହାମ୍‍ତିଙ୍ଗ୍‌ ସିତାନ୍‌ ।

19 ଆର୍‍ତିଙ୍ଗ୍‍ଁ ନିୟମ୍‍ ଏନ୍ଦା ସିଆୟ୍‍ ଆତାତ୍‍ ? ଲୋକା ଅସତ୍‍ ପାଣି ୱିଜୁ ତର୍‍ସି ସିନି ଉଦେସ୍‍ ମାର୍ହାତ୍‍ ମାରି ଅବ୍ରାହାମ୍‍ତି ଆମା କୁଟୁମ୍‌ତିଙ୍ଗ୍‍ ସୁଡ଼୍‍ଜି ମାପୁରୁ ଆୟା ପାର୍‍ମାଣ୍‍ କିତାମାର୍ହାନ୍, ଆୟା ଲୋକ୍‌ତି ୱାନି ସାନ୍ଦି ନିୟମ୍‍ତି ଦର୍‍କାର୍‍ ମାର୍ହାତ୍‍ । ଅରେନ୍‍ ଲୋକା ନାଡ଼ିମିଆଜି ମୁସ୍‌କୁପୁର୍‌ତି ଦୁତ୍‍ମାଣାନ୍‍ ନିୟମ୍‍ ସିଆୟ୍‍ ଆତାମାର୍ହାତ୍‍ । 20 ମାତର୍‍ ପାର୍‍ମାଣ୍‍କିତି ଦାନ୍‍ତି ୱାଲେ କେବଲ ଉନ୍‍ଣ୍ତ୍ରି ତରିନ୍‍ ମାର୍ହାର୍‍ । ୱାନ୍‍ ଆଜିନାନ୍‍ ନିଜେ ମାପୁରୁ ।

21 ନିୟମ୍‍ ଇନିକା ମାପୁରୁଦି ପାର୍‍ମାଣ୍‍ତି ବିରୁଦ୍‍ କିନାତ୍‍ ? ସିଲେ, ଏସାଙ୍ଗ୍‍ଁ ସିଲେ ! ଇରିଙ୍ଗ୍‌ ଲୋକାଙ୍ଗ୍‍ଁ ଜିବନ୍‌ ସିନି ନାନି ଉନ୍‍ଣ୍ତ୍ରି ନିୟମ୍‍ କିଆୟ୍‍ ଆତାତ୍‍ମାନ୍ଦି, ଆର୍‍ତିଙ୍ଗ୍‍ଁ ଆକା ମାନାନି ମାଣାନ୍‍ ନେ ଲୋକ୍‍ ମାପୁରୁଦି ଆଗ୍‍ଡ଼ି ଦସ୍‍କିଇକାନ୍‍ ୱାଜା ୱେଙ୍ଗାଁୟ୍‍ ଆଦେଙ୍ଗ୍‍ଁ ଆଟ୍‍ତାତ୍‍ମାନ୍ଦି । 22 ମାତର୍‍ ଦାର୍ମୁସାସ୍ତ୍ରଦୁ ରାସାତାମାନାତ୍‍, ୱିଜୁ ଲୋକୁ ଜାତି ପାପ୍‍ ସାକ୍ତିଦି ଆଡ୍‍ଗି, ଆଦେଙ୍ଗ୍‍ଁ ଏଣ୍ତେସ୍‌ ଜିସୁ କ୍ରିସ୍ତମାନୁ ବିସ୍‍ବାସ୍‍ତି ପଲ୍‍ ୱାଜା ପାର୍‍ମାଣ୍‍ଆତି ଆସିର୍ବାଦ୍‌ କ୍ରିସ୍ତ ବିସ୍‍ବାସିର୍‍ ପୟ୍‍ନାର୍‍ ।

23 ବିସ୍‍ବାସ୍‍ତି ଜୁଗ୍‍ ୱାନି ଆଗ୍‍ଡ଼ି ମାରି ତରାୟ୍‍ଆନି ସାନ୍ଦି ନିୟମ୍‍ ମା ୱିଜେରିଙ୍ଗ୍‍ଁ ତର୍‍ସି ଇଟ୍‍ତାମାର୍ହାତ୍‍ । 24 କ୍ରିସ୍ତଦି ୱାନି ସାନ୍ଦି ନିୟମ୍‍ ମାଙ୍ଗିଁ ଆଡିଗିକିଜି ଇଟ୍‌ତାମାର୍ହାତ୍‍; ମାତର୍‍ ତାନିୱେନ୍‍କା, କେବଲ ବିସ୍‍ବାସ୍‍ତାନ୍ ମାପୁ ମାପୁରୁ ଆଗ୍‍ଡ଼ି ଦାର୍ମୁତିକାର୍‍ ଇଜି ୱେଙ୍ଗ୍‍ଁନାପ୍‍ । 25 ଇଲେଇ ବିସ୍‍ବାସ୍‍ତି ଜୁଗ୍‍ ଇଗା ୱାତାତ୍‍, ମାପୁ ମାରି ନିୟମ୍‍ତି ଆଡ୍‍ଗି ସିଲେପ୍‍ ।

26 ବିସ୍‍ବାସ୍‍ତାନ୍ କ୍ରିସ୍ତ ଜିସୁଦି ୱାଲେ ଜଡ଼ାଜି ମିର୍‍ ୱିଜିଦେର୍‌ ମାପୁରୁଦି କଡ଼ର୍‍ ଆଇଲିକ୍‌ ଆତିମାନିଦେର୍‍ । 27 ଡୁବନ୍‌ତାନ୍‍ ମିର୍‍ କ୍ରିସ୍ତଦି ୱାଲେ ଉନ୍‍ଣ୍ତ୍ରେ ଆତିମାନିଦେର୍‍ ମାରି ଇଲେଇ ଜିସୁ କ୍ରିସ୍ତଦି ଜିବନ୍‍ରୁପ ଆଙ୍ଗିଁ ଆରାତିମାନିଦେର୍‍ । 28 ଆଦେଙ୍ଗ୍‍ଁ ଜିହୁଦି ନି ଅଣଜିହୁଦି, କଟିସାକର୍‌ ନି ମୁକ୍‍ଡ଼ାତି ଲୋକୁ, ମେମାରି ବା ଆଇମା ଲୋଇ ମାରି ଇନି ୱେର୍‍ଏ ସିଲେ । ମିର୍‍ ୱିଜେରେ ଜିସୁ କ୍ରିସ୍ତଦି ୱାଲେ ଜଡ଼ାଜି ଉନ୍‍ଣ୍ତ୍ରେମାନୁ ଆତିମାନିଦେର୍‍ । 29 ✝ଜଦି ମିରୁ କ୍ରିସ୍ତଦି ଲୋକୁ ଆର୍‌ତିଙ୍ଗ୍‌ ମିରୁ ଅବ୍ରାହାମତି କୁଟୁମ୍‍ ମାରି ମାପୁରୁ ଆମାକା ପାର୍‍ମାଣ୍‍ କିତାମାନାନ୍‍, ଆକା ଲାବ୍‍ କିନିଦେର୍‍ ।