1 ଇୟା ଉଣ୍ତିଙ୍ଗ୍‌ ପ୍ରବୁଦି ୱିଜୁ ମାଟା ଇସାବ୍‌ଦାନ୍‌ ପବିତ୍ର ବାଡିଦି ପାଣି ୱିଜୁ ତିଆର୍‌ କିଦେଙ୍ଗ୍‌ ପ୍ରବୁ ବତ୍ସଲେଲ ମାରି ଅହଲିୟାବ ମାରି ଆମାୱାରିଙ୍ଗ୍‌ ଜ୍ଞାନ୍‌ ମାରି ବୁଦି ସିତାମାନାନ୍‌, ଆୟା ୱିଜୁ ବୁଦିଦି ଲୋକୁ ପାଣି କିନାର୍‌ ।

2 ଇୟାୱେନ୍‌କା ମୋଶା ଆୟା ବତ୍ସଲେଲ ମାରି ଅହଲିୟାବତିଙ୍ଗ୍‌ ମାରି ପ୍ରବୁଦି ମାଣାନ୍‌ ମନ୍‌ତୁ ବୁଦି ପୟ୍‌ତି ଆଇ ୱିଜୁ ବୁଦି ପୟ୍‌ତି ଲୋକାଙ୍ଗ୍‌ ମାରି ଆୟା ପାଣି କିନି ଉଣ୍ତିଙ୍ଗ୍‌ ମନ୍‌ତୁ ବୁଦି ପୟ୍‌ତି ଲୋକାଙ୍ଗ୍‌ କୁକୁତାନ୍‌ । 3 ଆବେନୁ ୱାର୍‌ ପବିତ୍ର ବାଡିଦି ତିଆର୍‌ କିନି ପାଣି ଉଣ୍ତିଙ୍ଗ୍‌ ଇସ୍ରାଏଲ ଲୋକୁ ତାତି ଦାନ୍‌ ୱିଜୁ ମୋଶାଦି ମାଣାନ୍‌ ପୟ୍‌ତାର୍‌; ଆତିଙ୍ଗ୍‌ବା ଲୋକୁ ୱିଜୁ ସାଲ୍‌ଦି ୱାନି ଲାକ୍‌ତୁ ନିଜେଦି ବଦାଦାନ୍‌ ମାରି ଦାନ୍‌ ତାତାର୍‌ । 4 ଆବେଟ୍‌ ପବିତ୍ର ବାଡିଦି ୱିଜୁ ପାଣି କିନିକାର୍‌ ବୁଦି ପୟ୍‌ତି ଲୋକୁ ନିଜେ ନିଜେଦି ପାଣିଦାନ୍‌ ୱାଜି, 5 ମୋସେଙ୍ଗ୍‌ ଇର୍ହାର୍‌, "ପ୍ରବୁ ଆମାକା ଆମାକା ତିଆର୍‌ କିଦେଙ୍ଗ୍‌ ଇର୍ହାମାର୍ହାନ୍‌, ଲୋକୁ ଆୟା ପାଣି ଉଣ୍ତିଙ୍ଗ୍‌ ୱିଜୁ ଦର୍‌କାର୍‌ ଜିନିସ୍‌ତାନ୍‌ ନାଣ୍ଡ ତାସିନାର୍‌ ।"

6 ଆବେଟ୍‌ ମୋଶା ଆଦେସ୍‌ ସିଜି ଗୁଡ଼ାଦି ୱିଜୁ ଇକା ୱେର୍‌ତାନ୍‌, ମେମାର୍‌କୁ କି ଆଇମେକ୍‌ ପବିତ୍ର ବାଡି ଉଣ୍ତିଙ୍ଗ୍‌ ମାରି ଦାନ୍‌ ଉଣ୍ଡା କିମାକିର୍‌; ଆଦେଙ୍ଗ୍‌ ଲୋକୁ ତାତେଙ୍ଗ୍‌ ଡ଼ିସ୍‌ତାର୍‌ । 7 ଇର୍ରିଙ୍ଗା ୱିଜୁ ପାଣି କିଦେଙ୍ଗ୍‌ ୱାରି ଜିନିସ୍‌ ନାଣ୍ଡ ମାରି ତାନିମାଣାନ୍‌ ନାଣ୍ତ ମାର୍ହାତ୍‌ ।

8 ଇୟାୱେନ୍‌କା ପାଣି କିନିୱାରି ମାଣାନ୍‌ ୱିଜୁ ବୁଦି ପୟ୍‌ତି ଲୋକୁ ଅଡ଼ିନି ନୁଲୁ, ନିଡ଼ି, ସେର୍‌ଗା, ଏରାନି ରଙ୍ଗ୍‌ ନୁଲୁଦାନ୍‌ ଇଲୁଦି ଦାସ୍‌ଗୋଟା ପାର୍‌ଦେଙ୍ଗ୍‌ ତିଆର୍‌ କିତାର୍‌; ମାରି ଆୟା ଲୋଇ ପାଣିଦାନ୍‌ କିରୁବଦି ବମା କିତାର୍‌ । 9 ୱିଜୁ ପାର୍‌ଦେଙ୍ଗ୍‌ କଡ଼େ ଆଟ୍‌ଗୋଟା ମୁରେଙ୍ଗ୍‌ ନିରିକା, ୱିଜୁ ପାର୍‌ଦେଙ୍ଗ୍‌ ନାଲ୍‌ଗି ମୁରେଙ୍ଗ୍‌ ଅସାର୍‌ ମାରି ୱିଜୁ ପାର୍‌ଦେଙ୍ଗ୍‌ ସମାନ୍‌ ଇସାବ୍‌ଦାନ୍‌ ମାର୍ହାତ୍‌ । 10 ମାରି, ୱାନ୍‌ ପାସ୍‌ଗୋଟା ପାର୍‌ଦେଙ୍ଗ୍‌ ଉଣ୍ଡ୍ରେବାନୁ କିତାନ୍‌; ଆଇ ପାସ୍‌ଗୋଟା ପାର୍‌ଦେଙ୍ଗ୍‌ ଉଣ୍ତ୍ରେମାନୁ ମିସା କିତାନ୍‌ । 11 ମାରି, ୱାନ୍‌ ଜୋଡ଼ିସ୍‌ତି ବାଡିଦୁ ପାର୍‌ତୁମ୍‌ଦି ସେସ୍‌ତି ପାର୍‌ଦାଦି ଜାଲିଦୁ ନିଡ଼ି ନୁଲୁଦାନ୍‌ ଉରି କିତାନ୍‌; ଜୋଡ଼ିସ୍‌ତି ମାରି ଉନ୍‌ଡ୍ରି ପାର୍‌ଦାଦି ଜାଲିଦୁ ଆୟା ୱାଜା କିତାନ୍‌ । 12 ୱାନ୍‌ ପାର୍‌ତୁମ୍‌ ପାର୍‌ଦାଦି ଜାଲିଦୁ ପସାସ୍‌ ଗୋଟା ଉରିଙ୍ଗ୍‌ ମାରି ଜୋଡ଼ିସ୍‌ତି ବାଡିଦି ମାରି ଉନ୍‌ଡ୍ରି ପାର୍‌ଦାଦି ଜାଲିଦୁ ପସାସ୍‌ ଗୋଟା ଉରିଙ୍ଗ୍‌ କିତାର୍‌; ଆୟା ଉରିଙ୍ଗ୍‌ ୱିଜୁ ନିଜେ ନିଜେଦି ସାମ୍‌ନା ସାମ୍‌ନି ମାର୍ହେ । 13 ମାରି ୱାନ୍‌ ପଚାସ୍‌ ଗୋଟା ବାଙ୍ଗାରାମ୍‌ଦି ଲୁହାଦି ୱେକଣି କିଜି ୱେକଣିଦୁ ପାର୍‌ଦା ୱିଜୁ ଜୋଡ଼ିସ୍‌ତାର୍‌; ଆବେଟ୍‌ ଇଲୁ ଉନ୍‌ଡ୍ରେ ଆତାତ୍‌ । 14 ଇୟାୱେନ୍‌କା ୱାନ୍‌ ତେବାଦେଙ୍ଗ୍‌ ପିଡ଼ିକ୍‌ନି ଗୁଡ଼ା ଉଣ୍ତିଙ୍ଗ୍‌ ଗରିଆ ବୁର୍‌ବୁସାଦାନ୍‌ ଏଗାର୍‌ଗୋଟା ପାର୍‌ଦା ତିଆର୍‌ କିତାନ୍‌ । 15 ୱିଜୁ ପାର୍‌ଦେଙ୍ଗ୍‌ ଲମ୍ୱା ତିରିସ୍‌ କିୟୁ ମାରି ଅସାର୍‌ ନାଲ୍‌ଗି କିୟୁ, ଆୟା ଏଗାର୍‌ଗୋଟା ପାର୍‌ଦାଦି ସୋମାନ୍‌ ଇସାବ୍‌ଦାନ୍‌ ମାର୍ହାତ୍‌ । 16 ମାରି, ୱାନ୍‌ ପାସ୍‌ ଗୋଟା ପାର୍‌ଦା ଜୋଡ଼ିସ୍‌ କିଜି ୱେରେଏ ଇଟ୍‌ତାନ୍‌ ମାରି ଆଇ ସଅ ଗୋଟା ପାର୍‌ଦା ଜୋଡ଼ିସ୍‌ କିଜି ୱେରେଏ ଇଟ୍‌ତାନ୍‌ । 17 ଜୋଡ଼ିସ୍‌ତି ବାଡିଦୁ ପାର୍‌ତୁମ୍‌ କନାଦି ଅଟିଦୁ ପାର୍‌ଦାଦି ନାସୁଦାନ୍‌ ପଚାସ୍‌ ଗୋଟା ଗାଟିଙ୍ଗ୍‌ କିତାନ୍‌ ମାରିଉଣ୍ଡ୍ରି ପାର୍‌ଦାଦି ଜୋଡ଼ିସ୍‌ତିବାନୁ ନାସୁଦାନ୍‌ ପଚାସ୍‌ ଗୋଟା ଗାଟିଙ୍ଗ୍‌ କିତାନ୍‌ । 18 ମାରି ୱାନ୍‌ ଜୋଡ଼ିସ୍‌ କିଜି ଉନ୍‌ଡ୍ରି ଗୁଡ଼ା କିଦେଙ୍ଗ୍‌ ପିତଲ୍‌ଦି ପସାସ୍‌ ଗୋଟା ଲୁହାଦି ୱେକଣି କିତାନ୍‌ । 19 ମାରି, ୱାନ୍‌ ନେତେର୍‌ କାଡ଼୍‌ଜିତି ମେଣ୍ଡାଦି ତଲୁଦାନ୍‌ ଗୁଡ଼ାଦି ଉନ୍‌ଡ୍ରି ରେକାମ୍‌ ମାରି ଆୟା ମୁସୁକୁ କଡ଼୍‌କି ମେଣ୍ତା ପିଲାଦି ତଲୁଦି ଉନ୍‌ଡ୍ରି ରେକାମ୍‌ ତିଆର୍‌ କିତାନ୍‌ ।

20 ଆୟାୱେନ୍‌କା ୱାନ୍‌ ଇଲୁ ଉଣ୍ତିଙ୍ଗ୍‌ ଆକିସିଆ ମାରାନୁଦାନ୍‌ ନିଲ୍‌ପ୍‌ନି ପାଟା ତିଆର୍‌ କିତାନ୍‌ । 21 ଉନ୍‌ଡ୍ରେ ଉନ୍‌ଡ୍ରେ ପାଟା ଦାସ୍‌ଗୋଟା ମୁରେଙ୍ଗ୍‌ ନିରିକା ମାରି ଉଣ୍ତ୍ରେ ମୁରା ଆଦା ଅସାର୍‌ ମାର୍ହାତ୍‌ । 22 ୱିଜୁ ପାଟେଙ୍ଗ୍‌ ଉନ୍‌ଡ୍ରେ ୱାଜା ରୁଣ୍ଡି ରୁଣ୍ଡି ବନ୍ଦ୍‌କୁ ମାର୍ହେ; ଇୟା ୱାଜା ଆୟା ଗୁଡ଼ାଦି ୱିଜୁ ପାଟେଙ୍ଗା ଉଣ୍ତିଙ୍ଗ୍‌ ତିଆର୍‌ କିତାର୍‌ । 23 ମାରି ଆୟା ବାସାନି ଗୁଡ଼ାଦି ଉଣେର୍‌ ତରଟି ଉଣ୍ତିଙ୍ଗ୍‌ କୋଡ଼େ ଗୋଟା ପାଟା ତିଆର୍‌ କିତାର୍‌ । 24 ମାରି, ଆୟା କୋଡ଼େ ଗୋଟା ପାଟା ଆଡ୍‌ଗି ସାଲିସ୍‌ ଗୋଟା ୱେଣ୍ତିଦି ବନ୍ଦ୍‌କୁ କିତାର୍‌; ଉନ୍‌ଡ୍ରେ ପାଟା ଆଡ୍‌ଗି ଆବେଣି ରୁଣ୍ଡି ପାଦ୍‌ ଉଣ୍ତିଙ୍ଗ୍‌ ରୁଣ୍ଡି ବନ୍ଦ୍‌କୁ ମାରି ଆଇ ପାଟେଙ୍ଗା ଆଡ୍‌ଗି ୱାରି ରୁଣ୍ଡି ରୁଣ୍ଡି ପାଦ୍‌ ବନ୍ଦ୍‌କୁ ଉଣ୍ତିଙ୍ଗ୍‌ ରୁଣ୍ଡି ରୁଣ୍ଡି ବନ୍ଦ୍‌କୁ କିତାର୍‌ । 25 ମାରି, ତେବାନି ଗୁଡ଼ାଦି ଡେବ୍‌ରା ତରିନ୍‌ କୋଡ଼େ ଗୋଟା ପାଟେଙ୍ଗ୍‌ କିତାର୍‌ । 26 ଉନ୍‌ଡ୍ରେ ପାଟା ଆଡ୍‌ଗି ରୁଣ୍ଡି ବନ୍ଦ୍‌କୁ ମାରି ଆଇ ପାଟେଙ୍ଗା ଆଡ୍‌ଗି ରୁଣ୍ଡି ରୁଣ୍ଡି ବନ୍ଦ୍‌କୁ, ଇୟା ୱାଜା ୱେଣ୍ତିଦି ସାଲିସ୍‌ ଗୋଟା ବନ୍ଦ୍‌କୁ କିତାର୍‌ । 27 ଆୟା ତେବାନି ଗୁଡ଼ାଦି ୱେନ୍‌କା ତରଟି ଉଣ୍ତିଙ୍ଗ୍‌ ସୋ ଗୋଟା ପାଟେଙ୍ଗ୍‌ କିତାର୍‌ । 28 ମାରି, ତେବାନି ଗୁଡ଼ାଦି ଆୟା ୱେନ୍‌କା ତରଟି ରୁଣ୍ଡି କନେଙ୍ଗା ଉଣ୍ତିଙ୍ଗ୍‌ ରୁଣ୍ଡି ପାଟେଙ୍ଗ୍‌ କିତାର୍‌ । 29 ମାରି, ଆୟା ଆଡ୍‌ଗି ଜୋଡ଼ିସ୍‌ତିକା ମାର୍ହାତ୍‌ ମାରି ଆୟା ୱାଜା ଆବେଣି ତାଲାଦୁ ପାର୍‌ତୁମ୍‌ଦି ବରୋ ଲାକ୍‌ତୁ ଜୋଡ଼ିସ୍‌ତିକା ମାର୍ହାତ୍‌; ଇୟା ୱାଜା ଆୟା ରୁଣ୍ଡି କନେଙ୍ଗାଣି ପାଟା ଜୋଡ଼ିସ୍‌ତାର୍‌ । 30 ଆବେଟ୍‌ ଆଟ୍‌ ଗୋଟା ପାଟେଙ୍ଗ୍‌, ମାରି ଉନ୍‌ଡ୍ରି ଉନ୍‌ଡ୍ରି ପାଟା ଆଡ୍‌ଗି ରୁଣ୍ଡି ରୁଣ୍ଡି ବନ୍ଦ୍‌କୁ, ଇୟାୱାଜା ସଉଲ ଗୋଟା ୱେଣ୍ତି ବନ୍ଦ୍‌କୁ କିତାର୍‌ ।

31 ମାରି ଆୟା ଆକିସିଆ ମାରାନ୍‌ଦାନ୍‌ ଗାଡ଼ା ତିୟାର୍‌ କିଜି ତେବାନି ଗୁଡ଼ାଦି ଉନ୍‌ଡ୍ରି ତରଟି ପାଟାଦୁ ପାସ୍‌ ଗୋଟା ଗାଡ଼ା 32 ମାରି ଆଇ ତରଟି ପାଟାଦୁ ପାସ୍‌ ଗୋଟା ଗାଡ଼ା, ମାରି, ତେବାନି ଗୁଡ଼ାଦି ୱେନ୍‌କା ତରଟି ଆତ୍ରେ ତରଟି ପାଟାଦୁ ପାସ୍‌ ଗୋଟା ଗାଡ଼ା ତିଆର୍‌ କିତାର୍‌ । 33 ମାରି, ନାଣିମିଦି ଗାଡ଼ା, ପାଟାଦି ନାଣିମିଦାନ୍‌ ଇୟା ତାଲାଦାନ୍‌ ଆୟା ତାଲା ସାନ୍ଦି ଇତାତ୍‌ । 34 ମାରି, ୱାନ୍‌ ଆୟା ୱିଜୁ ପାଟେଙ୍ଗା ବାଙ୍ଗାରାମ୍‌ଦାନ୍‌ ଡାଲାୟ୍‌ କିତାର୍‌ ମାରି ଗାଡ଼ାଦି ଉଣ୍ତିଙ୍ଗ୍‌ ବାଙ୍ଗାରାମ୍‌ଦି ବରୋ କିତାର୍‌, ଗାଡ଼ା ୱିଜୁ ବାଙ୍ଗାରାମ୍‌ଦାନ୍‌ ଡାଲାୟ୍‌ କିତାର୍‌ ।

35 ଆୟା ନିଡ଼ି, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌, ଅଡ଼ିନି ସରୁ ନୁଲୁ ତିଆର୍‌ଆତି ମାରି କିରୁବଦିୱାଜା ବାନାଦି ଉନ୍‌ଡ୍ରି ୱେରେଏ କିନି ପାର୍‌ଦା ତିଆର୍‌ କିତାର୍‌ । 36 ମାରି, ୱାନ୍‌ ଆୟା ଉଣ୍ତିଙ୍ଗ୍‌ ଆକିସିଆ ମାରାନ୍‌ଦି ନାଲ୍‌ଗି ମୁଣ୍ଡେଙ୍ଗ୍‌ କିଜି ବାଙ୍ଗାରାମ୍‌ଦାନ୍‌ ଡାଲାୟ୍‌ କିତାର୍‌ ମାରି ଆୟା ୱିଜୁଦି ଆକୋଡ଼ି ବାଙ୍ଗାରାମ୍‌ଦାନ୍‌ କିତାର୍‌ ମାରି ଆୟା ଉଣ୍ତିଙ୍ଗ୍‌ ୱେଣ୍ତିଦି ନାଲ୍‌ଗି ବନ୍ଦ୍‌କୁ ଇଟ୍‌ତାର୍‌ । 37 ମାରି, ଆୟା ତେବାନି ଗୁଡ଼ାଦି ଦୁୱାର୍‌ ଉଣ୍ତିଙ୍ଗ୍‌ ନିଡ଼ି, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌ ମାରି ଅଡ଼ିନି ନୁଲୁ ତିଆର୍‌ଆତି ସିତ୍ରା କାବ୍ରାଦି ଉନ୍‌ଡ୍ରି ପିଡ଼ିକ୍‌ନି ପାର୍‌ଦା ତିୟାର୍‌ କିତାର୍‌ । 38 ଆବେନୁ ପାସ୍‌ ଗୋଟା ମୁଣ୍ଡେଙ୍ଗ୍‌ ମାରି ଆୟା ୱିଜୁଦି ଆକୋଡ଼ି କିତାର୍‌; ମାରି, ଆୟା ୱିଜୁଦି ଟିପୁକୁ ମାରି ତିଗା ବାଙ୍ଗାରାମ୍‌ଦାନ୍‌ ଡାଲାୟ୍‌ କିତାର୍‌, ମାତର୍‌ ୱାନିକା ପାସ୍‌ ଗୋଟା ବନ୍ଦ୍‌କୁ ପିତଲ୍‌ଦିକେଙ୍ଗ୍‌ ମାର୍ହେ ।