1 ଆୟା ୱେଡ଼ାଦୁ ମୋଶା ନିଜେଦି ପତେଲ୍‌ସି ଜିତ୍ର ଦର୍‌ଦି ମିଦିୟନିୟ ଜାଜକଦି କଡିଙ୍ଗ୍‌ ଗରିଏଙ୍ଗ୍‌ ମିଜି ମାର୍ହାନ୍‌; ଅରନେଣ୍ଡ୍‌ ଗରତି ୱେନ୍‌କାରି ତରନ୍‌ କଡିଙ୍ଗ୍‌ ଗରିଏଙ୍ଗ୍‌ ଅସି ହୋରେବ ଦର୍‌ତି ମାପୁରୁଦି ଗରନ୍‌ତୁ ଅତାନ୍‌ । 2 ଇବେନୁ ଉନ୍‌ଡ୍ରି ଦୁପାଦୁ ସିସୁ ଲୋଇରାନ୍‌ ପ୍ରବୁଦି ଦୁତ୍‌ ୱାନିଙ୍ଗ୍‌ ତରାୟ୍‌ ଆତାତ୍‌; ଆବେଟ୍‌ ୱାନ୍‌ ସୁଡ଼ୁତାନ୍‌, ମାରି ସୁଡ଼ୁଦୁ, ଦୁପା ସିସୁଦୁ କାସ୍‌ସିନାତ୍‌, ଇରିଙ୍ଗ୍‌ବା ଦୁପା ୱେଏଜିନାତ୍‌ । 3 ମାରି ମୋସା ଇର୍ହାନ୍‌, "ନାନ୍‌ ଲାକ୍‌ତୁ ସଲସି ଇୟା ପେରି କାବାଆନି ବିସୟ୍‌ ସୁଡ଼ୁନା, ଦୁପା ଇନ୍‌ତାନିଙ୍ଗ୍ ୱେଏଜିନାତ୍‌ ।" 4 ମାତର ପ୍ରବୁ ଏସ୍ତିୱାଲେ ସୁଡ଼ୁତାନ୍‌, ୱାନ୍‌ ସୁଡ଼ୁନି ଉଣ୍ତିଙ୍ଗ୍‌ ଲାକ୍‌ତୁ ସଲ୍‌ସିନାନ୍‌, ନାସ୍ତିୱାଲେ ମାପୁରୁ ଦୁପା ନାଣିମିରାନ୍‌ ୱାନିଙ୍ଗ୍‌ କୁକ୍‌ସି ଇର୍ହାନ୍‌, "ଏ ମୋଶା, ଏ ମୋଶା ।" ଆବେଟ୍‌ ୱାନ୍‌ ଇର୍ହାନ୍‌, "ଇବେ ସୁଡ଼ୁଆ, ନାନ୍‌ ଇବେ ମାନା ।" 5 ଆବେଟ୍‌ ୱାନ୍‌ ଇର୍ହାନ୍‌, "ନିନ୍‌ ଇୟା ବାଡି ଲାକ୍‌ତୁ ରାମା, ନି ପାଦାମ୍‌ଦି ଜୁତେଙ୍ଗ୍‌ କୁତ୍‌ଆ; ଇରିଙ୍ଗାଁ ନିନ୍‌ ଏମେ ବାଡିଦୁ ନିଲ୍‌ତି ମାନି, ଆକା ପବିତ୍ର ବୁମି ।" 6 ୱାନ୍‌ ମାରି ଇର୍ହାନ୍‌, ନାନ୍‌ ମି ଡକ୍ରାଦାଦାରି ମାପୁରୁ, ଇରିଙ୍ଗ୍‌, ଅବ୍ରହାମଦି ମାପୁରୁ ମାରି ଇସ୍‌ହାକଦି ମାପୁରୁ ମାରି ଜାକୁବଦି ମାପୁରୁ । ଆବେଣାନ୍‌ ମୋଶା ନିଜେଦି ମକମ୍‌ ପିଡ଼ିକାତାନ୍‌, ଇରିଙ୍ଗାଁ ୱାନ୍‌ ମାପୁରୁଦିଙ୍ଗ୍‌ ସୁଡ଼ୁଦେଙ୍ଗ୍‌ ତିୟେଲ୍‌ ଆତାନ୍‌ । 7 ଇୟାୱେନ୍‌କା ମାପୁରୁ ଇର୍ହାନ୍‌, "ନାନ୍‌ ମିସର ଦେସ୍‌ତୁ ମାନି ନିଜେ ଲୋକାଦି କାସ୍ଟୁ ସୁଡ଼ୁତା ମାନା ମାରି ପାଣିକିନିୱାରି ମାଣାନ୍‌ ଆଜିମାନି ୱାରି ଆଡ଼୍‌ବାନିକା ୱେର୍ହାମାନା; ନାନ୍‌ ୱାରି କାସ୍ଟୁ ନେସ୍‌ତା । 8 ଇୟାଉଣ୍ତିଙ୍ଗ୍‌ ମିସ୍ରିୟ ଲୋକାଦି କିୟୁଦାନ୍‌ ୱାରିଙ୍ଗ୍‌ ରକିୟା କିଦେଙ୍ଗ୍‌, ମାରି, ଆୟା ଦେସ୍‌ତାନ୍‌ ନେଗି ନି ଅସାର୍‌ ମାରିଉଣ୍ଡ୍ରି ଦେସ୍‌ତୁ; ଇରିଙ୍ଗାଁ, କିଣାନିୟ ମାରି ହିତ୍ତୀୟ ମାରି ଇମୋରିୟ ମାରି ପରିସିୟ ମାରି ହିବ୍ବୀୟ ମାରି ଜିବୁସିୟର୍‌ ଆମା ବାଡିଦୁ ମାନ୍‌ଜିନାର୍‌, ଆୟା ପାଲୁ ନି ପୁକି ସନି ନାନି ଦେସ୍‌ତୁ ୱାରିଙ୍ଗ୍‌ ଅତେଙ୍ଗ୍‌ ରେସି ୱାତାପ୍‌ । 9 ଏଣ୍ଡେସ୍‌ଇରିଙ୍ଗା ସୁଡ଼ୁଦୁ, ଇସ୍ରାଏଲ ଲୋକୁ ଆଡ଼ାବାନିକା ନା ଗିତଣିଦୁ ୱାତାମାନାତ୍‌; ମାରି ମିସ୍ରିୟ ଲୋକୁ ୱାରିଙ୍ଗ୍‌ ଆମା କାସ୍ଟୁ ସିଜିନାର୍, ଆକା ନାନ୍‌ ସୁଡ଼ୁତାମାନା 10 ଆଦେଙ୍ଗ୍‌ ଇଲେଇ ରାଆ, ନାନ୍‌ ନିଙ୍ଗିଁ ରାଜା ଫାରୋ ଲାକ୍‌ତୁ ପକ୍‌ନା, ନିନ୍‌ ମିସରତାନ୍‌ ନା ଇସ୍ରାଏଲ ଲୋକାଙ୍ଗ୍‌ ସପ୍‌ସି ତାନି ।"

11 ଆବେଟ୍‌ ମୋଶା ମାପୁରୁଙ୍ଗୁଁ ଇର୍ହାନ୍‌, "ନାନ୍‌ ଏନ୍‌ ଜେ, ରାଜା ପାରୋଦି ଲାକ୍‌ତୁ ସଲ୍‌ସି ମିସର ଦେସ୍‌ଦାନ୍‌ ଇସ୍ରାଏଲ ଲୋକାଙ୍ଗ୍‌ ସପ୍‌ସିତାନା ?" 12 ଆବେଟ୍‌ ମାପୁରୁ ଇର୍ହାନ୍‌, "ନାନ୍‌ ନି ୱାଲେ ମାନା; ମାରି ନାନ୍‌ ଜେ ନିଙ୍ଗିଁ ପକ୍‌ତାମାନା, ଆବେଣି ଉନ୍‌ଡ୍ରି ସିନା ନେସ୍‌ନି, ନିନ୍‌ ମିସରଦାନ୍‌ ଲୋକାଙ୍ଗ୍‌ ସପ୍‌ସିତାତି ୱେନ୍‌କା ମିର୍‌ ଇୟା ଗରନ୍‌ତୁ ମାପୁରୁଦି ସେବା କିନିଦେର୍‌ ।" 13 ଇୟାୱେନ୍‌କା ମୋଶା ମାପୁରୁଙ୍ଗୁଁ ଇର୍ହାନ୍‌, "ସୁଡ଼ୁଆ, ନାନ୍‌ ଏସ୍ତିୱାଲେ ଇସ୍ରାଏଲଦି ଲୋକା ଲାକ୍‌ତୁ ସଲ୍‌ସି ୱାରିଙ୍ଗ୍‌ ଇନା, ନା ମି ପୁର୍ବେଦିଦାଦାରି ମାପୁରୁ ନାଙ୍ଗି ମିଲାକ୍‌ତୁ ପକ୍‌ତାମାନାନ୍‌; ମାରି, ୱାର୍‌ ୱେନ୍‌ବାନାର୍‌, ୱାନି ଦର୍‌ ଇନ୍‌ଦର୍‌ ? ନାସ୍ତିୱାଲେ ନାନ୍‌ ଇନିକା ଇନା ?" 14 ଆବେଟ୍‌ ମାପୁରୁ ମୋସେଙ୍ଗ୍‌ ଇର୍ହାନ୍‌, "ନାନୁ ଜେ ମାନା, ଆୟାକାନ୍‌ ମାନା" ମାରି, ୱାନ୍‌ ଇର୍ହାନ୍‌, "ନିନ୍‌ ଇସ୍ରାଏଲ ଲୋକାଙ୍ଗ୍‌ ଇନି, ନିଜେ ମାପ୍‌ ମାନାପ୍‌ ମି ଲାକ୍‌ତୁ ନାଙ୍ଗିଁ ପକ୍‌ତାତାମାନାନ୍‌ ।" 15 ମାପୁରୁ ମୋସେଙ୍ଗ୍‌ ମାରି ଇର୍ହାନ୍‌, "ନିନ୍‌ ଇସ୍ରାଏଲ ଲୋକାଙ୍ଗ୍‌ ଇୟା ମାଟା ଇନି, ମି ପୁର୍ବେଦିବୁବାରି ମାପୁରୁ, ଇରିଙ୍ଗାଁ, ଅବ୍ରହାମଦି ମାପୁରୁ ମାରି ଇସ୍‌ହାକଦି ମାପୁରୁ ମାରି ଜାକୁବଦି ମାପୁରୁ ଏମେ ପ୍ରବୁ, ୱାନ୍‌ ମି ଲାକ୍‌ତୁ ନାଙ୍ଗିଁ ପକ୍‌ତାମାନାନ୍‌; ମା ଇୟା ଦର୍‌ ୱିଜୁଦିନ୍‌ ମାନ୍‌ଜିନିକା, ମାରି, କୁଟୁମ୍‌ତାନ୍‌ କୁଟୁମ୍‌ ସାନ୍ଦି ଏତ୍‌କିନିକା ଆନାତ୍‌ । 16 ନିନ୍‌ ସଲ୍‌ସୋ ଇସ୍ରାଏଲ ଲୋକାଦି ପ୍ରାଚିନରିଙ୍ଗ୍‌ ଉଣ୍ଡ୍ରେବାନୁ କିଜି ଇୟା ମାଟା ଇନ୍‌ଆ, ମି ପୁର୍ବେଦିବୁବାରି ମାପୁରୁ, ଇରିଙ୍ଗ୍‌, ଅବ୍ରହାମ ମାରି ଇସ୍‌ହାକ ମାରି ଜାକୁବଦି ମାପୁରୁ ସଦାପ୍ରବୁ ନାଙ୍ଗି ବର୍‌ ସିଜି ଇର୍ହାମାନାନ୍‌, ମାପ୍‌ ମିଙ୍ଗିଁ ମାରି ମିସରଦୁ ମିଙ୍ଗିଁ ଆମା ଆମାକା କିୟାଇ ଆତାମାନାତ୍‌, ଆୟା ୱିଜୁ ବିସୟ୍‌ତୁ ସୁଡ଼୍‌ତାମାନାପ୍‌ । 17 ମାରି, ମାପ୍‌ ମିଙ୍ଗିଁ ମିସରତି କାସ୍ଟୁଦାନ୍‌ ରକିୟା କିଜି କିଣାନିୟରି ମାରି ହିତ୍ତୀୟରି ମାରି ଇମୋରିୟରି ମାରି ପରିସିୟରି ମାରି ହିବ୍ବୀୟରି ମାରି ଜିବୁସିୟରି ପାଲୁ ନି ପୁକି ସନି ଦେସ୍‌ତୁ ଅନାପ୍‌ ଇଜି ଇର୍ହା ମାନାପ୍‌ । 18 ଇବେଟ୍‌ ୱାର୍‌ ମି ମାଟାଦାନ୍‌ ରାଜି ଆନାର୍‌; ଆବେଟ୍‌ ନିନ୍‌ ମାରି ଇସ୍ରାଏଲ କୁଟୁମ୍‌ଦି ପ୍ରାଚିନରିଙ୍ଗ୍‌ ମିସରଦି ରାଜା ଲାକ୍‌ତୁ ସଲ୍‌ସି ଇୟା ମାଟା ଇନିଦେର୍‌, ଏବ୍ରୀୟ ଲୋକାଦି ମାପୁରୁ ସଦାପ୍ରବୁ ମା ୱାଲେ ମିସାତା ମାନାନ୍‌; ଇୟାଉଣ୍ଡିଙ୍ଗ୍‌ ମାଡ଼ିସ୍‌ କିଜିନାପ୍‌, ମା ମାପୁରୁ ସଦାପ୍ରବୁଦି ଉଦେସ୍‌ତାନ୍‌ ପୁଜା କିଦେଙ୍ଗ୍‌ ଇଲେଇ ମାଙ୍ଗିଁ ମୁଣ୍ତ୍ରି ଦିନାମ୍‌ଦି ସାରି ପେରିବାଟାଦୁ ସନି ଉଣ୍ତିଙ୍ଗ୍‌ ସାରି ସିଦା । 19 ମାତର ମାପ୍‌ ନେସ୍‌ନାପ୍‌, ମିସରଦି ରାଜା ମିଙ୍ଗିଁ ସନି ଉଣ୍ତିଙ୍ଗ୍‌ ସାରି ସିଏନ୍‌, ସାକ୍ତିଦି କିୟୁ ତର୍‌ତିଙ୍ଗ୍‌ବା ସିଏନ୍‌ । 20 ଆବେଟ୍‌ ମାପ୍‌ ନିଜେଦି କିୟୁ ସାକ୍‌ସି ଦେସ୍‌ତୁ ଜେ ୱିଜୁ କାବାଆନି ପାଣି କିନାପ୍‌; ଆୟାବାଣାନ୍‌ ମିସରଦିଙ୍ଗ୍‌ କାସ୍ଟୁ ସିତି ୱେନ୍‌କା ୱାନ୍‌ ମିଙ୍ଗିଁ ସଣ୍ଡ୍ରେଙ୍ଗ୍‌ ସିନାନ୍‌ । 21 ମାରି ମାପ୍‌ ମିସ୍ରିୟ ଲୋକା ଆଗ୍‌ଡ଼ି ଇୟା ଲୋକାଙ୍ଗ୍‌ ଆର୍ସିବାଦ୍‌ କିନାପ୍‌, ଆବେଟ୍‌ ମିର୍‌ ସନିୱେଡ଼ାଦୁ ୱାର୍ରି କିୟୁଦାନ୍‌ ସଲ୍‌ଇଦେର୍‌; 22 ମାତର ୱିଜୁ ଆଇମେକ୍‍ ନିଜେ ଇଲୁ ପାଡ଼ାକ୍‌ଦୁମାନି ମାରି ନିଜେଦି ଇଲ୍‌କାଣି ଅଇମେକା ଲାକ୍‌ତୁରାନ୍‌ ବାଙ୍ଗାରାମ୍‌ ମାରି ୱେଣ୍ଡି ମାରି ଆଙ୍ଗିଁପାସିୟା ଲସ୍‌ସି ଅନେ; ମାରି, ଆକା ମିର୍‌ ନିଜେଦି କଡ଼ର୍‌ଆଇଲିକାଙ୍ଗ୍‌ ଇଟ୍‌କିସ୍‌ନିଦେର୍‌ ମାରି । ଇୟାୱାଜା ମିର୍‌ ମିସ୍ରିୟ ଲୋକାଦି ଜିନିସ୍‌ ଡ଼ିବିସ୍‌କିନି ଅନିଦେର୍‌ ।"