1 ନାସ୍ତିୱାଲେ ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, ମାପ୍‌ ଫାରୋ ଉଣ୍ତିଙ୍ଗ୍‌ ଆମାକା କିନାପ୍‌, ଆୟାକା ନିନ୍‌ ଇଲେଇ ସୁଡ଼ୁନି; ଇରିଙ୍ଗାଁ ନାଣ୍ଡ ସାକ୍ତି ତରିତିଙ୍ଗା, ୱାନ୍‌ ଲୋକାଙ୍ଗ୍‌ ଡ଼ିସ୍‌ନା ସିନାନ୍‌ ମାରି ନାଣ୍ଡ ସାକ୍ତି ତରିତିଙ୍ଗା, ନିଜେଦି ଦେସ୍‌ତାନ୍‌ ୱାରିଙ୍ଗ୍‌ ଡ଼ିସ୍‌ନା ସିନାନ୍‌ ।

2 ମାପୁରୁ ମୋଶାଦି ୱାଲେ ୱାର୍‌ଗିଜି ମାରିଇର୍ହାନ୍‌, "ମାପ୍‌ ଯିହୋବା ସଦାପ୍ରବୁ; 3 ମାପ୍‌ ଅବ୍ରାହାମ୍‌, ଇସ୍‌ହାକ ମାରି ଜାକୁବଙ୍ଗ୍‌ ୱିଜୁ ସାକ୍ତିଦି ମାପୁରୁ ଇଜି ଦର୍ଶନ୍‌ ସିତାମାର୍ହାପ୍‌, ମାତର ମାପ୍‌ ନିଜେଦି ଯିହୋବା ଦର୍‌ତାନ୍‌ ୱାରିଙ୍ଗ୍‌ ପରିଚୟ ସିଏଣ୍ଡା ମାର୍ହାପ୍‌ । 4 ମାରି କିଣାନ୍‌ ଦେସ୍‌, ଇରିଙ୍ଗାଁ, ଆବେନୁ ୱାର୍‌ ବାସା କିତାର୍‌, ଆୟା ବାସା କିନି ଦେସ୍‌ ବା ୱାରିଙ୍ଗ୍‌ ସିନାପ୍‌ ଇଜି ୱାରି ୱାଲେ ନିୟମ୍‌ ତିର୍‌ କିତା ମାର୍ହାପ୍‌ । 5 ଇଲେଇ ମିସ୍ରିୟର୍‌ ଆମାୱାରିଙ୍ଗ୍‌ ଦାସ୍‌ କିଜି ଇଟ୍‌ତା ମାନାର୍‌, ଆୟା ଇସ୍ରାଏଲ ଲୋକା ଆଡ଼୍‌ବାନିକା ୱେନ୍‌ଜି ମାପ୍‌ ନିଜେଦି ଆୟା ନିୟମ୍‌ ଏତ୍‌ କିଜିନାପ୍‌ । 6 ଇୟାଉଣ୍ତିଙ୍ଗ୍‌ ଇସ୍ରାଏଲ ଲୋକାଙ୍ଗ୍‌ ଇନ୍‌ଆ, ମାପ୍‌ ସଦାପ୍ରବୁ, ମାପ୍‌ ମିଙ୍ଗିଁ ମିସ୍ରିୟ ଲୋକା ବଜୁ ପିଣ୍ଡିନିବାଣାନ୍‌ କୁଡ଼ୁନିକା ମାରି ମାପ୍‌ ମିଙ୍ଗିଁ ୱାରି ଦାସ୍‌ପାଣିଦାନ୍‌ ମୁକୁଡ଼ା କିନିକା, ମାରି ମାପ୍‌ ପେରି ସାକ୍ତିଦାନ୍‌ ମାରି ପେରି ପେରି ଦଣ୍ଡ୍‌ଦି ମାଣାନ୍‌ ମିଙ୍ଗିଁ ରକିୟା କିନାପ୍‌ । 7 ମାପ୍‌ ମିଙ୍ଗିଁ ନିଜେ ଲୋକା ୱାଜା ଆସ୍‌ନାପ୍‌ ମାରି ମାପ୍‌ ମି ମାପୁରୁ ଆନାପ୍‌; ଆବେନୁ ମିସ୍ରିୟରି ବଜୁପିଣ୍ଡିନି ମାଣାନ୍‌ ଆକ କିନିକାପ୍‌ ମାପ୍‌ ନେ ମି ମାପୁରୁ ସଦାପ୍ରବୁ ନେ, ଆକା ମିର୍‌ ନେସ୍‌ନିଦେର୍‌ ।" 8 ମାପ୍‌ ଅବ୍ରହାମ୍‌ ମାରି ଇସ୍‌ହାକ ମାରି ଜାକୁବଙ୍ଗ୍‌ ଆମା ଦେସ୍‌ ସିନି ଉଣ୍ତିଙ୍ଗ୍‌ ପାର୍‌ମାଣ୍‌ କିତାମାନାପ୍‌, ଆୟା ଦେସ୍‌ତୁ ମାପ୍‌ ମିଙ୍ଗିଁ ଅନାପ୍‌; ମାରି ମାପ୍‌ ମା ଅଦିକାର୍‌ ଆୟାକା ମିଙ୍ଗିଁ ସିନାପ୍‌; ମାପ୍‌ ସଦାପ୍ରବୁ । 9 ମୋଶା ଇସ୍ରାଏଲ ଲୋକାଙ୍ଗ୍‌ ଆୟା ଇସାବ୍‌ଦାନ୍‌ ଇର୍ହାନ୍‌, ମାତର ୱାର୍‌ ମନୋଦୁକ୍‌ ମାରି କାସ୍ଟୁଦି ଦାସ୍‌ ଉଣ୍ତିଙ୍ଗ୍‌ ମୋଶାଦି ବାକ୍ୟ ଦାନ୍‌ ମନ୍‌ସିଏତାର୍‌ ।

10 ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, 11 ନିନ୍‌ ସଲସି ମିସରଦି ରାଜା ପାରୋଙ୍ଗ୍ ଇନ୍‌ଆ, ମି ଦେସ୍‌ଦାନ୍‌ ଇସ୍ରାଏଲ ଲୋକାଙ୍ଗ୍‌ ପକ୍‌ଆ ।

12 ଆବେନୁ ମୋଶା ସଦାପ୍ରବୁଦି ଆଗ୍‌ଡ଼ି ଇର୍ହାନ୍‌, "ସୁଡ଼ୁଆ, ଇସ୍ରାଏଲ ଲୋକ୍‌ ନା ମାଟାଦିଙ୍ଗ୍‌ ମନ୍‌ ସିଏଜିନାର୍‌; ଆଦେଙ୍ଗ୍‌ ୱାର୍‌ଗିଦେଙ୍ଗ୍‌ ଆଟ୍‌ଇ ଲୋକ୍‌ ଜେ ନାନ୍‌ ସିଲେ, ନା ମାଟା ଫାରୋ ଏଣ୍ଡେସ୍‌ ୱାଜା ୱେନାନ୍‌ ?"

13 ଇୟାୱାଜା ସଦାପ୍ରବୁ ମୋଶା ମାରି ହାରୋଣ ୱାଲେ ୱାର୍‌ଗିତାର୍‌, ମାରି ଇସ୍ରାଏଲ ଲୋକାଙ୍ଗ୍‌ ମିସର ଦେସ୍‌ତାନ୍‌ ସପ୍‌ସି ତାନି ଉଣ୍ତିଙ୍ଗ୍‌ ମିସରଦି ରାଜା ଫାରୋ ଲାକ୍‌ତୁ ମାରି ଇସ୍ରାଏଲ ଲୋକା ଲାକ୍‌ତୁ ମାନାନି ମାଟା ୱାରିଙ୍ଗ୍‌ ଇର୍ହାନ୍‌ ।

14 ଇୟାୱିଜୁ ଲୋକ୍‌ ନିଜେ ନିଜେ ଡକ୍‌ରାଦାଦାରି କୁଟୁମ୍‌ଦି ମାଣାନ୍‌ ପେରିକାର୍‌ ମାର୍ହାର୍‌ । ଜାକୁବଦି ପେରି ମାରିନ୍‌ ରୁବେନ୍‌ଦି ମାରିନ୍‌ ହୋନକ ମାରି ପଲ୍ଲୁ ମାରି ହିସ୍ରୋଣ ମାରି କର୍ମି; ଇୟାକାର୍‌ ରୁବେନ୍‌ଦି କୁଟୁମ୍‌ । 15 ମାରି, ସିମିୟୋନଦି ମାରିନ୍‌ ଜିମୁୟେଲ ମାରି ଜାମିନ୍ ମାରି ଓହଦ୍‌ ମାରି ଜାକିନ୍ ମାରି ସୋହର ମାରି କିଣାନିୟା ଆଇମାଦି ମାରିନ୍‌ ସୌଲ; ଇୟାକାର୍‌ ସିମିୟୋନଦି କୁଟୁମ୍‌ । 16 କୁଟୁମ୍‌ଦି ଇସାବ୍‌ଦାନ୍‌ ଲେବିଦି ମାରିନ୍‌କା ଦର୍‌ ଗେର୍ଶୋନ ମାରି କହାତ ମାରି ମରାରି; ଲେବିଦି ବୟସ୍ ସୟେ ତିରିସ୍‌ ସାତ୍‌ ବାର୍ସେକ୍‌ ଆତା ମାର୍ହାତ୍‌ । 17 ମାରି ନିଜେ ନିଜେ କୁଟୁମ୍‌ଦି ଇସାବ୍‌ଦାନ୍‌ ଗେର୍ଶୋନଦି ମାରିନ୍‌ ଲିବ୍‌ନି ମାରି ସିମିୟି । 18 ମାରି କହାତଦି ମାରିନ୍‌କୁ ଅମ୍ରାମ୍‌, ଜିଷହର, ହିବ୍ରୋଣ ମାରି ଉସିୟେଲ; କହାତଦି ସୟେ ତିରିସ୍‌ ତିନ୍‌ ବାର୍ସେକ୍‌ ବୟସ୍ ଆତାମାର୍ହାତ୍‌ । 19 ମରାରିଦି ମାରିନ୍‌କୁ ମହଲି ମାରି ମୁସି; ଇୟାକାର୍‌ କୁଟୁମ୍‌ଦି ଇସାବ୍‌ଦାନ୍‌ ଲେବିୟଦି କୁଟୁମ୍‌ ।

20 ମାରି ଅମ୍ରାମ୍‌ତି ବୁବାସିଦି ତାଙ୍ଗିଁ ଜକେବଦତିଙ୍ଗ୍‌ ପେଡ଼ି ଆତାନ୍‌, ୱାଦ୍‌ ହାରୋଣଙ୍ଗ୍‌ ମାରି ମୋସେଙ୍ଗ୍‌ ଜନମ୍‌ ସିତାର୍‌; ଆୟା ଅମ୍ରାମ୍‌ଦି ବୟସ୍ ସୟେ ତିରିସ୍‌ ସାତ୍ ନମ୍ୱର୍‌ତି ବାର୍ସେକ୍‌ ଆତାମାର୍ହାତ୍‌ । 21 ଜିଷହରଦି ମାରିନ୍‌କୁ କୋରହ ମାରି ନେଫଗ ମାରି ସିକ୍ରି । 22 ମାରି ଉସିୟେଲଦି ମାରିନ୍‌କୁ ମିସାୟେଲ ମାରି ଇଲିଷାଫନ୍‌ ମାରି ସିତ୍ରି । 23 ମାରି ହାରୋଣ ଅମ୍ମିନାଦଦି ଗାଡ଼୍‌ସିଙ୍ଗ୍‌ ନହଶୋନଦି ତାଙ୍ଗିଁ ଇଲିଶେବାଦିଙ୍ଗ୍‌ ପେଡ଼ି ଆତାନ୍‌; ଆବେଟ୍‌କୁ ୱାଦ୍‌ ଦାନି ୱାଲେ ନାଦବ ମାରି ଅବିହୂ ମାରି ଇଲିୟାସର ମାରି ଇଥାମରଦିଙ୍ଗ୍‌ ଜନମ୍‌ କିତାତ୍‌ । 24 ମାରି କୋରହରଦି ମାରିନ୍‌କୁ ଅସିର ମାରି ଇଲ୍‌କାନା ମାରି ଅବିୟାସପ; ଇୟାକାର୍‌ କୋରହରଦି କୁଟୁମ୍‌ । 25 ମାରି ହାରୋଣଦି ମାରିନ୍‌ ଇଲିୟାସର ପୁଟିୟେଲ୍‌ଦି ଅରେତ୍‌ ଗାଡ଼୍‌ସିଙ୍ଗ୍‌ ଫେଡ଼ି ଆତାନ୍‌, ୱାଦ୍‌ ପିନହସ୍‌ଦିଙ୍ଗ୍‌ ଜନମ୍‌ କିତାତ୍‌, ଇୟାକାର୍‌ ଲେବିୟରି କୁଟୁମ୍‌ଦି ଇସାବ୍‌ଦାନ୍‌ ୱାରି କୁଟୁମ୍‌ଦି ମାଣାନ୍‌ ପେରିକାର୍‌ ମାର୍ହାର୍‌ ।

26 ଇୟାକା ଜେ ହାରୋଣ ମାରି ମୋଶା, ୱେରିଙ୍ଗ୍‌ ସଦାପ୍ରବୁ ଇର୍ହାନ୍‌, "ମିର୍‌ ସନ୍ୟର୍‌ ୱିଜେରେ ଇସ୍ରାଏଲ ଲୋକାଙ୍ଗ୍‌ ମିସର ଦେସ୍‌ତାନ୍‌ ସପ୍‌ସି ତାଗାଟ୍‌ ।" 27 ୱାର୍‌ ମିସରଦାନ୍‌ ଇସ୍ରାଏଲ ଲୋକାଙ୍ଗ୍‌ ସପ୍‌ସି ତାତେଙ୍ଗ୍‌ ଇଜି ମିସରଦି ରାଜା ଫାରୋଦି ୱାଲେ ୱାର୍‌ଗିତାର୍‌ । ୱାର୍‌ ଆୟା ମୋଶା ମାରି ହାରୋଣ ।

28 ଆମାଦିନ୍‌ ସଦାପ୍ରବୁ ମିସର ଦେସ୍‌ତୁ ମୋଶାଦି ୱାଲେ ୱାର୍‌ଗିତାନ୍‌, 29 ଆୟା ଦିନ୍‌ ସଦାପ୍ରବୁ ମୋସେଙ୍ଗ୍‌ ଇୟା ମାଟା ଇର୍ହାନ୍‌, ମାପ୍‌ ସଦାପ୍ରବୁ, ମାପ୍‌ ନିଙ୍ଗିଁ ଆମାକା ଆମାକା ଇନାପ୍‌; ଆକା ୱିଜୁ ମିସ୍ରିୟ ରାଜା ପାରୋଙ୍ଗ୍ ଇନ୍‌ଆ ।

30 ଆବେନୁ ମୋଶା ପ୍ରବୁଦି ଆଗ୍‌ଡ଼ି ଇର୍ହାନ୍‌, "ନେଗେଣ୍ତ୍‌ ୱାର୍‌ଗିଦେଙ୍ଗ୍‌ ନେସ୍‌ଏ ଜେ ନାନ୍‌, ନା ମାଟା ଫାରୋ ଏଣ୍ଡେସ୍‌ ୱେନାନ୍‌ ?"