1 ଆବେନୁ ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ସୁଡ଼ୁଆ, ମାପ୍‌ ନିଙ୍ଗିଁ ଫାରୋ ଲାକ୍‌ତୁ ମାପୁରୁ ୱାଜା କିଜି ଆସ୍‌କିତାପ୍‌ ମାରି ନି ତଡ଼ାନ୍‌ ହାରୋଣ ମି ବବିସ୍ୟଦ୍‌ବକ୍ତା ଆନାନ୍‌ । 2 ମାପ୍‌ ମିଙ୍ଗିଁ ଆମାକା ଆମାକା ଇନାପ୍‌, ଆୟାକା ୱିଜୁ ମିର୍‌ ଇନିଦେର୍‌; ମାରି ମି ତଡ଼ାନ୍‌ ହାରୋଣ ଇସ୍ରାଏଲ ଲୋକାଙ୍ଗ୍‌ ନିଜେଦି ଦେସ୍‌ତାନ୍‌ ଡ଼ିସ୍‌ନି ସନି ଉଣ୍ତିଙ୍ଗ୍‌ ପାରୋଙ୍ଗ୍‌ ଇନ୍‌ଆ । 3 ମାରି, ମାପ୍‌ ଫାରୋଦି ଜିବନ୍ ଆଟ୍‌ୱା କିନାପ୍‌, ମାରି ମିସର ଦେସ୍‌ତୁ ମା ସିନା ମାରି କାବାଆନି ପାଣି ନାଣ୍ଡ କିନାପ୍‌ । 4 ଇରିଙ୍ଗାବା ଫାରୋ ମି ମାଟାଦିଙ୍ଗ୍‌ ୱେନ୍‌ଏନ୍‌; ଇୟାଉଣ୍ତିଙ୍ଗ୍‌ ମାପ୍‌ ମିସର ଦେସ୍‌ ମୁସୁକୁ ନିଜେଦି କିୟୁ ଇଡ୍‌ଜି ପେରି ଦଣ୍ଡ୍‌ଦି ମାଣାନ୍‌ ମିସରଦାନ୍‌ ନିଜେଦି ସନ୍ୟରିଙ୍ଗ୍‌, ମା ଲୋକୁ ଇସ୍ରାଏଲ ଲୋକାଙ୍ଗ୍‌ ସପ୍‌ସି ତାନାଟ୍‌ । 5 ମାରି, ମାପ୍‌ ମିସର ବିରୁଦ୍‌ଦାନ୍‌ ନିଜେଦି କିୟୁ ପେର୍‌ଜି ୱାରି ମାଣାନ୍‌କୁ ଇସ୍ରାଏଲ ଲୋକାଙ୍ଗ୍‌ ସପ୍‌ସି ତାନି ୱାଲେ ନାନ୍‌ ଜେ ସଦାପ୍ରବୁ, ଆକା ୱାର୍‌ ନେସ୍‌ନାର୍‌ ।" 6 ଇୟାୱେନ୍‌କା ମୋସା ମାରି ହାରୋଣ ଆୟାୱାଜାନେ କିତାର୍‌; ସଦାପ୍ରବୁଦି ମାଟା ଇସାବ୍‌ଦାନ୍‌ ୱାର୍‌ ପାଣିକିତାର୍‌ । 7 ରାଜା ପାରୋଦି ୱାଲେ ୱାର୍‌ଗିଜିନି ୱାଲେ ମୋସେଙ୍ଗ୍‌ ଅସେ ବାର୍‌ସେକ୍‌ ଆତାମାର୍ହାତ୍‌ ମାରି ହାରୋଣଙ୍ଗ୍‌ ଅସେ ତିନ୍‌ ବାର୍ସେକ୍‌ ବୟସ୍ ଆତା ମାର୍ହାତ୍‌ ।

8 ମାରି ସଦାପ୍ରବୁ ମୋସେଙ୍ଗ୍‌ ମାରି ହାରୋଣଙ୍ଗ୍‌ ଇର୍ହାନ୍‌, 9 "ମିର୍‌ ନିଜେଦି ଉଣ୍ତିଙ୍ଗ୍‌ ଉନ୍‌ଡ୍ରି ସିନା ତର୍‌ତୁ ଇଜି ଏସିୱାଲେ ଫାରୋ ମିଙ୍ଗିଁ ଇରିଙ୍ଗାଁ, ଆର୍‌ତିଙ୍ଗ୍‌ ନିନ୍‌ ହାରୋଣଙ୍ଗ୍‌ ଇନ୍‌ଆ, ନି ବାଡିଗା ଫାରୋ କାଲୁ ଆଗ୍‌ଡ଼ି ପକ୍‌ଆ; ଆବେନୁ ଆୟା ବାଡିଗା ସାରାସୁ ଆନାତ୍‌ ।" 10 ଆବେନୁ ମୋଶା ମାରି ହାରୋଣ ପାରୋଦି ଲାକ୍‌ତୁ ସଲସି ସଦାପ୍ରବୁଦି ମାଟା ଇସାବ୍‌ତାନ୍‌ ପାଣି କିତାର୍‌; ମାରି ହାରୋଣ, ଫାରୋ ମାରି ୱାନି ଦାସ୍‌କା ଆଗ୍‌ଡ଼ି ନିଜେଦି ବାଡିଗା ଆଡିଗି ପକ୍‌ତିଙ୍ଗ୍‌, ଆକା ସାରାସୁ ଆତାତ୍‌ । 11 ଆଦେଙ୍ଗ୍‌ ପାରୋ ନିଜେଦି ଗୁରୁ ମାରି ଗୁଣିଆରିଙ୍ଗ୍‌ କୁକୁତାନ୍‌; ଆବେନୁ ମିସ୍ରିୟ ଗୁରୁ ଗୁଣିଆର୍‌ ବା ନିଜେଦି ମାୟାଦାନ୍‌ ଆୟାୱାଜା କିତାର୍‌ । 12 ଇର୍ରିଙ୍ଗା, ୱାର୍‌ ୱିଜେରେ ନିଜେ ନିଜେଦି ବାଡିଗା ପକ୍‌ତିଙ୍ଗ୍‌, ଆୟାକେଙ୍ଗ୍‌ ସାରାସ୍‌କୁ ଆତେ; ମାତର ହାରୋଣଦି ବାଡିଗା ୱାରି ୱିଜେରି ବାଡିଗେଆଙ୍ଗ୍‌ ଡ଼ିଙ୍ଗିତାତ୍‌ । 13 ଆବେଟ୍‌ ସଦାପ୍ରବୁଦି ମାଟା ଇସାବ୍‌ଦାନ୍‌ ଫାରୋଦି ଜିବନ୍‌ ଆଟ୍‌ୱା ଆତାତ୍‌ ମାରି ୱାନ୍‌ ୱାରି ମାଟାଦିଙ୍ଗ୍‌ ୱେନ୍‌ଏତାନ୍‌ ।

14 ଇୟାୱେନ୍‌କା ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ଫାରୋଦି ଜିବନ୍‌ ଆଟ୍‌ୱା ଆତାମାନାତ୍‌, ୱାନ୍‌ ଲୋକାଙ୍ଗ୍‌ ଡ଼ିସ୍‌ସୋ ସିଦେଙ୍ଗ୍‌ ବଦା କିଏଜିନାନ୍‌ ।" 15 ଇୟାଉଣ୍ତିଙ୍ଗ୍‌ ମିର୍‌ ସାଲ୍‌ଦିନେ ଫାରୋ ଲାକ୍‌ତୁ ସାନ୍‌ଡ୍ରୁ; ସୁଡ଼ୁଦୁ, ୱାନ୍‌ ଏରୁ ତରିନ୍‌ ସରିଙ୍ଗା, ମିର୍‌ ୱାନିଙ୍ଗ୍‌ ବୁଡ଼ୁନି ଉଣ୍ତିଙ୍ଗ୍‌ ନିଲ ଗାଡା ପାଡ଼ିଦୁ ନିଲ୍‌ଦୁ; ଆମା ବାଡିଗା ସାରାସୁ ଆତା ମାର୍ହାତ୍‌, ଆକାବା କିୟୁଦୁ ଅତୁ । 16 ମାରି ପାରୋଙ୍ଗ୍ ଇନ୍‍ଡ୍ରୁ, ଏବ୍ରୀୟରି ସଦାପ୍ରବୁ ମାପୁରୁ ନାଙ୍ଗିଁ ନି ଲାକ୍‌ତୁ ପକ୍‌ସି ଇର୍ହାନ୍‌, "ନିନ୍‌ ମା ଲୋକାଙ୍ଗ୍‌ ବାଲିବାଟାଦୁ ସେବା କିଦେଙ୍ଗ୍‌ ଡ଼ିସ୍‌ଆ; ମାତର ସୁଡ଼ୁଆ, ନିନ୍‌ ଇୟା ସାନ୍ଦି ଇୟା ମାଟାଦିଙ୍ଗ୍‌ ମୋନ ସିଏଜିନାନ୍‌ ।" 17 ସଦାପ୍ରବୁ ଇୟାୱାଜା ଇଜିନାନ୍‌, ନାନ୍‌ ଜେ ସଦାପ୍ରବୁ, ଆକା ନିନ୍‌ ଇୟା ମାଣାନ୍‌ ନେସ୍‌ନି; ସୁଡ଼ୁଆ, ମାପ୍‌ ନିଜେଦି କିୟୁଦି ଇୟା ବାଡିଗାଦାନ୍‌ ନିଲ ଗାଡାଦି ଏରୁ ମୁସ୍‌କୁ ଡାକ୍‌ନାପ୍‌, ଆବେନୁ ଆକା ନେତେର୍‌ ଆନାତ୍‌ । 18 ମାରି, ଗାଡାଦୁ ମାନି ମିନ୍‌କୁ ସାନେସନେ ମାରି ଗାଡା କାପୁ ଆନାତ୍‌; ଆବେଣାନ୍‌ ମିସ୍ରିୟ ଲୋକ୍‌ ଗାଡାଦି ଏରୁ ଉଣ୍ଡେଙ୍ଗ୍‌ ଆଟ୍‌ଏର୍‌ । 19 ଇୟାୱେନ୍‌କା ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ହାରୋଣଙ୍ଗ୍‌ ଇୟା ମାଟା ଇନ୍‌ଆ, ନିନ୍‌ ନିଜେଦି ବାଡିଗା ଅସି ମିସର ଦେସ୍‌ଦି ଏରୁ ମୁସୁକୁ, ଇର୍ରିଙ୍ଗା, ଆବେଣି ଗାଡା, ନାଡ଼ୁକୁ, ବାନ୍ଦୁଙ୍ଗା ମାରି ଜଲାଦୁ ଇୟାୱିଜୁ ମୁସୁକୁ ନିଜେଦି କିୟୁ ପେର୍‌ଆ, ଆବେଣାନ୍‌ ୱିଜୁ ଏରୁ ନେତେର୍‌ ଆନାତ୍‌; ମାରି, ମିସର ଦେସ୍‌ତି ୱିଜୁ ମାରାନ୍‌ତି ସାଟି ମାରି କାଲୁଦି ସାଟିଦୁ ବା ନେତେର୍‌ ଆନାତ୍‌ ।" 20 ଆବେଟ୍‌ ମୋସା ମାରି ହାରୋଣ ସଦାପ୍ରବୁଦି ମାଟା ଇସାବ୍‌ଦାନ୍‌ ଆୟାୱାଜା କିତାର୍‌; ୱାନ୍‌ ବାଡିଗା ଅସି ଫାରୋ ମାରି ୱାନି ଦାସରି ଆଗ୍‌ଡ଼ି ଏରୁ ମୁସୁକୁ ଡାକ୍‌ତାନ୍‌; ଆବେଣାନ୍‌ ୱିଜୁ ଗାଡାଦି ଏରୁ ନେତେର୍‌ ଆତାତ୍‌ । 21 ମାରି, ଗାଡାଦି ୱିଜୁ ମିନ୍‌କୁ ସାତେ ମାରି ଗାଡା କାପୁ ଆତାତ୍‌, ଆବେଣାନ୍‌ ମିସ୍ରିୟର୍‌ ଗାଡାଦି ଏରୁ ଉଣ୍ଡେଙ୍ଗ୍‌ ଆଟ୍‌ଏତାର୍‌; ମିସର ଦେସ୍‌ତୁ ୱିଜୁ ନେତେର୍‌ ଆତାତ୍‌ । 22 ନାସ୍ତିୱାଲେ ମିସ୍ରିୟ ଗୁରୁ ଗୁଣିଆର୍‌ ବା ନିଜେଦି ମାୟାଦାନ୍‌ ଆୟାୱାଜା କିତାର୍‌; ଆବେଟ୍‌ ସଦାପ୍ରବୁଦି ମାଟା ଇସାବ୍‌ଦାନ୍‌ ଫାରୋଦି ଜିବନ୍‌ ଆଟ୍‌ୱା ଆତାତ୍‌ ମାରି ୱାନ୍‌ ୱାରି ମାଟାଦାନ୍‌ ମୋନ୍‌ସିଏତାନ୍‌ । 23 ଇୟାୱେନ୍‌କା ରାଜା ଫାରୋ ମୋକମ୍‌ ଡ଼େସିକିଜି ନିଜେଦି ଇନ୍‌ଡ୍ର ସର୍ହାନ୍‌, ଇବେନୁ ନିଜେଦି ମୋନ୍‌ ସିଏତାନ୍‌ । 24 ମାରି, ୱିଜୁ ମିସରଦି ଲୋକ୍‌ ଗାଡାଦି ଏରୁ ଉଣ୍ଡେଙ୍ଗ୍‌ ଆଟ୍‌ଇତି ଉଣ୍ତିଙ୍ଗ୍‌ ଉଣି ଏରୁଦି ଉଣ୍ତିଙ୍ଗ୍‌ ଗାଡାଦି ୱିଜୁତରିନ୍‌ କାରିତାର୍‌ । 25 ସଦାପ୍ରବୁ ଗାଡାଦିଙ୍ଗ୍‌ ଡାକ୍‌ତି ୱେନ୍‌କା ସାତ୍‌ଦିନ୍‌ ପୁରା ଆତାତ୍‌ ।