ଯାତ୍ରା ବଇ 30

ବାସ୍‌ନା ଦୁପ୍‌ଣିଦି ବେଦି

1 ମାରି ମିର୍‌ ଦୁପ୍‌ଣି ଆଡ଼ିକ୍‌ନି ଉଣ୍ତିଙ୍ଗ୍‌ ଆକିସିଆ ମାରାନ୍‌ଦାନ୍‌ ଉନ୍‌ଡ୍ରି ବେଦି ତିଆର୍‌କିନି । 2 ଆକା ଉନ୍‌ଡ୍ରେ ମୁରା ନିରିକା ମାରି ଉନ୍‌ଡ୍ରେ ମୁରା ଅସାର୍‌ ମାରି ନାଲ୍‌ଗି କନେଙ୍ଗ୍‌ ଆନାତ୍‌, ମାରି ରୁଣ୍ଡି ମୁରେଙ୍ଗ୍‌ ଉଛା ଆନାତ୍‌; ଆବେଣି‍ କମୁକୁ ୱିଜୁ ତାନି ବାଗ୍‌ ଆନାତ୍‌ । 3 ଆବେନୁ ଆଡ୍‌ଗି ମାରି ସାରିବେଡ଼େତି ମାରି କୁମୁକୁ ନେଗି ବାଙ୍ଗାରାମ୍‌ଦାନ୍‌ ଡାଲାୟ୍‌ କିନିଦେର୍‌ ମାରି ଆବେନୁ ସାରିବେଡ଼େତି ବାଙ୍ଗାରାମ୍‌ତି ଅଟି କିନିଦେର୍‌ । 4 ମାରି, ଆବେଣି ଅଟି ଆଡ୍‌ଗି ରୁଣ୍ଡି ତରଟି ରୁଣ୍ଡି କନେଙ୍ଗା ଲାକ୍‌ତୁ ବାଙ୍ଗାରାମ୍‌ଦି ରୁଣ୍ଡି ରୁଣ୍ଡି ବରୋ କିନିଦେର୍‌; ମାରି ଆକା ପିଡ୍‌ନି କଣା ଆନାତ୍‌ । 5 ଆୟା କଣା ଆକିସିଆ ମାରାନ୍‌ଦାନ୍‌ ତିଆର୍‌ କିଜି ବାଙ୍ଗାରାମ୍‌ଦାନ୍‌ ଡାଲାୟ୍‌ କିନିଦେର୍‌ । 6 ମାରି, ମାପ୍‌ ଆମା ବାଡିଦୁ ମି ୱାଲେ ବୁଡ଼ାନାପ୍‌, ଆୟା ବାଡିଦୁ, ଇରିଙ୍ଗ୍‌, ନିୟମ୍‌ ପେଡ଼ାଦି ମୁସୁକୁରି ପାପ୍‌ତିଙ୍ଗ୍‌ ପିଡ଼ିକ୍‌ନି ଡାବ୍‌ଣା ଆଗ୍‌ଡ଼ି ନିୟମ୍‌ ପେଡ଼ାଦି ଆଗ୍‌ଡ଼ିରି ୱେରେଏ କିନି ୱାତିଦି ଆଗ୍‌ଡ଼ି ଆକା ଇଡ୍‌ନିଦେର୍‌ । 7 ହାରୋଣ ଆୟା ମୁସୁକୁ ବାସ୍‌ନାଦି ଦୁପ୍‌ଣି ଆଡ଼ାକ୍‌ନାନ୍‌, ୱାନ୍‌ ୱିଜୁ ଦିନ୍‌ ସାଲ୍‌ଦି ବେଡ଼ାଦୁ ଦିୱା ସପା କିନି ବେଡ଼ାଦୁ ୱାନ୍‌ ଦୁପ୍‌ଣି ଆଡ଼ାକିସ୍‌ନାନ୍‌ । 8 ମାରି, ମିଲିମିଲିକା ବେଡ଼ାଦୁ ହାରୋଣ ଦିୱା କାସିସ୍‌ନି ବେଡ଼ାଦୁ ଦୁପ୍‌ଣି ଆଡ଼ାକ୍‌ନାନ୍‌, ଆବେଟ୍‌କୁ ମି ଜୁଗୁ ଜୁଗୁ ସାନ୍ଦି ପ୍ରବୁଦି ଆଗ୍‌ଡ଼ି ୱିଜୁଦିନ୍‌ ଦୁପ୍‌ଣି ଆଡ଼୍‌ନିକା ଆନାତ୍‌ । 9 ମିର୍‌ ଆୟା ମୁସୁକୁ ଆଇ ଇନି ଦୁପ୍‌ଣି ବା ଜାତୁ ପୁଜା ବା ପାସି ପୁଜା ସିଇଦେର୍‌ ମାରି ଆୟା ମୁସୁକୁ ଉଣି ଅଙ୍ଗୁର୍‌ରସ୍‌ ୱାକ୍‍ମାଟ୍‌ । 10 ମାରି, ହାରୋଣ ବାର୍ସେକ୍‌ ଲୋଇ ଅର୍‌ସୁ ଆବେଣି କମୁ ମୁସ୍‌କୁ ପାପ୍‌ କେମା କିନିକା ମାନାନିଦେର୍‌; ୱାନ୍‌ ପାପ୍‌ କେମା ସିନି ପାପ୍‌ତି ନେତେର୍‌ ଦାନ୍‌ ମି ବୁବାରି ରିତିଦାନ୍‌ ବାର୍ସେକ୍‌ତିଙ୍ଗ୍‌ ଅର୍‌ସୁ ଆୟା ପାପ୍‌ କେମା କିନିକା କିନାନ୍‌ । ଇୟା ବେଦି ପ୍ରବୁଦି ଉଦେସ୍‌ତାନ୍‌ ପବିତ୍ର ଆନାତ୍‌ ।

ବାସାନି ଗୁଡ଼ା ଉଣ୍ତିଙ୍ଗ୍‌ ଦାନ୍‌

11 ମାରି ସଦାପ୍ରବୁ ମୋସେଙ୍ଗ୍‌ ଇୟା ମାଟା ଇର୍ହାନ୍‌, 12 "ଏସ୍ତିୱାଲେ ମିର୍‌ ଲେକିସ୍‌ତି ଲୋକା ଇସାବ୍‌ତାନ୍‌ ଇସ୍ରାଏଲ ଲୋକାଙ୍ଗ୍‌ ଇସାବ୍‌ କିନିଦେର୍‌, ନାସ୍ତିୱାଲେ ୱାରି ୱିଜୁ ଲୋକୁ ସଦାପ୍ରବୁଦି ଲାକ୍‌ତୁ ନିଜେ ନିଜେ ଜିବନ୍‌ ଉଣ୍ତିଙ୍ଗ୍‌ ଲେକିସ୍‌ନି ବେଡ଼ାଦୁ ପାପ୍‌ କେମା କିନାର୍‌, ଆବେଟ୍‌କୁ ୱାରି ମାଣାନ୍‌ ଲେକିସ୍‌ନି ବେଡ଼ାଦୁ ଇନି ମର୍‌ଡି ଆଏତ୍‌ । 13 ଏନ୍‌ ଲେକିସ୍‌ ଆତି ଲୋକା ଲୋଇ ମିସାତାମାନାନ୍‌, ୱାନ୍‌ ପବିତ୍ର ବାଡିଦୁ ସେକଲ*30:13 ସେକଲ ୬ ଗ୍ରାମ ଇସାବ୍‌ଦାନ୍‌ ଆଦା ସେକଲ ସିନାନ୍‌; କୋଡ଼େ ଗେରାଦୁ*30:13 ଗେରା ଅଦା ଗ୍ରାମ ଉନ୍‌ଡ୍ରେ ସେକଲ; ଆୟା ଆଦା ସେକଲ ସଦାପ୍ରବୁଦି ପୟ୍‌ନି ଦାନ୍‌ ଆନାତ୍‌ । 14 କୋଡ଼େ ବାର୍ସେକ୍ ଇରିଙ୍ଗ୍‌ ଆବେଣାନ୍‌ ନାଣ୍ତ ବାର୍ସେକ୍‌ ଏନ୍‌ ଲେକିସ୍‌ ଆତି ଲୋକା ଲୋଇ ମିସାତାମାନାନ୍‌, ୱାନ୍‌ ସଦାପ୍ରବୁଙ୍ଗ୍ ଇୟା ଦାନ୍‌ ସିନାନ୍‌ । 15 ମିର୍‌ ନିଜେ ନିଜେ ଜିବନ୍‌ ଉଣ୍ତିଙ୍ଗ୍‌ ପାପ୍‌ କେମା କିନି ଉଣ୍ତିଙ୍ଗ୍‌ ସଦାପ୍ରବୁଙ୍ଗ୍‌ ଆୟା ଦାନ୍‌ ସିନି ୱାଲେ ଦନ୍‌ ଆଦା ସେକଲ ଦାନ୍‌ ନାଣ୍ଡ ସିମାଟ୍‌, ମାରି ସିଲିକାର୍‌ ଆବେଣାନ୍‌ ଉଣା ସିମାକିର୍‌ । 16 ଆଦେଙ୍ଗ୍‌ ମିର୍‌ ଇସ୍ରାଏଲ ଲୋକାବାଣାନ୍‌ ଆୟା ପାପ୍‌ କେମା ସିତି ୱେଣ୍ତି ଅଦ୍‌ଲି ଅସି ମିସାଜିସାନି ଗୁଡ଼ାଦି ପାଣିଦି ଉଣ୍ତିଙ୍ଗ୍‌ ତିଆର୍‌ କିନିଦେର୍‌ ଆକା ମି ଉଣ୍ତିଙ୍ଗ୍‌ ଜିବନ୍‌ତି ପାପ୍‌ କେମା ଉଣ୍ତିଙ୍ଗ୍‌ ଇସ୍ରାଏଲ ଲୋକୁ ଏତ୍‌ କିନି ଉଣ୍ତିଙ୍ଗ୍‌ ସଦାପ୍ରବୁଦି ଆଗ୍‌ଡ଼ି ମାନ୍‌ଜିନାତ୍‌ ।"

ପିତଲ୍‌ଦି ଏରୁ କୁଣ୍ତି

17 ଇୟାୱେନ୍‌କା ପ୍ରବୁ ମୋସେଙ୍ଗ୍‌ ଇର୍ହାନ୍‌, 18 "ନିନ୍‌ ନର୍‌ବାନି ଉଣ୍ତିଙ୍ଗ୍‌ ପିତଲ୍‌ଦି କୁଣ୍ତି ମାରି ଆବେଣି ପିତଲ୍‌ଦି ଗୁଦୁରି ତିଆର୍‌ କିନି; ମାରି ମିସାଜିସାନି ଗୁଡ଼ା ମାରି ବେଦି ନାଣିମି ଇଡ୍‌ଜି ଆବେନୁ ଏରୁ ଇଡ୍‌ନି । 19 ମାରି ହାରୋଣ ମାରି ୱାନି କୋଡ଼ର୍‌ ଆବେନୁ ନିଜେ ନିଜେଦି କିକୁ ମାରି ପାଦ୍‌କୁ ନର୍‌ନାର୍‌ । 20 ୱାର୍‌ ମିସାଜିସାନି ଗୁଡ଼ାଦୁ ଡ଼ୁଗୁନି ୱାଲେ ଏଣ୍ଡେସ୍‌କି ସାଏର୍‌, ଇୟାଉଣ୍ଡିଙ୍ଗ୍‌ ଏରୁଦାନ୍‌ ନିଜେଦିଙ୍ଗ୍‌ ନର୍‌ନାର୍‌; ପ୍ରବୁଦି ସେବା ଉଣ୍ତିଙ୍ଗ୍‌, ଅର୍ତାତ୍‌, ସିସୁଦି ଦାନ୍‌ ଦୁପ୍‌ଣି ଆଡ଼ିକ୍‌ନି ଉଣ୍ତିଙ୍ଗ୍‌ ବେଦି ଲାକ୍‌ତୁ ୱାନିୱାଲେ ଏଣ୍ଡେସ୍‌କି ସାଏର୍‌, 21 ଇୟାଉଣ୍ଡିଙ୍ଗ୍‌ ୱାର୍‌ ନିଜେ ନିଜେଦି କିକୁ ମାରି ପାଦ୍‌କୁ ନର୍‌ନାର୍‌; ଇକା ୱାର୍‌ ମାରି ୱାରି କୁଟୁମ୍‌ଦିକାର୍‌ କାଡ଼ା କାଡ଼ା ମାନାନି ୱିଜୁଦିନ୍‌ତି ବିଦି ଆନାତ୍‌ ।"

ତାଲାଦୁ ୱାକ୍‌ନି ନିୟୁ ମାରି ଦୁପ୍‌ଣି

22 ମାରିବା ପ୍ରବୁ ମୋସେଙ୍ଗ୍‌ ଇର୍ହାନ୍‌, 23 "ନିନ୍‌ ନିଜେଦି ଲାକ୍‌ତୁ ଇୟାୱିଜୁ ନାଣ୍ଡନେଗି ବାସ୍‌ନା ଜିନିସ୍‌, ଇରିଙ୍ଗ୍‌, ପବିତ୍ର ବାଡିଦି ସେକଲ ଇସାବ୍‌ଦାନ୍‌ ପାସ୍‌ସୋ ସେକଲ ନେଗି ବାସ୍‌ନା ନିୟୁ ମାରି ଆବେଣି ଆଦା, ଇରିଙ୍ଗ୍‌, ଦୁଇସ ପସାସ୍‌ ସେକଲ ବାସ୍‌ନାଦି ଦାରୁଚିନି*30:23 ଦାରୁଚିନି - ଆଜିନାତ୍‌ ମସଲାଦୁ ମିସାନିକା ମାରି ଦୁଇସ ପସାସ୍‌ ସେକଲ ବାସ୍‌ନାଦି ରସ୍‌, 24 ମାରି ପାସ୍‌ସୋ ସେକଲ ମାରି ଉନ୍‌ଡ୍ରେ ଜିତ ମାରାନ୍‌ତି ନିୟୁ ଉଣ୍ଡାକିନି । 25 ଇୟା ୱିଜୁ ମାଣାନ୍‌ ନିନ୍‌ ତାଲାଦୁ ୱାକ୍‌ନି ପବିତ୍ର ନିୟୁ, ଇରିଙ୍ଗ୍‌, ବାସାନାଦି ଇସାବ୍‌ଦାନ୍‌ ନିୟୁ ତିଆର୍‌ କିନି, ଆକା ତାଲାଦୁ ୱାକ୍‌ନି ପବିତ୍ର ନିୟୁ ଆନାତ୍‌ । 26 ଆକା ନିନ୍‌ ଅସି ମିସାଜିସାନି ଗୁଡ଼ା ମାରି ନିୟମ୍‌ ପେଡ଼ା, 27 ମାରି, ଟେବୁଲ୍‌, ଆବେଣି ୱିଜୁ ସାଟିଙ୍ଗ୍‌, ମାରି ଦିୱା ଇଡ୍‌ନିକା ମାରି ଆବେଣି ୱିଜୁ ସାଟିଙ୍ଗ୍‌, 28 ମାରି ଦୁପ୍‌ଣି ବେଦି, ଆବେଣି ୱିଜୁ ସାଟିଙ୍ଗ୍‌, କିକୁ କାଲ୍‌କୁ ନର୍‌ବାନି କୁଡ଼ୁକେଙ୍ଗ୍‌ ମାରି ଆବେଣି ଗୁଦୁରି ଅବିସେକ୍‌ କିଦୁ । 29 ମାରି, ଇୟା ୱିଜୁ ଜିନିସ୍‌ତିଙ୍ଗ୍‌ ପବିତ୍ର କିନି, ଆବେଟ୍‌ ଆକା ନାଣ୍ତପବିତ୍ର ଆନାତ୍‌, ଆମାକା ବା ଆକା ମୁଟ୍‌ମାଟ୍‌, ଆୟାକା ୱିଜୁ ପବିତ୍ର ଆନାତ୍‌ । 30 ମାରି ନିନ୍‌ ହାରୋଣଙ୍ଗ୍‌ ମାରି ୱାନି କୋଡ଼ରିଙ୍ଗ୍‌ ନା ଜାଜକ ପାଣି କିଦେଙ୍ଗ୍‌ ଅବିସେକ୍‌ କିଜି ପବିତ୍ର କିନି । 31 ମାରି ଇସ୍ରାଏଲ ଲୋକାଙ୍ଗ୍ ଇନି, ମି ଡକ୍‌ରାଦାଦାରି ସାନ୍ଦି ନା ଉଣ୍ତିଙ୍ଗ୍‌ ଆକା ଅବିସେକ୍‌ତି ପବିତ୍ର ନିୟୁ ଆନାତ୍‌ । 32 ଲୋକା ମେନ୍ଦଲ୍‌ଦୁ ଆକା ଉସାୟ୍‌ ଆଏତ୍‌; ଇରିଙ୍ଗାବା ନିନ୍‌ ଆବେଣି କୁଡ଼ିତି ଜିନିସ୍‌ ଇସାବ୍‌ଦାନ୍‌ ମାରି ଇନି ନିୟୁ କିମାଟ୍‌; ଆକା ପବିତ୍ରଦିକା, ମାରି ଆକା ମି ଉଣ୍ତିଙ୍ଗ୍‌ ପବିତ୍ର ଆନାତ୍‌ । 33 ଏନ୍‌ବା ଇୟାୱାଜା ଇନିକା ତିଆର୍‌ କିନାନ୍‌, ଏନ୍‌କି ନେସ୍‌ଇ ଲୋକାଦି ମେନ୍ଦଲତୁ ଆବେଣାନ୍‌ କାଣ୍ଡେକ୍‌ ଉସ୍‌ନାନ୍‌, ୱାନ୍‌ ନିଜେଦି ଲୋକାବାଣାନ୍‌ ଅଲଗା ଆନାନ୍‌ ।"

ବାସ୍‌ନା ଦୁପ୍‌ଣି

34 ଇୟାୱେନ୍‌କା ପ୍ରବୁ ମୋସେଙ୍ଗ୍‌ ଇର୍ହାନ୍‌, "ନିନ୍‌ ନି ଲାକ୍‌ତୁ ବାସ୍‌ନାଦି ଜିନିସ୍‌, ଇରିଙ୍ଗ୍‌, ଗୁଗ୍‌ଗୁଲ, ନକି, କୁନ୍ଦୁରୁ ମାରି ନେଗି ଲୋବାନ୍‌, ଇୟା ୱିଜୁ ବାସ୍‌ନାଦି ଜିନିସ୍‌ ୱିଜୁ ସମାନ୍‌ତାନ୍‌ ଉଣ୍ଡା କିଆ । 35 ମାରି ଆୟା ମାଣାନ୍‌ ବାସ୍‌ନାଦି ଇସାବ୍‌ଦାନ୍‌ ତିଆର୍‌ ଆନାତ୍‌ ମାରି ସରୁଦି ଉନ୍‌ଡ୍ରି ନେଗି ପବିତ୍ର ବାସ୍‌ନା ଦୁପ୍‌ଣି ତିଆର୍‌ କିଆ । 36 ଆବେଣାନ୍‌ ଏସୋ ଗୁଣ୍ଡା କିଜି ଆମା ମିସାଜିସାନି ଗୁଡ଼ାଦୁ ନାନ୍‌ ନି ୱାଲେ ବେଟ୍‌ବୁଡ଼ାନା, ଆବେନୁ ନିୟମ୍‌ ପେଡ଼ା ଆଗ୍‌ଡ଼ି ଇଡ୍‌ନି; ଆକା ମି ଉଣ୍ତିଙ୍ଗ୍‌ ପେରି ପବିତ୍ର ଆନାତ୍‌ । 37 ମାରି, ନିନ୍‌ ଆମା ବାସ୍‌ନାଦି ଦୁପ୍‌ଣି କିନି, ଆବେନୁ ମିସାତି ଜିନିସ୍‌ ଇସାବ୍‌ଦାନ୍‌ ମି ଉଣ୍ତିଙ୍ଗ୍‌ କିମା, ଆକା ମି ଉଣ୍ତିଙ୍ଗ୍‌ ପ୍ରବୁଦି ଉଣ୍ତିଙ୍ଗ୍‌ ପବିତ୍ର ଆନାତ୍‌ । 38 ଏନ୍‌କି ନିଜେଦି ମୁଜ୍‌ନି ଉଣ୍ତିଙ୍ଗ୍‌ ଆୟାନାନି ବାସ୍‌ନାଦି ଦୁପ୍‌ଣି ତିଆର୍‌ କିନାନ୍‌, ୱାନ୍‌ ନିଜେଦି ଲୋକା ମାଣାନ୍‌ ଅଲଗା ଆନାନ୍‌ ।"