1 ଇୟାୱେନ୍‌କା ପ୍ରବୁ ମୋସେଙ୍ଗ୍‌ ଇର୍ହାନ୍‌, "ନିନ୍‌ ଆଗ୍‌ଡ଼ିରି ୱାଜା ରୁଣ୍ଡି ପାଟା କିଆ । ନିନ୍‌ ଆମା କାଲୁ ପାଟା ରୁକୁତି ମାନି, ଆୟା ମୁସୁକୁ ଆମାକା ଆମାକା ରାସାତା ମାର୍ହାତ୍‌, ଆୟା ୱିଜୁ ବିସୟ୍‌ ନାନ୍‌ ଇୟା ରୁଣ୍ଡି କାଲୁ ପାଟାଦୁ ରାସ୍‌ନା । 2 ମାରି ନିନ୍‌ ସାଲ୍‌ଦିନେ ତିଆର୍‌ ଆଆ ମାରି ସାଲ୍‌ଦିନେ ସିନୟ ଗରନ୍‌ତୁ ଏକ୍‌ସି ଆବେନୁ ଗରନୁ ଦାମୁକୁଦୁ ନା ଲାକ୍‌ତୁ ରାଆ । 3 ମାତର ନି ୱାଲେ ମାରି ଏନ୍‌ ମୁସୁକୁ ରାମାକିର୍‌, ମାରି, ଇୟା ୱିଜୁ ଗରନ୍‌ତୁ ଏନ୍‌ବା ତରାମାକିର୍‌ ମାରି କୋଡିଙ୍ଗ୍‌ ଗରିଏଙ୍ଗ୍‌ ମାନ୍ଦା ବା ଇୟା ଗରନ୍‌ ଆଗ୍‌ଡ଼ି ସାରାମାକିୟ୍‌ ।" 4 ଆଦେଙ୍ଗ୍‌ ମୋଶା ଆଗ୍‌ଡ଼ି କାଲୁଦି ୱାଜା ରୁଣ୍ଡି କାଲୁଦି ପାଟା କୟ୍‌ତାନ୍‌; ମାରି, ୱାନ୍‌ ପ୍ରବୁଦି ମାଟା ଇସାବ୍‌ଦାନ୍‌ ସାଲ୍‌ଦିନେ ନିଙ୍ଗ୍‌ଜି ସିନୟ ଗରନ୍‌ ମୁସୁକୁ ସର୍ହାନ୍‌ ମାରି ଆୟା ରୁଣ୍ଡି କାଲୁଦାନ୍‌ ତିଆର୍‌ କିତି ପାଟା କିୟୁଦୁ ଅତାନ୍‌ ।

5 ଆଦେଙ୍ଗ୍‌ ପ୍ରବୁ ବାଦ୍‌ଡ଼ଦାନ୍‌ ୱାଜି ୱାନ୍‌ ଆୟା ବାଡିଦୁ ୱାନି ୱାଲେ ନିଲ୍‌ଜି ସଦାପ୍ରବୁଦି ଦର୍‌ ୱେର୍‌ତାନ୍‌ । 6 ମାରି ପ୍ରବୁ ୱାନି ଆଗ୍‌ଡ଼ି ସିଜି ସଲସି ଇକା ୱେର୍‌ତାନ୍‌, "ପ୍ରବୁ, ପ୍ରବୁ ମାପୁରୁ ଲାଡ୍‌ କିନିକା ମାରି କାର୍ମୁ ସିନିକାନ୍‌, ରିସାଦୁ ଦିରେ, ଜିବନ୍‌ନୋନାନ୍‌ ମାରି ସତ୍‌ତୁ ବର୍ତି ମାନିକାନ୍‌; 7 ଆଜାର୍‌ ଆଜାର୍‌ କୁଡ଼ା ସାନ୍ଦି ରକିୟା କିନିକାନ୍‌, ସେଇପାଣି ମାରି ମାଟା ମାନାଇକା ମାରି ଦସିଦିଙ୍ଗ୍‌ କେମାସିନିକାନ୍‌, ମାରିବା ସତେନେ ଆବେଣି ଦଣ୍ଡ୍‌ ସିନିକାନ୍‌, ମୁଣ୍ତ୍ରି ନି ନାଲ୍‌ଗି କୁଡ଼ା ସାନ୍ଦି ନାତିପୁତି ମୁସୁକୁ ବୁବାସିରି କିତିମାନି ଦସି ଦଣ୍ତ୍‌ ସିନିକାନ୍‌ ।"

8 ଆବେଟ୍‌ ମୋଶା ଦାପ୍ରେନେ ବୁମିଦୁ ପାଡ଼୍‌ଗିଜି ମାଡ଼ିସ୍‌ କିଜି, 9 ୱାନ୍‌ ଇର୍ହାନ୍‌, "ସଦାପ୍ରବୁ, ନାନ୍‌ ଜଦି ନି ଆଗ୍‌ଡ଼ି ଆର୍ସିବାଦ୍‌ ପୟ୍‌ତାମାନା, ଆର୍‌ତିଙ୍ଗ୍‌ ମାଡ଼ିସ୍‌ କିଜିନା, ପ୍ରବୁ ମା ୱାଲେ ନାଣିମି ଆଜି ବୁଲାଆ; ଇର୍ରିଙ୍ଗା ଇୟାକାର୍‌ ଜିବନ୍‌ ଆଟ୍‌ୱା ଲୋକୁ, ମାରି ମା ସେଇପାଣି ମାରି ପାପ୍‌ କେମା କିଜି ନିଜେଦି ଅଦିକାର୍ ଉଣ୍ତିଙ୍ଗ୍‌ ମାଙ୍ଗିଁ ଆସ୍‌ଆ ।"

10 ଆଦେଙ୍ଗ୍‌ ପ୍ରବୁ ଇର୍ହାନ୍‌, ସୁଡ଼ୁଆ, ନାନ୍‌ ଉନ୍‌ଡ୍ରି ନିୟମ୍‌ କିନା; ୱିଜୁ ଦୁନିଆଦୁ ବା ଏମେ କୁଟୁମ୍‌ ଲୋଇ ଆକା ଏସେଙ୍ଗ୍‌ କିଆଇ ଆଏତ୍‌, ଇୟାୱାଜା କାବାଆନି ପାଣି ନାନ୍‌ ମି ୱିଜୁ ଲୋକା ଆଗ୍‌ଡ଼ି କିନା; ଆବେଟ୍‌ ଆମା ୱିଜୁ ଲୋକା ଲାକ୍‌ତୁ ନିନ୍‌ ମାନି, ୱାର୍‌ ପ୍ରବୁଦି ଆୟା ପାଣି ସୁଡ଼ୁନାର୍‌, ଇର୍ରିଙ୍ଗା ନାନ୍‌ ମି ଲାକ୍‌ତୁ ଆମାକା କିନା, ଆକା ବୟଙ୍କାର୍‌ତିକା । 11 ନେର୍‌ ନାନ୍‌ ମିଙ୍ଗିଁ ଆମା ମାଟା ଇନା, ଆବେନୁ ମୋନ୍‌ ସିଦୁ; ସୁଡ଼ୁଦୁ, ନାନ୍‌ ଇମୋରିୟ, କିଣାନିୟ, ହିତ୍ତୀୟ, ପରିସିୟ, ହିବ୍ବୀୟ ମାରି ଜିବୁସିୟ ଲୋକାଙ୍ଗ୍‌ ମି ଆଗ୍‌ଡ଼ିରାନ୍‌ ଉଲୁପ୍‌ନାପ୍‌ । 12 ମିର୍‌ ନିଜେଦି ବିସୟ୍‌ତାନ୍‌ ଜାଗାର୍‌ତା ଆଦୁ, ଆମା ଦେସ୍‌ତୁ ମିର୍‌ ସଲ୍‌ସିନିଦେର୍‌, ଆୟା ଦେସ୍‌ତି ଲୋକାୱାଲେ ନିୟମ୍‌ କିମାଟ୍‌; କିତିଙ୍ଗା ଆକା ମି ଲୋଇ ଉନ୍‌ଡ୍ରି ଉରି ୱାଜା ଆନାତ୍‌ । 13 ମାତର ମିର୍‌ ୱାରି ବେଦି ୱିଜୁ ରୁକ୍‌ନିଦେର୍‌ ମାରି ୱାରି ମୁଣ୍ତା ୱିଜୁ ରୁକ୍‌ସି ପକ୍‌ନିଦେର୍‌ ମାରି ଆଶେରାଦି ବମା କୟ୍‌ନି ପକ୍‌ନିଦେର୍‌ ।

14 ଏଣ୍ତେସ୍‌କି ମିର୍‌ ଆଇ ଏମେ ଦେୟାମ୍‌ଦିଙ୍ଗ୍‌ ମାଡ଼ିସ୍‌ କିମାଟ୍‌, ଇର୍ରିଙ୍ଗା ପ୍ରବୁଦି ଦର୍‌ ନିଜେଦି ଗୌରବ୍‌ତୁ ରକିୟାକିନି, ୱାନ୍‌ ନିଜେଦି ଗୌରବ୍‌ତୁ ରକିୟାକିନି ମାପୁରୁ ଆନାନ୍‌ । 15 ଆନାତ୍‌ସୁଗି ମିର୍‌ ଆୟା ଦେସ୍‌ତି ଲୋକା ୱାଲେ ନିୟମ୍‌ କିନିଦେର୍‌; କିତିଙ୍ଗା ଆମା ୱେଡ଼ାଦୁ ୱାର୍‌ ନିଜେ ତିଆର୍‌ କିତି ଦେୟାମ୍‌ ଲାକ୍‌ତୁ ସଲୋସି ଦାରିପାଣି କିନାର୍‌ ମାରି ନିଜେ ତିଆର୍‌ କିତି ଦେୟାମ୍‌ ଲାକ୍‌ତୁ ପୁଜା ସିନାର୍‌, ଆୟା ବେଡ଼ାଦୁ ଏନ୍‌ ମିଙ୍ଗିଁ କୁକୁତିଙ୍ଗା, ମିର୍‌ ୱାରି ପୁଜାଦୁ ଏକ୍‌ସିକିତିକା ତିନିଦେର୍‌; 16 ମାରିବା ନିନ୍‌ ନିଜେଦି କୋଡ଼ରି ଉଣ୍ତିଙ୍ଗ୍‌ ୱାରି ଆଇଲିକାଙ୍ଗ୍‌ ତାତିଙ୍ଗା, ୱାରି ଆଇଲିକ୍‌ ନିଜେଦି ଦେୟାମ୍‌କା ଲାକ୍‌ତୁ ୱେନ୍‌କା ସଲ୍‌ସି ମି କୋଡ଼ରିଙ୍ଗ୍‌ ନିଜେଦି ଦେୟାମ୍‌କା ଲାକ୍‌ତୁ ଅସି ଦାରିପାଣି କିବିସ୍‌ନେ ।

17 ମିର୍‌ ନିଜେଦି ଉଣ୍ତିଙ୍ଗ୍‌ ଆମାବା ଦେୟାମ୍‌ ତିଆର୍‌ କିମାଟ୍‌ ।

18 ମିର୍‌ ସୟ୍‌ଇ ରୁଟିଦି ପଣ୍ତୟ୍‌ କିନିଦେର୍‌, ମାରି, ଆବୀବ୍‌ ଲେଜୁଦୁ ଆମା ବେଡ଼ାଦୁ ଏଣ୍ଡେସ୍‌ କିଦେଙ୍ଗ୍‌ ମିଙ୍ଗିଁ ମାଟା ଇର୍ହାମାନା, ଆୟାୱାଜା ମିର୍‌ ସାତ୍‌ଦିନ୍‌ ସୟ୍‌ଇ ରୁଟି ତିନିଦେର୍‌; ଇର୍ରିଙ୍ଗା ଆୟା ଆବୀବ୍‌ ଲେଜୁଦୁ ମିର୍‌ ମିସର ଦେସ୍‌ତାନ୍‌ ସୋସି ୱାତିମାର୍ହିଦେର୍‌ ।

19 ମାରି ୱିଜୁ ପାର୍‌ତୁମ୍‌ ଜନମ୍‌ ଆତି କଡ଼ ମାରି ଗରିଏଙ୍ଗ୍‌ ମେଣ୍ଡେଙ୍ଗା ମାନ୍ଧା ଲୋଇରାନ୍‌ ପାର୍‌ତୁମ୍‌ ଜନମ୍‌ ଆତି ପତୁ ପିଲେକ୍‌ ୱିଜୁ ମାୱି । 20 ମାତର ପାର୍‌ତୁମ୍‌ ଜନମ୍‌ ଆତି ଗଦ ବାଦ୍‌ଲୁ ମିର୍‌ ମେଣ୍ଡାପିଲା ସିଜି ତାନିଙ୍ଗ୍‌ ମୁକୁଡ଼ା କିନିଦେର୍‌; ଜଦି ମୁକ୍‌ଡ଼ା କିଇଦେର୍‌, ଆର୍‌ତିଙ୍ଗ୍‌ ତାନି କକ୍‌ଲା ରୁକ୍‌ନିଦେର୍‌ । ମି ପାର୍‌ତୁମ୍‌ ଜନମ୍‌ ଆତି କୋଡ଼ରିଙ୍ଗ୍‌ ୱିଜୁ ମିର୍‌ ମୁକୁଡ଼ା କିନିଦେର୍‌ । ମାରି, ଏନ୍‌ ୱାର୍‌ଇ କିୟୁଦୁ ନା ଲାକ୍‌ତୁ ରାମାକିନ୍‌ ।

21 ମିର୍‌ ସୋ ଦିନ୍‌ ପାଣି କିନିଦେର୍‌, ମାତର ସାତ୍‌ଦିନ୍‌ତୁ ରମ୍‌ନିଦେର୍‌; ୱିତ୍‌ନି ୱାଲେ ମାରି ପାସି କୋୟ୍‌ନି ୱାଲେ ରମ୍‌ନିଦେର୍‌ ।

22 ମିର୍‌ ସାତ୍‌ଦିନ୍‌ତି ପଣ୍ତୟ୍‌, ଇର୍ରିଙ୍ଗା, କୋୟ୍‌ତି ଗଦ୍‌ମୁଦି ପାର୍‌ତୁମ୍‌ ପଲ୍‌ଦି ପଣ୍ତୟ୍‌ ମାରି ର୍ବାସେକ୍‌ଦି ୱିଜ୍‌ନି ବେଡ଼ାଦୁ ପଲ୍‌ ଉଣ୍ଡା କିନି ପଣ୍ତୟ୍‌ କିନିଦେର୍‌ ।

23 ମି ୱିଜେରେ ମେମାର୍‌ଙ୍ଗୁଁ ବାର୍ସେକ୍‌ ଲୋଇ ମୁଣ୍ତ୍ରି ଜାରିଙ୍ଗ୍‌ ଇସ୍ରାଏଲଦି ପ୍ରବୁ ମାପୁରୁଦି ଲାକ୍‌ତୁ ସନାର୍‌ । 24 ଇର୍ରିଙ୍ଗା ନାନ୍‌ ମି ଆଗ୍‌ଡ଼ିରାନ୍‌ ଆଇ ଦେସ୍‌ତି ଲୋକାଙ୍ଗ୍‌ ଆକୋ କିନା ମାରି ମି ସାନ୍ଦି ପିରିସ୍‌ କିନା, ମାରି, ମିର୍‌ ବାର୍ସେକ୍‌ଦି ଲୋଇ ମୁଜା ପ୍ରବୁ ମାପୁରୁଦି ଲାକ୍‌ତୁ ସୋନି ଉଣ୍ତିଙ୍ଗ୍‌ ସୋରିଙ୍ଗା, ମି ବୁମି ଉଣ୍ତିଙ୍ଗ୍‌ ଏନ୍‌ ଲବ୍‌ କିଏର୍‌ ।

25 ମିର୍‌ ନାଙ୍ଗିଁ ପୁଜାକିତି ନେତେର୍‌ ସୟ୍‌ତି ଜିନିସ୍‌ଦି ୱାଲେ ସିମାଟ୍‌ ମାରି ନିସ୍ତାର ପଣ୍ତୟ୍‌ଦି ପୁଜାସିତି ଜିନିସ୍‌ ସାଲ୍‌ଦି ସାନ୍ଦି ଇଡ୍‌ମାଟ୍‌ ।

26 ମିର୍‌ ନିଜେଦି ବୁମିଦି ପାର୍‌ତୁମ୍‌ ଆତି ପଲ୍‌ତି ଦିନ୍‌ସୁ ନିଜେଦି ପ୍ରବୁ ମାପୁରୁଦି ଇଣ୍ଡ୍ର ୱିଜୁ ବାର୍ସେକ୍‌ ତାନିଦେର୍‌ । ମାରି, "ମିର୍‌ ଗରିଆଦି ପିଲାଦିଙ୍ଗ୍‌ ତାନି ୟାୟାଦି ପାଲୁତାନ୍‌ ୱାର୍‌ମାଟ୍‌ ।"

27 ମାରି ପ୍ରବୁ ମୋସେଙ୍ଗ୍‌ ଇର୍ହାନ୍‌, "ନିନ୍‌ ଇୟାୱିଜୁ ମାଟା ରାସ୍‌ଆ, ଇର୍ରିଙ୍ଗା ନାନ୍‌ ଇୟା ମାଟାଦି ଇସାବ୍‌ଦାନ୍‌ ନି ୱାଲେ ମାରି ଇସ୍ରାଏଲ ଲୋକା ୱାଲେ ନିୟମ୍‌ ତିର୍‌କିତାମାନା ।" 28 ଆୟା ୱେଡ଼ାଦୁ ମୋଶା ପ୍ରବୁଦି ୱାଲେ ଆୟା ବାଡିଦୁ ସାଲିସ୍‌ ଦିନ୍‌ ୱେଡ଼େ ନି ନାଡ଼ା ମାର୍ହାନ୍‌; ୱାନ୍‌ କାଦି କି ଏରୁ ଉଣୁଏତାନ୍‌ । ୱାନ୍‌ ଆୟା ରୁଣ୍ଡି କାଲୁଦୁ ନିୟମ୍‌ଦି ମାଟା, ଇର୍ରିଙ୍ଗା, ଦଶ୍‌ଗୋଟା ଆଜ୍ଞା ରାସ୍‌ତାନ୍‌ ।

29 ମୋଶା ସିନୟ ଗରନତାନ୍‌ ମାରି ରେସିୱାନି ବେଡ଼ାଦୁ ସାକିଦି ୱାଜା ରୁଣ୍ଡି ମକେଙ୍ଗ୍‌ କାଲୁ କିୟୁଦୁ ଆସ୍‌ସି ଗରତାନ୍‌ ରେତାନ୍‌, ମାତର ପ୍ରବୁଦି ୱାଲେ ୱାର୍‌ଗିନି ଉଣ୍ତିଙ୍ଗ୍‌ ନିଜେଦି ମୋକମ୍‌ ଜେ ଜାୟ୍‌ ଆତାମାର୍ହାତ୍‌, ଆକା ମୋଶା ନେସ୍‌ଏତା ମାର୍ହାନ୍‌ । 30 ମାରି, ଏସ୍ତିୱାଲେ ହାରୋଣ ମାରି ଇସ୍ରାଏଲ ଲୋକୁ ମୋସେଙ୍ଗ୍‌ ସୁଡ଼ୁତାର୍‌, ନାସ୍ତିୱାଲେ ୱାନି ମୋକମ୍‌ତି ତଲୁ ଜାୟ୍‌ ମାର୍ହାତ୍‌; ଆଦେଙ୍ଗ୍‌ ୱାର୍‌ ୱାନି ଲାକ୍‌ତୁ ସନ୍‌ଡ୍ରେଙ୍ଗ୍‌ ତିଲାତାର୍‌ । 31 ମାତର ମୋଶା ୱାରିଙ୍ଗ୍‌ କୁକୁତିଙ୍ଗ୍‌, ହାରୋଣ ମାରି ଲୋକା ନେତାର୍‌ ୱାନି ଲାକ୍‌ତୁ ସର୍ହାର୍‌; ଆବେନୁ ମୋଶା ୱାରି ୱାଲେ ୱାର୍‌ଗିତାନ୍‌ । 32 ଆୟା ୱେନ୍‌କା ଇସ୍ରାଏଲ ଲୋକୁ ୱାନି ଲାକ୍‌ତୁ ସର୍ହାର୍‌; ଆବେଟ୍‌ ପ୍ରବୁ ସିନୟ ଗରନ୍‌ତୁ ୱାନିଙ୍ଗ୍‌ ଆମା ଆମା ମାଟା ଇର୍ହାମାର୍ହାନ୍‌, ଆକା ୱିଜୁ ୱାନ୍‌ ଆଜ୍ଞା ୱାଜା ୱାରିଙ୍ଗ୍‌ ୱେର୍‌ତାନ୍‌ । 33 ମାରି, ମୋଶା ୱାରି ୱାଲେ ୱାର୍‌ଗିତି ୱିସ୍‌ତି ୱେନ୍‌କା ନିଜେଦି ମୋକମ୍‌ତିଙ୍ଗ୍‌ ପିଡ଼ିକାତାନ୍‌ । 34 ମାତର ମୋଶା ପ୍ରବୁଦି ୱାଲେ ୱାର୍‌ଗିଦେଙ୍ଗ୍‌ ଇଜି ଲୋଇ ୱାନିଙ୍ଗ୍‌ ବେଟ୍‌ ବୁଡ଼ାଦେଙ୍ଗ୍‌ ସଲ୍‌ସି ଆତ୍ରେ ରେଇ ସାନ୍ଦି ଆୟା ପିଡ଼ିଗିତି ମାରିକା କୁତ୍‌ତା ଇଟ୍‌ତାନ୍‌; ମାରି ଆମା ମାଟା ପୟ୍‌ତାନ୍‌, ଆତ୍ରେ ୱାଜି ଇସ୍ରାଏଲ ଲୋକାଙ୍ଗ୍‌ ଆକା ଇର୍ହାନ୍‌ । 35 ଆବେଟ୍‌ ମୋଶାଦି ମୋକମ୍‌ ଜାୟ୍‌ ମାର୍ହାତ୍‌, ଇକା ଇସ୍ରାଏଲ ଲୋକୁ ୱାନି ମୋକମ୍‌ଦିଙ୍ଗ୍‌ ସୁଡ଼ୁତାର୍‌; ମୋଶା ପ୍ରବୁଦି ୱାଲେ ୱାର୍‌ଗିଦେଙ୍ଗ୍‌ ଆମାସାନ୍ଦି ଲୋଇ ସଲ୍‌ଏତାନ୍‌; ଆୟା ସାନ୍ଦି ନିଜେଦି ମୋକମ୍‌ତିଙ୍ଗ୍‌ ପିଡ଼ିକ୍‌ତା ମାର୍ହାନ୍‌ ।