1 ଇୟାୱେନ୍‌କା ଲୋକୁ ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ନିଡ଼ି, ସେର୍‌ଗା ରଙ୍ଗ୍‌ ମାରି ଏରାନି ରଙ୍ଗ୍‌ ମାରି ନୁଲୁ ଦାନ୍‌ ପବିତ୍ର ବାଡିଦୁ ସେବା କିନି ଉଣ୍ତିଙ୍ଗ୍‌ ନେଗି ଆଙ୍ଗିଁ ତିଆର୍‌ କିତାର୍, ମାରି ହାରୋଣଦି ଉଣ୍ତିଙ୍ଗ୍‌ ପବିତ୍ର ଆଙ୍ଗିଁ ତିୟାର୍‌ କିତାର୍‌ ।

2 ମାରି ୱାନ୍‌ ବାଙ୍ଗାରାମ୍‌ ଦାନ୍‌ ମାରି ନିଡ଼ି, ସେର୍‌ଗା ରଙ୍ଗ୍‌ ଏରାନିଦିକା ମାରି ନେଗି ଅଡ଼ିନି ସରୁ ନୁଲୁ ଦାନ୍‌ ଏପୋଦ ଆଙ୍ଗିଁ ତିଆର୍‌ କିତାର୍‌ । 3 ଇର୍ରିଙ୍ଗ୍‌, ୱାର୍‌ ବାଙ୍ଗାରାମ୍‌ କୁତୁସି ପାତଲ୍‌ କିଜି ତିୟାର୍‌ କିନି ୱାରି ମାଣାନ୍‌ ନିଡ଼ି, ସେର୍‌ଗା ରଙ୍ଗ୍‌, ଏରାନିକା ମାରି ଅଡ଼ିନି ସରୁ ନୁଲୁଦାନ୍‌ ତିୟାର୍‌ ଗୁତ୍‌ତେଙ୍ଗ୍‌ ଆକା କୋୟ୍‌ଜି ନୁଲୁ କିତାର୍ । 4 ୱାର୍‌ ମିସାକିଜି ରୁଣ୍ଡି ଗୁଜାମ୍‌ପଟି କିତାର୍‌; ଆବେଣି ରୁଣ୍ଡି ଟିପ୍‌କାଙ୍ଗ୍‌ ଜୋଡ଼ିସ୍‌କିତାର୍‌ । 5 ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ଏପୋଦଦି ମୁସୁକୁରି ଆମା ବାନାଦି ପଟୁ ଆବେଣିକା ମାର୍ହାତ୍‌, ଆକା ବା ଆୟା ପାଣି ଇସାବ୍‌ଦାନ୍‌ ବାଙ୍ଗାରାମ୍‌ତାନ୍‌ ମାରି ନିଡ଼ି, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌ ମାରି ନେଗି ଅଡ଼ିନି ସରୁ ନୁଲୁଦାନ୍‌ ତିୟାର୍‌ ଆତାତ୍‌ । 6 ମାରି ୱାର୍‌ ଜାକୁବ ମାରିସିରି ଦରୁ ଇସାବ୍‌ଦାନ୍‌ ଗଦେକିତି ଅଦ୍‌ଲି ଗଦେକିତି ମାରି ବାଙ୍ଗାରାମ୍‌ତାନ୍‌ ସରାକିଜି ରୁଣ୍ଡି ଗୋମେଦକ ମଣି ତିଆର୍‌ କିତାର୍‌ । 7 ମାରି, ୱାର୍‌ ପ୍ରବୁଦି ମାଟା ଇସାବ୍‌ଦାନ୍‌ ଏପୋଦଦି ରୁଣ୍ଡି ଗୁଜାମ୍‌ପଟି ମୁସୁକୁ ଇସ୍ରାଏଲଦି ମାରିସିରି ଏତ୍‌କିନି ମଣି ୱାଜା ଆକା ବାସାକିତାର୍‌ ।

8 ଇୟାୱେନ୍‌କା ୱାନ୍‌ ଏପୋଦଦି ପାଣି ଇସାବ୍‌ଦାନ୍‌ ବାଙ୍ଗାରାମ୍‌ଦାନ୍‌ ନିଡ଼ି, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌ ମାରି ନେଗି ଅଡ଼ିନି ସରୁ ନୁଲୁଦାନ୍‌ ବୁଦିଦାନ୍‌ ପାଣିକିନି ୱାରିବାଣାନ୍‌ ବକାଦିସାଜୁ ତିୟାର୍‌ କିତାର୍‌ । 9 ଆକା ନାଲ୍‌ଗି କୋନେଙ୍ଗ୍‌ ମାର୍ହାତ୍‌, ଇର୍ରିଙ୍ଗ୍‌, ୱାର୍‌ ଆୟା ବକାଦିସାଜୁ ଦୁଣା କିଜି ଉନ୍‌ଡ୍ରି ବିତା ନିରିକା ମାରି ଉନ୍‌ଡ୍ରି ବିତା ଅସାର୍‌ କିତାର୍‌ । 10 ମାରି, ଆକା ନାଲ୍‌ଗି ଦାଡ଼ି ମଣିଦାନ୍‌ ସରା କିତାର୍‌; ଆବେଣି ପାର୍‌ତୁମ୍‌ ଦାଡ଼ିଦୁ ଚୁଣି, ପିତମଣି ମାରି ମରକତ, 11 ରୁଣ୍ତି ଦାଡ଼ିଦୁ ପଦ୍ମରାଗ, ନିଳକାନ୍ତ ମାରି ହିରକ, 12 ମୁଣ୍ତ୍ରି ଦାଡ଼ିଦୁ ପେରଜ ମାରି ଯିସ୍ମ ମାରି ଇନ୍ଦ୍ରନିଲମଣି, 13 ମାରି, ନାଲ୍‌ଗି ଦାଡ଼ିଦୁ ବୈଦୁର୍ଯ୍ୟ, ଗୋମେଦକ ମାରି ସୂର୍ଯ୍ୟକାନ୍ତ ମଣି ମାର୍ହାତ୍‌; ଇୟା ୱିଜୁ ମଣି ବାଙ୍ଗାରାମ୍‌ଦାନ୍‌ ବାସାକିତାର୍‌ । 14 ମାରି, ଇସ୍ରାଏଲଦି ଲୋକା ଦରୁଦି ଇୟା ୱିଜୁ ମଣି ୱାରି ଦର୍‌ ଇସାବ୍‌ଦାନ୍‌ ବାର ଗୋଟା ଆତାତ୍‌ ମାରି ଅଦ୍‌ଲିଦି ଉନ୍‌ଡ୍ରି ଉନ୍‌ଡ୍ରି ମଣିଦୁ ବାର ଗୋଟା କୁଟୁମ୍‌ଦି ଉନ୍‌ଡ୍ରି ଉନ୍‌ଡ୍ରି ଦର୍‌ ତେବାତାତ୍‌ । 15 ଇୟାୱେନ୍‌କା ୱାର୍‌ ବକାଦି ସାଜୁଦୁ ନେଗି ବାଙ୍ଗାରାମ୍‌ ଦାନ୍‌ ସିକିଣି ସରା ୱାଜା ତିୟାର୍‌ କିତାର୍‌ । 16 ରୁଣ୍ଡି ବାଙ୍ଗାରାମ୍‌ ଦାରା ମାରି ରୁଣ୍ଡି ବାଙ୍ଗାରାମ୍‌ ୱେଡା ତିୟାର୍‌ କିଜି ବକାଦିସାଜୁଦି ରୁଣ୍ଡି ତରନ୍‌ ଆୟା ରୁଣ୍ଡି ୱେଡେଙ୍ଗ୍‌ ଆଡ୍‌ଗିସ୍‌ତାର୍‌ । 17 ମାରି ବକାଦିସାଜୁଦି ଲୋଇ ରୁଣ୍ଡି ୱେଡା ନାଣିମି ଆୟା ରୁଣ୍ଡି ସରା ବାଙ୍ଗାରାମ୍‌ତାନ୍‌ ତିଆର୍‌ଆତି ପାତ୍‌ଲତି ନାସୁ ଆଡ୍‌ଗିସ୍‌ତାର୍‌ । 18 ମାରି, ସିକ୍‌ଣିଦି ରୁଣ୍ଡି ତାଲେକ୍‌ ରୁଣ୍ତି ଇସାବ୍‌ତାନ୍‌ ବନ୍ଦ କିଜି ଏପୋଦ ଆଙ୍ଗିଁ ଆଗ୍‌ଡ଼ିରି ରୁଣ୍ଡି ଗୁଜାମ୍‌ପଟି ମୁସୁକୁ ଇଟ୍‌ତାର୍‌ । 19 ମାରି, ୱାର୍‌ ରୁଣ୍ଡି ବାଙ୍ଗାରାମ୍‌ ୱେଡେଙ୍ଗ୍‌ ତିୟାର୍‌ କିଜି ବକାଦିସାଜୁଦି ରୁଣ୍ଡି ତରନ୍‌ ଏପୋଦଦି ଆଗ୍‌ଡ଼ିରି ଲୋଇ ତରିନ୍‌ ଇଟ୍‌ତାର୍‌ । 20 ୱାର୍‌ ମାରି ରୁଣ୍ଡି ବାଙ୍ଗାରାମ୍‌ ୱେଡେଙ୍ଗ୍‌ କିଜି ଏପୋଦଦି ରୁଣ୍ଡି ଗୁଜାମ୍‌ପଟି ଆଡ୍‌ଗି ଆଗ୍‌ଡ଼ିରି ଜୋଡ଼ିସ୍‌ତି ବାଡିଦୁ ଏପୋଦଦି ସିନାଦି ନାସୁ ମୁସୁକୁ ଆକା ଇଟ୍‌ତାର୍‌ । 21 ମାରି ବକାଦିସାଜୁ ଏଣ୍ଡେସ୍‌କି ଏପୋଦଦି କାବ୍ରା ନାସୁ ମୁସୁକୁ ମାନ୍‌ଜି ଏପୋଦତାନ୍‌ କୁଦୁଜି ଆର୍‌ଏତ୍‌, ଇୟାଉଣ୍ଡିଙ୍ଗ୍‌ ୱାର୍‌ ବକାଦି ସାଜୁଦିଙ୍ଗ୍‌ ନିଜେ ବେଡ଼ାଦୁ ନିଡ଼ି ନୁଲୁଦାନ୍‌ ଏପୋଦଦି ୱେଡା ୱାଲେ ବନ୍ଦ କିଜି ଇଟ୍‌ତାର୍‌; ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ଇକା କିଆୟ୍‌ଆତାତ୍‌ ।

22 ଇୟାୱେନ୍‌କା ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ଆୟା ଗୁତ୍‌ନି ପାଣି ଏପୋଦଦି ଆଙ୍ଗିଁ ୱିଜୁ ନିଡ଼ି ରଙ୍ଗ୍‌ କିତାର୍‌ । 23 ଆୟା ଆଙ୍ଗିଁଦି ନାଣିମି ସାନ୍ଦୁଆଦି କକ୍‌ଲା ଲାକ୍‌ତୁ ବରୋ ମାର୍ହାତ୍‌; ଆକା ଏଣ୍ଡେସ୍‌ଗି ତେୱେଏତ୍‌, ଇୟାଉଣ୍ଡିଙ୍ଗ୍‌ ଆୟା କୋକ୍‌ଲାଦି ସାରିବେଡ଼୍‌ତି ଗୁତ୍‌ତା ମାର୍ହାର୍‌ । 24 ମାରି, ୱାର୍‌ ଆଙ୍ଗିଁଦି ସାରିବେଡ଼୍‌ତି ନିଡ଼ି, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌ ମାରି ନେଗି ନୁଲୁଦାନ୍‌ ଡାଲିମ୍ୱ ତିଆର୍‌ କିତାର୍‌ । 25 ମାରି ୱାର୍‌ ଡାଲିମ୍ୱ ନାଣିମି ନେଗି ବାଙ୍ଗାରାମ୍‌ଦାନ୍‌ ଜିଡ଼୍‌ଙ୍ଗା କିଜି ଆଙ୍ଗିଁଦି ସାରିବେଡ଼୍‌ତି ଡାଳିମ୍ୱଦି ନାଣିମି ନାଣିମି ଇଟ୍‌ତାର୍‌ । 26 ଇର୍ରିଙ୍ଗା, ସେବାକିନି ଉଣ୍ତିଙ୍ଗ୍‌ ଆଙ୍ଗିଁ ବାଡିଦି ସାରିବେଡ଼େତି ଉନ୍‌ଡ୍ରି ଜିଡ଼୍‌ଙ୍ଗା ୱେନ୍‌କା ଉନ୍‌ଡ୍ରି ଡାଲିମ୍ୱ ମାରି ଉନ୍‌ଡ୍ରି ଜିଡ଼୍‌ଙ୍ଗା ୱେନ୍‌କା ଉନ୍‌ଡ୍ରି ଡାଳିମ୍ୱ, ଇୟାୱାଜା କିତାର୍‌ । 27 ଇୟାୱେନ୍‌କା ମୋସାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ୱାର୍‌ ହାରୋଣ ମାରି ୱାନି ମାରିସିରି ଉଣ୍ତିଙ୍ଗ୍‌ ଅଡ଼ିନି ନେଗି ସରୁ ନୁଲୁଦାନ୍‌ ଗୁତ୍‌ସି ତିଆର୍‌ କିତି ନିର୍‌ଇ ଆଙ୍ଗିଁ । 28 ମାରି ଅଡ଼ିନି ସରୁ ନୁଲୁଦାନ୍‌ ତିୟାର୍‌ଆତି ତାଲାଗୁଡା ମାରି ନେଗି ନୁଲୁଦାନ୍‌ ତିୟାର୍‌ ଆତି ତାଲାଟପି ମାରି ନେଗି ଅଡ଼ିନି ସରୁ ନୁଲୁଦାନ୍‌ ତିୟାର୍‌ଆତି ଅଡ଼ିନି ଡ଼େବୁଦି ଆଙ୍ଗିଁ ତିଆର୍‌ କିତାର୍‌ । 29 ମାରି ନେଗି ସରୁ ଅଡ଼ିନି ନୁଲୁ ମାରି ନିଡ଼ି, ସେର୍‌ଗା, ଏରାନି ରଙ୍ଗ୍‌ଦି, ନୁଲୁଦାନ୍‌ ଗୁତ୍‌ନି ପାଣିଦି ଉନ୍‌ଡ୍ରି ଜୁକିଗାଟି ତିଆର୍‌ କିତାର୍‌ । 30 ଇୟାୱେନ୍‌କା ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ୱାର୍‌ ନେଗି ବାଙ୍ଗାରାମ୍‌ଦାନ୍‌ ପବିତ୍ର ମୁକୁଟ୍‌ ପଟି କିଜି ଗଦେଆତି ସିଲ୍‌ ୱାଜା ଆୟା ମୁସୁକୁ "ପ୍ରବୁଦି ଉଦେସ୍‌ତାନ୍‌ ପବିତ୍ର" ଇକା ରାସ୍‌ତାର୍‌ । 31 ମାରି, ମୁସୁକୁ ତାଲାଗୁଡା ମୁସୁକୁ ଇଡ୍‌ନି ଉଣ୍ତିଙ୍ଗ୍‌ ଆକା ନିଡ଼ି ନୁଲୁଦାନ୍‌ ତର୍‌ତାର୍‌ ।

32 ଇୟା ୱାଜା ମିସାନି ଗୁଡ଼ାଦି ୱିଜୁ ପାଣି ୱିଜିତାତ୍‌; ଇସ୍ରାଏଲ ଲୋକୁ ଆକା କିତାର୍‌, ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ୱାର୍‌ ୱିଜୁ ପାଣି କିତାର୍‌ । 33 ଇୟାୱେନ୍‌କା ୱାର୍‌ ମୋଶାଦି ଲାକ୍‌ତୁ ଆୟା ଗୁଡ଼ା ତାତାର୍‌, ଇର୍ରିଙ୍ଗ୍‌, ଗୁଡ଼ା ମାରି ଆବେଣି ୱିଜୁ ଜିନିସ୍‌, ଆକଡ଼ି, ପାଟେଙ୍ଗ୍‌, ଗାଡ଼ା, ମୁଣ୍ଡେଙ୍ଗ୍‌ ମାରି ବନ୍ଦ୍‌କୁ; 34 ମାରି, ନେତେର୍‌ ଆତି ମେଣ୍ଡା ତଲୁଦାନ୍‌ ତିୟାର୍‌ଆତି ମାରି କଡ଼୍‌କି ତଲୁଦାନ୍‌ ତିୟାର୍‌ଆତି ମାରି ପିଡ଼ିକ୍‌ନି ୱେରେଏ କିନି ପାର୍‌ଦା; 35 ନିୟମ୍ ପେଡ଼ା ମାରି ଆବେଣି କଣା ମାରି ଡାବ୍‌ଣା 36 ଟେବୁଲ୍‌, ଆବେଣି ୱିଜୁ ଜିନିସ୍‌ ମାରି ମାପୁରୁଙ୍ଗୁଁ ସିତିମାନି ରୁଟି, 37 ନେଗି ଦିୱା ଇଡ୍‌ନିକା, ଆବେଣି ଦିୱା, ଇର୍ରିଙ୍ଗ୍‌, ଦିୱା ୱିଜୁ ମାରି ଆବେଣି ୱିଜୁ ଜିନିସ୍‌ ମାରି ଦିୱାଦି ନିୟୁ; 38 ମାରି ବାଙ୍ଗାରାମ୍‌ଦି ବେଦି, ଅବିସେକ୍‌ତି ନିୟୁ, ଦୁପ୍‌ଣିଦି ବାସ୍‌ନାଦି ଜିନିସ୍‌ ମାରି ଗୁଡ଼ା ଦୁୱାର୍‌ତୁ ପିଡ଼ିକ୍‌ନି ୱାତି; 39 ପିତଲ୍‌ଦି ବେଦି ମାରି ଆବେଣି ପିତଲ୍‌ଦି ଜାଲି, ଆବେଣି କଣା ମାରି ୱିଜୁ ଜିନିସ୍‌, ନର୍‌ବାନି କୁଣ୍ତ୍‌ ମାରି ଆବେଣି ଗୁଦୁରି; 40 ଦୁୱାର୍‌ତି ପାର୍‌ଦା, ଆବେଣି ମୁଣ୍ଡେଙ୍ଗ୍‌ ମାରି ବନ୍ଦ୍‌କୁ ମାରି ଦୁୱାର୍‌ ସେର୍‌ଲାଦି ପିଡ଼ିକ୍‌ନି ୱାତି, ଆବେଣି ନାସୁ ମାରି କୁଟିଙ୍ଗ୍‌ ମାରି ମିସାଜିସାନି ଗୁଡ଼ା ଉଣ୍ତିଙ୍ଗ୍‌ ତେବାନି ପାଣିଦି ୱିଜୁ ଜିନିସ୍‌; 41 ପବିତ୍ର ବାଡିଦୁ ସେବାକିନି ଉଣ୍ତିଙ୍ଗ୍‌ ସୁନ୍ଦର୍‌ ଆଙ୍ଗିଁ, ଇର୍ରିଙ୍ଗ୍‌, ହାରୋଣ ଯାଜକଦି ପବିତ୍ର ଆଙ୍ଗିଁ ମାରି ୱାନି ମାରିସିରି ଜାଜକ ପାଣିକିନି ଆଙ୍ଗିଁ, 42 ୱିଜୁ ଆମା ଆମା ପାଣି କିଦେଙ୍ଗ୍‌ ମୋଶାଦି ଉଣ୍ତିଙ୍ଗ୍‌ ପ୍ରବୁ ମାଟା ସିତାମାର୍ହାନ୍‌, ଇସ୍ରାଏଲ୍‌ ଲୋକୁ ଆକା ୱିଜୁ କିତାର୍‌ । 43 ଇବେଟ୍‌ ମୋଶା ଆୟା ୱିଜୁ ପାଣିଦିଙ୍ଗ୍‌ ସୁଡ଼ୁତାନ୍‌, ମାରି ସୁଡ଼ୁଦୁ, ୱାର୍‌ ୱିଜୁ କିତାମାନାର୍‌; ପ୍ରବୁ ଏଣ୍ଡେସ୍‌ ମାଟା ସିତାମାର୍ହାନ୍‌, ୱାର୍‌ ଆୟା ୱାଜା ୱିଜୁ କିତାମାର୍ହାର୍‌; ଆବେଟ୍‌ ମୋଶା ୱାରିଙ୍ଗ୍‌ ଆର୍ସିବାଦ୍‌ କିତାନ୍‌ ।