ଯାତ୍ରା ବଇ 2

ମୋଶାଦି ଜନମ୍‌

1 ଇୟାୱେନ୍‌କା ଲେବି କୁଟୁମ୍‌ଦି ଅରେନ୍‌ ଲୋକ୍‌ ସଲସି ଲେବି କୁଟୁମ୍‌ଦୁ ପୁଟ୍‌ତି ଅରେତ୍‌ ଆଇଲିଦିଙ୍ଗ୍‌ ପେଡ଼ି ଆତାନ୍‌ । 2 ଆବେଟ୍‌କୁ ଆୟା ଆଇମା ପଟାଦୁ ଇଡ୍‌ଜି କଡ଼ଦିଙ୍ଗ୍‌ ଜନମ୍‌ ସିତାତ୍‌; ମାରି କଡ଼ଦିଙ୍ଗ୍‌ ନାଣ୍ଡ ସୁନ୍ଦର୍‌ ସୁଡ଼ୁଜି ୱାଦ୍‌ ୱାନିଙ୍ଗ୍‌ ମୁଣ୍ତ୍ରି ଲେଜ୍‌କୁ ସାନ୍ଦି ମାର୍‌କ୍‌ସି ଇଟ୍‌ତାତ୍‌ । 3 ଅବେଟ୍‌କୁ ମାରି ମାର୍‌କ୍‌ସି ଇଡ୍‌ଦେଙ୍ଗ୍‌ ଆଟ୍‌ଏଣ୍ଡା ୱାଦ୍‌ ଉନ୍‌ଡ୍ରି ଦେରୁଦାନ୍‌ ତିଆର୍‌ ଆତି ପେଡ଼ା ଅସି ସିକଟ୍‌ ସିକ୍‌ଲା ନିୟୁ ମାରି ଦୁପୁଣି କେରେସି ଆୟା ଲୋଇ କଡ଼ଦିଙ୍ଗ୍‌ ଇଡ୍‌ଜି ନିଲ ଗାଡାଦି ପାଡ଼ି ଇଟ୍‌ତାତ୍‌ । 4 ମାରି ୱାନିଙ୍ଗ୍‌ ଇନିକା ଗଟାନାତ୍‌, ଆକା ସୁଡ଼ୁନି ଉଣ୍ତିଙ୍ଗ୍‌ ୱାନି ତାଙ୍ଗିଁ ଆକୋ ନିଲ୍‌ତାମାର୍ହାତ୍‌ ।

5 ଇୟାୱେନ୍‌କା ରାଜା ଫାରୋଦି ଗାଡ଼୍‌ସି ଇବାଦେଙ୍ଗ୍‌ ଗାଡାଦୁ ୱାତାତ୍‌, ତାନି ଦାସିକି ଗାଡା ପାଡ଼ିଦୁ ବୁଲାଜି ମାର୍ହେ । ଆୟା ମାଣାନ୍‌ ୱାଦ୍‌ ଗାଡାଦାନ୍‌ ଉନ୍‌ଡ୍ରି ପେଡ଼ା ସୁଡ଼ୁଜି ଆକା ତାତେଙ୍ଗ୍‌ ନିଜେଦି ଦାସିଙ୍ଗ୍‌ ପୋକ୍‌ତାତ୍‌ । 6 ୱାଦ୍‌ ପେଡ଼ା କୁତ୍‌ସ ଆୟା କଡ଼ଦିଙ୍ଗ୍‌ ସୁଡ଼ୁତାତ୍‌; ମାରି ସୁଡୁଦୁ, ଆୟା କଡ଼ ଆଡ଼୍‌ବାଜି ମାର୍ହାନ୍‌; ଆବେଣାନ୍‌ ୱାଦ୍‌ ଜିବନ୍‌ ନପିସ୍‌ କିଜି ଇର୍ହାତ୍‌, "ଇୟାକାନ୍‌ ଏବ୍ରୀୟ କଡ଼ ।"

7 ଆୟା ୱେଡ଼ାଦୁ ତାନି ତାଙ୍ଗିଁ ରାଜା ଫାରୋଦି ଗାଡ଼୍‌ସିଙ୍ଗ୍‌ ଇର୍ହାତ୍, ନାନ୍‌ ସଲ୍‌ସି ନିଜେଦି ଉଣ୍ତିଙ୍ଗ୍‌ ଇୟା କଡ଼ଦିଙ୍ଗ୍‌ ଉଟ୍‌ପିସ୍‌ କିଦେଙ୍ଗ୍‌ ଇଜି ଏବ୍ରୀୟ ଆଇମେକା ମାଣାନ୍‌ ଅରେତ୍‌ ଆଇମାଦିଙ୍ଗ୍‍ କୁକ୍‌ସି ତାନା ?

8 ଆବେଣାନ୍‌ ଫାରୋଦି ଗାଡ଼୍‌ସି ଇର୍ହାତ୍‌, ସାଙ୍ଗ୍ଆ; ଆବେଣାନ୍‌ ଆୟାକାତ୍‌ ସଲ୍‌ସି ଆୟା କଡ଼ଦି ୟାୟେଙ୍ଗ୍‌ କୁକ୍‌ସି ତାତାତ୍‌ । 9 ଆଦେଙ୍ଗ୍‌ ଫାରୋଦି ଗାଡ଼୍‌ସି ତାନିଙ୍ଗ୍‌ ଇର୍ହାତ୍‌, ନିନ୍‌ ଇୟା କଡ଼ଦିଙ୍ଗ୍‌ ନା ଉଣ୍ତିଙ୍ଗ୍‌ ପାଲୁ ଉଟ୍‌ପିସ୍‌ କିଆ; ନାନ୍‌ ନିଙ୍ଗିଁ ଡାବୁଙ୍ଗ୍‌ ସିନା; ଆବେଣାନ୍‌ ଆୟା ଆଇମା କଡ଼ଦିଙ୍ଗ୍‌ ଅସି ପାଲୁ ଉଟ୍‌ପିସ୍‌ କିତାତ୍‌ । 10 ଇୟାୱେନ୍‌କା କଡ଼ ପିରିତାନ୍‌, ୱାଦ୍‌ ୱାନିଙ୍ଗ୍‌ ଅସି ଫାରୋଦି ଗାଡ଼୍‌ସିଙ୍ଗ୍‌ ସିତାତ୍‌ । ଆବେଣାନ୍‌ କଡ଼ ତାନି ମାରିନ୍‌ ଆତାନ୍‌ । ଆଦେଙ୍ଗ୍‌ ୱାନି ଦର୍‌ ମୋଶା ସିତାତ୍‌; ଇରିଙ୍ଗାଁ ୱାଦ୍‌ ଇର୍ହାତ୍, ନାନ୍‌ ଏର୍‌ଦାନ୍‌ କୁତ୍‌ତା ତାତା ।

ମୋଶାଦି ମିଦିୟନତୁ ସନିକା

11 ଆୟାୱେଡ଼ାଦୁ ମୋଶା ପିରିତି ୱେନ୍‌କା ଅର୍‌ନେଣ୍ଡ୍‌ ୱାନ୍‌ ନିଜେଦି ତଡ଼ାନ୍‌କା ଲାକ୍‌ତୁ ସଲସି ୱାରିଙ୍ଗ୍‌ ବଜୁ ପିଣ୍ଡିତି ମାନିକା ସୁଡ଼ୁତାନ୍‌; ମାରି, ଅରେନ୍‌ ମିସ୍ରିୟ ୱାନି ତଡ଼ାନ୍‌କା ମାଣାନ୍‌ ଅରେନ୍‌ ଏବ୍ରୀଙ୍ଗ୍‌ ଡାକ୍‌ସି ମାରିକା ସୁଡ଼ୁତାନ୍‌ । 12 ଆଦେଙ୍ଗ୍‌ ମୋସା ଇନିଙ୍ଗାଁ ଆନିଙ୍ଗାଁ ସୁଡ଼ୁଜି, ଏଙ୍ଗେବା ସୁଡ଼ୁଏଣ୍ଡା ଆୟା ମିସ୍ରିୟଙ୍ଗ୍‌ ସାୟାମାରାଗ୍‌ ଡାକ୍‌ସି ବାଲିଦୁ ମୁସ୍‌ତାନ୍‌ । 13 ମାରି ଉନ୍‌ଡ୍ରି ଦିନ୍‌ ୱାନ୍‌ ଆତ୍ରେ ସଲସି ରୁଣ୍ଡି ଲୋକ୍‌ ଏବ୍ରୀଲୋକାଙ୍ଗ୍‌ ଜାଟି କିନିକା ସୁଡ଼ୁଜି ଦୋସି ଲୋକ୍‌ଦିଙ୍ଗ୍‌ ଇର୍ହାନ୍‌, "ନିନୁ ନିଜେ ତଡ଼ାନ୍‌ତିଙ୍ଗ୍‌ ଏନ୍ଧା ଡାକ୍‌ସିନି ?"

14 ଆବେଟ୍‌ ୱାନ୍‌ ଇର୍ହାନ୍‌, "ଏନ୍‌ ନିଙ୍ଗିଁ ମା ମୁସୁକୁ ରାଜା ମାରି ବିସାର୍‌କିନିକାନ୍‌ କିଜି ଅଦିକାର୍ ସିତାମାନାନ୍‌ ?" ନିନ୍‌ ଏଣ୍ଡେସ୍‌ ଆୟା ମିସ୍ରିୟ ଲୋକ୍‌ଦିଙ୍ଗ୍‌ ସାୟାମାର୍‌ଗା ଡାକ୍‌ତି, ଆୟାୱାଜାନେ ନାଙ୍ଗିଁ ଡାକ୍‌ତେଙ୍ଗ୍‌ ସୁଡ଼ୁଜିନି ? ଆବେଟ୍‌ ମୋଶା ତିୟେଲ୍‌ ଆଜି ଇର୍ହାନ୍‌, "ଇୟା ମାଟା ଆର୍‌ତିଙ୍ଗ୍‌ ୱେଙ୍ଗିଁତା ମାନାତ୍‌ ।" 15 ଇୟାୱେନ୍‌କା ରାଜା ପାରୋ ଇୟା ମାଟା ୱେନ୍‌ଜି ମସେଙ୍ଗ୍‌ ଡାକ୍‌ତେଙ୍ଗ୍‌ ଇଜି ସେସ୍ଟା କିତାନ୍‌ । ମାତର ମୋସା ରାଜା ପାରୋଦି ଆଗ୍‌ଡ଼ିରାନ୍‌ ସଲସି ମିଦିୟନ ଦେସ୍‌ତୁ ବାସା କିଦେଙ୍ଗ୍‌ ସଲସି ଉନ୍‌ଡ୍ରି କୁଇଁକାଲ୍‌ ଲାକ୍‌ତୁ ବାସ୍‌ତାନ୍‌ । 16 ମିଦିୟନିୟ ଜାଜକଦି ସାତ୍‌ ଗଟା ଗାଡ଼୍‌ସିକ୍‌ ମାର୍ହେ; ୱାକ୍‌ ଆୟା ବାଡିଦୁ ୱାଜି ବୁବାଦି କଡିଙ୍ଗ୍‌ ଗରିଏଙ୍ଗାଁ ଏରୁ ଉଟ୍‌ପିସ୍‌ କିଦେଙ୍ଗ୍‌ ଏରୁ ରେଲ୍‌ଜି କୁଣ୍ତ୍‌ଦୁ ବର୍ତି କିତେ । 17 ଆୟା ମାଣାନ୍‌ କଡିଙ୍ଗ୍‌ ଗରିଏଙ୍ଗ୍‌ ମିନିକାର୍‌ ୱାଜି ୱାରିଙ୍ଗ୍‌ ଗୁସାଦୁ ଇର୍ହାର୍‌, ମାତର ମୋଶା ନିଙ୍ଗ୍‌ଜି ୱାନିକାଙ୍ଗ୍‌ ସାହାଜ୍ୟ କିଜି ୱାନିକା କଡିଙ୍ଗ୍‌ ଗରିଏଙ୍ଗ୍‌ ଏରୁ ଉଟ୍‌ପିସ୍‌ କିବିସ୍‌ତାନ୍‌ । 18 ଇୟାୱେନ୍‌କା ୱାକ୍‌ ନିଜେଦି ବୁବା ରୁୟେଲ ଲାକ୍‌ତୁ ସର୍ହେ, ୱାନ୍‌ ୱାନିକାଙ୍ଗ୍‌ ୱେନ୍‌ବାତାନ୍‌, "ନେର୍‌ ମିର୍‌ ନିସା ଦାପ୍ରେ ଏଣ୍ଡେସ୍‌ ୱାତିଦେର୍‌ ?"

19 ଆବେନୁ ୱାକ୍‌ ଇର୍ହେ, "ଅରେନ୍‌ ମିସ୍ରିୟ ଲୋକ୍‌ ଗାଉଡ଼ୁରି କିୟୁଦାନ୍‌ ମାଙ୍ଗିଁ ରକିୟା କିତାନ୍‌, ମାରି ମା ଉଣ୍ତିଙ୍ଗ୍‌ ଏରୁ ତାସି କଡିଙ୍ଗ୍‌ ଗରିଏଙ୍ଗାଁ ଏରୁ ଉଟ୍‌ପିସ୍‌ କିତାନ୍‌ ।"

20 ଆର୍‌ତିଙ୍ଗ୍‌ ୱାନ୍‌ ନିଜେଦି ଗାଡ଼୍‌ସିକାଙ୍ଗ୍‌ ଇର୍ହାନ୍‌, "ୱାନ୍‌ ଏମେବାନୁ ମାନାନ୍‌ ? ମିରୁ ୱାନିଙ୍ଗ୍‌ ଏନ୍ଦା ଡ଼ିସ୍‌ତି ୱାତିଦେର୍‌ ? ୱାନିଙ୍ଗ୍‌ କୁକୁତୁ; ୱାନ୍‌ ମାୱାଲେ ଉଣାନ୍‌ ।"

21 ଆୟାୱେନ୍‌କା ମୋଶା ଆୟା ଲୋକ୍‌ଦି ୱାଲେ ବାସା କିଦେଙ୍ଗ୍‌ ରାଜି ଆତାନ୍‌; ମାରି ୱାନ୍‌ ମୋଶାଦି ୱାଲେ ନିଜେଦି ଗାଡ଼୍‌ସିଙ୍ଗ୍‌ ସିପରାଦିଙ୍ଗ୍‌ ପେଡ଼ିକିତା ସିତାନ୍‌ । 22 ଇୟାୱେନ୍‌କା ଆୟା ଆଇମା କଡ଼ ଜନମ୍‌ କିତାତ୍‌, ମୋଶା ୱାନି ଦର୍‌ ଗେର୍ଶୋମ୍‌ ଇଟ୍‌ତାତ୍‌; ୱାଦ୍‌ ଇର୍ହାତ୍‌, "ନାନ୍‌ ଆଇ ଦେସ୍‌ତୁ ବାସାନି ଲୋକୁ ଆତାମାନା ।"

23 ଏସ ବାର୍ସେକ୍‌ ୱେନ୍‌କା ମିସ୍ରିୟ ରାଜା ସାତାନ୍‌, ମାରି ଇସ୍ରାଏଲ ଲୋକୁ ଦାସ୍‌ ପାଣି ଉଣ୍ତିଙ୍ଗ୍‌ ଦୁଃକ୍‌ ମାରି ଆଡ଼୍‌ବାତାର୍‌ ମାରି ଦାସ୍‌ ପାଣି ଉଣ୍ତିଙ୍ଗ୍‌ ୱାରି ଆଡ଼ାବାନି କାକୁର୍ତି ମାପୁରୁ ଲାକ୍‌ତୁ ଇତାତ୍‌ । 24 ଆବେନୁ ମାପୁରୁ ୱାରି ଆଡ଼ାବାନି ମାଟା ୱେରାନ୍‌, ମାରି ଅବ୍ରହାମ ମାରି ଇସ୍‌ହାକ ମାରି ଜାକୁବଦି ୱାଲେ କିତି ନିଜେଦି ନିୟମ ଏତ୍‌ କିଜି, 25 ଇସ୍ରାଏଲ ଲୋକା ମୁସ୍‌କୁ ସୁଡ଼ୁତାନ୍‌ ମାରି ୱାରି ଅବସ୍ଥା ନେସ୍‌ତାନ୍‌ ।