1 ମାରି ନା ଉଣ୍ତିଙ୍ଗ୍‌ ଜାଜକ ପାଣିକିନି ଉଣ୍ତିଙ୍ଗ୍‌ ନିନ୍‌ ଇସ୍ରାଏଲ ଲୋକା ମାଣାନ୍‌ ନିଜେଦି ତଡ଼ାନ୍‌ ହାରୋଣତିଙ୍ଗ୍‌ ମାରି ୱାନି ୱାଲେ ୱାନି ମାରିସିରିଙ୍ଗ୍‌, ଇର୍ରିଙ୍ଗା, ହାରୋଣ, ନାଦବ, ମାରି ଅବିହୂ, ଇଲିୟାସର ମାରି ଇଥାମରତିଙ୍ଗ୍‌ ନା ଲାକ୍‌ତୁ ତାନିଦେର୍‌ । 2 ନି ତଡ଼ାନ୍‌ ହାରୋଣଦି ସନ୍‌ମାନ୍‌ ନି ସୁନ୍ଦର୍‌ ଉଣ୍ତିଙ୍ଗ୍‌ ପବିତ୍ର ଆଙ୍ଗିଁସକା ତିଆର୍‌ କିନିଦେର୍ । 3 ମାରି ନାନ୍‌ ଆମା ୱାରିଙ୍ଗ୍‌ ବୁଦିସିନି ଆତ୍ମାଦାନ୍‌ ପୁରା କିତାମାନା, ଆୟା ୱିଜେରିଙ୍ଗ୍‌ ବୁଦିଦି ଲୋକାଙ୍ଗ୍ ଇନ୍‌ଆ; ନା ଉଣ୍ତିଙ୍ଗ୍‌ ଜାଜକ ପାଣି କିନି ଉଣ୍ତିଙ୍ଗ୍‌ ହାରୋଣତିଙ୍ଗ୍‌ ପବିତ୍ର କିନି ଉଣ୍ତିଙ୍ଗ୍‌ ୱାର୍‌ ୱାନି ଆଙ୍ଗିଁସକା ତିଆର୍‌ କିନାର୍‌ । 4 ଇର୍ରିଙ୍ଗା, ବକାଦିସାଜୁ, ଏପୋଦ, ନିର୍‌ଇ ଡ଼େବୁଦି ଆଙ୍ଗିଁସକା, ନେଗେନ୍‌ ତର୍‌ନି ଆଙ୍ଗିଁ, ତାଲାଗୁଡା ମାରି ଜୁକିଦୁ ତରାନିକା, ଇୟା ୱିଜୁ ଆଙ୍ଗିଁସକା ୱାର୍‌ ତିଆର୍‌ କିନାର୍‌; ନା ଉଣ୍ତିଙ୍ଗ୍‌ ଜାଜକ ପାଣି କିନି ଉଣ୍ତିଙ୍ଗ୍‌ ମି ତଡ଼ାନ୍‌ ହାରୋଣ ମାରି ୱାନି ମାରିସିରି ଉଣ୍ତିଙ୍ଗ୍‌ ୱାର୍‌ ପବିତ୍ର ଆଙ୍ଗିଁସକା ତିଆର୍‌ କିନାର୍‌ । 5 ୱାର୍‌ ବାଙ୍ଗାରାମ୍‌ ମାରି ନିଡ଼ି ରଙ୍ଗ୍‌, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌ ମାରି ନେଗି ଅଡ଼ିନି ସରୁନୁଲୁ ଅନାର୍‌ ।

6 ମାରି ୱାର୍‌ ଆୟା ବାଙ୍ଗାରାମ୍‌, ନିଡ଼ି, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌ ମାରି ନେଗି ଅଡ଼ିନି ସରୁନୁଲୁଦାନ୍‌ ନେଗେନ୍‌ ପାଣି କିନିୱାରି ମାଣାନ୍‌ ଏପୋଦ ଆଙ୍ଗିଁସକା ତିଆର୍‌ କିନାର୍‌ । 7 ଆବେଣି ରିଏରି ତାଲାଦୁ ଉନ୍‌ଡ୍ରେ ୱାଜା କୁଡ଼୍‌ନି ରୁଣ୍ଡି ଗୁଜାମ୍‌ପଟି ତେବାନାତ୍‌; ଇୟାୱାଜା ଆକା ମିସାନାତ୍‌ । 8 ମାରି, ଏପୋଦଦି ଆମା ସିନାଦି ଜୁକି ନାସୁ ଆୟା ମୁସୁକୁ ତେବାନାତ୍‌, ଆବେଣି‍ ସିନାଦି ପାଣି ଆୟା ଆଙ୍ଗିଁ ଇସାବ୍‌ଦାନ୍‌ ଆନାତ୍‌; ଇର୍ରିଙ୍ଗା, ବାଙ୍ଗାରାମ୍‌ଦାନ୍‌, ନିଡ଼ି, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌ ମାରି ନେଗି ଅଡ଼ିନି ସରୁନୁଲୁଦାନ୍‌ ଆନାତ୍‌ । 9 ଇୟାୱେନ୍‌କା ମିର୍‌ ରୁଣ୍ଡି ଗୋମେଦକ କାଲୁ ଅସି ଆୟା ମୁସୁକୁ ଜାକୁବଦି ବାର ମାରିସିରି ଦର୍‌କୁ ରାସ୍‌ନିଦେର୍‌ । 10 ଇର୍ରିଙ୍ଗା, ୱାରି କୁଟୁମ୍‌ ଇସାବ୍‌ଦାନ୍‌ ସୋ ଗୋଟା ଦର୍‌କୁ ଉନ୍‌ଡ୍ରେ କାଲୁ ମୁସୁକୁ ମାରି ତେବାତିମାନି ସୋ ଗୋଟା ଦର୍‌କୁ ଆଇ ମଣି ମୁସୁକୁ ରାସ୍‌ନିଦେର୍‌ । 11 ପାଣି କିନିବାନୁ ଅଦ୍‌ଲି ସାପେ କିଦେଙ୍ଗ୍‌ ଆୟା ରୁଣ୍ଡି ମଣି ମୁସୁକୁ ଜାକୁବଦି ମାରିସିରି ଦର୍‌ ରାସ୍‌ନିଦେର୍‌, ମାରି, ଆକା ରୁଣ୍ଡି ବାଙ୍ଗାରାଓଦି ସରାଦାନ୍‌ ବନ୍ଦ କିନିଦେର୍‌ । 12 ମାରି, ଜାକୁବଦି ବାର କୁଟୁମ୍‌ତିଙ୍ଗ୍‌ ଏତ୍‌ କିନି ଉଣ୍ତିଙ୍ଗ୍‌ ମିର୍‌ ଆୟା ରୁଣ୍ଡି ମଣି ଏପୋଦଦି ରୁଣ୍ଡି ଗୁଜାମ୍‌ଦୁ ସିନିଦେର୍‌; ଆବେଟ୍‌ ହାରୋଣ ଏତ୍‌ କିନି ଉଣ୍ତିଙ୍ଗ୍‌ ପ୍ରବୁଦି ଆଗ୍‌ଡ଼ି ନିଜେଦି ରୁଣ୍ଡି ଗୁଜାମ୍‌ଦୁ ୱାରି ଦର୍‌ ପିଣ୍ଡିନାନ୍‌ । 13 ମାରି ମିର୍‌ ରୁଣ୍ଡି ବାଙ୍ଗାରାମ୍‌ ସରା କିନିଦେର୍‌ 14 ମାରି ନେଗି ବାଙ୍ଗାରାମ୍‌ ଦାନ୍‌ ରୁଣ୍ଡି ସରା ସିକିଣି କିଜି ଆୟା ସରା ସିକିଣି ଆୟା ରୁଣ୍ଡି ତରିଟ୍‌ ଆସ୍‌ପିସ୍‌ନିଦେର୍‌ ।

15 ମାରି, ରସ୍‌ନି ପାଣିଦୁ ବିସାର୍‌ କିନି ବକାସାଜୁ କିନିଦେର୍‌, ଇର୍ରିଙ୍ଗ୍‌, ଏପୋଦଦି ପାଣି ଇସାବ୍‌ଦାନ୍‌ ବାଙ୍ଗାରାମ୍‌ଦାନ୍‌ ନିଡ଼ି, ସେର୍‌ଗା ରଙ୍ଗ୍‌, ଏରାନି ରଙ୍ଗ୍‌ ମାରି ନେଗି ଅଡ଼ିନି ସରୁନୁଲୁଦାନ୍‌ ନେଗେନ୍‌ ପାଣିକିଦେଙ୍ଗ୍‌ ନେସ୍‌ତି ଲୋକା ମାଣାନ୍‌ ଆକା ତିଆର୍‌ କିନିଦେର୍‌ । 16 ଆକା ନାଲ୍‌ଗି କୋନେଙ୍ଗ୍‌ ମାରି ବେଡ଼େକ୍‌ତିକା ଆନାତ୍‌; ଆବେଣି ନିରିକା ଉନ୍‌ଡ୍ରେ ବିତା ମାରି ଅସାର୍ ଉନ୍‌ଡ୍ରେ ବିତା ଆନାତ୍‌ । 17 ମାରି, ତାନିଙ୍ଗ୍‌ ନାଲ୍‌ଗି ଦାଡ଼ି କାଲୁଦାନ୍‌ କାସ୍‌ସି କିନିଦେର୍‌, ଆବେଣି ପାର୍‌ତୁମ୍‌ ଦାଡ଼ିଦାନ୍‌ ଚୁଣି, ପିତମଣି ମାରି ମରକତ; 18 ରୁଣ୍ଡି ଦାଡ଼ିଦୁ ପଦ୍ମରାଗ୍‌ ମାରି ନିଳକାନ୍ତ ମାରି ହିରକ 19 ମୁଣ୍ଡ୍ରି ଦାଡ଼ିଦୁ ପେରୋଜ ମାରି ଯିସ୍ମ ମାରି ଇନ୍ଦ୍ରନିଲମଣି 20 ମାରି, ନାଲ୍‌ଗି ଦାଡ଼ିଦୁ ବୈଦୁର୍ଯ୍ୟ, ଗୋମେଦକ ମଣି ମାରି ସୂର୍ଯ୍ୟକାନ୍ତ; ଇୟା ୱିଜୁ ବାଙ୍ଗାରାମ୍‌ଦାନ୍‌ ନିଜେ ନିଜେ ଦାଡ଼ିଦୁ ବାସାୟ୍‌ ଆନେ । 21 ଇୟା ମଣି ଜାକୁବଦି ମାରିସିରି ଉଣ୍ତିଙ୍ଗ୍‌ ୱାରି ଦର୍‌ ଇସାବ୍‌ଦାନ୍‌ ବାର ଗୋଟା ଆନେ; ଅଦ୍‌ଲି ସାପେ କିତି ୱିଜୁ ମଣିଦୁ ଆୟା ବାର ଗୋଟା କୁଟୁମ୍‌ ଉଣ୍ତିଙ୍ଗ୍‌ ୱିଜୁ ଲୋକା ଦର୍‌ ତେବାନାତ୍‌ । 22 ମିର୍‌ ନେଗି ବାଙ୍ଗାରାମ୍‌ଦାନ୍‌ ବକାଦିସାଜୁ ଉଣ୍ତିଙ୍ଗ୍‌ ସରା ୱାଜା ନାସୁ ରୁଣ୍ଡି ସିକିଣି ତିଆର୍‌ କିନିଦେର୍‌ । 23 ମାରି, ବକାଦିସାଜୁ ମୁସୁକୁ ବାଙ୍ଗାରାମ୍‌ଦି ରୁଣ୍ଡି ବରୋ କିନିଦେର୍‌ ମାରି ବକାଦିସାଜୁଦି ରୁଣ୍ଡି ତରିନ୍‌ ଆୟା ରୁଣ୍ଡି କନାଦୁ ଆସ୍‌ପିସ୍‌ କିଦୁ । 24 ମାରି ବକାସାଜୁଦି ରୁଣ୍ଡି ତରଟି ରୁଣ୍ଡି ବରୋ ଲୋଇ ଆୟା ରୁଣ୍ଡି ନାସୁ ବାଙ୍ଗାରାମ୍‌ ସିକିଣି ଆସ୍‌ପିସ୍‌ କିଦୁ । 25 ମାରି ନାସୁ ସିକିଣିଦି ରୁଣ୍ଡି ତାଲା ତରିନ୍‌ ବନ୍ଦ କିଜି ଏପୋଦ ଆଙ୍ଗିଁଦି ଆଗ୍‌ଡ଼ି ରୁଣ୍ଡି ଗୁଜାମି ମୁସୁକୁ ଆସ୍‌ପିସ୍‌ନିଦେର୍‌ । 26 ମିର୍‌ ବାଙ୍ଗାରାମ୍‌ତି ରୁଣ୍ଡି ଆସ୍‌ନିକେଙ୍ଗ୍‌ ତିଆର୍‌ କିଜି ବକାଦିସାଜୁଦି ରୁଣ୍ଡି ତରିଟ୍‌ ଏପୋଦ ଆଙ୍ଗିଁଦି ଆଗ୍‌ଡ଼ିରି ଲୋଇରି ତରିନ୍‌ ଇଡ୍‌ନିଦେର୍‌ । 27 ମାରି ରୁଣ୍ଡି ବାଙ୍ଗାରାମ୍‌ଦି ଆସ୍‌ନିକେଙ୍ଗ୍‌ କିଜି ଏପୋଦ ଆଙ୍ଗିଁଦି ରୁଣ୍ଡି ଗୁଜାମିଦୁ ଆଡ୍‌ଗି ଆବେଣି ଆଗ୍‌ଡ଼ି ତରଟି ଜଡ଼ିସ୍‌ତି ବାଡିଦୁ ଏପୋଦଦି କାବ୍ରାଦି ବାନା ମୁସୁକୁ ଆକା ଇଡ୍‌ନିଦେର୍‌ । 28 ଆବେନୁ ବକାଦିସାଜୁ ଏଣ୍ଡେସ୍‌ ଏପୋଦଦି ସିନାଦି ଜୁକି ନାସୁ ମୁସୁକୁ ମାନ୍‌ଜି ଏପୋଦତାନ୍‌ କୁଦୁଜି ଆର୍‌ଏତ୍‌, ଇୟାଉଣ୍ଡିଙ୍ଗ୍‌ ୱାର୍‌ ବକାଦି ସାଜୁଦିଙ୍ଗ୍‌ ନିଜେଦି ଆସ୍‌ନିବାଣାନ୍‌ ନିଡ଼ି ନୁଲୁଦାନ୍‌ ଏପୋଦଦି ଆସ୍‌ନି ବୋର୍‌ଦି ୱାଲେ ତର୍‌ସି ଇଡ୍‌ନାର୍‌ ।

29 ଆମା ବେଡ଼ାଦୁ ହାରୋଣ ପବିତ୍ର ବାଡିଦୁ ଡ଼ୁଗୁନାନ୍‌, ଆୟା ବେଡ଼ାଦୁ ପ୍ରବୁଦି ଆଗ୍‌ଡ଼ି ଦିନାମି ଏତ୍‌ କିନି ଆୟା ବିସାର୍‌ କିନି ବକାଦି ସାଜୁଦୁ ଜାକୁବ ମାରିସିରି ଦର୍‌ ୱିଜୁ ନିଜେଦି ଜିବନ୍‌ତୁ ଏତ୍‌ କିନାନ୍‌ । 30 ଆୟା ବିସାର୍‌ କିନି ବକାଦି ସାଜୁଦୁ ମିର୍‌ ଉରିମ୍‌* ମାରି ତୁମ୍ମୀମ୍‌* ଇଡ୍‌ନିଦେର୍‌; ଆବେଟ୍‌ ହାରୋଣ ଆମା ବେଡ଼ାଦୁ ପ୍ରବୁଦି ପବିତ୍ର ବାଡି ଆଗ୍‌ଡ଼ି ଡ଼ୁଗୁନାନ୍‌, ଆୟା ବେଡ଼ାଦୁ ହାରୋଣଦି ବକା ମୁସୁକୁ ଆକା ତେବାନାତ୍‌, ମାରି, ହାରୋଣ ନା ଆଗ୍‌ଡ଼ି ଦିନାମି ଇସ୍ରାଏଲ ଲୋକା ଉଣ୍ତିଙ୍ଗ୍ ନା ବଦା ଇନିକା ଆକା ୱାନ୍‌ ନେସ୍‌ତେଙ୍ଗ୍ ଆଟ୍‌ନାନ୍‌ ।

31 ମିର୍‌ ଏପୋଦଦି ଆଙ୍ଗିଁ ପୁରା ନିଡ଼ି ରଙ୍ଗ୍‌ କିନିଦେର୍‌ । 32 ଆବେନୁ ନାଣିମି ତାଲା ଡ଼ୁଗୁସ୍‌ନି ଉଣ୍ତିଙ୍ଗ୍‌ ଉନ୍‌ଡ୍ରି ବରୋ ତେବାନାତ୍‌; ସାନ୍ଦୁଆଦି କକ୍‌ଲା ବାଡି ଆୟା ବରୋଦି ସାରିବେଡ଼୍‌ତି କିୟୁଦାନ୍‌ ଗୁତ୍‌ସି ତିଆର୍‌ କିଆୟ୍‌ ଆନାତ୍‌, ଆବେଟ୍‌ ଆକା ତେୱେଏତ୍‌ । 33 ମାରି ମିର୍‌ ଆବେଣି ଲାକ୍‌ତୁରି ସାରିବେଡ଼୍‌ତି ନିଡ଼ି, ସେର୍‌ଗା, ଏରାନି ରଙ୍ଗ୍‌ତି ଡାଲିମ୍ୱ ପଲ୍‌ କିନିଦେର୍‌; ମାରି ସାରିବେଡ଼୍‌ତିଦି ନାଣିମି ନାଣିମି ବାଙ୍ଗାରାମ୍‌ଦି ଜୁମୁକା ତେବାନାତ୍‌ । 34 ଆୟା ନିର୍‌ଇ ଆଙ୍ଗିଁଦି ନାସୁତି ସାରିବେଡ଼୍‌ତି ଉନ୍‌ଡ୍ରି ବାଙ୍ଗାରାମ୍‌ ଜୁମୁକା ମାରି ଉନ୍‌ଡ୍ରି ଡାଲିମ୍ୱ ପଲ୍‌, ମାରି, ଉନ୍‌ଡ୍ରି ବାଙ୍ଗାରାମ୍‌ଦି ଜୁମୁକା ମାରି ଉନ୍‌ଡ୍ରି ଡାଳିମ୍ୱ ପଲ୍‌ ତେବାନାତ୍‌ । 35 ମାରି ହାରୋଣ ସେବାକିନି ୱେଡ଼ାଦୁ ଆକା ଆରାନାନ୍‌; ଆବେଟ୍‌ ୱାନ୍‌ ଏସ୍ତିୱାଲେ ପ୍ରବୁଦି ଆଗ୍‌ଡ଼ି ପବିତ୍ର ବାଡିଦୁ ଡ଼ୁଗୁନାନ୍‌ ମାରି ଏସ୍ତିୱାଲେ ୱାନ୍‌ ଆବେଣାନ୍‌ ସନାନ୍‌, ନାସ୍ତିୱାଲେ ଆବେଣି ଆଉଲି ୱେନାଇ ଆନାତ୍‌; ଆଦେଙ୍ଗ୍‌ ୱାନ୍‌ ସାଏନ୍‌ ।

36 ମାରି ମିର୍‌ ନେଗି ବାଙ୍ଗାରାମ୍‌ଦାନ୍‌ ଉନ୍‌ଡ୍ରି ପଟି ତିଆର୍‌ କିଜି ସିଲ୍‌ କିଜି ଆୟା ମୁସୁକୁ "ପ୍ରବୁଦି ଉଦେସ୍‌ତାନ୍‌ ପବିତ୍ର" ରାସ୍‌ନିଦେର୍‌ । 37 ମାରି, ତାଲାଗୁଡା ମୁସୁକୁ ମାନ୍‌ଣ୍ଡ୍ରେଙ୍ଗ୍‌ ଆକା ନିଡ଼ି ନୁଲୁଦାନ୍‌ ତର୍‌ସି ତାଲାଗୁଡାଦି ଆଗ୍‌ଡ଼ି ଇଡ୍‌ନିଦେର୍‌ । 38 ଆକା ହାରୋଣଦି କାପାଲ୍‌ ମୁସୁକୁ ତେବାନାତ୍‌, ଆବେନୁ ପବିତ୍ର ଜିନିସ୍‌ ଗଟାତିକା ସେଇକା, ଇରିଙ୍ଗାଁ, ଇସ୍ରାଏଲ ଲୋକୁ ନିଜେଦି ପବିତ୍ରଦି ପବିତ୍ର ଜନିସ୍‌ଦି ୱିଜୁ ଜିନିସ୍‌ ବିସୟ୍‌ତାନ୍‌ ଆମା ସେଇକା କିନାର୍‌, ଆକା ହାରୋଣ ପିଣ୍ଡିନାନ୍‌ ମାରି ପ୍ରବୁଦି ଆଗ୍‌ଡ଼ି ୱାର୍‌ ଏଣ୍ଡେସ୍‌ ଆସାନାର୍‌, ଇୟାଉଣ୍ଡିଙ୍ଗ୍‌ ଆକା ଦିନାମି ୱାନି କାପାଲ୍‌ଦୁ ତେବାନାତ୍‌ ।

39 ମିର୍‌ ନିର୍‌ଇ ଡ଼େବୁଦି ଆଙ୍ଗିଁ ଅଡ଼ିନି ଟେରିକଟ୍‌ ଆଙ୍ଗିଁ ମାରି ତାଲାଗୁଡାଦିଙ୍ଗ୍‌ ଅଡ଼ିନି ନୁଲୁଦାନ୍‌ ତିଆର୍‌ କିନିଦେର୍‌; ମାରି ଜୁକିଗାଟି ତରାନି ପାଣି ଦାନ୍‌ କାବ୍ରା ଚିତ୍ରା କିନିଦେର୍‌ ।

40 ମାରି ହାରୋଣଦି ମାରିସିରି ଉଣ୍ତିଙ୍ଗ୍‌ ନିର୍‌ଇ ଡ଼େବୁଦି ଆଙ୍ଗିଁ ମାରି ଜୁକିଗାଟି ତର୍‌ନିକା ତିଆର୍‌ କିନିଦେର୍‌, ମାରି ୱାରି ସୁନ୍ଦର୍‌ ଉଣ୍ତିଙ୍ଗ୍‌ ତାଲାଦୁ ଆରିସ୍‌କିନିଦେର୍‌ । 41 ମାରି, ନି ତଡ଼ାନ୍‌ ହାରୋଣ ମାରି ୱାନି ମାରିସିରିଙ୍ଗ୍‌ ଆକା ୱିଜୁ ଆରିସ୍‌ କିନିଦେର୍‌; ମାରି, ୱାରିଙ୍ଗ୍‌ ଅବିସେକ୍‌ କିଜି ପଦଦୁ ଇଡ୍‌ନିଦେର୍‌ ମାରି ପବିତ୍ର କିନିଦେର୍‌, ଆବେନୁ ୱାର୍‌ ନା ଜାଜକ ପାଣି କିନାର୍‌ । 42 ନିନ୍‌ ୱାରି ମେନ୍ଦଲତି ଡୁମୁଡା ପିଡ଼ିକ୍‌ନି ଉଣ୍ତିଙ୍ଗ୍‌ ଜୁକିଦାନ୍‌ କୁରୁଗୁ ସାନ୍ଦି ଅଡ଼ିନି ଡ଼େବୁଦି ଆଙ୍ଗିଁ ଆରିସ୍‌ କିନିଦେର୍‌ । 43 ମାରି, ଏସ୍ତିୱାଲେ ହାରୋଣ ମାରି ୱାନି ମାରିସିର୍‌ ମିସାନି ଗୁଡ଼ାଦୁ ଡ଼ୁଗୁନାର୍‌, ବା ପବିତ୍ର ବାଡିଦୁ ସେବା କିନି ଉଣ୍ତିଙ୍ଗ୍‌ ବେଦିଦି ଲାକ୍‌ତୁ ୱାନାର୍‌, ନାସ୍ତିୱାଲେ ୱାର୍‌ ଏଣ୍ତେସ୍‌ ପାପ୍‌ କିଜି ସାଏର୍‌, ଇୟାଉଣ୍ତିଙ୍ଗ୍‌ ୱାର୍‌ ଇୟା ଆଙ୍ଗିଁ ଆରାନାର୍‌; ଇକା ହାରୋଣ ମାରି ୱାନି ୱେନ୍‌କାରି କୁଟୁମ୍‌ତି ଉଣ୍ତିଙ୍ଗ୍‌ ମାନାନି ୱିଜୁଦିନ୍‌ତି ବିଦି ଆନାତ୍‌ ।