1 ଆବେଟ୍‌ ମୋଶା ଡ଼େସି ମାପୁରୁଙ୍ଗୁଁ ଇର୍ହାନ୍‌, ସୁଡ଼ୁଆ, ୱାର୍‌ ନାଙ୍ଗିଁ ମାନାଏର୍‌ ମାରି ନା ମାଟାଦିଙ୍ଗ୍‌ ମନ୍‌ ସିଏର୍‌; ମାତର ୱାର୍‌ ଇନାର୍‌, ପ୍ରବୁ ନିଙ୍ଗିଁ ବର୍‌ ସିଏନ୍‌ ।

2 ଆବେଟ୍‌ ମାପୁରୁ ୱାନିଙ୍ଗ୍‌ ଇର୍ହାନ୍‌, "ନି କିୟୁଦୁ ଆୟାକା ଇନିକା ମାନାତ୍‌ ?" ୱାନ୍‌ ଇର୍ହାନ୍‌, "ବାଡିଗା ।"

3 ଆବେଟ୍‌ ପ୍ରବୁ ଇର୍ହାନ୍‌, "ତାନିଙ୍ଗ୍‌ ବୁମିଦୁ ପକ୍‌ଆ ।" ଆବେଟ୍‌ ୱାନ୍‌ ବାଡିଗାଦିଙ୍ଗ୍‌ ବୁମିଦୁ ପକ୍‌ତାନ୍‌, ବାଡିଗା ସାରାସୁ ଆତାତ୍‌; ଆବେଣାନ୍‌ ମୋଶା ସାରାସୁ ଆଗ୍‌ଡ଼ିରାନ୍‌ ଉରୁକ୍‌ତାନ୍‌ । 4 ନାସ୍ତିୱାଲେ ପ୍ରବୁ ମୋସେଙ୍ଗ୍‌ ଇର୍ହାନ୍‌, "ୱାରି ପୁର୍ବେଦିବୁବାରି ସଦାପ୍ରବୁ ମାପୁରୁ, ଇରିଙ୍ଗ୍‌, ଅବ୍ରହାମ୍‌ଦି ମାପୁରୁ ମାରି ଇସ୍‌ହାକଦି ମାପୁରୁ ମାରି ଜାକୁବଦି ମାପୁରୁ ଜେ ନିଙ୍ଗିଁ ବର୍‌ ସିତାମାନାନ୍‌, ଇକା ଏଣ୍ଡେସ୍‌ଗି ୱାର୍‌ ମାନାନାର୍‌," 5 ଇୟାଉଣ୍ତିଙ୍ଗ୍‌ ନିନ୍‌ ନିଜେଦି କିୟୁ ସାକ୍‌ସି ତାନି ତକା ଆସ୍‌ଆ; ଆବେଟ୍‌ ୱାନ୍‌ କିୟୁ ସାକ୍‌ସି ତାନିଙ୍ଗ୍‌ ଆସ୍‌ତାନ୍‌, ୱାନି କିୟୁଦୁ ଆକା ବାଡିଗା ଆତାତ୍‌ । 6 ଇୟାୱେନ୍‌କା ପ୍ରବୁ ୱାନିଙ୍ଗ୍‌ ମାରି ଇର୍ହାନ୍‌, "ନି ନିଜେଦି କିୟୁ ବକାଦୁ ଇଡ୍‌ଆ ।" ଆବେଟ୍‌ ୱାନ୍‌ ନିଜେଦି କିୟୁ ବକାଦୁ ଇଡ୍‌ଜି ମାରି ଡ଼େସି କିୟୁ ସପ୍‌ତାନ୍‌, ସୁଡ଼ୁଆ, ୱାନି କିୟୁ ଅଡ଼ିନିରଙ୍ଗ୍‌ ୱାଜା କୁସ୍ଟରୋଗ୍‌ ଆତାତ୍‌ । 7 ଇବେନୁ ୱାନ୍‌ ଇର୍ହାନ୍‌, "ନିନ୍‌ ମାରିଡ଼େସି ନିଜେଦି କିୟୁ ବକାଦୁ ଇଡ୍‌ଆ;" ୱାର୍‌ ଜଦି ମାନାଏର୍‌ 8 ମାରି ନି ଆୟା ପାର୍‌ତୁମ୍‌ ସିନାଦୁ ମୋନ୍‌ ସିଏର୍‌, ଆର୍‌ତିଙ୍ଗ୍‌ ମାରି ଉନ୍‌ଡ୍ରି ସିନାଦୁ ମାନାନାର୍ । ଆବେଟ୍‌ ୱାନ୍‌ ମାରି ଡ଼େସି ନିଜେଦି କିୟୁ ବକାଦୁ ଇଡ୍‌ଜି ସପ୍‌ତାନ୍‌, ସୁଡ଼ୁଦୁ, ଆକା ସତେନେ କାଣ୍ଡା ଆତାତ୍‌ । 9 ଇୟା ରୁଣ୍ଡି ସିନାଦାନ୍‌ ଜଦି ୱାର୍‌ ମାନାଏର୍‌ ମାରି ନି ମାଟାଦିଙ୍ଗ୍‌ ମନ୍‌ ସିଏତିଙ୍ଗା, ଆର୍‌ତିଙ୍ଗ୍‌ ନିନ୍‌ ନିଲ ଗାଡାଦି ଏରୁ ସୁବୁଡ଼ି ଅସି ୱାର୍‌ତି ବୁମିଦୁ ୱାକ୍‌ଆ; ଆବେଣାନ୍‌ ନିନ୍‌ ଗାଡାଦାନ୍‌ ଏମେ ଏରୁ ତାନି, ଆକା ୱାର୍‌ତି ବୁମିଦୁ ନେତେର୍‌ ଆନାତ୍‌ ।

10 ଇୟାୱେନ୍‌କା ମୋଶା ମାପୁରୁଙ୍ଗୁଁ ଇର୍ହାନ୍‌, "ଏ ପ୍ରବୁ, ଇୟା ୱେଡ଼ା ଆଗ୍‍ଡ଼ିନେ, ମାରି ନିନ୍‌ ନିଜେଦି ସାକର୍‌ ୱାଲେ ୱାର୍‌ଗିତି ୱେନ୍‌କା ନେ ନାନ୍‌ ନେଗେନ୍‌ ମାଟା ୱାର୍‌ଗିନିକାନ୍‌ ସିଲେ, ମାତର ନାନ୍‌ ଉଣା ମାଟା ୱାର୍‌ଗିନିକାନ୍‌ ମାରି ତତଲା ୱେତଲ୍‌ତିକାନ୍‌ ।"

11 ଆବେଟ୍‌ ପ୍ରବୁ ୱାନିଙ୍ଗ୍‌ ଇର୍ହାନ୍‌, "ଲୋକା ୱେୟୁ ଏନ୍‌ ତିଆର୍‌ କିତାମାନାନ୍‌ ? ମାରି ଲୋକାଙ୍ଗ୍‌ ଗୁଲା ମାରି ବଇରା ମାରି କାଣୁକୁ ସୁଣିକା ମାରିବା କାଣା ଏନ୍‌ କିନାନ୍‌ ? ମାପ୍‌ ସଦାପ୍ରବୁ ଆକା କିଏପ୍‌ ନ ? 12 ଇଲେଇ ସାଙ୍ଗ୍‌ଆ, ନାନ୍‌ ନି ୱାଲେ ମାନ୍‌ଜି ମାଟା ୱାର୍‌ଗିଦେଙ୍ଗ୍‌ ମାରି ଇଣ୍ତ୍ରେଙ୍ଗ୍‌ ନିଙ୍ଗିଁ ଅଜାକିନାପ୍‌ ।"

13 ମାତର୍‌ ମୋଶା ଇର୍ହାନ୍‌, "ଏ ପ୍ରବୁ, ନାନ୍‌ ମାଡ଼ିସ୍‌ କିଜିନା, ଏମେୱାନିଙ୍ଗ୍‌ ପକ୍‌ତେଙ୍ଗ୍‌ ଆନାତ୍‌, ୱାନି ମାଣାନ୍‌ ପକ୍‌ଆ ।"

14 ଆବେଟ୍‌ ମୋଶା ଉଣ୍ତିଙ୍ଗ୍‌ ପ୍ରବୁଦି ରିସା ନାଣ୍ଡ ଆତାତ୍‌; ଆଦେଙ୍ଗ୍‌ ମାପୁରୁ ଇର୍ହାନ୍‌, "ଲେବିୟ ହାରୋଣ ନୋ ନି ତଡ଼ାନ୍‌ ଆଏନ୍‌ ? ନାନ୍‌ ନେସ୍‌ନା, ନେଗେନ୍‌ ୱାର୍‌ଗିନାନ୍‌ । ମାରି ସୁଡ଼ୁଆ, ୱାନ୍‌ ନି ୱାଲେ ମିସାଦେଙ୍ଗ୍‌ ୱାଜିନାନ୍‌; ମାରି ନିଙ୍ଗିଁ ସୁଡ଼ୁଜ ୱେଡ଼ିକା ଆନାନ୍‌ । 15 ନିନ୍‌ ୱାନିଙ୍ଗ୍‌ ଇନି ମାରି ୱାନି ୱେୟୁଦୁ ବାକ୍ୟ ସିନି; ମାରି ନାନ୍ ମିଙ୍ଗିଁ ରିଏରିଙ୍ଗ୍‌ ୱାର୍‌ଗିଦେଙ୍ଗ୍‌ ସାକା କିନା ମାରି ନାନ୍‌ ମିଙ୍ଗିଁ ରିଏରିଙ୍ଗ୍‌ ଇନିକା କିନିକାମାନାତ୍‌ ଆକା ଅଜାକିନା । 16 ୱାନ୍‌ ଲୋକା ଲାକ୍‌ତୁ ମି ଉଣ୍ତିଙ୍ଗ୍‌ ନାଡ଼ିମି ୱାର୍‌ଗିନିକାନ୍‌ ଆନାନ୍‌; ନିନ୍‌ ୱାନି ମାପୁରୁ ୱାଜା ଆନି ମାରି ୱାନିଙ୍ଗ୍‌ ଇନିକା ଇନ୍‌ଡ୍ରେଙ୍ଗ୍‌ ଆନାତ୍‌ ଆକା ୱେର୍‌ନି । 17 ମାରି ନିନ୍‌ ନିଜେଦି କିୟୁଦାନ୍‌ ଇୟା ବାଡିଗା ଅଆ, ଇରିଙ୍ଗ୍‌ ଇୟା ମାଣାନ୍‌ ନିନ୍‌ ଇୟାୱିଜୁ ସିନା ତର୍‌ନି ।"

18 ଇୟାୱେନ୍‌କା ମୋଶା ନିଜେଦି ପତେଲ୍‌ସି ଜିତ୍ର ଲାକ୍‌ତୁ ଡ଼େସି ସଲୋସି ଇର୍ହାନ୍‌, "ନାନ୍‌ ମାଡ଼ିସ୍‌ କିଜିନା, ମିସର ଦେସ୍‌ତୁ ନା ତଡ଼ାନ୍‌କା ଲାକ୍‌ତୁ ଇଲେଇ ଡ଼େସି ସନି ଉଣ୍ତିଙ୍ଗ୍‌ ମାରି ୱାର୍‌ ଇଲେଇବା ଜିତାମାନାର୍‌ ସିଲେ, ଆକା ସୁଡ଼ୁନି ଉଣ୍ତିଙ୍ଗ୍‌ ନାଙ୍ଗି ସଣ୍ଡ୍ରେଙ୍ଗ୍‌ ସିଦା ।" ଆବେଟ୍‌ ଜିତ୍ର ମୋସେଙ୍ଗ୍‌ ଇର୍ହାନ୍‌, ନେଗେଣ୍ଡ୍‌ତାନ୍‌ ସାଙ୍ଗ୍‌ଆ ।

19 ମାରି ପ୍ରବୁ ମିଦିୟନଦୁ ମୋସେଙ୍ଗ୍‌ ଇର୍ହାନ୍‌, "ନିନ୍‌ ମିସର ଦେସ୍‍ଦୁ ଡ଼େସି ସାଙ୍ଗ୍‌ଆ; ଇରିଙ୍ଗ୍‌ ଆମା ଲୋକ୍‌ ନିଙ୍ଗିଁ ଡାକ୍‌ତେଙ୍ଗ୍‌ ରେବାଜି ମାର୍ହାର୍‌, ୱାର୍‌ ୱିଜେରେ ସାତା ମାନାର୍‌ ।" 20 ଆବେନୁ ମୋଶା ନିଜେ ଆଡ଼ିଙ୍ଗ୍‌ ମାରି କଡ଼ରିଙ୍ଗ୍‌ ଗଦ ମୁସୁକୁ ଏକ୍‌ସି ମିସର ଦେସ୍‌ତୁ ଡ଼େସି ସର୍ହାର୍‌, ମାରି ୱାନ୍‌ ନିଜେ କିୟୁଦୁ ମାପୁରୁଦି ଆୟା ବାଡିଗା ଅତାନ୍‌ ।

21 ପ୍ରବୁ ମୋସେଙ୍ଗ୍‌ ଇର୍ହାନ୍‌, "ଜାଗାର୍‌ତା, ମିର୍‌ ମିସରଦୁ ଡ଼େସି ସରିଙ୍ଗା, ମାପ୍‌ ମି କିୟୁଦୁ ନେ ୱିଜୁ କାବାଆନି ବିସୟ୍‌ କିଦେଙ୍ଗ୍‌ ସିତାମାନାପ୍‌, ଆକା ଫାରୋ ଆଗ୍‌ଡ଼ି କିନି; ମାତର ମାପ୍‌ ୱାନି ମନ୍‌ ଆଟ୍‌ୱା କିନାପ୍‌; ଆବେନୁ ୱାନ୍‌ ଲୋକାଙ୍ଗ୍‌ ଡ଼ିସ୍‌ଏନ୍‌ । 22 ମାରି ନିନ୍‌ ପାରୋଙ୍ଗ୍ ଇନି, ସଦାପ୍ରବୁ ଇଜିନାନ୍‌, ଇସ୍ରାଏଲ ମା ମାରିନ୍‌; ମା ପେରି ମାରିନ୍‌; 23 ମାପ୍‌ ନିଙ୍ଗିଁ ଇଜିନାପ୍‍, ମା ସେବା କିନି ଉଣ୍ତିଙ୍ଗ୍‌ ନିନ୍‌ ମା ମାରିନ୍‌ତିଙ୍ଗ୍‌ ଡ଼ିସ୍‌ଆ; ମାତର ନିନ୍‌ ୱାନିଙ୍ଗ୍‌ ଡ଼ିସ୍‌ତେଙ୍ଗ୍‌ ବଦା କିଏଜିନି ; ସୁଡ଼ୁଆ, ମାପ୍‌ ମି ମାରିନ୍‌ତିଙ୍ଗ୍‌, ମି ପେରି ମାରିନ୍‌ଦିଙ୍ଗ୍‌ ସାପିସ୍‌ନାପ୍‌ ।"

24 ଇୟାୱେନ୍‌କା ସାରିଦି ରୋମ୍‌ନି ଇନ୍‌ଡ୍ର ପ୍ରବୁ ୱାନିଙ୍ଗ୍‌ ବେଟ୍‌ଆଜି ସାପିସ୍‌ କିଦେଙ୍ଗ୍‌ ସେସ୍ଟା କିତାନ୍‌ । 25 ନାସ୍ତିୱାଲେ ସିପରା ଉନ୍‌ଡ୍ରି ଦାରାଦି କାଲୁ ଅସି ନିଜେଦି କଡ଼ଦିଙ୍ଗ୍‌ ସୁନ୍ନତ କିଜି ଆକା ୱାନି କାଲୁ ଆଡ୍‌ଗି ଇଡ୍‌ଜି ଇର୍ହାତ୍‌, "ନିନ୍‌ ସତେନେ ନା ନେତେର୍‌ଦି କନ୍‌ଲି ।" 26 ଇୟାୱାଜା ପ୍ରବୁ ତାନିଙ୍ଗ୍‌ ଡ଼ିସ୍‌ତା ସିତାନ୍‌ । ଆବେନୁ ଆୟା ଆଇମା ଇର୍ହାତ୍‌, "ସୁନ୍ନତ ଆତି ନିନ୍‌ ନେତେର୍‌ତି କନ୍‌ଲି ।"

27 ଇୟାୱେନ୍‌କା ସଦାପ୍ରବୁ ହାରୋଣଙ୍ଗ୍‌ ଇର୍ହାନ୍‌, ନିନ୍‌ ମୋଶାଦି ୱାଲେ ବୁଡ଼ୁନି ଉଣ୍ତିଙ୍ଗ୍‌ ବାଲିବାଟାଦୁ ସାଙ୍ଗ୍‌ଆ; ଆବେଟ୍‌ ୱାନ୍‌ ସଲ୍‌ସି ମାପୁରୁତି ଗରନ୍‌ତୁ ୱାନି ୱାଲେ ମିସାଜି ୱାନିଙ୍ଗ୍‌ ନଣ୍ଡିତାନ୍‌ । 28 ନାସ୍ତିୱାଲେ ମୋଶା ସଦାପ୍ରବୁ ଇର୍ହି ୱିଜୁ ମାଟା ମାରି ୱାନ୍‌ ସିତିମାନି ୱିଜୁ ସିନା ହାରୋଣଙ୍ଗ୍‌ ୱେର୍‌ତାନ୍‌ । 29 ଇୟାୱେନ୍‌କା ମୋଶା ମାରି ହାରୋଣ ସଲ୍‌ସି ଇସ୍ରାଏଲ ଲୋକା ପେରିୱାରିଙ୍ଗ୍‌ ଉଣ୍ଡ୍ରେବାନୁ କିତାର୍‌ । 30 ମାରି ହାରୋଣ ୱାରିଙ୍ଗ୍‌ ମୋଶାଦି ଉଣ୍ତିଙ୍ଗ୍‌ କିତିମାନି ସଦାପ୍ରବୁ ୱିଜୁ ମାଟା ଇର୍ହାନ୍‌, ମାରି ଲୋକା ଆଗ୍‌ଡ଼ି ଆୟାୱିଜୁ ସିନା ତର୍‌ତାନ୍‌ । 31 ଆବେଟ୍‌ ଲୋକୁ ମାନାତାର୍‌, ମାରି, ପ୍ରବୁ ଇସ୍ରାଏଲ ଲୋକା ଜାତୁନ୍‍ କିଜି ୱାରି ଦୁଃକ୍‌ ସୁଡ଼ୁତାମାନାନ୍‌, ଇକା ୱେନ୍‌ଜି ୱାର୍‌ ୱାନିଙ୍ଗ୍‌ ତାଲା ପାଡ଼ିକ୍‌ସି ମାଡ଼ିସ୍‌ କିତାର୍‌ ।