1 ଇୟାୱେନ୍‌କା ମିସର ଦେସ୍‌ତୁ ସଦାପ୍ରବୁ ମୋଶା ମାରି ହାରୋଣତିଙ୍ଗ୍‌ ଇର୍ହାନ୍‌, 2 ଇୟା ଲେଜୁ ମି ପେରି ଲେଜୁ ମାରି ଇୟା ବାର୍‌ସେକ୍‌ତି ପାର୍‌ତୁମ୍‌ ଲେଜୁ ଆନାତ୍‌ । 3 ମିରୁ ଇସ୍ରାଏଲଦି ୱିଜୁ କୁଟୁମ୍‌ତିଙ୍ଗ୍‌ ଇୟା ମାଟା ଇନଡ୍ରୁ, ଇୟା ଲେଜୁଦି ଦସ୍‌ ଦିନ୍‌ତୁ ମିର୍‌ ୱିଜେରେ ଲୋକ୍‌ ଇଲୁ ଇସାବ୍‌ଦାନ୍‌ ୱିଜେରେ ଇଲୁଦି ଉଣ୍ତିଙ୍ଗ୍‌ ଉନ୍‌ଡ୍ରି ଉନ୍‌ଡ୍ରି ମେଣ୍ଡାପିଲା ଅନିଦେର୍‌ । 4 ମାରି, ଉନ୍‌ଡ୍ରି ମେଣ୍ଡାପିଲା ଅନିଉଣ୍ଡିଙ୍ଗ୍‌ ଜଦି ଏମେ ଇଲୁ ଉଣା ଆନାତ୍‌, ଆଦେଙ୍ଗ୍‌ ୱାନ୍‌ ମାରି ୱାନି ଇଲୁ ଲାକ୍‌ତୁରି ଲୋକାଙ୍ଗ୍, ଜାତୁ ଇସାବ୍‌ଦାନ୍‌ ଉନ୍‌ଡ୍ରି ମେଣ୍ଡାପିଲା ଅନିଦେର୍‌; ମିର୍‌ ୱିଜେରେ ତିନି ସାକ୍ତି ଇସାବ୍‌ଦାନ୍‌ ମେଣ୍ଡାପିଲାଦି ଇସାବ୍‌କିନିଦେର୍‌ । 5 ମିର୍‌ ମେଣ୍ଡାମାନ୍ଦା ବା ଗରିଏଙ୍ଗ୍‌ମାନ୍ଦା ମାଣାନ୍‌ ପିଲା ଅନିଦେର୍‌; ଆକା ରଗ୍‌ ନି ଦାଗ୍‌ ସିଲିକା ମାନାତ୍‌, ଉନ୍‌ଡ୍ରେ ବାର୍ସେକ୍‌ତି ଗାଡ୍‌ରା ପିଲା; 6 ଆୟା ଲେଜୁଦି ସଉଦ ଦିନ୍‌ତୁ ତାନିଙ୍ଗ୍‌ କେର୍‌ସି ଇଡ୍‌ନିଦେର୍‌; ଇୟାୱେନ୍‌କା ଇସ୍ରାଏଲ ଲୋକାଦି ୱିଜୁ କୁଟୁମ୍‌ ମିଲିମିଲିକା ଇୟା ମେଣ୍ତାପିଲାଦିଙ୍ଗ୍‌ କୟ୍‌ନାର୍‌ । 7 ମାରି, ଲୋକ୍‌ ତାନି ନେତେର୍‌ ଅସି ଆମା ଆମା ଇନ୍‌ଡ୍ର ମେଣ୍ଡା ତିନାର୍‌, ଆୟା ଇଲ୍‌କାଣି ରୁଣ୍ତି ଦୁୱାର୍‌ ବନ୍ଦଙ୍ଗା ମାରି ସେର୍‌ଲା ମୁସୁକୁ ଆକା ଉସ୍‌ନାର୍‌ । 8 ମାରି ଇୟା ନାଡ଼ା ତାନି କାଣ୍ତା ତିନାର୍‌; ସିସୁଦୁ ସୁର୍‌ଜି କମିର୍‌ ସିଲି ରୁଟି ମାରି କେୟିନି କୁସାଦାନ୍‌ ଆକା ତିନିଦେର୍‌ । 9 ମିରୁ ଆୟା କାଣ୍ଡା ପାସିକା ମାରି ୱାର୍‌ଜ ତିନ୍‌ଇଦେର୍‌, ମାତର ସିସୁଦୁ ତାନି ତାଲା ମାରି କୁରୁଗୁ ମେନ୍ଦଲ୍‌ତି ଲୋଇରି ୱିଜୁ ସୁର୍‌ଜ ତିନିଦେର୍‌ । 10 ମାରି, ସାଲ୍‌ଦି ସାନ୍ଦି ଆବେଣି ଇନିକାବା ଇଡ୍‌ମାଟ୍‌; ଜଦି ସାଲ୍‌ଦି ସାନ୍ଦି ଇନିକା ମାନ୍‌ଜିନାତ୍‌, ଆକା ସିସୁଦୁ ଆଡ଼ିକ୍‌ନିଦେର୍‌ । 11 ଇୟାୱାଜା ମିର୍‌ ଆକା ବେଗି ତିନିଦେର୍‌, ଇର୍ରିଙ୍ଗା ମିର୍‌ ଜୁକିଦୁ ତରାଜି ପାଦାମ୍‌ତୁ ଜୁତା ଆରାଜି କିୟୁଦୁ ବାଡିଗା ଆସ୍‌ସୋ ସନି ଉଣ୍ତିଙ୍ଗ୍‌ ତିଆର୍‌ ଆନିଦେର୍‌; ଇକା ସଦାପ୍ରବୁଦି ଡ଼ିସାନି ପଣ୍ତୟ୍‌ ।

12 ଏଣ୍ତେସ୍‌କି ମାପ୍‌ ନେର୍‌ ନାଡ଼ା ମିସର ଦେସ୍‌ତି ଲୋଇ ସଲ୍‌ସି ମିସର ଦେସ୍‌ଦି ଲୋକାଙ୍ଗ୍ ମାରି ଜାତୁଙ୍ଗାଁ ୱିଜୁ ପାର୍‌ତୁମ୍‌ ଜନମ୍‌ ଆତି ୱାନିକାଙ୍ଗ୍‌ ସାପିସ୍‌ କିନାପ୍‌; ମାରି, ମିସ୍ରିୟରି ୱିଜୁ ଦିୟାମ୍‌କା ବିଚାର୍‌ କିଜି ଦଣ୍ଡ୍‌ ସିନାପ୍‌; ମାପ୍‌ ସଦାପ୍ରବୁ । 13 ଆଦେଙ୍ଗ୍‌ ମିର୍‌ ଆମା ଆମା ଇଲ୍‌କାଙ୍ଗ୍‌ ମାନିଦେର୍‌, ଆୟା ଆୟା ଇଲ୍‌କାଙ୍ଗ୍‌ ଆୟା ନେତେର୍‌ ସିନା ୱାଜା ତେବାନାତ୍‌; ମାରି ମାପ୍‌ ମିସର ଦେସ୍‌ତିଙ୍ଗ୍‌ ଦଣ୍ଡ୍‌ ସିନି ୱେଡ଼ାଦୁ ଆୟା ନେତେର୍‌ ସୁଡ଼ୁତିଙ୍ଗା, ମିଙ୍ଗିଁ ଡ଼ିସ୍‌ସୋ ଆଗ୍‌ଡ଼ି ସନାପ୍‌, ମାରି, ସାନିକା ମିଙ୍ଗିଁ ଗଟାଏତ୍‌ । 14 ମାରି ଆୟା ଦିନ୍‌ ମି ଏତ୍‌କିନି ଦିନ୍‌ ଆନାତ୍‌, ମାରି, ମିର୍‌ ଆୟା ଦିନାମ୍‌ତିଙ୍ଗ୍‌ ସଦାପ୍ରବୁଦି ପଣ୍ଡୟ୍‌ ୱାଜା ମାନାନିଦେର୍‌; କାଡ଼ା କାଡ଼ା ଆସ୍‌ସୋ ବିଦି ଇସାବ୍‌ତାନ୍‌ ଇୟା ପଣ୍ତ୍‌ୟ କିନିଦେର୍‌ ।

15 ମିର୍‌ ସାତ୍‌ ଦିନ୍‌ ସାନ୍ଦି ସୟ୍‌ଇ ରୁଟି ତିନିଦେର୍‌; ପାର୍‌ତୁମ୍‌ ଦିନ୍‌ତୁ ନିଜେ ନିଜେଦି ଇନ୍‌ଡ୍ରଣାନ୍‌ ସୟ୍‌ଇକା ଆକୋ କିନିଦେର୍‌, ଇର୍ରିଙ୍ଗା ଆମାକାନ୍‌ ପାର୍‌ତୁମ୍‌ ଦିନ୍‌ଦାନ୍‌ ସାତ୍‌ଦିନ୍‌ ସାନ୍ଦି କମିର୍‌ ସିଲି ରୁଟି ତିନାନ୍‌, ୱାନ୍‌ ଇସ୍ରାଏଲ ଲୋଇରାନ୍‌ ୱେର୍‌ଏ ଆନାନ୍‌ । 16 ମାରି ପାର୍‌ତୁମ୍‌ ଦିନ୍‌ତୁ ମି ପବିତ୍ର ସବା ଆନାତ୍‌, ମାରି ସାତ୍‌ଦିନ୍‌ତୁ ବା ମି ପବିତ୍ର ସବା ଆନାତ୍; ମାରି ରିନେଟିଙ୍ଗ୍‌ ୱିଜୁ ଲୋକ୍‌ କାଦି ୱାର୍‌ନିକା ଡ଼ିସ୍‌ତିଙ୍ଗ୍‌ ମାରି ଇନି ପାଣିବା କିଦେଙ୍ଗ୍‌ ଆଏତ୍‌, କେବଲ ଆୟା ପାଣି ମିର୍‌ କିଦେଙ୍ଗ୍‌ ଆଟ୍‌ନିଦେର୍‌ । 17 ଇୟାୱାଜା ମିର୍‌ ସୟ୍‌ଇ ରୁଟି ପଣ୍ଡୟ୍‌ କିନିଦେର୍‌, ଇର୍ରିଙ୍ଗା ଆୟା ଦିନ୍‌ତୁ ନେ ମାପ୍‌ ମି ଦଲ୍‌ତି ଲୋକାଙ୍ଗ୍‌ ମିସର ଦେସ୍‌ତାନ୍‌ ସପ୍‌ସି ତାନାପ୍‌; ଆଦେଙ୍ଗ୍‌ ମିର୍‌ କାଡ଼ା କାଡ଼ାଦି ବିଦି ଇସାବ୍‌ତାନ୍‌ ଇୟା ଦିନ୍‌ ମାନାନିଦେର୍‌ । 18 ମିର୍‌ ପାର୍‌ତୁମ୍‌ ଲେଜୁଦି ସଉଦ ଦିନ୍‌ଦି ମିଲିମିଲିକା ବେଡ଼ାଦାନ୍‌ କଡ଼େ ଏକ୍‌ ଦିନ୍‌ଦି ମିଲିମିଲିକା ସାନ୍ଦି କମିର୍‌ ସିଲି ରୁଟି ତିନିଦେର୍‌ । 19 ୱାରାମ୍‌ ଲୋଇ ମି ଇଲ୍‌କାଙ୍ଗ୍‌ ସୟ୍‌ନିକା ମିସାତି ଗୁଣ୍ତା ମାନ୍‌ମାକିତ୍‌, ଇର୍ରିଙ୍ଗା ଆଇ ଦେସ୍‌ତିକା ବା ଇୟା ଦେସ୍‌ତିକାର୍‌ ଆମାକାର୍‌ ଇବେନୁ କମିର୍‌ ମିସାତିକା ତିନାର୍‌, ୱାର୍‌ ଇସ୍ରାଏଲ ଲୋକା ମାଣାନ୍‌ ଅଲଗା ଆନାନ୍‌ । 20 ମିର୍‌ କମିର୍‌ ମିସାତିକା ଇନିକାବା ଜିନିସ୍‌ ତିନ୍‌ମାଟ୍‌, ମିର୍‌ ନିଜେ ନିଜେଦି ୱିଜେରେ ଇନ୍‌ଡ୍ର କମିର୍‌ ସିଲି ରୁଟି ତିନିଦେର୍‌ ।

21 ନାସ୍ତିୱାଲେ ମୋଶା ଇସ୍ରାଏଲଦି ୱିଜୁ ପ୍ରାଚିନରିଙ୍ଗ୍‌ କୁକ୍‌ସି ଇର୍ହାନ୍‌, "ମିର୍‌ ନିଜେଦି ଉଣ୍ତିଙ୍ଗ୍‌ ନିଜେ ନିଜେଦି କୁଟୁମ୍‌ଦି ଇସାବ୍‌ଦାନ୍‌ ଉନ୍‌ଡ୍ରି ଉନ୍‌ଡ୍ରି ମେଣ୍ଡାପିଲା ସପ୍‌ସି ଅସି ନିସ୍ତାର୍‌ ପଣ୍ତୟ୍‌ତୁ ପୁଜା ସିଜି କୟ୍‌ଦୁ । 22 ମାରି ଉଣ୍ତ୍ରି ଏସ କମେଙ୍ଗ୍‌ ଅସି ସାଟିଦି ନେତେର୍‌ତୁ ମୁଡ଼ୁକ୍‌ସି ଦୁୱାର୍‌ ବନ୍ଧ ମୁସୁକୁ ମାରି ରୁଣ୍ଡି ବନ୍ଦଙ୍ଗା ମୁସୁକୁ ସାଟିଦି ନେତେର୍‌ ଉସ୍‌ତୁ; ମାରି ସାଲ୍‌ଦି ଆନେଣ୍ଡା ମିର୍‌ ଏନ୍‌ବା ଇଲୁ ଆତ୍ରେ ସୋମାଟ୍‌ । 23 ଏନ୍ଦାଇର୍ରିଙ୍ଗା ସଦାପ୍ରବୁ ମିସ୍ରିୟରିଙ୍ଗ୍‌ ସାପିସ୍‌ କିନି ଉଣ୍ତିଙ୍ଗ୍‌ ୱାରି ଲୋଇରାନ୍‌ ସନାନ୍‌; ଆବେନୁ ଦୁୱାର୍‌ ମୁସୁକୁ ମାରି ରୁଣ୍ଡି ଦୁୱାର୍‌ ବନ୍ଦଙ୍ଗା ମୁସୁକୁ ଆୟା ନେତେର୍‌ ସୁଡ଼ୁତିଙ୍ଗ୍‌, ସଦାପ୍ରବୁ ଆୟା ଦୁୱାର୍‌ ଡ଼ିସ୍‌ସୋ ଆଗ୍‌ଡ଼ି ସୋନାନ୍‌, ମି ଇଲ୍‌କାଙ୍ଗ୍‌ ସାପିସ୍‌ନି ଦୁତ୍‌ତିଙ୍ଗ୍‌ ଡ଼ୁଗ୍‌ଜି ସାପିସ୍‌ କିଦେଙ୍ଗ୍‌ ସିଏନ୍‌ । 24 ମାରି, ମିର୍‌ ମାରି କାଡ଼ା କାଡ଼ା ମି କଡ଼ର୍‌ ଇୟା ନିୟମ୍‌ ଇସାବ୍‌ତାନ୍‌ ରିତିନିତି ମାନାନିଦେର୍‌ । 25 ମାରି ସଦାପ୍ରବୁ ନିଜେଦି ପାର୍‌ମାଣ୍‌ ଇସାବ୍‌ଦାନ୍‌; ମିଙ୍ଗିଁ ଆମା ଦେସ୍‌ ସିନାନ୍‌, ଆବେନୁ ସରିଙ୍ଗାଁ, ଇୟା ରିତିନିତି କିନିଦେର୍‌ । 26 ଇକା ମି କଡ଼ର୍‌ ୱେନ୍‌ବାତିଙ୍ଗା, ମି ଇୟା ରିତିନିତିଦି ମାଟା ଇନିକା ? 27 ମିର୍‌ ଇନିଦେର୍‌, ଇୟାକା ସଦାପ୍ରବୁଦି ଉଣ୍ତିଙ୍ଗ୍‌ ନିସ୍ତାର୍‌ ପଣ୍ତୟ୍‌ଦି ପୁଜା; ଇର୍ରିଙ୍ଗା ମିସ୍ରିୟରିଙ୍ଗ୍‌ ସାପିସ୍‌ କିନି ୱେଡ଼ାଦୁ ୱାନ୍‌ ମିସରଦୁ ବାସାନି ଇସ୍ରାଏଲ ଲୋକା ଇଲ୍‌କାଙ୍ଗ୍‌ ୱିଜୁ ଡ଼ିସ୍‌ସୋ ଆଗ୍‌ଡ଼ି ସଲ୍‌ସି ମା ଇଲ୍‌କୁ ରକିୟା କିତାମାର୍ହାନ୍‌ ।" ନାସ୍ତିୱାଲେ ଲୋକ୍‌ ତାଲା ଆଡ୍‌ଗି ପାଡ଼ିକ୍‌ସି ମାଡ଼ିସ୍‌ କିତାର୍‌ । 28 ଆବେଟ୍‌ ଇସ୍ରାଏଲ ଲୋକ୍‌ ସଲ୍‌ସି ଆୟାୱାଜା କିତାର୍‌; ମାରି ୱାର୍‌ ମୋଶା ମାରି ହାରୋଣଦି ଉଣ୍ତିଙ୍ଗ୍‌ ସଦାପ୍ରବୁଦି ମାଟା ଇସାବ୍‌ଦାନ୍‌ ଆୟାୱାଜା ପାଣି କିତାର୍‌ ।

29 ଇୟାୱେନ୍‌କା ମାଜେର୍‌ ନାଡ଼ା ସଦାପ୍ରବୁ ରାଜାଗାଦିଦି ବାସ୍‌ନି ପାରୋଦି ପାର୍‌ତୁମ୍‌ ଜନମ୍‌ତି କଡ଼ଦି ମାଣାନ୍‌ ଜଇଲ୍‌ଦୁ ମାନି ପାର୍‌ତୁମ୍‌ ଜନମ୍‌ ଆତି କଡ଼ରି ସାନ୍ଦି ମିସର ଦେସ୍‌ତି ୱିଜୁ ପାର୍‌ତୁମ୍‌ ଜନମ୍‌ ଆତି କଡ଼ରିଙ୍ଗ୍‌ ମାରି ପାର୍‌ତୁମ୍‌ ଜନମ୍‌ ଆତି କଡିଗରିଏଙ୍ଗା ସାପିସ୍‌ କିତାତ୍‌ । 30 ଆବେନୁ ଫାରୋ ମାରି ୱାନି ଦାସର୍‌ ମାରି ମିସ୍ରିୟ ଲୋକୁ ୱିଜେରେ ନାଡ଼ା ନିଙ୍ଗିଁତାର୍‌; ମାରି ମିସର ଦେସ୍‌ଦୁ ନାଣ୍ଡ ଆଡ଼ାବାନିକା ଆତାତ୍‌; ଇର୍ରିଙ୍ଗା ଏମେ ଇନ୍‌ଡ୍ର ଏନ୍‌ ସାଏନ୍‌, ଇୟାୱାଜା ଇଲୁ ସିଲେତାତ୍‌ । 31 ଆବେନୁ ନାଡ଼ାନେ ପାରୋ, ମୋସେଙ୍ଗ୍‌ ମାରି ହାରୋଣଙ୍ଗ୍‌ କୁକ୍‌ସି ଇର୍ହାନ୍‌, "ମିର୍‌ ମାରି ଇସ୍ରାଏଲ୍‌ କୁଟୁମ୍‌ ନିଙ୍ଗିଁଜ ମା ଲୋକା ମାଣାନ୍‌ ସତୁ, ମି ମାଟା ଇସାବ୍‌ଦାନ୍‌ ସଦାପ୍ରବୁଦି ସେବା କିଦେଙ୍ଗ୍‌ ସାନ୍‌ଡ୍ରୁ । 32 ମି ମାଟା ଇସାବ୍‌ଦାନ୍‌ କଡିଗରିଏଙ୍ଗ୍‌ ମାନ୍ଧା ୱିଜୁ ଆସ୍‌ସ ସାନ୍‌ଡ଼୍ରୁ ମାରି ମାଙ୍ଗିଁ ବା ଆର୍ସିବାଦ୍‌ କିଦୁ ।"

33 ନାସ୍ତିୱାଲେ ମିସ୍ରିୟର୍‌ ଲୋକାଙ୍ଗ୍‌ ଦାପ୍ରେ ଦେସ୍‌ତାନ୍‌ ପକନି ଉଣ୍ତିଙ୍ଗ୍‌ ତାନ୍ଦ୍ରା ଆତାର୍‌; ମାତର ୱାର୍‌ ଇର୍ହାର୍‌, "ମାଡ୍‌ ୱିଜୁଲୋକ୍‌ ସାତି ୱାଜା ଆତାମାନାପ୍‌ ।" 34 ଆବେନୁ କାଡ଼ାସ୍‌ତି ମଇଦା କମିର୍‌ ମିସାଇ ଆଗ୍‍ଡ଼ିନେ, ଲୋକୁ ଆୟାକା ଅସି ମଇଦା କାଡ଼ାସ୍‌ନି ସାଟି ୱିଜୁ ନିଜେ ନିଜେଦି ୱାତିଗନ୍ଦାଦୁ ମୋଟା ତର୍‌ସି ଅତାର୍‌ । 35 ମାରି ଇସ୍ରାଏଲ ଲୋକୁ ମୋସାଦି ମାଟା ଇସାବ୍‌ଦାନ୍‌ ମିସ୍ରିୟରି ବାଙ୍ଗାରାମ୍‌ ୱେଣ୍ତି ମାରି ୱାତିଗନ୍ଦା ଲସ୍‌ତାର୍‌ । 36 ଆବେନୁ ସଦାପ୍ରବୁ ମିସ୍ରିୟରି ଆଗ୍‌ଡ଼ି ଲୋକାଙ୍ଗ୍‌ ଦୟା କିତିଙ୍ଗ୍‌ ୱାର୍‌ ୱାରିଙ୍ଗ୍‌ ଆମାକା ଲସ୍‌ତାର୍‌, ୱାର୍‌ ଆକା ସିତାର୍‌ । ଇୟାୱାଜା ୱାର୍‌ ମିସ୍ରିୟରି ଦନ୍‌ ଡ଼ିବିସ୍‌ତା ଅତାର୍‌ ।

37 ଇସ୍ରାଏଲ ଲୋକୁ କଡ଼ରିଙ୍ଗ୍‌ ଡ଼ିସ୍‌ସି ସୋ ଲକିୟ ମେମାର୍‌କୁ ବୁଲାଜି ସନ୍‌ଡ୍ରେଙ୍ଗ୍‌ ରାମିସେସ୍‌ତାନ୍‌ ସୁକ୍‌କୋତଦୁ ସର୍ହାର୍‌ । 38 ମାରି ମିସାତି ଲୋକୁ ନାଣ୍ଡ୍‌ ଲକ୍‌ ମାରି କଡିଗରିଏଙ୍ଗ୍‌ ମାନ୍ଧା ନାଣ୍ଡ୍‌ ନାଣ୍ଡ୍‌ ୱାନିକା ୱାଲେ ସର୍ହାର୍‌ । 39 ୱାର୍‌ ମିସରଦାନ୍‌ ତାତି ପିଡ଼ିସ୍‌ତି ମଇଦାଦାନ୍‌ କମିର୍‌ ମିସାଇ ରୁଟି ତିଆର୍‌ କିତାର୍‌; ଇର୍ରିଙ୍ଗା ଆକା କମିର୍‌ ମିସାଏତା ମାର୍ହାତ୍‌; ଏଣ୍ତେସ୍‌କି ୱାର୍‌ ମିସରଦାନ୍‌ ପେରାୟ୍‌ ଆତା ମାର୍ହାର୍‌, ଇୟାଉଣ୍ଡିଙ୍ଗ୍‌ ୱେଡ଼ା କିଏଜି ନିଜେଦି ଉଣ୍ତିଙ୍ଗ୍‌ କାଦି ତିୟାର୍‌ କିଦେଙ୍ଗ୍‌ ଆଟ୍‌ଏତାର୍‌ । 40 ଇସ୍ରାଏଲ କୁଟୁମ୍‌ ସାରସ ତିରିସ୍ ବାର୍ସୁ ମିସର ଦେସ୍‍ଦୁ ବାସା କିତା ମାର୍ହାର୍‌ । 41 ଆୟା ସାରସ ତିରିସ୍ ବାର୍ସୁ ସାରାସାରିଦୁ ଆୟା ଦିନ୍‌ତୁ ସଦାପ୍ରବୁଦି ସନ୍ୟର୍‌ ମିସରଦାନ୍‌ ସତାର୍‌ । 42 ମିସର ଦେସ୍‌ଦାନ୍‌ ୱାର୍‌ ସତି ଉଣ୍ତିଙ୍ଗ୍‌ ଆକା ସଦାପ୍ରବୁଦି ଉଦେସ୍‌ତାନ୍‌ ନାଣ୍ଡ୍‌ ଏତ୍‌ କିନି ନାଡ଼ା ; ଆକା ସଦାପ୍ରବୁଦି ନାଡ଼ା ଇଜି ଇସ୍ରାଏଲ ଲୋକାଦି କାଡ଼ା କାଡ଼ାଦି ଏତ୍‌ କିନିକା ।

43 ମାରି ସଦାପ୍ରବୁ ମୋସେଙ୍ଗ୍‌ ମାରି ହାରୋଣଙ୍ଗ୍‌ ଇର୍ହାନ୍‌, ନିସ୍ତାର ପଣ୍ତୟ୍‌ଦି ଇୟା ନିୟମ୍‌; ଏମେ ଆଇଦେସ୍‌ତି ଲୋକ୍‌ ଆକା ଉଣ୍ତେଙ୍ଗ୍‌ ଆଏତ୍‌ । 44 ମାତର ଡାବୁଦାନ୍‌ କଟି ୱିଜୁ ଲୋକାରି ଦାସ୍‌ ସୁନ୍ନତ ଆତିଙ୍ଗାଁ ଉଣ୍ଡେଙ୍ଗ୍‌ ଆଟ୍‌ନାର୍‌; 45 ଏମେ ଆଇ ଦେସ୍‌ତିକାନ୍‌ ବା ବେତନ୍‌ଜିବି ଦାସ୍‌ ଆକା ତିନ୍‌ଣ୍ଡ୍ରେଙ୍ଗ୍‌ ଆଟ୍‌ଏନ୍‌ । 46 ଉନ୍‌ଡ୍ରି ଇନ୍‌ଣ୍ଡ୍ର ଆକା ତିନାର୍‌; ମିର୍‌ ଆୟା କାଣ୍ଡା କାଣ୍ଡେକ୍‌ ବା ଇନ୍‌ଡ୍ରଣାନ୍‌ ଆତ୍ରେ ଅମାଟ୍‌; ଇର୍ରିଙ୍ଗ୍‌ବା ତାନି ଉନ୍‌ଡ୍ରି ପେଡ଼େନ୍‌ବା ରୁକୁମାଟ୍‌ । 47 ଇସ୍ରାଏଲଦି ଲୋକ୍‌ ୱିଜୁ ଆକା ମାନାନାର୍‌ । 48 ମାରି ମିୱାଲେ ଆଇ ଦେସ୍‌ତି ଲୋକ୍‌ବା ଏସେଙ୍ଗ୍‌ ସଦାପ୍ରବୁଦି ନିସ୍ତାର ପଣ୍ତୟ୍‌ କିଦେଙ୍ଗ୍‌ ବଦା କିଜିନାନ୍‌, ଇର୍ରିଙ୍ଗା ୱାନି ପରିବାର୍‌ ୱିଜୁ ମେମାର୍‌କୁ ସୁନ୍ନତ ଆପିରି, ମାତର୍‌, ଆୟାୱେନ୍‌କା ୱାନ୍‌ ଲାକ୍‌ତୁ ୱାଜି ପଣ୍ଡୟ୍‌ କିପିନ୍‌; ଆବେଣାନ୍‌ ୱାନ୍‌ ଦେସ୍‌ତି ଲୋକ୍‌ ୱାଜା ଆନାନ୍‌; ମାତର ଏମେ ଅସୁନ୍ନତ୍‌ ଲୋକ୍‌ ଆକା ତିନ୍‌ଣ୍ଡ୍ରେଙ୍ଗ୍‌ ଆଟ୍‌ଏନ୍‌ । 49 ମାରି ଦେସ୍‌ତି ଲୋକ୍‌ ମାରି ମି ଲାକ୍‌ତୁ ବାସାକିତି ଆଇ ଲୋକା ଉଣ୍ତିଙ୍ଗ୍‌ ଉନ୍‌ଡ୍ରେ ବିଦି ଆନାତ୍‌ । 50 ଆବେଟ୍‌ ଇସ୍ରାଏଲ୍‌ ଲୋକୁ ୱିଜେରେ ଇୟାୱାଜା କିତାର୍‌; ମୋଶା ମାରି ହାରୋଣ ଉଣ୍ତିଙ୍ଗ୍‌ ସଦାପ୍ରବୁଦି ମାଟା ଆମାୱାଜା ମାର୍ହାତ୍‌, ଆୟାୱାଜା ୱାର୍‌ କିତାର୍‌ । 51 ଇୟାୱାଜା ସଦାପ୍ରବୁ ଆୟା ଦିନ୍‌ତୁ ନାଣ୍ଡ୍‌ ଇସ୍ରାଏଲ୍‌ ଲୋକାଙ୍ଗ୍‌ ମିସର ଦେସ୍‌ଦାନ୍‌ ସପ୍‌ସି ତାତାନ୍‌ ।