ଯାତ୍ରା ବଇ 26

ମାପୁରୁଦି ବାସାନି ଗୁଡ଼ା

1 ମାରି ମିର୍‌ ସାକର୍‌ ଗୋଟା ପାର୍‌ଦା ଦାନ୍‌ ଗୁଡ଼ା ତିଆର୍‌ କିନିଦେର୍‌; ଆୟା ୱିଜୁ ପାର୍‌ଦା ଅଡ଼ିନିକା ମାରି ନିଡ଼ିଦିକା, ସେର୍‌ଗା ରଙ୍ଗ୍‌ ମାରି ଏରାନି ରଙ୍ଗ୍‌ ନାନି ନୁଲୁ ଦାନ୍‌ ତିଆର୍‌ ଆନାତ୍‌, ଆବେନୁ ତିଆର୍‌ କିତି କିରୁବରି ପଟୁ ମାନ୍‌ଜିନାତ୍‌ । 2 ଆୟା ୱିଜୁ ପାର୍‌ଦା କୋଡ଼େ ଆଟ୍‌ କିୟୁ ନିରିକା ମାରି ନାଲ୍‌ଗି କିୟୁ ଅସାର୍‌, ୱିଜୁ ପାର୍‌ଦା ଉନ୍‌ଡ୍ରେ ସମାନ୍‌ ଆନାତ୍‌ । 3 ମାରି, ଉନ୍‌ଡ୍ରେ ପାସ୍‌ ଗୋଟା ପାର୍‌ଦା ଉନ୍‌ଡ୍ରେ ୱାଜା କୁଡ଼ୁଜି ମାନ୍‌ଜିନାତ୍‌, ମାରି ଆଇ ପାସ୍‌ ଗୋଟା ପାର୍‌ଦା ଉନ୍‌ଡ୍ରେ ୱାଜା କୁଡ଼ୁଜି ମାନ୍‌ଜିନାତ୍‌ । 4 ମାରି ଜଡ଼ିସ୍‌ନି ବାଡିଦୁ ଆଗ୍‌ଡ଼ି ୱିଜିତି ବାଗ୍‌ତୁ ପାର୍‌ଦାଦି ନାସୁଦୁ ନିଡ଼ି ନୁଲୁଦି ଗାଟି କିନିଦେର୍‌ ମାରି ଜଡ଼ିସ୍‌ନି ବାଡିଦୁ ମାରିଉଣ୍ଡ୍ରି ଆଇ ପାର୍‌ଦାଦି ନାସୁଦୁ ଆୟାୱାଜା କିନିଦେର୍‌ । 5 ଇର୍ରିଙ୍ଗା, ପାର୍‌ତୁମ୍‌ ପାର୍‌ଦାଦି ନାସୁଦୁ ପଚାସ୍‌ ଗୋଟା ଉରିଗାଟି କିନିଦେର୍‌ ମାରି ଜଡ଼ିସ୍‌ନି ମାରି ଉନ୍‌ଡ୍ରି ପାର୍‌ଦାଦି ନାସୁଦୁ ପଚାସ୍‌ ଗୋଟା ଉରିଗାଟି କିନିଦେର୍‌; ଆୟା ରୁଣ୍ଡି ନାସ୍‌କାଣି ଗାଟିଙ୍ଗ୍‌ ଉନ୍‌ଡ୍ରେ ତରିନ୍‌ ମାନ୍‌ଜିନାତ୍‌ । 6 ମାରି, ପଚାସ୍‌ ଗୋଟା ବାଙ୍ଗାରାମ୍‌ ଆକଡ଼ି କିଜି ଆକଡ଼ିଦୁ ପାର୍‌ଦା ୱିଜୁବାନୁ ଜୋଡ଼ିସ୍‌ନିଦେର୍‌; ଆବେଟ୍‌ ଉନ୍‌ଡ୍ରି ଗୁଡ଼ା ଆନାତ୍‌ । 7 ମାରି ଆୟା ଇଲୁ ମୁସୁକୁ ପିଡ଼ିକ୍‌ତେଙ୍ଗ୍‌ ଗୁଡ଼ା ଉଣ୍ତିଙ୍ଗ୍‌ ଗରିୟା ତଲ୍‌ଦି ଏଗାର୍‌ ଗୋଟା ପାର୍‌ଦା ତିଆର୍‌ କିନିଦେର୍‌ । 8 ଆୟା ୱିଜୁ ପାର୍‌ଦାଦି ନିରିକା ତିରିସ୍‌ କିୟୁ ମାରି ଅସାର୍‌ ନାଲ୍‌ଗି କିୟୁ; ଇୟା ଏଗାର୍‌ ଗୋଟା ପାର୍‌ଦାଦି ଉନ୍‌ଡ୍ରେ ସମାନ୍‌ ଆନାତ୍‌ । 9 ଇୟାୱେନ୍‌କା ପାସ୍‌ ଗୋଟା ପାର୍‌ଦା ଉନ୍‌ଡ୍ରେ ୱାଜା ଜଡ଼ିସ୍‌ ଅଲଗା ଇଡ୍‌ନିଦେର୍‌ ମାରି ଆଇ ସୋ ଗୋଟା ପାର୍‌ଦା ଅଲଗା ଇଡ୍‌ନିଦେର୍‌, ମାରି, ୱେନିକା ଲୋଇ ସୋ ଗୋଟା ପାର୍‌ଦା ବେଡ଼େକ୍‌ସି ଗୁଡ଼ା ଆଗ୍‌ଡ଼ି ଇଡ୍‌ନିଦେର୍‌ । 10 ମାରି ଜଡ଼ିସ୍‌ନି ବାଡିଦୁ ପାର୍‌ତୁମ୍‌ ସେସ୍‌ ପାର୍‌ଦାଦି ନାସୁଦୁ ପଚାସ୍‌ ଗାଟିଙ୍ଗ୍‌ କିନିଦେର୍‌ ମାରି ମାରିଉଣ୍ଡ୍ରି ପାର୍‌ଦାଦି ଜଡ଼ିସ୍‌ନି ନାସୁଦୁ ପଚାସ୍‌ ଗୋଟା ଉରି ଗାଟିଙ୍ଗ୍‌ କିନିଦେର୍‌ । 11 ମାରି ପିତଲ୍‌ଦି ପସାସ୍‌ ଗୋଟା ଆକଡ଼ି କିଜି ଆୟା ଉରି ଗାଟିଙ୍ଗା ଡ଼ୁଗିସ୍‌ କିଜି ଗୁଡ଼ା ଜଡ଼ିସ୍‌କିନିଦେର୍‌; ଆବେନୁ ଆକା ଉନ୍‌ଡ୍ରି ଗୁଡ଼ା ଆନାତ୍‌ । 12 ଆୟା ଗୁଡ଼ାଦି ପାର୍‌ଦା ଉନ୍‌ଡ୍ରି ତରଟ୍‌, ଇର୍ରିଙ୍ଗ୍‌, ଆମାକା ଅଦା ପାର୍‌ଦା ମାନ୍‌ଜିନାତ୍‌, ଆକା ଇଲୁଦି ୱେନ୍‌କା ତରିନ୍‌ ଲେଡ଼େନା ମାନ୍‌ଜିନାତ୍‌ । 13 ମାରି ଗୁଡ଼ା ପାର୍‌ଦାଦି ତେବାତି ଆମା ନିର୍‌ଇ ବାଗ୍‌ ଇୟା ପାଡ଼୍‌କା ଉନ୍‌ଡ୍ରି କିୟୁ ମାରି ଆୟା ପାଡ଼୍‌କା ଉନ୍‌ଡ୍ରି କିୟୁ ନାଣ୍ଡ ମାନ୍‌ଜିନାତ୍‌, ଆକା ଇଲୁଦି ଇୟା ପାଡ଼୍‌କା ଆୟା ପାଡ଼୍‌କା ପିଡ଼ିକ୍‌ନି ଉଣ୍ତିଙ୍ଗ୍‌ ଲେଡ଼େନା ତେବାନାତ୍‌ ।

14 ଇୟାୱେନ୍‌କା ମିର୍‌ ନେତେର୍‌ ରଙ୍ଗ୍‌ ଆତି ମେଣ୍ଡା ତଲୁଦାନ୍‌ ଗୁଡ଼ାଦି ଉନ୍‌ଡ୍ରି ତରିନ୍‌ ପିଡ଼ିକ୍‌ନିଦେର୍‌, ମାରି ଆୟା ମୁସୁକୁ କଡ଼୍‌କି ତଲୁଦାନ୍‌ ଉଣ୍ଡ୍ରି‍ ପିଡ଼୍‌ନିକା କିନିଦେର୍‌ ।

15 ଇୟାୱେନ୍‌କା ମିର୍‌ ଇଲୁ ଉଣ୍ତିଙ୍ଗ୍‌ ଆକିସିଆ ମାରାନ୍‌ତାନ୍‌ ନିଲ୍‌ବା ପାଟା ତିଆର୍‌ କିନିଦେର୍‌ । 16 ଉନ୍‌ଡ୍ରି ଉନ୍‌ଡ୍ରି ପାଟା ଦାସ୍‌ ଗୋଟା ମୁରେଙ୍ଗ୍‌ ନିରିକା ମାରି ଉଣ୍ତ୍ରେମୁରା ଆଦା ଅସାର୍‌ ଆନାତ୍‌ । 17 ଆବେନୁ ପାଟା ଜଡ଼ିସ୍‌ତେଙ୍ଗ୍‌ ରୁଣ୍ଡି ପାଦ୍‌ କିନିଦେର୍‌; ଇୟା ୱାଜା ଗୁଡ଼ାଦି ୱିଜୁ ପାଟା ଉଣ୍ତିଙ୍ଗ୍‌ ତିଆର୍‌ କିନିଦେର୍‌ । 18 ମାରି ଗୁଡ଼ା ଉଣ୍ତିଙ୍ଗ୍‌ ଆମା ୱିଜୁ ପାଟା କିନିଦେର୍‌, ଆୟା ୱିଜୁଦି ମାଣାନ୍‌ ଉଣେରି ତରିନ୍‌ ଉଣେରି ପାଡ଼ାକାଦି ଉଣ୍ତିଙ୍ଗ୍‌ କୋଡ଼େ ଗୋଟା ପାଟା । 19 ମାରି, ଆୟା କୋଡ଼େ ଗୋଟା ପାଟା ଆଡ୍‌ଗି ସାଲିସ୍‌ ଗୋଟା ୱେଣ୍ତିଦି ବର୍‌ ପତ୍‌ତି ଆଡ୍‌ଗିରି ବନ୍ଦ୍‌ କିନିଦେର୍‌; ଉନ୍‌ଡ୍ରେ ପାଟା ଆଡ୍‌ଗି ଆବେଣି ରୁଣ୍ଡି ପାଦାମ୍‌ ଉଣ୍ତିଙ୍ଗ୍‌ ରୁଣ୍ତି ବର୍‌ ପତ୍‌ତି ଆଡ୍‌ଗିରି ବନ୍ଦ୍‌ ମାରି ଆଇଆଇ ପାଟା ଆଡ୍‌ଗି ବା ୱାନିକା ରୁଣ୍ଡି ରୁଣ୍ଡି ପାଦ୍‌ ଉଣ୍ତିଙ୍ଗ୍‌ ରୁଣ୍ଡି ବର୍‌ ପତ୍‌ତି ଆଡ୍‌ଗିରି ବନ୍ଦ୍‌ ଆନେ । 20 ମାରି, ଗୁଡ଼ାଦି ଆଇ ତରଟି ଉଣ୍ତିଙ୍ଗ୍‌ ଡେବିରି ତରିନ୍‌ କୋଡ଼େ ଗୋଟା ପାଟା ଆନେ । 21 ଉନ୍‌ଡ୍ରେ ପାଟା ଆଡ୍‌ଗି ରୁଣ୍ଡି ବର୍‌ ପତ୍‌ତି ଆଡ୍‌ଗିରି ବନ୍ଦ୍‌ ମାରି ଆଇ ପାଟେଙ୍ଗା ଆଡ୍‌ଗି ରୁଣ୍ଡି ରୁଣ୍ଡି ବର୍‌ ପତ୍‌ତି ଆଡ୍‌ଗିରି ବନ୍ଦ୍‌; ଇୟାୱାଜା ୱେଣ୍ତିଦି ସାଲିସ୍‌ ଗୋଟା ବର୍‌ ପତ୍‌ତି ଆଡ୍‌ଗିରି ବନ୍ଦ୍‌ ଆନାତ୍‌ । 22 ଗୁଡ଼ାଦି ୱେଡ଼ା ଆର୍‌ନି ତରଟି ଉଣ୍ତିଙ୍ଗ୍‌ ସଅ ଗୋଟା ପାଟେଙ୍ଗ୍‌ ଆନେ । 23 ମାରି, ଗୁଡ଼ାଦି ଆୟା ୱେନ୍‌କା ତରଟି ରୁଣ୍ଡି କୋନାଦୁ ରୁଣ୍ଡି ପାଟେଙ୍ଗ୍‌ ସିନିଦେର୍‌ । 24 ଇୟା କୋନାଦୁ ମାନି ପାଟେଙ୍ଗ୍‌ ମିସାଜି ମୁସୁକୁ ସାନ୍ଦି ମିସାନା ମାନ୍‌ଜିନାତ୍‌, ରୁଣ୍ଡି କୋନାଦୁ ମାନ୍‌ଜିନି ରୁଣ୍ଡି ପାଟେଙ୍ଗ୍‌ ଇୟାୱାଜା ତିଆର୍‌ ଆନେ । 25 ଆବେଟ୍‌ ଆବେଣି ପାଟା ଆଟ୍‌ ଗୋଟା ଆନେ ମାରି ଆବେଣି ସଉଲ ଗୋଟା ୱେଣ୍ତିଦି ବନ୍ଦ୍‌ ଆନାତ୍‌; ଉନ୍‌ଡ୍ରେ ପାଟା ଆଡ୍‌ଗି ରୁଣ୍ଡି ବନ୍ଦ୍‌ ମାରି ଆଇ ପାଟା ଆଡ୍‌ଗି ରୁଣ୍ଡି ବନ୍ଦ୍‌ ଆନେ ।

26 ମାରି ମିର୍‌ ଆକିସିଆ ମାରାନ୍‌ତାନ୍‌ ଗାଡ଼ା ତିଆର୍‌ କିନିଦେର୍‌; ଗୁଡ଼ାଦି ଉନ୍‌ଡ୍ରି ତରଟି ପାଟାଦୁ ପାସ୍‌ ଗୋଟା ଗାଡ଼େଙ୍ଗ୍‌ ମାରି ଆଇ ତରିଟି ପାଟାଦୁ ପାସ୍‌ ଗୋଟା ଗାଡ଼େଙ୍ଗ୍‌ 27 ମାରି ଗୁଡ଼ାଦି ୱେଡ଼ା ଆର୍‌ନି ତରିଟି ପାଟାଦୁ ପାସ୍‌ ଗୋଟା ଗାଡ଼େଙ୍ଗ୍‌ ଆନେ । 28 ମାରି, ନାଣିମିରି ଗାଡ଼ା ପାଟାଦି ନାଣିମିରାନ୍‌ ଇୟା ତାଲାଦାନ୍‌ ଆୟା ତାଲା ସାନ୍ଦି ଇନାତ୍‌ । 29 ମାରି ଆୟା ୱିଜୁ ପାଟା ବାଙ୍ଗାରାମ୍‌ଦାନ୍‌ ଡାଲାୟ୍‌ କିନିଦେର୍‌ ମାରି ଗାଡ଼ାଦି ଉଣ୍ତିଙ୍ଗ୍‌ ବାଙ୍ଗାରାମ୍‌ ବରୋ କିନିଦେର୍‌, ମାରି ଆସ୍‌ପିସ୍‌ କିନି ଗାଡ଼େଙ୍ଗ୍‌ ୱିଜୁ ବାଙ୍ଗାରାମ୍‌ଦାନ୍‌ ଡାଲାୟ୍‌ କିନିଦେର୍‌ । 30 ଇୟାୱାଜା ଗୁଡ଼ାଦି ଆମା ଏମେ ମାଟା ଗରନ୍‌ତୁ ନିଙ୍ଗିଁ ନାନୁ ୱେର୍‌ତାମାନା; ଆୟା ଇସାବ୍‌ଦାନ୍‌ ଆକା ତିଆର୍‌ କିନି ।

31 ମାରି ମିର୍‌ ନିଡ଼ି ରଙ୍ଗ୍‌, ସେର୍‌ଗା ରଙ୍ଗ୍‌ ମାରି ଏରାନି ରଙ୍ଗ୍‌ ମାରି ତେର୍‌ବିତି ଅଡ଼ିନି ନୁଲୁ ଦାନ୍‌ ଉନ୍‌ଡ୍ରି ୱେରେଏ କିନି ୱାତି ତିଆର୍‌ କିନିଦେର୍‌; ଆକା ତିଆର୍‌ କିନିକାର୍‌ ପାଣିଦୁ କିରୁବରି ପଟ୍‌ ୱାଜା କିନାର୍‌ । 32 ମିର୍‌ ଆକା ବାଙ୍ଗାରାମ୍‌ଦାନ୍‌ ଡାଲାୟ୍‌ କିଜି ଆକିସିଆ ମାରାନ୍‌ଦି ନାଲ୍‌ଗି ମୁଣ୍ଡେଙ୍ଗା ମୁସୁକୁ ଡ଼ନିଦେର୍‌; ମାରି, ୱେଣ୍ତିଦି ନାଲ୍‌ଗି ବନ୍ଦ୍‌ ମୁସୁକୁ ୱାନିକା ବାଙ୍ଗାରାମ୍‌ତି ଆକଡ଼ି ୱିଜୁ ବାସାକିନିଦେର୍‌ । 33 ମାରି ଆକଡ଼ି ୱିଜୁଦି ଆଡ୍‌ଗି ୱେରେଏ କିନି ୱାତି ଡ଼ସି ଆୟା ୱେରେଏ କିନି ୱାତି ଲୋଇ ନିୟମ୍‌ ପେଡ଼ା ତାନିଦେର୍‌; ଆବେନୁ ଆୟା ୱେରେଏ କିନି ୱାତି ପବିତ୍ର ବାଡି ମାରି ନାଣ୍ଡ ପବିତ୍ର ବାଡି ଲୋଇ ୱେରେଏ ଆନାତ୍‌ । 34 ମାରି ମିର୍‌ ପେରି ପବିତ୍ର ବାଡିଦୁ ନିୟମ୍‌ ପେଡ଼ା ମୁସୁକୁ ଡାବ୍‌ଣା ଇଡ୍‌ନିଦେର୍‌ । 35 ଏର୍‌ପ୍‌ନି ୱାତିଦି ଆତ୍ରେ ଟେବୁଲ୍‌ ଇଡ୍‌ନିଦେର୍‌ ମାରି ଟେବୁଲ୍‌ ଆଗ୍‌ଡ଼ି ଗୁଡ଼ାଦି ଉଣେରି ତରିନ୍‌ ଦିୱା ମୁଣ୍ତା ଇଡ୍‌ନିଦେର୍‌ ମାରି ଡେବିରି ତରିନ୍‌ ଟେବୁଲ୍‌ ଇଡ୍‌ନିଦେର୍‌ ।

36 ମାରି, ଗୁଡ଼ାଦି ସେର୍‌ଲା ଉଣ୍ତିଙ୍ଗ୍‌ ନିଡ଼ି ରଙ୍ଗ୍‌ ମାରି ସେର୍‌ଗା ରଙ୍ଗ୍‌ ଏରାନି ରଙ୍ଗ୍‌ ମାରି ଅଡ଼ିନିକା ନୁଲୁଦାନ୍‌ ତିଆର୍‌ ଆତି କାବ୍‌ରା ସିତ୍ରାଦି ଉନ୍‌ଡ୍ରି ପିଡ଼ିକ୍‌ନି ୱାତି ତିଆର୍‌ କିନିଦେର୍‌ । 37 ଆୟା ପିଡ଼ିକ୍‌ନି ୱାତି ଉଣ୍ତିଙ୍ଗ୍‌ ପାସ୍‌ ଗୋଟା ଆକିସିଆ ମାରାନ୍‌ଦି ମୁଣ୍ଡେଙ୍ଗ୍‌ ତିଆର୍‌ କିଜି ବାଙ୍ଗାରାମ୍‌ଦାନ୍‌ ଡାଲାୟ୍‌ କିନିଦେର୍‌, ମାରି ବାଙ୍ଗାରାମ୍‌ଦାନ୍‌ ଆବେଣି ଆକଡ଼ି କିନିଦେର୍‌ ମାରି ଆୟା ଉଣ୍ତିଙ୍ଗ୍‌ ପିତଲ୍‌ଦି ପାସ୍‌ ଗୋଟା ବନ୍ଦ୍‌କୁ ଇଡ୍‌ନିଦେର୍‌ ।