ଯାତ୍ରା ବଇ 40

ଗୁଡ଼ା କିନିକା ମାରି ସର୍ପେ କିନିକା

1 ଇୟାୱେନ୍‌କା ପ୍ରବୁ ମୋସେଙ୍ଗ୍‌ ଇର୍ହାନ୍‌, 2 "ନିନୁ ପାର୍‌ତୁମ୍‌ ଲେଜୁଦି ପାର୍‌ତୁମ୍‌ ଦିନ୍‌ତୁ ମିସାଜିସାନି ଗୁଡ଼ା ତିୟାର୍‌ କିନି ।" 3 ମାରି, ଆୟା ଲୋଇ ନିୟମ୍‌ ପେଡ଼ା ଇଡ୍‌ଜି ନାଡ଼୍‌ମିରି ୱାତି ଡ଼ସି ଆୟା ପେଡ଼ା ପିଡ଼ିକ୍‌ନି । 4 ଇୟାୱେନ୍‌କା ଟେବୁଲ୍‌ ଲୋଇ ତାସି ଆୟା ମୁସୁକୁରି ଜିନିସ୍‌ ଇସାବ୍‌ଦାନ୍‌ ଇଡ୍‌ନି; ମାରି ଦିୱା ଇଡ୍‌ନିକା ଲୋଇ ତାସି ଆବେଣି ଦିୱେଙ୍ଗ୍‌ ୱିଜୁ କାସିସ୍‌କିନି । 5 ନିୟମ୍‌ ପେଡ଼ା ଆଗ୍‌ଡ଼ି ବାଙ୍ଗାରାମ୍‌ତି ଦୁପ୍‌ଣିବେଦି ଇଡ୍‌ନି, ମାରି, ଗୁଡ଼ାଦି ସେର୍‌ଲାଦୁ ପିଡ଼ିକ୍‌ନି ପାର୍‌ଦା ଡ଼ନି । 6 ମାରି ମିସାଜିସାନି ଗୁଡ଼ାଦି ଦୁୱାର୍‌ ଆଗ୍‌ଡ଼ି ହୋମ୍‌ ଆଡ଼ିକ୍‌ନି ବେଦି ଇଡ୍‌ନି । 7 ମିସାଜିସାନି ଗୁଡ଼ା ମାରି ବେଦି ଲାକ୍‌ତୁ ଏର୍‌ ନର୍‌ବାନି କୁଣ୍ତ୍‌ ଇଡ୍‌ଜି ଆବେନୁ ଏରୁ ଇଡ୍‌ନି । 8 ମାରି, ସାରିବେଡ଼୍‌ତି ଦୁଆର୍‌ ତିଆର୍‌ କିନି ମାରି ଦୁଆର୍‌ ସେର୍‌ଲାଦୁ ପିଡ଼ିକ୍‌ନି ପାର୍‌ଦା ଡ଼ନି ।

9 ଇୟାୱେନ୍‌କା ଅବିସେକ୍‌କିତି ନିୟୁ ଅସି ଗୁଡ଼ା ମାରି ଆବେଣି ୱିଜୁ ଜିନିସ୍‌ ଅବିସେକ୍‌ କିଜି ଆକା ମାରି ଆବେଣି ୱିଜୁ ସାଟିଙ୍ଗ୍‌ ପବିତ୍ର କିନି; ଆବେଟ୍‌ ଆକା ପବିତ୍ର ଆନାତ୍‌ । 10 ମାରି, ନିନୁ ହୋମବେଦି ମାରି ଆବେଣି ୱିଜୁ ସାଟିଙ୍ଗ୍‌ ଅବିସେକ୍‌ କିଜି ପବିତ୍ର କିନି; ଆବେନୁ ଆୟା ବେଦି ମହା ପବିତ୍ର ଆନାତ୍‌ । 11 ମାରି ନିନୁ ନର୍‌ବାନି କୁଣ୍ତ୍‌ ମାରି ଆବେଣି ଗୁଦୁରି ଅବିସେକ୍‌ କିଜି ପବିତ୍ର କିନି ।

12 "ଇୟାୱେନ୍‌କା ନିନୁ ହାରୋଣତିଙ୍ଗ୍‌ ମାରି ୱାନି ମାରିସିରିଙ୍ଗ୍‌ ମିସାଜିସାନି ଗୁଡ଼ାଦି ସେର୍‌ଲା ଲାକ୍‌ତୁ ତାସି ଏରୁଦାନ୍‌ ଇବିସ୍‌ କିନି । 13 ମାରି, ନା ଉଦେସ୍‌ତାନ୍‌ ଜାଜକ ପାଣି କିନି ଉଣ୍ତିଙ୍ଗ୍‌ ହାରୋଣଙ୍ଗ୍‌ ପବିତ୍ର ଆଙ୍ଗିଁ ଆରିସ୍‌ କିଜି ଅବିସେକ୍‌ କିଜି ସେବା କିନାନ୍‌ । 14 ମାରି ୱାନି ମାରିସିରିଙ୍ଗ୍‌ ତାସି ଆଙ୍ଗିଁ ଆରିସ୍‌ନିଦେର୍‌ । 15 ମାରି, ୱାରି ବୁବେଙ୍ଗ୍‌ ଏଣ୍ଡେସ୍‌ ଅବିସେକ୍‌ କିତିଦେର୍‌, ଆୟା ୱାଜା ୱାରିଙ୍ଗ୍ ଅବିସେକ୍‌ କିନିଦେର୍‌, ଆବେଟ୍‌ ୱାର୍‌ ନା ଜାଜକ ପାଣି କିନାର୍‌; ଆୟା ଅବିସେକ୍‌ ୱାରି ଜୁଗୁ ଜୁଗୁଦି ଜାଜକଦି ମୁଲ୍‌ ଆନାତ୍‌ ।"

16 ମୋଶା ଇୟାୱାଜା କିତାନ୍‌; ୱାନ୍‌ ପ୍ରବୁଦି ମାଟା ଇସାବ୍‌ଦାନ୍‌ ୱିଜୁ କିତାନ୍‌ । 17 ଇୟାୱେନ୍‌କା ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ୱେନ୍‌କାରି ବାର୍ସେକ୍‌ଦି ପାର୍‌ତୁମ୍‌ ଲେଜୁଦି ପାର୍‌ତୁମ୍‌ ଦିନ୍‌ତୁ ମିସର ଡ଼ିସ୍‌ତି ୱେନ୍‌କା ମିସାଜିସାନି ଗୁଡ଼ା ତିଆର୍‌ ଆତାତ୍‌ । 18 ମାରି, ମୋଶା ମିସାଜିସାନି ଗୁଡ଼ା ନିଲ୍‌ପ୍‌ସି ଆବେଣି ବନ୍ଦ୍‌କୁ ସିଜି ପାଟା ବାସା କିଜି ଗାଡ଼ା ନିର୍‌ସି ଆବେଣି ମୁଣ୍ଡେଙ୍ଗ୍‌ ନିଲ୍‌ପ୍‌ତାନ୍‌ । 19 ଆଦେଙ୍ଗ୍‌ ୱାନ୍‌ ମିସାଜିସାନି ଗୁଡ଼ା ମୁସୁକୁ ପାର୍‌ଦା ସାର୍‌ପ୍‌ତାନ୍‌ ମାରି ଗୁଡ଼ା ମୁସୁକୁ ୱିତାନ୍‌; 20 ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ୱାନ୍‌ ନିୟମ୍‌ ଆକୁ ଅସି ପେଡ଼ା ଲୋଇ ଇଟ୍‌ତାନ୍‌ ମାରି ପେଡ଼ାଦୁ କଣା ଗୁତ୍‌ସି ପେଡ଼ା ମୁସୁକୁ ପାପ୍‌ତିଙ୍ଗ୍‌ ପିଡ଼ିକ୍‌ନି ଡାବ୍‌ଣା ଇଟ୍‌ତାନ୍‌; 21 ମାରି ମିସାଜିସାନି ଗୁଡ଼ା ଲୋଇ ପେଡ଼ା ତାତାନ୍‌ ମାରି ପିଡ଼ିକ୍‌ନି ନାଡ଼୍‌ମିରି ୱାତି ଡ଼ସି ନିୟମ୍‌ ପେଡ଼ା ପିଡ଼ିକ୍‌ତାନ୍‌ ।

22 ଇୟାୱେନ୍‌କା ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ୱାନ୍‌ ମିସାଜିସାନି ଗୁଡ଼ାଦି ଡେବ୍‌ରା ତରନ୍‌ ୱେରେଏ କିନି ୱାତିଦି ଆତ୍ରେ ମିସାଜିସାନି ଗୁଡ଼ାଦୁ ଟେବୁଲ୍‌ ଇଟ୍‌ତାନ୍‌; 23 ମାରି, ୱାନ୍‌ ପ୍ରବୁଦି ଆଗ୍‌ଡ଼ି ରିତିଦାନ୍‌ ଆୟା ମୁସୁକୁ ରୁଟି ଇଟ୍‌ତାନ୍‌ । 24 ଇୟାୱେନ୍‌କା ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ଟେବୁଲ୍‌ ଆଗ୍‌ଡ଼ି ଗୁଡ଼ାଦି ଉଣେର୍‌ ତରନ୍‌ ମିସାଜିସାନି ଗୁଡ଼ାଦୁ ଦିୱା ମୁଣ୍ତା ଇଟ୍‌ତାନ୍‌ 25 ମାରି ପ୍ରବୁଦି ଆଗ୍‌ଡ଼ି ଦିୱା କାସିସ୍‌କିତାନ୍‌ । 26 ମାରି ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ଆୟା ମିସାଜିସାନି ଗୁଡ଼ାଦୁ ନାଡ଼୍‌ମିରି ୱାତି ଆଗ୍‌ଡ଼ି ବାଙ୍ଗାରାମ୍‌ ବେଦି ଇଟ୍‌ତାନ୍‌ 27 ମାରି ଆୟା ମୁସୁକୁ ବାସ୍‌ନାଦି ଦୁପ୍‌ଣି ଆଡ଼ାକ୍‌ତାନ୍‌ । 28 ମାରି, ୱାନ୍‌ ଗୁଡ଼ାଦି ସେର୍‌ଲାଦୁ ପିଡ଼ିକ୍‌ନି ୱାତି ଡ଼ତାନ୍‌ 29 ମାରି ମିସାଜିସାନି ଗୁଡ଼ାଦି ସେର୍‌ଲା ଲାକ୍‌ତୁ ହୋମ୍‌ ଆଡ଼ିକ୍‌ନି ବେଦି ଇଡ୍‌ଜି ଆୟା ମୁସୁକୁ ହୋମବଲି ମାରି ପୁଜା ସିତାନ୍‌ । 30 ଇୟାୱେନ୍‌କା ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ୱାନ୍‌ ମିସାଜିସାନି ଗୁଡ଼ା ମାରି ବେଦି ନାଡ଼୍‌ମି ନର୍‌ବାନି କୁଣ୍ତ୍‌ ଇଡ୍‌ଜି ଆୟା ଲୋଇ ନର୍‌ବାନି ଉଣ୍ତିଙ୍ଗ୍‌ ଏରୁ ଇଟ୍‌ତାନ୍‌ । 31 ଆବେଟ୍‌ ମୋଶା ମାରି ହାରୋଣ ମାରି ୱାରି ମାରିସିର୍‌ ନିଜେ ନିଜେଦି କିକୁ କାଲ୍‌କୁ ନର୍‌ବାତାର୍‌ । 32 ମୋଶାଦି ଉଣ୍ତିଙ୍ଗ୍‌ ପ୍ରବୁଦି ମାଟା ଇସାବ୍‌ଦାନ୍‌ ଆମା ୱେଡ଼ାଦୁ ୱାର୍‌ ମିସାଜିସାନି ଗୁଡ଼ାଦୁ ଡ଼ୁଗିତିଙ୍ଗ୍‌ବା ବେଦିଦି ଲାକ୍‌ତୁ ଆତାର୍‌, ଆୟା ୱେଡ଼ାଦୁ ୱାର୍‌ ନର୍‌ବାତାର୍‌ । 33 ଇୟାୱେନ୍‌କା ଆୟା ଗୁଡ଼ାଦି ମାରି ବେଦିଦି ସାରିବେଡ଼୍‌ତି ଦୁୱାର୍‌ ତିୟାର୍‌ କିତାର୍‌ ମାରି ଦୁୱାର୍‌ ସେର୍‌ଲାଦୁ ପିଡ଼ିକ୍‌ନି ପାର୍‌ଦା ଡ଼ତାର୍‌, ଇୟାୱାଜା ମୋଶା ଆୟା ପାଣି ୱିସ୍‌ତାନ୍‌ ।

ପ୍ରବୁଦି ଜାୟ୍‌

34 ଇୟାୱେନ୍‌କା ବାଦଡ଼୍‌ ଆୟା ମିସାଜିସାନି ଗୁଡ଼ାଦିଙ୍ଗ୍‌ ପିଡ଼ିକ୍‌ତାତ୍‌ ମାରି ପ୍ରବୁଦି ଜାୟ୍‌ ଗୁଡ଼ାଦିଙ୍ଗ୍‌ ପୁରା କିତାତ୍‌ । 35 ଆବେଟ୍‌ ମୋଶା ମିସାଜିସାନି ଗୁଡ଼ାଦୁ ଡ଼ୁଗୁଦେଙ୍ଗ୍‌ ଆଟ୍‌ଏତାନ୍‌, ଇର୍ରିଙ୍ଗା ବାଦଡ଼୍‌ ଆୟା ମୁସୁକୁ ପିଡ଼ିକ୍‌ତା ମାର୍ହାତ୍‌ ମାରି ପ୍ରବୁଦି ଜାୟ୍‌ ଗୁଡ଼ାଦିଙ୍ଗ୍‌ ପୁରାକିତା ମାର୍ହାତ୍‌ । 36 ମାରି, ମିସାଜିସାନି ଗୁଡ଼ା ମୁସୁକୁରାନ୍‌ ଏସ୍ତିୱାଲେ ବାଦଡ଼୍‌ ଅଆୟ୍‌ ଆତାତ୍‌, ନାସ୍ତିୱାଲେ ଇସ୍ରାଏଲ ଲୋକୁ ନିଜେଦି ସାରି ବୁଲାତାର୍‌ । 37 ମାତର ବାଦଡ଼୍‌ ଏସ୍ତିୱାଲେ ମୁସୁକୁ ଅଆୟ୍‌ ଆଏତାତ୍‌, ନାସ୍ତିୱାଲେ ମୁସୁକୁ ସଲ୍‌ଇ ସାନ୍ଦି ୱାର୍‌ ସଲ୍‌ଏତାର୍‌ । 38 ଇର୍ରିଙ୍ଗା ୱିଜୁ ଇସ୍ରାଏଲ କୁଟୁମ୍‌ଦି ଲୋକା ଆଗ୍‌ଡ଼ି ୱାର୍‌ ୱିଜେରେ ସନିୱାଲେ ୱେଡ଼େ ପ୍ରବୁଦି ବାଦଡ଼୍‌ ମାରି ନାଡ଼ା ସିସୁ ଗୁଡ଼ା ମୁସୁକୁ ମାନ୍‌ଜି ମାର୍ହାତ୍‌ ।