ଜାଜକ ୱାଜା ଅବିସେକ୍ ଆନି ବିଦି
1 ମାରି ନା ଉଣ୍ତିଙ୍ଗ୍ ଜାଜକ ପାଣି କିନି ଉଣ୍ତିଙ୍ଗ୍ ୱାରିଙ୍ଗ୍ ନିଲପ୍ନି ଉଣ୍ତିଙ୍ଗ୍ ନିନ୍ ୱାରି ଉଣ୍ତିଙ୍ଗ୍ ଇୟା ୱିଜୁ ପାଣି କିନି; ନେଗି ଉନ୍ଡ୍ରି ବାଚିପିଲା ମାରି ରୁଣ୍ଡି ମେଣ୍ଡେଙ୍ଗ୍ ଅନି । 2 ମାରି, ସୟ୍ଇ ରୁଟି ମାରି ନିୟୁ କୁଡ଼ିତି ସୟ୍ଇ ପିଟାମ୍ ମାରି ନିୟୁ କୁଡ଼ିତି ସୟ୍ଇ ପାତଲ୍ତି ଗଦ୍ମୁ ଦୁରୁଦାନ୍ ତିଆର୍ କିନି, 3 ମାରି, ଉନ୍ଡ୍ରି ଡାଡ଼ିଦୁ ଆକା ଇଡ୍ନିଦେର୍ ମାରି ଆୟା ବାଚିପିଲା ମାରି ରୁଣ୍ଡି ମେଣ୍ଡେଙ୍ଗ୍ ଅର୍ସେ ଅସି ଆୟା ଡାଡ଼ି ତାନିଦେର୍ ।
4 ମାରି, ହାରୋଣତିଙ୍ଗ୍ ମାରି ୱାନି ମାରିସିରିଙ୍ଗ୍ ମିସାନି ଗୁଡ଼ା ସେର୍ଲାଦୁ ତାସି ଏରୁଦାନ୍ ୱାରିଙ୍ଗ୍ ଇବିସ୍କିନିଦେର୍ । 5 ଆୟାୱେନ୍କା ଆୟା ୱିଜୁ ଆଙ୍ଗିଁ ଅସି ହାରୋଣତିଙ୍ଗ୍ ଆଙ୍ଗିଁ ମାରି ଏପୋଦଦି ଆଙ୍ଗିଁ, ଏପୋଦ ମାରି ବକାଦିସାଜୁ ଆରିସ୍ କିନିଦେର୍, ମାରି ଏପୋଦଦି ସିନା ନାସୁଦାନ୍ ୱାନି ଜୁକିଦୁ ତର୍ନିଦେର୍ । 6 ୱାନି ତାଲାଦୁ ତାଲାଗୁଡା ତର୍ସି ଆୟା ମୁସୁକୁ ପବିତ୍ର ମୁକୁଟ୍ ଆରିସ୍କିନିଦେର୍ । 7 ଇୟାୱେନ୍କା ଉସୁନି ନିୟୁ ତାସି ୱାନି ତାଲା ମୁସୁକୁ ୱାକ୍ସି ୱାନିଙ୍ଗ୍ ଉସ୍ନିଦେର୍ ।
8 ଆଦେଙ୍ଗ୍ ନିନ୍ ହାରୋଣଦି ମାରିସିରିଙ୍ଗ୍ ତାସି ଆଙ୍ଗିଁ ଆରିସ୍ କିନିଦେର୍ । 9 ମାରି, ହାରୋଣତିଙ୍ଗ୍ ମାରି ୱାନି ମାରିସିରିଙ୍ଗ୍ ଜୁକି ନାସୁ ତର୍ସି ଆରିସ୍ କିନି ମାରି ୱାରି ତାଲେକାଙ୍ଗ୍ ଟପି ଆରିସ୍ କିଜି; ଆବେଟ୍ ୱାର୍ ୱିଜୁଦିନ୍ତି ବିଦିଦାନ୍ ଜାଜକ ପଦ ପୟ୍ନାର୍ । ଇୟାୱାଜା ମିର୍ ହାରୋଣତିଙ୍ଗ୍ ମାରି ୱାନି ମାରିସିରିଙ୍ଗ୍ ଆସ୍କିନିଦେର୍ ।
10 ନିନ୍ ମିସାନି ଗୁଡ଼ା ଆଗ୍ଡ଼ି ଆୟା ବାଚିପିଲା ତାପିସ୍ନିଦେର୍, ମାରି ହାରୋଣତିଙ୍ଗ୍ ମାରି ୱାନି ମାରିସିରିଙ୍ଗ୍ ଆୟା ବାଚିପିଲାଦି ତାଲାଦୁ ନିଜେ ନିଜେଦି କିକୁ ଇଡ୍ନାର୍ । 11 ଆବେଟ୍ ନିନ୍ ମିସାଜିସାନି ଗୁଡ଼ା ଦୁୱାର୍ତୁ ପ୍ରବୁଦି ଆଗ୍ଡ଼ି ଆୟା ବାଚିପିଲାଦିଙ୍ଗ୍ କାତ୍ନିଦେର୍ । 12 ଇୟାୱେନ୍କା ବାଚିପିଲାଦି ନେତେର୍ ଅସି ଡ଼ାସ୍କା ଦାନ୍ ବେଦିଦି କମୁ ମୁସୁକୁ ଉସ୍ନି, ମାରି, ବେଦି ମୁଲ୍ତୁ ମାରି ୱିଜୁ ନେତେର୍ ୱାକ୍ନି । 13 ମାରି ତାନି ଲୋଇମାନି କଣ୍ୱେସ୍ ମାରି ତାଡ଼ାକି ମୁସୁକୁରି ପଟୁ ମାରି ରୁଣ୍ଡି କଦ୍ଲିଡୁଣ୍ତି ମାରି ମୁସୁକୁରି କଣ୍ୱେସ୍ ଅସି ବେଦିଦୁ ଆଡ଼୍କିନିଦେର୍ । 14 ମାତର ବାଚିପିଲାଦି କାଣ୍ଡା, ତଲୁ ମାରି ଡ଼ାପି, ୱାସ୍କିପଟୁ ଗୁଡ଼ାଦି ଆତ୍ରେ ସିସୁଦୁ ଆଡ଼୍କିନିଦେର୍; ଇକା ପାପ୍ଦି ବଲି ।
15 ଇୟାୱେନ୍କା ନିନ୍ ପାର୍ତୁମ୍ ମେଣ୍ଡା ଅନି; ମାରି ହାରୋଣ ମାରି ୱାନି ମାରିସିର୍ ଆୟା ମେଣ୍ଡାଦି ତାଲାଦୁ ନିଜେ ନିଜେଦି କିକୁ ଇଡ୍ନାର୍ । 16 ଆବେଟ୍ ନିନ୍ ଆୟା ମେଣ୍ଡାଦିଙ୍ଗ୍ କାତ୍ସି ତାନି ନେତେର୍ ଅସି ବେଦି ମୁସୁକୁ ସାରିବେଡ଼୍ତି ଲୋଜ୍ନିଦେର୍ । 17 ଆୟାୱେନ୍କା ମେଣ୍ଡାଦିଙ୍ଗ୍ ମକା ମକା କିଜି ତାନି ୱାସ୍କିପଟୁ ମାରି କାଲ୍କୁ ନର୍ଜି ଆକା ୱିଜୁ ଆୟା ମୁକେଙ୍ଗ୍ ୱିଜୁ ମାରି ତାଲାଦି ୱାଲେ ଇଡ୍ନିଦେର୍ । 18 ମାରି, ନିନ୍ ପୁରା ମେଣ୍ଡାଦିଙ୍ଗ୍ ବେଦି ମୁସୁକୁ ଆଡ଼ିକ୍ନି; ଆକା ପ୍ରବୁଦି ହୋମବଳି ମାରି ୱେଡ଼ିକାଦି ବାସ୍ନା ମୁଜ୍ଦେଙ୍ଗ୍ ପ୍ରବୁଦି ଉଦେସ୍ତାନ୍ ସିସୁଦି ଦାନ୍ ।
19 ଇୟାୱେନ୍କା ନିନ୍ ମାରିଉଣ୍ଡ୍ରି ମେଣ୍ଡାଦିଙ୍ଗ୍ ଅନି, ମାରି, ହାରୋଣ ମାରି ୱାନି ମାରିସିର୍ ଆୟା ମେଣ୍ଡାଦି ତାଲାଦୁ ନିଜେ ନିଜେଦି କିୟୁ ଇଡ୍ନାର୍ । 20 ଆଦେଙ୍ଗ୍ ନିନ୍ ଆୟା ମେଣ୍ଡାଦିଙ୍ଗ୍ କାତ୍ସି ତାନି ନେତେର୍ ଅସି ହାରୋଣଦି ଉଣେର୍ ଗିତଣି ପାଡ଼ାକାଦୁ ମାରି ୱାନି ମାରିସିରି ଉଣେର୍ ଗିତଣିଙ୍ଗା ପାଡ଼ାକାଦୁ ମାରି ୱାରି ଉଣେର୍ କିକାଣି ଡାଟା ଡ଼ାସ୍କେଙ୍ଗା ମୁସୁକୁ ମାରି ଉଣେର୍ ପାଦ୍ଦି ଡାଟା ଡ଼ାସ୍କେଙ୍ଗା ମୁସୁକୁ ଉସ୍ନି, ମାରି, ବେଦି ମୁସୁକୁ ସାରିବେଡ଼୍ତି ନେତେର୍ ଲୋଜ୍ନି । 21 ଇୟାୱେନ୍କା ବେଦିଦୁ ମୁସ୍କୁରି ନେତେର୍ ମାରି ଅବିସେକ୍ତି ନିୟୁ ଅସି ହାରୋଣ ମୁସୁକୁ ମାରି ୱାନି ଆଙ୍ଗିଁ ମୁସୁକୁ, ମାରି, ୱାନି ୱାଲେ ୱାନି ମାରିସିରି ମୁସୁକୁ ମାରି ୱାରି ଆଙ୍ଗିଁ ମୁସୁକୁ ଲୋଜ୍ନି; ଆବେଟ୍ ୱାନ୍ ମାରି ୱାନି ୱାଲେ ୱାନି ଆଙ୍ଗିଁ, ମାରି, ୱାନି ମାରିସିର୍ ମାରି ୱାରି ଆଙ୍ଗିଁ ପବିତ୍ର ଆନାତ୍ ।
22 ମାରି, ନିନ୍ ଆୟା ମେଣ୍ଡାଦି କଣ୍ୱେସ୍ ମାରି କଣ୍ୱେସ୍ତି ତକା, ଲୋଇରି ମୁସୁକୁରି କଣ୍ୱେସ୍ ମାରି ତାଡ଼ାକିଦି ମୁସୁକୁରି ୱାସ୍କିପଟୁ ମାରି ରୁଣ୍ଡି ଟାକୁ ମାରି ଆବେଣି ମୁସୁକୁରି କଣ୍ୱେସ୍ ମାରି ଉଣି ତରଟି କୁରୁଗୁ ଅନିଦେର୍, ଏନ୍ଦାଇରିଙ୍ଗ୍ ଆୟାକା ସିତିମାନି ମେଣ୍ତା । 23 ମାରି, ପ୍ରବୁଦି ଆଗ୍ଡ଼ିରି ସୟ୍ଇ ରୁଟିଦି ଡାଡ଼ିଦାନ୍ ଉନ୍ଡ୍ରି ରୁଟି ମାରି ନିୟୁ ମିସାତି ଉନ୍ଡ୍ରି ସାରି ମାରି ଉନ୍ଡ୍ରି ଇସ୍ରି ସାରି ଅସି 24 ଆୟା ୱିଜୁ କାଦି ହାରୋଣଦି କିୟୁଦୁ ମାରି ୱାନି ମାରିସିରି କିୟୁଦୁ ସିଜି ପିଡ଼ିସ୍ସି ପୁଜାସିଜି ପ୍ରବୁଦି ଆଗ୍ଡ଼ି ଆକା ଦୁକୁନିକା । 25 ଇୟାୱେନ୍କା ନିନ୍ ୱାରି କିୟୁଦାନ୍ ଆୟାକା ୱିଜୁ ଅସି ୱେଡ଼ିକାଦି ମୁଜ୍ନି ଉଣ୍ତିଙ୍ଗ୍ ପ୍ରବୁଦି ଆଗ୍ଡ଼ି ବେଦିଦୁ ହୋମ ବଲି ମୁସୁକୁ ଆଡ଼ିକ୍ନି । ଇକା ପ୍ରବୁଦି ଉଣ୍ତିଙ୍ଗ୍ ସିସୁଦି ଦାନ୍ ।
26 ଇୟାୱେନ୍କା ନିନ୍ ହାରୋଣଦି ସିତିମାନି ମେଣ୍ଡାଦି ବକା ଅସି ପିଡ଼ିସ୍ସି ପୁଜାସିଜି ପ୍ରବୁଦି ଆଗ୍ଡ଼ି ଦୁକୁନି; ଆୟା କାଣ୍ଡେକ୍ ନି ବାଗ୍ ଆନାତ୍ ।
27 ମାରି ହାରୋଣ ମାରି ୱାନି ମାରିସିରି ପଦ୍ ପୟ୍ନି ମେଣ୍ଡାଦି ଆମା ବକା ନାନି ପିଡ଼ିସ୍ସି ପୁଜାସିଜି ଦୁକୁସି ମାରି ଆମା କୁରୁଗୁ ନାନି ପେର୍ଜିସିନି ଦାନ୍ ମୁସ୍କୁ ପେରାୟ୍ ଆତାତ୍, ଆକା ମିର୍ ପବିତ୍ର କିନିଦେର୍ । 28 ଆବେଟ୍ ୱିଜୁଦିନ୍ତି ବିଦିଦାନ୍ ଇସ୍ରାଏଲ ଲୋକାବାଣାନ୍ ଆକା ହାରୋଣ ମାରି ୱାନି ମାରିସିରି ଅଦିକାର୍ ଆନାତ୍, ଏଣ୍ତେସ୍କି ଆକା ପେର୍ଜିସିନି ଦାନ୍; ଇସ୍ରାଏଲ ଲୋକାଦି ଇୟା ପେର୍ଜିସିନି ଦାନ୍ ୱାରି ସାନ୍ତି ଉଣ୍ତିଙ୍ଗ୍ ପୁଜା ସିଆୟ୍ ଆନାତ୍; ଇକା ପ୍ରବୁଦି ଉଦେସ୍ତାନ୍ ୱାରି ପେର୍ଜିସିନି ଦାନ୍ ଆନାତ୍ ।
29 ମାରି ହାରୋଣଦି ସାତି ୱେନ୍କା ୱାନି ପବିତ୍ର ଆଙ୍ଗିଁ ୱିଜୁ ୱାନି ମାରିସିରିଦି ଆନାତ୍; ନିୟୁ ଉସ୍ସି ମାରି ପଦ୍ ଅନି ବେଡ଼ାଦୁ ୱାର୍ ଆକା ଆରାନାର୍ । 30 ୱାନି ମାରିସିର୍ ଲୋଇ ଆମାକାନ୍ ଆୟା ପଦ୍ଦୁ ଜାଜକ ଆଜି ପବିତ୍ର ବାଡିଦୁ ସେବା କିନି ଉଣ୍ତିଙ୍ଗ୍ ମିସାଜିସାନି ଗୁଡ଼ାଦୁ ୱାନାନ୍, ୱାନ୍ ଆୟା ଆଙ୍ଗିଁ ସାତ୍ ଦିନ୍ ଆରାନାନ୍ ।
31 ଇୟାୱେନ୍କା ମିର୍ ଆୟା ସିଆୟ୍ଆତି ମେଣ୍ଡାଦି କାଣ୍ଡା ଅସି ଉନ୍ଡ୍ରି ପବିତ୍ର ବାଡିଦୁ ୱାର୍ନିଦେର୍, 32 ମାରି, ହାରୋଣ ମାରି ୱାନି ମାରିସିର୍ ମିସାଜିସାନି ଗୁଡ଼ା ସେର୍ଲା ଲାକ୍ତୁ ଆୟା ମେଣ୍ଡା କାଣ୍ଡା ମାରି ଡାଡ଼ିଦି ଆୟା ରୁଟି ତିନାର୍ । 33 ମାରି, ୱାରିଙ୍ଗ୍ ପଦ୍ଦୁ ଇଡ୍ଦେଙ୍ଗ ମାରି ପବିତ୍ର ଉଣ୍ତିଙ୍ଗ୍ ଆମାୱାନି ମାଣାନ୍ ପୁରା ଆତାତ୍, ଆକା ୱାର୍ ତିନାର୍; ମାତର ଏମେ ଆଇ କୁଟୁମ୍ତି ଲୋକୁ ଆକା ତିନ୍ଏର୍, ଇରିଙ୍ଗ୍ ଆକା ୱିଜୁ ପବିତ୍ର ଜିନିସ୍ । 34 ମାରି ଆୟା ପଦ୍ ଉଣ୍ତିଙ୍ଗ୍ କାଣ୍ଡା ମାରି ରୁଟିଦାନ୍ ଜଦି ସାଲ୍ଦି ସାନ୍ଦି ଇନିକା ଏଜିତି ମାର୍ହିଙ୍ଗ୍, ଆର୍ତିଙ୍ଗ୍ ଆୟା ଏଜିତିକା ସିସୁଦୁ ଆଡ଼୍କିନିଦେର୍, ଏନ୍ ଆକା ତିନିମାଟ୍; ଇରିଙ୍ଗ୍ ଆକା ପବିତ୍ର ଜିନିସ୍ ।
35 ନାନ୍ ମିଙ୍ଗିଁ ଏଣ୍ତେସ୍ ମାଟା ୱେର୍ତାମାନା, ଆୟା ଇସାବ୍ଦାନ୍ ମିର୍ ହାରୋଣଙ୍ଗ୍ ମାରି ୱାନି ମାରିସିରି ଉଣ୍ତିଙ୍ଗ୍ କିନିଦେର୍; ୱାରି ପୁଜାସିନି ଉଣ୍ତିଙ୍ଗ୍ ସାତ୍ଦିନ୍ ଲାଗେଆନାତ୍ । 36 ମାରି ମିର୍ ବାଦ୍ଲୁ ସିନି ଉଣ୍ତିଙ୍ଗ୍ ଦିନାମି ପାପ୍ତାନ୍ ରକିୟା ପୟ୍ନି ବଲିପୁଜା ୱାଜା ଉନ୍ଡ୍ରି ପତୁ ବାଚିପିଲା ସିନିଦେର୍, ମାରି, ବେଦି ଉଣ୍ତିଙ୍ଗ୍ ବାଦ୍ଲୁ ସିଜି ଆକା ପାପ୍ ମୁକୁଡ଼ା କିନିଦେର୍ ମାରି ଆକା ପବିତ୍ର କିନି ଉଣ୍ତିଙ୍ଗ୍ ନିୟୁଦାନ୍ ସାନ୍ତି କିନିଦେର୍ । 37 ମିର୍ ବେଦି ଉଣ୍ତିଙ୍ଗ୍ ସାତ୍ ଦିନ୍ ପାପ୍ କେମା ସିଜି ଆକା ପବିତ୍ର କିନିଦେର୍; ଆବେଟ୍ ବେଦି ନାଣ୍ତପବିତ୍ର ଆନାତ୍, ମାରି, ଆମାୱିଜୁ ବେଦି ମୁଟ୍ମାଟ୍, ଆୟା ୱିଜୁ ପବିତ୍ର ଆନାତ୍ ।
ଦିନାମିଦି ଦାନ୍
38 ଆୟା ବେଦି ମୁସୁକୁ ମିର୍ ଇୟା ପୁଜା ସିନିଦେର୍; ମିର୍ ନିୟମ୍ ଇସାବ୍ତାନ୍ ଦିନାମି ଉଣ୍ତ୍ରି ବାର୍ସେକ୍ତି ରୁଣ୍ଡି ମେଣ୍ଡା ପିଲେକ୍, 39 ଇରିଙ୍ଗ୍, ତାନି ପାର୍ତୁମ୍ ମେଣ୍ଡାପିଲାଦିଙ୍ଗ୍ ସାଲ୍ଦି ପୁଜା କିନିଦେର୍ ମାରି ମାରିଉଣ୍ଡ୍ରି ମେଣ୍ଡାପିଲାଦିଙ୍ଗ୍ ମିଲିମିଲିକା ପୁଜା କିନିଦେର୍ । 40 ମାରି, ପାର୍ତୁମ୍ ମେଣ୍ଡାପିଲାଦି ୱାଲେ ହିନ୍ ସାଟିଦି ନାଲ୍ଗି ବାଗ୍ତାନ୍ ପିରିତି ନିୟୁଦାନ୍ ମିସାତି ଉନ୍ଡ୍ରି ଐପାଦି29:40 ଇରିଙ୍ଗ୍ ଉଣ୍ତ୍ରି କେଜି ଦୁରୁ ମାରି ନିୟୁ ଦାସ୍ ବାଗ୍ତାନ୍ ଉଣ୍ତ୍ରି ବାଗ୍ ଦୁରୁ ମାରି ଅଙ୍ଗୁର୍ରସ୍ ସିନି ଉଣ୍ତିଙ୍ଗ୍ ହିନ୍ଦି ନାଲ୍ଗି ବାଗ୍ତାନ୍ ଉଣ୍ତ୍ରି ବାଗ୍ ଅଙ୍ଗୁର୍ରସ୍ ସିନିଦେର୍ । 41 ମାରି ମିଲିମିଲିକା ମାରିଉଣ୍ଡ୍ରି ମେଣ୍ଡାପିଲାଦିଙ୍ଗ୍ ପୁଜା କିନିଦେର୍, ମାରି ସାଲ୍ଦି କାଦି ପୁଜାସିନିକା ମାରି ଉଣି ପୁଜାସିନିକା ଇସାବ୍ତାନ୍ ୱେଡ଼ିକାଦି ବାସ୍ନା ଉଣ୍ତିଙ୍ଗ୍ ପ୍ରବୁଦି ଆଗ୍ଡ଼ି ସିସୁଦି ଦାନ୍ ୱାଜା ଆକା ପୁଜା ସିନିଦେର୍ । 42 ଇକା ମିସାଜିସାନି ଗୁଡ଼ାଦି ସେର୍ଲା ଲାକ୍ତୁ ପ୍ରବୁଦି ଆଗ୍ଡ଼ି ମି ଜୁଗୁଜୁଗୁତି ଦିନାମି ହମ୍ ପୁଜା ଆନାତ୍; ଆୟା ବାଡିଦୁ ନାନ୍ ମି ୱାଲେ ୱାର୍ଗିଜିସାଦେଙ୍ଗ୍ ମି ୱାଲେ ବେଟ୍ ବୁଡ଼ାନା । 43 ମାରି ଆୟା ବାଡିଦୁ ନାନ୍ ଇସ୍ରାଏଲ ଲୋକାୱାଲେ ବେଟ୍ ବୁଡ଼ାନା; ମାରି, ନା ଗୌରବ୍ତାନ୍ ଗୁଡ଼ା ପବିତ୍ର ଆନାତ୍ । 44 ମାରି, ନାନ୍ ମିସାନି ଗୁଡ଼ା ମାରି ବେଦିଦିଙ୍ଗ୍ ପବିତ୍ର କିନା, ମାରି, ନା ଜାଜକ ପାଣି କିନି ଉଣ୍ତିଙ୍ଗ୍ ହାରୋଣତିଙ୍ଗ୍ ମାରି ୱାନି ମାରିସିରିଙ୍ଗ୍ ପବିତ୍ର କିନି । 45 ନାନ୍ ଇସ୍ରାଏଲ ଲୋକା ଲୋଇ ବାସାଜି ୱାରି ମାପୁରୁ ଆନା । 46 ଆବେଟ୍ ନାନ୍ ଜେ ୱାରି ପ୍ରବୁ ମାପୁରୁ, ୱାରି ଲୋଇ ବାସାକିନି ଉଣ୍ତିଙ୍ଗ୍ ମିସର ଦେସ୍ତାନ୍ ୱାରିଙ୍ଗ୍ ସପ୍ସି ତାତାମାନା, ଆକା ୱାର୍ ନେସ୍ନାର୍; ନାନ୍ ପ୍ରବୁ ୱାରି ମାପୁରୁ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)