1 ମିର୍‌ ମିଚ୍‌ ମାଟା ସପ୍‌ମାଟ୍‌; ଅନ୍ୟାୟ ସାକି ଆଜି ତାଗ୍‌ଇ ଲୋକାଙ୍ଗ୍‌ ସାକା କିମାଟ୍‌ । 2 ମିର୍‌ ଦାରିପାଣି କିଦେଙ୍ଗ୍‌ ନାଣ୍ଡ ଲୋକା ୱାଲେ ସଲ୍‌ମାଟ୍‌, ମାରି, ନ୍ୟାୟ୍‌ ବିସାର୍‌ ୱେର୍‌ଏ କିନି ଉଣ୍ତିଙ୍ଗ୍‌ ନାଣ୍ଡ ଲୋକା ତରିନ୍‌ ଆଜି ବାଦା କିମାଟ୍‌; 3 ମାରି ବିଚାର୍‌ତୁ କାକୁର୍ତି ଲୋକାଙ୍ଗ୍‌ ନିସାର୍‌ କିମାଟ୍‌ ।

4 ମିର୍‌ ନିଜେଦି ସାତ୍ରୁଦି କଡି ବା ଗଦଦିଙ୍ଗ୍‌ ସାରି ବାଣାଜି ସନିକା ସୁଡ଼ୁତିଙ୍ଗା, ୱାନି ଲାକ୍‌ତୁ ତାନିଙ୍ଗ୍‌ ଆସ୍‌ସୋ ସାନ୍‌ଡ୍ରୁ । 5 ଜଦି ମିର୍‌ ମି ସତ୍ରୁଦି ଗଦଦିଙ୍ଗ୍‌ ବଜୁଦାନ୍‌ ଆଡ୍‌ଗି ଆର୍‌ନି ମାନିକା ସୁଡ଼ୁତିଙ୍ଗା, ତାନିଙ୍ଗ୍‌ ଡ଼ିସ୍‌ସି ସୋଲ୍‌ମାଟ୍‌, ମିର୍‌ ଏଣ୍ତେସ୍‌ବା ତାନି ୱାଲେ ଦାନିଙ୍ଗ୍‌ ମୁକ୍‌ଡ଼ା କିନିଦେର୍‌ ।

6 କାକୁର୍ତି ଲୋକା ବିଚାର୍‌ତୁ ମିର୍‌ ୱାରି ମୁସୁକୁ ଅନ୍ୟାୟ କିମାଟ୍‌ । 7 ମିଚ୍‌ ବିସୟ୍‌ଦାନ୍‌ ନିଜେଦିଙ୍ଗ୍‌ ଆକ ଇଡ୍‌ଦୁ; ମାରି, ଦସ୍‍ କିଇ ୱାନିଙ୍ଗ୍‌ ମାରି ଦାର୍ମୁଦି ଲୋକାଙ୍ଗ୍‌ ନାସ୍ଟୁ କିମାଟ୍‌; ଏଣ୍ତେସ୍‌ ନାନ୍‌ ତାଗ୍‌ଇ ଲୋକାଙ୍ଗ୍‌ ଡ଼ିସ୍‌ଏ । 8 ମିର୍‌ ଲାଞ୍ଚ୍‌ ଅମାଟ୍‌, ଇର୍ରିଙ୍ଗା ଲାଞ୍ଚ୍‌ କାଣ୍‌ଗାଦୁ ମାନି ଲୋକାଙ୍ଗ୍‌ କାଣା କିନାତ୍‌ ମାରି ଦାର୍ମୁଦି ଲୋକା ବାକ୍ୟ ଆଇକା କିନାତ୍‌ ।

9 ମିର୍‌ ଆଇ ଦେସ୍‌ତି ଲୋକାଙ୍ଗ୍‌ କାରାପ୍‌ ବ୍ୟବହାର୍‌ କିମାଟ୍‌, ଇର୍ରିଙ୍ଗା ମିର୍‌ ଆଇ ଦେସ୍‌ତି ଲୋକାଦି ମୋନ୍‌ ନେସ୍ତି ମାନିଦେର୍‌, ଏନ୍ଦାଇର୍ରିଙ୍ଗା ମିର୍‌ ମିସର ଦେସ୍‌ତୁ ଆଇ ଦେସ୍‌ତିକିଦେର୍‌ ମାରିଦେର୍‌ ।

10 ମାରି ମିର୍‌ ନିଜେଦି ବୁମିଦୁ ସୋ ବାର୍ସୁ ସାନ୍ଦି ୱିତୁ ୱିତ୍‌ନିଦେର୍‌ ମାରି ଆବେନୁ ଆତି ପାସି ଉଣ୍ଡା କିଜି ଇଡ୍‌ନିଦେର୍‌ । 11 ମାତର ସାତ୍‌ ବାର୍ସୁଦୁ ତାନିଙ୍ଗ୍‌ ରୋମିସ୍‌ନିଦେର୍‌ ମାରି ପାଡ଼ିଆ ଡ଼ିସ୍‌ତୁ; ଆବେଟ୍‌ ମି କାକୁର୍ତି ଲୋକୁ ଉଣ୍ଡେଙ୍ଗ୍‌ ପୟ୍‌ନାର୍‌; ୱାର୍‌ ଆମାକା ବାକି ଇଡ୍‌ନାର୍‌, ଆକା ବନ୍‌ତି ଜାତୁଙ୍ଗ୍‌ ତିନ୍‌ଡ୍ରେଙ୍ଗ୍‌ ପୟ୍‌ନେ । ମାରି, ମି ଅଙ୍ଗୁର୍‌ କିଡ଼ିଇ ମାରି ଜିତ ମାରାକାଙ୍ଗ୍‌ ବା ଆୟା ୱାଜା କିନିଦେର୍‌ ।

12 ମିର୍‌ ସୋ ଦିନ୍‌ ନିଜେଦି ପାଣି କିଜି ସାତ୍‌ ଦିନ୍‌ତୁ ରୋମ୍‌ନିଦେର୍‌, ଆବେଟ୍‌ ମି କଡିଙ୍ଗ୍‌ ମାରି ଗଦଙ୍ଗ୍ ରୋମ୍‌ନେ, ମାରି, ମି ଦାସିରି ମାରିନ୍‌କୁ ମାରି ଆଇ ଦେସ୍‌ତି ଲୋକୁ ରମ୍‌ଦେଙ୍ଗ୍‌ ପୟ୍‌ନାର୍‌ ।

13 ନାନ୍‌ ମିଙ୍ଗିଁ ଆମାକା ଆମାକା ଇର୍ହାମାନା, ଆୟା ୱିଜୁ ବିସୟ୍‌ଦାନ୍‌ ୱେନ୍‌ଡ୍ରୁ; ଆଇ ଦେୟାମ୍‌କା ଦର୍‌ ଏତ୍‌ କିମାଟ୍‌, ମାରି ମି ୱେୟୁଦାନ୍‌ ଆକା ୱେନାଇ ଆମାକିତ୍‌ ।

14 ମିର୍‌ ବାର୍‌ସେକ୍‌ ଲୋଇ ମୁଜା ନାଙ୍ଗିଁ ମାନାନି ଉଣ୍ତିଙ୍ଗ୍‌ ପଣ୍ଡୟ୍‌ କିନିଦେର୍‌ । 15 ସୟ୍‌ଇ ରୁଟିଦି ପଣ୍ଡୟ୍‌ କିନିଦେର୍‌; ନା ମାଟା ଇସାବ୍‌ଦାନ୍‌ ଅବିବ୍‌ ଲେଜୁଦୁ ସାତ୍‌ ଦିନ୍‌ ସୟ୍‌ଇ ରୁଟି ତିନିଦେର୍‌, ଏଣ୍ତେସ୍‌କି ମିର୍‌ ଆୟା ୱେଡ଼ାଦୁ ମିସର ଦେସ୍‌ତାନ୍‌ ମୁକ୍‌ଡ଼ାତି ମାନିଦେର୍‌; ମାରି, ଏନ୍‌ ୱାର୍ହି କିୟୁଦାନ୍‌ ନା ଲାକ୍‌ତୁ ରାମାକିନ୍‌ ।

16 ମାରି, ମିର୍‌ ପାସି କୋୟ୍‌ନି ପଣ୍ତୟ୍‌, ଇର୍ରିଙ୍ଗା, କିଡ଼ିଇଦୁ ଆମାକା ୱିତ୍‌ନିଦେର୍‌, ଆବେଣି ପାର୍‌ତୁମ୍‌ ଉଣ୍ତାକିତି ପଲ୍‌ତି ପଣ୍ତୟ୍‌ କିଦୁ; ମାରି, କାଡ଼ା ୱିଜ୍‌ନି ୱେଡ଼ାଦୁ କିଡ଼ିଇଦାନ୍‌ ପଲ୍‌ ଉଣ୍ତା କିନିୱାଲେ ପଲ୍‌ ଉଣ୍ତାକିନି ପଣ୍ତୟ୍‌ କିଦୁ । 17 ବାର୍‌ସେକ୍‌ ଲୋଇ ମୁଜା ମି ୱିଜେରେ ମେମାରି ଲୋକୁ ପ୍ରବୁଦି ଆଗ୍‌ଡ଼ି ୱାନିଦେର୍‌ ।

18 ମିର୍‌ ସୟ୍‌ନିକା ମିସାତି ଜିନିସ୍‌ ୱାଲେ ନା ବଲିଦି ନେତେର୍‌ ସିମାଟ୍‌; ମାରି, ନା ପଣ୍ତୟ୍‌ତି ଜିନିସ୍‌ କଣ୍‌ୱେସ୍‌ ନାଡ଼ା ୱିଗ୍‌ଜି ସାଲ୍‌ଦି ସାନ୍ଦି ଇଡ୍‌ମାଟ୍‌ ।

19 ମି ବୁମିଦି ପାର୍‌ତୁମ୍‌ ଆତି ପଲ୍‌ ମି ପ୍ରବୁ ମାପୁରୁଦି ଇନ୍‌ଡ୍ର ତାନିଦେର୍‌ । ମିର୍‌ ଗରିଆ ପିଲା କି ମେଣ୍ତା ପିଲା ତାନି ୟାୟା ପାଲୁଦାନ୍‌ ୱାର୍‌ମାଟ୍‌ ।

20 ସୁଡ଼ୁଦୁ, ନାନ୍‌ ମିଙ୍ଗିଁ ସାରିଦୁ ରକ୍‌ୟା କିଦେଙ୍ଗ୍‌ ମାରି ମିଙ୍ଗିଁ ନା ତିଆର୍‌ କିତି ବାଡିଦୁ ତାନି ଉଣ୍ତିଙ୍ଗ୍‌ ମି ଆଗ୍‌ଡ଼ି ଆଗ୍‌ଡ଼ି ଉନ୍‌ଡ୍ରି ଦୁତ୍‌ଦିଙ୍ଗ୍‌ ପକ୍‌ସିନା । 21 ୱାନି ବିସୟ୍‌ତାନ୍‌ ଜାଗାର୍‌ତା ଆଦୁ ମାରି ୱାନି ମାଟା ଆସ୍‌ତୁ; ୱାନି ବିରୁଦ୍‌ତାନ୍‌ ନିଲ୍‌ମାଟ୍‌; ଇର୍ରିଙ୍ଗା ୱାନ୍‌ ମି ଅଦାର୍ମୁ କେମା କିଏନ୍‌; ଏନ୍ଦାଇର୍ରିଙ୍ଗା ୱାନିମାନୁ ମା ଦର୍‌ ମାନାତ୍‌ । 22 ମାତର ମିର୍‌ ଜଦି ୱାନି ମାଟା ୱେନିଦେର୍‌, ମାରି, ନାନ୍‌ ଆମାକା ୱିଜୁ ଇନା, ଆକା କିନିଦେର୍‌; ଆର୍‌ତିଙ୍ଗ୍‌ ନାନ୍‌ ମାପ୍‌ ସତ୍ରୁରି ସତ୍ରୁ ମାରି ବିରୁଦ୍‌କିନି ୱାରି ବିରୁଦ୍‌ ଆନିକା । 23 ଇର୍ରିଙ୍ଗା ନା ଦୁତ୍‌ ମି ଆଗ୍‌ଡ଼ି ଆଗ୍‌ଡ଼ି ସଲ୍‌ସି ମିଙ୍ଗିଁ ଇମୋରିୟ, ହିତ୍ତୀୟ, ପରିସିୟ, କିଣାନିୟ, ହିବ୍ବୀୟ, ମାରି ଜିବୁସିୟରି ଦେସ୍‌ତୁ ତାନାନ୍‌, ମାରି, ନାନ୍‌ ୱାରିଙ୍ଗ୍‌ ନାସ୍ଟୁ କିନା । 24 ମିର୍‌ ୱାରି ଦିୟାମ୍‌କାଙ୍ଗ୍‌ ମାଡ଼ିସ୍‌ କିମାଟ୍‌ ମାରି ୱାନିକା ସେବା କିମାଟ୍‌, ମାରି, ୱାରି ନିୟମ୍‌ ଇସାବ୍‌ଦାନ୍‌ ପାଣି କିମାଟ୍‌; ମାତର ଦିୟାମ୍‌କା କାଲୁଦିଙ୍ଗ୍‌ ମାକ୍‌ନିଦେର୍‌ ମାରି ୱାରି ମୁଣ୍ତା ୱିଜୁ ରୁକ୍‌ନିଦେର୍‌ । 25 ମିର୍‌ ମି ପ୍ରବୁ ମାପୁରୁଦି ସେବା କିନିଦେର୍‌; ଆବେଟ୍‌ ୱାନ୍‌ ମିଙ୍ଗିଁ ଉଣି ତିନିବାନୁ ଆର୍ସିବାଦ୍‌ କିନାନ୍‌, ମାରି, ନାନ୍‌ ମି ଲୋଇରାନ୍‌ ରୋଗ୍‌ ୱିଜୁ ଆକ କିନା । 26 ମି ଦେସ୍‌ତୁ ଏ ଗାର୍ବୁ ନାସ୍ଟୁ ଆଏତ୍‌, ମାରି, ଏକ୍‌ ବାଞ୍ଜି ଆଉ; ନାନ୍‌ ମିଙ୍ଗିଁ ନାଣ୍ତ ବାର୍ସେକ୍‌ ଜିପିସ୍‌ସି ଇଡ୍‌ନା ।

27 ନାନ୍‌ ମି ଆଗ୍‌ଡ଼ି ଆଗ୍‌ଡ଼ି ନା ବିସୟ୍‌ତି ତିଲାନିକା ପକ୍‌ନା; ମାରି, ମିର୍‌ ଏମେ ୱିଜୁ ଲୋକା ଲାକ୍‌ତୁ ସନିଦେର୍‌, ୱାରିଙ୍ଗ୍‌ କିଲିବିଲି କିନା ମାରି ନାନ୍‌ ମି ସାତ୍ରୁରିଙ୍ଗ୍‌ ମି ମାଣାନ୍‌ ଡ଼େସି ପେର୍‌ନା । 28 ନାନ୍‌ ମି ଆଗ୍‌ଡ଼ି ଆଗ୍‌ଡ଼ି ଟେକେର୍‌ ୱିଜେଙ୍ଗା ପକ୍‌ନା; ୱାକ୍‌ ହିବ୍ବୀୟ, କିଣାନିୟ ମାରି ହିତ୍ତୀୟରିଙ୍ଗ୍‌ ମି ଆଗ୍‌ଡ଼ିରାନ୍‌ ଉଲ୍‌ପ୍‌ନେ । 29 ମାତର ଉନ୍‌ଡ୍ରି ବାର୍‌ସେକ୍‌ଦୁ ମି ଆଗ୍‌ଡ଼ିରାନ୍‌ ୱାରିଙ୍ଗ୍‌ ଉଲ୍‌ପ୍‌ତେଙ୍ଗ୍‌ କେଏ, ଇର୍ରିଙ୍ଗା ଦେସ୍‌ ୱାରିକା ଆନାତ୍‌ ମାରି ମି ଆଗ୍‌ଡ଼ିରି ବନ୍‌ତି ଜାତୁଙ୍ଗ୍‌ ନାଣ୍ଡଆନେ । 30 ମିର୍‌ ଏମେସାନ୍ଦି ନାଣ୍ଡ ଆଇଦେର୍‍ ମାରି ଦେସ୍‌ ଅଦିକାର୍‌ କିଇଦେର୍‌, ଆୟାସାନ୍ଦି ନାନ୍‌ ମି ଆଗ୍‌ଡ଼ିରାନ୍‌ ୱାରିଙ୍ଗ୍‌ ଦିରେ ଦିରେ ଉଲ୍‌ପ୍‌ନା । 31 ମାରି, ନାନ୍ ସୁପ୍‌ ସାମ୍‌ଦୁର୍‌ତାନ୍‌ ପଲେସ୍ଟିୟରି ସାମ୍‌ଦୁର୍‌ ସାନ୍ଦି ମାରି ମରୁବୁମି ବାଡିଦାନ୍‌ ପରାତ ଗାଡା ସାନ୍ଦି ମି ସାନ୍ଦି ତିଆର୍‌ କିନା; ଇର୍ରିଙ୍ଗା ନାନ୍‌ ଆୟା ଦେସ୍‌ତି ଲୋକାଙ୍ଗ୍‌ ମି କିୟୁଦୁ ସର୍ପେ କିନା; ଆବେଟ୍‌ ମିର୍‌ ନିଜେଦି ଆଗ୍‌ଡ଼ିରାନ୍‌ ୱାରିଙ୍ଗ୍‌ ଉଲ୍‌ପ୍‌ନିଦେର୍‌ । 32 ମିର୍‌ ୱାରି ୱାଲେ ବା ୱାରି ଦେୟାମ୍‌କା ୱାଲେ ଏମେ ରାଜିନାମା ତିର୍‌ କିମାଟ୍‌ । 33 ୱାର୍‌ ମି ଦେସ୍‌ତୁ ବାସା କିଏର୍‌, କିତିଙ୍ଗା ୱାର୍‌ ନା ବିରୁଦ୍‌ତାନ୍‌ ମିଙ୍ଗିଁ ପାପ୍‌ କିବିସ୍‌ନାର୍‌; ଏନ୍ଦାଇର୍ରିଙ୍ଗା ମିର୍‌ ଜଦି ୱାରି ଦିୟାମ୍‌କାଙ୍ଗ୍‌ ସେବାକିନିଦେର୍‌, ଆର୍‌ତିଙ୍ଗ୍‌ ଆକା ସତ୍‌ନେ ମିଙ୍ଗିଁ ଉରି ୱାଜା ଆନାତ୍‌ ।