1 ଆୟା ୱେନ୍‌କା ମୋଶା ଇସ୍ରାଏଲ ଲୋକା ୱିଜୁ ଦଲ୍‌ତି ଲୋକାଙ୍ଗ୍‌ ଉଣ୍ଡ୍ରେବାନୁ କିଜି ଇର୍ହାନ୍‌, "ପ୍ରବୁ ମିଙ୍ଗିଁ ଇୟା ୱିଜୁ ମାଟା ମାନାନି ଉଣ୍ତିଙ୍ଗ୍‌ ଇର୍ହାମାନାନ୍‌ । 2 ସଅ ଦିନ୍‌ ପାଣି କିନିଦେର୍‌, ମାତର ସାତ୍‌ଦିନ୍‌ତି ଦିନ୍‌ ମି ଉଣ୍ତିଙ୍ଗ୍‌ ପବିତ୍ର ଦିନ୍‌ ଆନାତ୍‌; ଆକା ପ୍ରବୁଦି ଉଣ୍ତିଙ୍ଗ୍‌ ରୋମ୍‌ନି ଦିନ୍‌ ଆନାତ୍‌, ଏନ୍‌ବା ଆୟା ଦିନ୍‌ତୁ ପାଣି କିନାନ୍‌, ୱାନିଙ୍ଗ୍‌ ସାନି ଦଣ୍ଡ୍‌ ଆନାତ୍‌ ।" 3 ମିର୍‌ ରମ୍‌ନି ଦିନ୍‌ତୁ ନିଜେଦି ଏମେ ବାସାନି ବାଡିଦୁ ସିସୁ କାସିସ୍‌ମାଟ୍‌ ।

4 ମାରି ମୋଶା ଇସ୍ରାଏଲ ଲୋକା ୱିଜୁ ଲୋକାଙ୍ଗ୍‌ ମାରି ଇର୍ହାନ୍‌, "ପ୍ରବୁ ଇୟା ମାଟା ସିତାମାନାନ୍‌ । 5 ମିର୍‌ ପ୍ରବୁଦି ଉଣ୍ତିଙ୍ଗ୍‌ ନିଜେଦି ମାଣାନ୍‌ ଦାନ୍‌ ଉଣ୍ତାକିଦୁ; ଏନ୍‌ଗି ନେଗି ମୋନ୍‌, ୱାନ୍‌ ପ୍ରବୁଦି ଉଣ୍ତିଙ୍ଗ୍‌ ବାଙ୍ଗାରାମ୍‌ ମାରି ୱେଣ୍ତି ମାରି ପିତଲ୍‌, 6 ମାରି, ନିଡ଼ିଦିକା ମାରି ଏରାନିକା ମାରି ସେର୍‌ଗା ରଙ୍ଗ୍‌ ମାରି ଅଡ଼ିନିକା ମାରି ଟେରିକଟ୍‌ ନୁଲୁ ମାରି ଗରିଆ ବୁରୁବୁସା, 7 ମାରି ନେତେର୍‌ ଆତି ମେଣ୍ଡାଦି ତଲୁ ମାରି କଡ଼୍‌କି ପିଲାଦି ତଲୁ ମାରି ଆକିସିଆ ମାରାନ୍‌, 8 ମାରି, ଦିୱାଦି ନିୟୁ ମାରି ଅବିସେକ୍‌ତି ନିୟୁ ମାରି ବାସ୍‌ନାଦି ଦୁପ୍‌ଣି ବାସ୍‌ନା, 9 ମାରି, ଏପୋଦ ମାରି ବକାଦୁ ତରାନି ଉଣ୍ତିଙ୍ଗ୍‌ ଗୋମେଦକ ମଣି ୱିଜୁ ଦାରାଦି କାଲୁ, ଇୟା ୱିଜୁ ପ୍ରବୁଦି ଦାନ୍‌ ତାନିଦେର୍‌ ।"

10 ମାରି ମି ଲୋଇରାନ୍‌ ୱିଜେରେ ପାଣିକିନି ବୁଦି ମାନି ଲୋକୁ ୱାଜି ପ୍ରବୁ ଆଦେସ୍‌ ସିତି ୱିଜୁ ଜିନିସ୍‌ ତିଆର୍‌ କିପିର୍‌, 11 ଇର୍ରିଙ୍ଗା, ତେବାନି ଗୁଡ଼ା, ଆବେଣି ଗୁଡ଼ା, ରେକାମ୍‌, ୱେକଣି କୁଟି, ପାଟା, ଗାଡ଼ା, ବନ୍ଦ୍‌, କଣା, 12 ମାରି, ନିୟମ୍‌ ପେଡ଼ା ମାରି ଆବେଣି କଣା ମାରି ପାପ୍‌ତିଙ୍ଗ୍‌ ପିଡ଼ିକ୍‌ନି ଡାବ୍‌ଣା ମାରି କେର୍‌ପ୍‌ନି ନାଡ଼୍‌ମିରି ୱାତି, 13 ମାରି ଟେବୁଲ୍‌, ଆବେଣି କଣା, ସାଟିଙ୍ଗ୍‌ ୱିଜୁ ମାରି ମାପୁରୁଙ୍ଗୁଁ ସିତିମାନି ରୁଟି, 14 ମାରି, ଦିୱା ଉଣ୍ତିଙ୍ଗ୍‌ ଦିୱା ଇଡ୍‌ନିକା ମାରି ଆବେଣି ସାଟି, ଦିୱା ମାରି ଦିୱାଦି ନିୟୁ, 15 ମାରି ଦୁପ୍‌ଣି ବେଦି, ଆବେଣି କଣା, ଅବିସେକ୍‌ତି ନିୟୁ, ବାସ୍‌ନାଦି ଦୁପ୍‌ଣି ବାସାନି ଗୁଡ଼ା ଡ଼ୁଗୁନି ଦୁୱାର୍‌ତୁ ପିଡ଼ିକ୍‌ନି ୱାତି, 16 ମାରି ହୋମ୍‌ବେଦି ମାରି ଆବେଣି ପିତଲ୍‌ ପିଡ଼୍‌କିନି ମାରି ମୁଣ୍ତା, ସାଟିଙ୍ଗ୍‌ ୱିଜୁ ମାରି ନର୍‌ବାନି ସାଟି ମାରି ଆବେଣି ଗୁଦୁରି, 17 ମାରି, ଦୁଆର୍‌ ପାର୍‌ଦା ମାରି ଆବେଣି ବନ୍ଦ୍‌ ମାରି ବରୋ ମାରି ଦୁୱାର୍‌ତୁ କେର୍‌ପ୍‌ନି ୱାତି, 18 ମାରି, ଇଲୁଦି କୁଟି ମାରି ଦୁଆର୍‌ତି କୁଟି ମାରି ରିଆଙ୍ଗାଁଦି ନାସୁ, 19 ମାରି, ପବିତ୍ର ବାଡିଦୁ ସେବାକିନି ଉଣ୍ତିଙ୍ଗ୍‌ ନେଗି ଆଙ୍ଗିଁ, ଇର୍ରିଙ୍ଗା, ହାରୋଣ ଜାଜକଦି ଉଣ୍ତିଙ୍ଗ୍‌ ପବିତ୍ର ଆଙ୍ଗିଁ ମାରି ଜାଜକ ପାଣିଦି ଉଣ୍ତିଙ୍ଗ୍‌ ୱାନି କୋଡ଼ରି ଆଙ୍ଗିଙ୍ଗ୍‌, ଇୟା ୱିଜୁ ତିଆର୍‌ କିନିଦେର୍‌ ।

20 ଇୟାୱେନ୍‌କା ଇସ୍ରାଏଲ ୱିଜୁ ଲୋକୁ ମୋଶାଦି ଆଗ୍‌ଡ଼ିରାନ୍‌ ସର୍ହାର୍‌ । 21 ମାରି, ଏମେୱାନି ମୋନ୍‌ ଆମାୱାନିଙ୍ଗ୍‌ ଇର୍ହାତ୍‌ ମାରି ଆମାୱାନି ଆତ୍ମା ଇଛା କିନାତ୍‌, ୱାର୍‌ ମିସାନି ଗୁଡ଼ା ତିଆର୍‌ କିଦେଙ୍ଗ୍‌ ମାରି ଆବେଣି ୱିଜୁ ପାଣି ମାରି ପବିତ୍ର ଆଙ୍ଗିଁ ଉଣ୍ତିଙ୍ଗ୍‌ ପ୍ରବୁଦି ମାନୁ ଦାନ୍‌ ତାତାର୍‌ । 22 ମାରି, ମେମାର୍‌କୁ ମାରି ଆଇମେକ୍‌ ଏସୋ ଲୋକୁ ନିଜେ ମୋନ୍‌ତାନ୍‌ ମାର୍ହେ, ୱାର୍‌ ୱିଜେରେ ୱାଜି ବାସ୍‌ୱେଙ୍ଗ୍‌, ପାଗ୍‌ଡ଼େଙ୍ଗ୍‌, ୱେତରି ମାରି ପୁସେଙ୍ଗ୍‌ ୱିଜୁ ବାଙ୍ଗାରାମ୍‌ ସରେଙ୍ଗ୍‌ ୱିଜୁ ତାତାର୍‌; ୱିଜୁ ଲୋକୁ ପ୍ରବୁଦି ଉଣ୍ତିଙ୍ଗ୍‌ ବାଙ୍ଗାରାମ୍‌ ଦାନ୍‌ ସିତାର୍‌ । 23 ମାରି, ଆମାୱାରି ଲାକ୍‌ତୁ ନିଡ଼ି ମାରି ସେର୍‌ଗା ରଙ୍ଗ୍‌ ମାରି ଏରାନି ରଙ୍ଗ୍‌ ମାରି ଅଡ଼ିନିକା ମାରି ଟେରିକଟ୍‌ ନୁଲୁ ମାରି ଗରିଆ ପିଲାଦି ତଲୁ ମାରି ନେତେର୍‌ ଆତି ମେଣ୍ଡା ତଲୁ ମାରି କଡ଼୍‌କି ପିଲାଦି ତଲୁ ମାର୍ହାତ୍‌, ୱାର୍‌ ୱିଜେରେ ଆକା ତାତାର୍‌ । 24 ମାରି, ଆମାକାର୍‌ ୱେଣ୍ତି କି ପିତଲ୍‌ ଦାନ୍‌ କିତାର୍‌, ୱାନ୍‌ ପ୍ରବୁଦି ଦାନ୍‌ ତାତାନ୍‌; ମାରି ଆମାୱାନି ଲାକ୍‌ତୁ ସେବାଦି ଏମେବା ପାଣିଦି ଉଣ୍ତିଙ୍ଗ୍‌ ଆକିସିଆ ମାରାନ୍‌ ମାର୍ହାତ୍‌, ୱାନ୍‌ ଆକା ତାତାନ୍‌ । 25 ବୁଦିଦି ଆଇମେକ୍‌ ନିଜେ ନିଜେ କିୟୁଦାନ୍‌ ନୁଲୁ କୋୟ୍‌ଜି ନିଡ଼ିଦିକା, ଏରାନିକା ମାରି ଅଡ଼ିନି ଟେରିକଟ୍‌ ନୁଲୁ ତାତେ । 26 ମାରି, ଆମା ଆଇମେକା ମନ୍‌ ବୁଦିଦୁ ମାର୍ହାତ୍‌, ୱାକ୍‌ ୱିଜୁ ଗରିଆ ବୁର୍‌ବୁସାଦି ନୁଲୁ କୋୟ୍‌ତେ । 27 ମାରି, ନେତାର୍‌ ଏପୋଦ ମାରି ବକାଦିସାଜୁ ଉଣ୍ତିଙ୍ଗ୍‌ ଗୋମେଦଦି କଚନାର୍ଥକ ମଣି, 28 ମାରି ଦିୱା ମାରି ଅବିସେକ୍‌ତି ନିୟୁ ମାରି ବାସ୍‌ନା ଦୁପ୍‌ଣି ଉଣ୍ତିଙ୍ଗ୍‌ ନେଗିବାସ୍‌ନା ଜିନିସ୍‌ ମାରି ନିୟୁ ତାତେ । 29 ଇସ୍ରାଏଲ ଲୋକୁ ନିଜେଦି ବଦାଦାନ୍‌ ପ୍ରବୁଦି ଉଣ୍ତିଙ୍ଗ୍‌ ଦାନ୍‌ ତାତାର୍‌; ପ୍ରବୁ ମୋଶାଦି ମାଣାନ୍‌ ଆମାକା ଆମାକା କିଦେଙ୍ଗ୍‌ ମାଟା ଇର୍ହା ମାର୍ହାନ୍‌, ଆବେଣି ଇନି ରକମ୍‌ତି ପାଣି କିଦେଙ୍ଗ୍‌ ଆମା ଆମା ମେମାର୍‌ରିଙ୍ଗ୍‌ ମାରି ଆଇମେକା ମୋନ୍‌ ଇଛା କିତାର୍‌, ୱାର୍‌ ୱିଜୁ ଲୋକୁ ଦାନ୍‌ ତାତାର୍‌ ।

30 ମୋଶା ଇସ୍ରାଏଲ ଲୋକାଙ୍ଗ୍‌ ମାରି ଇର୍ହାନ୍‌, "ସୁଡ଼ୁଦୁ, ପ୍ରବୁ ଜିହୁଦା କୁଟୁମ୍‌ଦି ହୁରିଦି ନାତି ଊରିଦି ମାରିନ୍‌ ବତ୍ସଲେଲଦିଙ୍ଗ୍‌ ଦର୍‌ ଆସ୍‌ସି କୁକ୍‌ତାମାନାନ୍‌ ।" 31 ମାରି, ୱାନିଙ୍ଗ୍‌ ଜ୍ଞାନ୍‌, ବୁଦି, ବିଦ୍ୟା ମାରି ପାଣି କିଦେଙ୍ଗ୍‌ ଆଟ୍‌ନି ମାପୁରୁଦି ଆତ୍ମାଦାନ୍‌ ପୁରା କିଜି 32 ସିତ୍ର ପାଣି ମାରି ବାଙ୍ଗାରାମ୍‌, ୱେଣ୍ତି ମାରି ପିତଲ୍‌ ପତ୍‌ନିକା 33 ମାରି କଚନାର୍ଥକ ମଣିକର୍ତ୍ତନ ମାରି ୱିଜୁ ପାଣି କିନି ଉଣ୍ତିଙ୍ଗ୍‌ ୱେର୍‌ଗୁ ପତ୍‌ନିକା, ଇୟା ୱିଜୁ ପାଣି କିନି ଉଣ୍ତିଙ୍ଗ୍‌ ୱାନିଙ୍ଗ୍‌ ବୁଦି କିତାମାନାନ୍‌ । 34 ମାରି ସିକ୍‌ୟା ସିଦେଙ୍ଗ୍‌ ୱାନି ମାରି ଦାନ୍‌ କୁଡ଼ାଦି ଅହିସାମକଦି ମାରିନ୍‌ ଅହଲିୟାବର ମୋନ୍‌ତୁ ବୁଦି ସିତାନ୍‌ । 35 ମାରି ପତ୍‌ନି ମାରି ପାଣି କିନି ଉଣ୍ତିଙ୍ଗ୍‌, ମାରି, ନିଡ଼ି ମାରି ସେର୍‌ଗା ରଙ୍ଗ୍‌ ଏରାନି ରଙ୍ଗ୍‌ ମାରି ଅଡ଼ିନି ନେଗି ନୁଲୁଦାନ୍‌ ନେଗି ପାଣି ମାରି ଗୁତ୍‌ନି ପାଣି କିନି ଉଣ୍ତିଙ୍ଗ୍, ଇର୍ରିଙ୍ଗା, ୱିଜୁଦିନ୍‌ତୁ ପାଣି ମାରି ସିତ୍ର ପାଣି କିନି ଉଣ୍ତିଙ୍ଗ୍‌ ୱାରି ମୋନ୍‌ତିଙ୍ଗ୍‌ ଜ୍ଞାନ୍‌ଦାନ୍‌ ପୁରା କିତାମାନାନ୍‌ ।