1 ଇୟାୱେନ୍‌କା ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ମିର୍‌ ଫାରୋ ଲାକ୍‌ତୁ ସଲସି ୱାନିଙ୍ଗ୍‌ ଇନ୍‍ଡ୍ରୁ, ସଦାପ୍ରବୁ ଇୟା ମାଟା ଇଜିନାନ୍‌, ମାଙ୍ଗିଁ ସେବା କିନି ଉଣ୍ତିଙ୍ଗ୍‌ ମା ଲୋକାଙ୍ଗ୍‌ ଡ଼ିସ୍‌ସୋ ସିଦା । 2 ଜଦି ନିନ୍‌ ୱାରିଙ୍ଗ୍‌ ଡ଼ିସ୍‌ନି ଉଣ୍ତିଙ୍ଗ୍‌ ଇଛା କିଏଜିନି, ଆର୍‌ତିଙ୍ଗ୍‌ ସୁଡ଼ୁଆ, ମାପ୍‌ କାପୋକିଙ୍ଗା ମାଣାନ୍‌ ମି ୱିଜୁ ଦେସ୍‌ତୁ ଦଣ୍ଡ୍‌ ସିନାପ୍‌ । 3 ନିଲ ଗାଡାଦୁ ବର୍ତି ଆନେ କାପୋକିଙ୍ଗ୍‌, ଆବେଟ୍‌କୁ ୱିଜୁ କାପୋକିଙ୍ଗ୍‌ ନିଙ୍ଗ୍‌ଜି ମି ଇଲୁଦୁ ମାରି ଗୁରୁନି ବାକ୍‌ରାଦୁ ମାରି ଗୁରୁନି ବାଡ଼ିଦୁ ମାରି ମି ଦାସରି ଇଲ୍‌କାଙ୍ଗ୍‌ ମାରି ମି ଲୋକା ମୁସୁକୁ ମାରି ମି ସିସୁଗୁଟାଦୁ ମାରି ମି ଜାୱା ସାଟିଦୁ ଡ଼ୁଗୁନେ; 4 ମାରି ନିଙ୍ଗିଁ ମାରି ନି ଲୋକାଙ୍ଗ୍‌ ମାରି ଦାସରି ମୁସୁକୁ କାପୋକିଙ୍ଗ୍‌ ଗାତ୍‌ନେ ।" 5 ଇୟାୱେନ୍‌କା ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ହାରୋଣଙ୍ଗ୍‌ ଇନିଆ, ନିନ୍‌ ଗାଡାଦୁ, ନାଡ଼ୁଦୁ ମାରି ବାନ୍ଦୁଙ୍ଗା ମୁସୁକୁ ନିଜେଦି ବାଡିଗା ପେର୍‌ଜି ମିସର ଦେସ୍‌ ମୁସ୍‌କୁ କାପୋକିଙ୍ଗ୍‌ ତାପିସ୍‌କିଆ ।" 6 ଆବେଟ୍‌କୁ ହାରୋଣ ମିସରଦି ୱିଜୁ ଏରୁ ମୁସୁକୁ ନିଜେଦି କିୟୁ ପେର୍‌ତାନ୍‌, କାପୋକିଙ୍ଗ୍‌ ସୋସି ମିସର ଦେସ୍‌ତୁ ସାରିତେ ସର୍ହେ । 7 ନାସ୍ତିୱାଲେ ଗୁରୁ ଗୁଣିଆର୍‌ ନିଜେଦି ମାୟାଦାନ୍‌ ଆୟାୱାଜା କିଜି ମିସର ଦେସ୍‌ ମୁସୁକୁ କାପୋକିଙ୍ଗ୍‌ ତାତାର୍‌ ।

8 ଆବେଟ୍‌ ଫାରୋ ମୋସେଙ୍ଗ୍‌ ନି ହାରୋଣଙ୍ଗ୍‌ କୁକ୍‌ସି ଇର୍ହାନ୍‌; ମା ମାଣାନ୍‌ ମାରି ମା ଲୋକାବାଣାନ୍‌ ଇୟାୱିଜୁ କାପୋକିଙ୍ଗ୍‌ ଆକୋ କିନି ଉଣ୍ତିଙ୍ଗ୍‌ ସଦାପ୍ରବୁଦି ଲାକ୍‌ତୁ ପାର୍‌ତନା କିଦୁ; ଆବେଟ୍‌କୁ ମାପ୍‌ ସଦା ପ୍ରବୁଦି ଉଦେସ୍‌ତାନ୍‌ ପୁଜା କିନି ଉଣ୍ତିଙ୍ଗ୍‌ ଲୋକାଙ୍ଗ୍‌ ଡ଼ିସ୍‌ନା ସିନାପ୍‌ । 9 ଆଦେଙ୍ଗ୍‌ ମୋଶା ପାରୋଙ୍ଗ୍ ଇର୍ହାନ୍‌, "ନା ମୁସୁକୁ ଡ଼ିସ୍‌ଆ; କାପୋକିଙ୍ଗ୍‌ ୱିଜୁ ଏଣ୍ଡେସ୍‌ଗି ମି ମାଣାନ୍‌ ମାରି ମି ଇନ୍‌ଡ୍ରଣାନ୍‌ ସଲ୍‌ସି ଗାଡାଦୁ ତେବାନେ, ନିଜେଦି ମାରି ନିଜେଦି ଦାସରିଙ୍ଗ୍‌ ମାରି ଲୋକା ୱିଜେରି ଉଣ୍ତିଙ୍ଗ୍‌ ସଦାପ୍ରବୁଦି ଲାକ୍‌ତୁ ଏସେଙ୍ଗ୍‌ ଇୟା ପାର୍‌ତନା କିନା ?"

10 ୱାନ୍‌ ଇର୍ହାନ୍‌, ୱିଗେରିଙ୍ଗ୍‌ କିଆ । ନାସ୍ତିୱାଲେ ମୋଶା ଇର୍ହାନ୍‌, ମା ସଦାପ୍ରବୁ ମାପୁରୁଦି ୱାଜା ଏନ୍‌ ସିଲେନ୍‌, ଇୟାକା ଏଣ୍ଡେସ୍‌ଗି ନିନ୍‌ ନେସ୍‌ନି, ଇୟାଉଣ୍ତିଙ୍ଗ୍‌ ନି ମାଟା ଇସାବ୍‌ଦାନ୍‌ ଆପିତ୍‌ । 11 କାପୋକିଙ୍ଗ୍‌ ନିବାଣାନ୍‌ ମାରି ମି ଇନ୍‌ଡ୍ରଣି ଦାସର୍‌ ମାରି ୱିଜୁ ଲୋକାଦି ମାଣାନ୍‌ ଆକୋ ଆଜି ଗାଡାଦୁ ମାନ୍‌ଜିନେ । 12 ଇୟାୱେନ୍‌କା ମୋଶା ମାରି ହାରୋଣ ଫାରୋଦି ଲାକ୍‌ତୁରାନ୍‌ ସୋସି ସର୍ହାର୍‌; ମାରି, ମୋଶା ଫାରୋଦି ବିରୁଦ୍‌ତାନ୍‌ ଆୟା କାପୋକିଙ୍ଗା ବିସୟ୍‌ଦାନ୍‌ ସଦାପ୍ରବୁଦି ଲାକ୍‌ତୁ ପ୍ରାର୍ଥନା କିତାନ୍‌ । 13 ଆବେଟ୍‌କୁ ସଦାପ୍ରବୁ ମୋଶାଦି ମାଟା ଇସାବ୍‌ଦାନ୍‌ କିତାନ୍‌, ଇନ୍‌ଡ୍ର, ଦୁୱାର୍‌ତୁ ମାରି କିଡ଼ିଇଦୁ ୱିଜୁ କାପୋକିଙ୍ଗ୍‌ ସାତେ । 14 ଆବେଟ୍‌କୁ ଲୋକ୍‌ ଆୟ ୱିଜୁ ଉନ୍‌ଡ୍ରେବାନୁ କିଜି ଗାଦା କିତାର୍‌, ଦେସ୍‌ ୱିଜୁ କାପୁ ଆତାତ୍‌ । 15 ମାତର ରାଜା ଫାରୋ କାସ୍ଟୁ ଗୁସାନିକା ସୁଡ଼ୁଜି ସଦାପ୍ରବୁଦି ବାକ୍ୟ ଇସାବ୍‌ତାନ୍‌ ୱାନି ଜିବନ୍‌ ଆଟ୍‌ୱା କିତାନ୍‌ ମାରି ୱାରି ମାଟାଦିଙ୍ଗ୍‌ ମନ୍‌ ସିଏତାନ୍‌ ।

16 ଆବେନୁ ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ହାରୋଣଙ୍ଗ୍‌ ଇନ୍‌ଆ, ୱିଜୁ ମିସର ଦେସ୍‌ତୁ ଏଣ୍ଡେସ୍‌ଗି ପେନୁକୁ ଆନେ, ଇୟାଉଣ୍ଡିଙ୍ଗ୍‌ ମି ନିଜେଦି ବାଡିଗା ଫେର୍‌ଜି ବୁମିଦୁ ଡାକ୍‌ଆ ।" 17 ଆବେନୁ ୱାର୍‌ ଆୟାୱାଜା କିତାର୍‌; ହାରୋଣ ବାଡିଗା କିୟୁ ପେର୍‌ଜି ବୁମିଦୁ ଡାକ୍‌ତିଙ୍ଗ୍‌, ଲୋକାଙ୍ଗ୍‌ ମାରି ଜାତୁଙ୍ଗାଁ ମେଣ୍ତେଙ୍ଗ୍‌ମାନ୍ଧାଦୁ ପେନୁକୁ ଆତେ; ମାରି ମିସର ଦେସ୍‌ତି ବୁମିଦି ୱିଜୁ ଦୁଡ଼ି ପେନୁକୁ ଆତେ । 18 ନାସ୍ତିୱାଲେ ଗୁରୁ ଗୁଣିଆର୍‌ ନିଜେ ନିଜେଦି ମନ୍ତ୍ରଦାନ୍‌ ଆୟାୱାଜା ପେନୁକୁ କିଦେଙ୍ଗ୍‌ ମନ୍ତ୍ର କିତାର୍‌, ମାତର ଆଟ୍‌ଏତାର୍‌; ଆବେଣାନ୍‌ ଲୋକାଙ୍ଗ୍‌ ମାରି କଡିଙ୍ଗ୍‌ ଗରିଏଙ୍ଗାଁ ମୁସୁକୁ ପେନୁକୁ ଆତେ । 19 ଆଦେଙ୍ଗ୍‌ ଗୁରୁ ଗୁଣିଆର୍‌ ରାଜା ପାରୋଙ୍ଗ୍ ଇର୍ହାର୍‌, "ଇୟାକା ତୋ ମାପୁରୁଦି କିୟୁଦି ପାଣି;" ଇରିଙ୍ଗାବା ସଦାପ୍ରବୁଦି ମାଟା ଇସାବ୍‌ଦାନ୍‌ ଫାରୋଦି ଜିବନ୍‌ ଆଟ୍‌ୱା ଆତାତ୍‌, ମାରି ୱାନ୍‌ ମାଟାଦିଙ୍ଗ୍‌ ମନ୍‌ସିଏତାନ୍‌ ।

20 ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ନିନ୍‌ ସାଲ୍‌ଦି ନିଙ୍ଗିଁଜ ଫାରୋ ଆଗ୍‌ଡ଼ି ନିଲ୍‌ଆ; ସୁଡ଼ୁଆ, ୱାନ୍‌ ଏରୁ ଲାକ୍‌ତୁ ୱାତିଙ୍ଗାଁ, ନିନ୍‌ ୱାନିଙ୍ଗ୍‌ ଇୟା ମାଟା ଇନ୍‌ଆ, ସଦାପ୍ରବୁ ଇଜିନାନ୍‌, ମା ପୁଜା କିନି ଉଣ୍ତିଙ୍ଗ୍‌ ମା ଲୋକାଙ୍ଗ୍‌ ଡ଼ିସ୍‌ଆ । 21 ମାରି ଏସେଙ୍ଗ୍‌ ମା ଲୋକାଙ୍ଗ୍‌ ଡ଼ିସ୍‌ଏନ୍‌, ଆଦେଙ୍ଗ୍‌ ମାପ୍‌ ମି ମୁସୁକୁ ମାରି ମି ଦାସ୍‌ରି ମୁସୁକୁ ମାରି ଲୋକା ମୁସୁକୁ ମାରି ମି ଇଲୁ ଲୋଇ ଇୟାୱାଜା ସାପିସ୍‌ କିନି କରିୱିଞ୍ଜା ପକ୍‌ତାନାପ୍‌ ଜେ, ଆୟା ମାଣାନ୍‌ ମିସ୍ରିୟରି ଇଲୁ ମାରି ବାସାଦି ବୁମିଦୁ ପୁରାବର୍ତି ଆନେ । 22 ମାରି ଦେସ୍‌ ଲଇ କେବଲ ମାପ୍‌ନେ ସଦାପ୍ରବୁ, ଇୟାକା ମିଙ୍ଗିଁ ନେସ୍‌ପିସ୍‌ କିନି ଉଣ୍ତିଙ୍ଗ୍‌ ଆୟା ଦିନାମ୍‌ ମା ଲୋକା ବାଡି ଗୋଶନ ଦେସ୍‌ ୱେର୍‌ଏ କିନାପ୍‌; ଆବେନୁ ସାପିସ୍‌ କିନି କରିୱିଞ୍ଜେଙ୍ଗ୍‌ ଆଉ । 23 ମାପ୍‌ ମା ଲୋକାଙ୍ଗ୍‌ ମାରି ମି ଲୋକା ମାଣାନ୍‌ ୱେର୍‌ଏ କିନାପ୍‌; ୱିଗେ ଇୟା ସିନା ଆନାତ୍‌ ।" 24 ସଦାପ୍ରବୁ ଆୟାୱାଜା କିତାନ୍‌; ଆବେନୁ ଫାରୋଦି ମାରି ୱାନି ଦାସ୍‌ରି ଇଲ୍‌କାଙ୍ଗ୍‌ ସାପିସ୍‌ କିନି କରିୱିଞ୍ଜେଙ୍ଗ୍‌ ଇତେ; ମାରି ୱିଜୁ ମିସର ଦେସ୍‌ ସାପିସ୍‌ କିତି ମାଣାନ୍‌ ନାଷ୍ଟୁ ଆତାତ୍‌ । 25 ନାସ୍ତିୱାଲେ ରାଜା ଫାରୋ ମୋସେଙ୍ଗ୍‌ ମାରି ହାରୋଣଙ୍ଗ୍‌ କୁକ୍‌ସି ଇର୍ହାନ୍‌, "ମିର୍‌ ସଲସି ଇୟା ଦେସ୍‌ତୁ ମି ମାପୁରୁଦି ଉଣ୍ତିଙ୍ଗ୍‌ ପୁଜା କିଦୁ ।"

26 ଆବେଟ୍‌ ମୋଶା ଇର୍ହାନ୍‌, ଆୟାୱାଜା କିତିଙ୍ଗାବା ନେଗେନ୍‌ ସିଲେ; ଇର୍ରିଙ୍ଗା ଆକା କିତିଙ୍ଗା, ମା ସଦାପ୍ରବୁ ମାପୁରୁଦି ଉଣ୍ତିଙ୍ଗ୍‌ ମିସ୍ରିୟରି କାଡ଼୍‌ନି ପୁଜା କିଦେଙ୍ଗ୍‌ ଆନାତ୍‌; ସୁଡ଼ୁଆ, ମିସ୍ରିୟରି ଆଗ୍‌ଡ଼ି ୱାରିଙ୍ଗ୍‌ କାଡ଼୍‌ନି ପୁଜା କିତିଙ୍ଗା, ୱାର୍‌ ନେ ମାଙ୍ଗିଁ କାଲ୍‌କୁ ଡାକ୍‌ସି ଡାକ୍‌ଏର୍‌ ନୋ ? 27 ଆଦେଙ୍ଗ୍‌ ମାପ୍‌ ମୁଣ୍ତ୍ରି ଦିନ୍‌ଦି ସାରି ସଲୋସି ମାଙ୍ଗିଁ ସଦାପ୍ରବୁ ମାପୁରୁ ଆମା ମାଟା ସିନାନ୍‌, ଆୟା ଇସାବ୍‌ଦାନ୍‌ ମାପୁରୁଦି ଉଣ୍ତିଙ୍ଗ୍‌ ପୁଜା କିନାପ୍‌ ।

28 ଆବେନୁ ଫାରୋ ଇର୍ହାନ୍‌, ମାପ୍‌ ମିଙ୍ଗିଁ ଡ଼ିସ୍‌ନାପ୍‌, ମିର୍‌ ବାଲିବାଟାଦୁ ସଲ୍‌ସି ନିଜେଦି ସଦାପ୍ରବୁ ମାପୁରୁଦି ଉଣ୍ତିଙ୍ଗ୍‌ ପୁଜା କିଦୁ; ମାତର ନାଣ୍ଡ ଆକ ସଲ୍‌ମାଟ୍‌, ମାରି ମାଉଣ୍ଡିଙ୍ଗ୍‌ ପାର୍‌ତନା କିଦୁ ।

29 ମୋଶା ଇର୍ହାନ୍‌, ସୁଡ଼ୁଆ, ନାନ୍‌ ନି ଲାକ୍‌ତୁରାନ୍‌ ସଲ୍‌ସି ସଦାପ୍ରବୁଦି ଆଗ୍‌ଡ଼ି ପ୍ରାର୍ଥନା କିନା, ଆବେନୁ ନିଙ୍ଗିଁ ମାରି ନି ଦାସରିଙ୍ଗ୍‌ ମାରି ନି ଲୋକା ଲାକ୍‌ତୁରାନ୍‌ ୱିଜୁ ସାପିସ୍‌କିନିକା ଆକା କିଆୟ୍ ଆନାତ୍‌; ମାତର ସଦାପ୍ରବୁଦି ଉଣ୍ତିଙ୍ଗ୍‌ ପୁଜା କିନି ଉଣ୍ତିଙ୍ଗ୍‌ ଲୋକାଙ୍ଗ୍‌ ଡ଼ିସ୍‌ନି ବିସୟ୍‌ଦାନ୍‌ ଫାରୋ ମାରିଡ଼େସି ଟକେ କିମାକିନ୍‌ । 30 ଆବେନୁ ମୋଶା ଫାରୋଦି ଲାକ୍‌ତୁରାନ୍‌ ଆତ୍ରେ ସଲ୍‌ସି ସଦାପ୍ରବୁଦି ଲାକ୍‌ତୁ ପ୍ରାର୍ଥନା କିତାନ୍‌ । 31 ଆବେନୁ ସଦାପ୍ରବୁ ମୋଶାଦି ପ୍ରାର୍ଥନା ଇସାବ୍‌ଦାନ୍‌ ଫାରୋଦି ମାଣାନ୍‌, ୱାନି ଦାସର ମାରି ଲୋକା ୱିଜୁ ଲୋକା ମାଣାନ୍‌ ୱିଜୁ ସାପିସ୍‌ କିନି ଦାନିଙ୍ଗ୍‌ ଆକ କିତାନ୍‌; ଉଣ୍ତ୍ରିବା ମାନ୍‌ଏତାତ୍‌ । 32 ଇଲେଇବା ଫାରୋ ନିଜେଦି ଜିବନ୍‌ ଆଟ୍‌ୱା କିତାନ୍‌ ମାରି ଲୋକାଙ୍ଗ୍‌ ସନ୍‌ଡ୍ରେଙ୍ଗ୍‌ ଡ଼ିସ୍‌ଏତାନ୍‌ ।