1 ଆସା କିନି ବିସୟ୍‌ ପୋଇନିକା ପୁରା ନେସ୍‍ନାଟ୍‍ ମାରି ତର୍‌ଇ ବିସୟ୍‍ତି ସତ୍‍ବୁଦି ଆସାନିକା ନେ ବିସ୍‍ବାସ୍‍ । 2 ପୁର୍ବେଦି ଲୋକୁ ୱାରି ବିସ୍‌ବାସ୍‍ଦାନ୍ ମାପୁରୁଦି ୱେଡ଼ିକାଦିଲୋକୁ ଆତାମାର୍ହାର୍‍ । 3 ✝ମାପୁରୁଦି ବାକ୍ୟଦାନ୍ ସାରା ଦୁନିଆ ତିଆର୍‍ ଆତାତ୍‌ ମାରି ସୁଡ଼ିଇ ବିସୟ୍‌ଦାନ୍ ସୁଣି ବିସୟ୍‌ତି ତିଆର୍ ଆତାତ୍‌, ଇୟା ମାଟା ବିସ୍‍ବାସ୍‍ତାନ୍ ମାଡୁ ନେସ୍‌ସିନିକା । 4 ବିସ୍‍ବାସ୍‌ତାନ୍‌ ହେବଲ ମାପୁରୁଦି ଲାକ୍‌ତୁ କୟିନଦି ବାଦ୍‍ଲୁ ନେଗି ପୁଜା କିତାମାର୍ହାନ୍ । ନିଜେଦି ବିସ୍‍ବାସ୍‍ଦାନ୍ ୱାନ୍‌ ମାପୁରୁଦି ମାଡ଼ାନ୍ ଦାର୍ମୁଦିକାନ୍‌ ଇଜି ସାକ୍ୟ ପୋଇତାନ୍‌, ଇରିଙ୍ଗ୍‌ ମାପୁରୁ ନିଜେ ୱାନି ସିତିମାନିପୁଜା ମାନାତାମାରାନ୍ । ୱାନି ବିସ୍‍ବାସ୍ ଉଣ୍ତିଙ୍ଗ୍‌ ହେବଲ ସାତିସରିଙ୍ଗ୍‌ ବା ଇୟାସାନ୍ଦି ୱାର୍‌ଗିଜିନାନ୍ ।

5 ବିସ୍‍ବାସ୍‍ତାନ୍ ହନୋକ ସାନି ମାଡ଼ାନ୍‍କୁ ରକିୟା ପୋଇତାମାରାନ୍ । ମାପୁରୁ ୱାନିଙ୍ଗ୍‌ ନିଜେ ଲାକୁତୁ ଅତାମାରାନ୍ ମାରି ୱାନିଙ୍ଗ୍‌ ଏନ୍‌ ମାରି ସୁଡ଼ୁଦେଙ୍ଗ୍‌ ଆଟ୍‍ଏତାମାର୍ହାର୍‍ । ଦର୍ମସାସ୍ତ୍ରଦୁ ରାସାତାମାନାତ୍‌ ଜେ, ହନୋକ ମାପୁରୁଦି ଲାକୁତୁ ସନି ଆଗ୍‍ଡ଼ି ୱାନି ୱେଡ଼ିକାଦିକାନ୍‌ ଆତାମାର୍ହାନ୍‌ । 6 ବିସ୍‍ବାସ୍‌ତିଙ୍ଗ୍‌ ଡ଼ିସ୍‌ତିଙ୍ଗ୍‌ ଏନ୍‍ ମାପୁରୁଙ୍ଗୁଁ ୱେଡ଼ିକା କିଦେଙ୍ଗ୍ ଆଟ୍ଏନ୍‍, ଇରିଙ୍ଗ୍‌ ଏନ୍‌ ମାପୁରୁଦି ଲାକ୍‌ତୁ ୱାନାନ୍, ୱାନ୍‌ ମାପୁରୁଦିମାନୁ‍ ବିସ୍‌ବାସ୍‌ କିନିକା ଦରକାର୍, ମାପୁରୁ ଜେ ୱାନି ୱେନ୍‌କାସନିୱାରିଙ୍ଗ୍‌ ଆସା ପୁରା କିନାନ୍, ଆକାବା ବିସ୍‍ବାସ୍ କିନିକା ଦରକାର୍ ।

7 ବିସ୍‍ବାସ୍‌ତି ସାକ୍ତିଦାନ୍ ନୋହ ଇନିକା ଅଡ଼୍‌ବିଏଣ୍‌ଗା ଗଟ୍‌ନା ବିସୟ୍‌ତାନ୍‌ ମାପୁରୁଦି ଜାଗ୍‌ରାତାଦି ବାକ୍ୟ ୱେନ୍‌ଡ୍ରେଙ୍ଗ୍‌ ଆଟ୍‍ତାମାର୍‌ଆନ୍‌ । ୱାନ୍‌ ମାପୁରୁଦି ଆଦେସ୍ ମାନାଜି ଉଡ୍ରି ଜାହାଜ୍‌ ତିଆର୍ କିତାନ୍‌ । ଆବେନ୍‌ ୱାନ୍‌ ମାରି ୱାନି ଇଲୁଦିଲୋକ୍‍ ୱିଜୁ ରକ୍‌ୟା ପୋଇତାର୍ । ତାନିବାଦ୍‌ଲୁ ଦେସ୍‍ତିଲୋକୁ ଦଣ୍ତ୍‌ ଆତାର୍‌, ମାତର୍‌ ନୋହ ୱାନି ବିସ୍‍ବାସ୍ ଉଣ୍ତିଙ୍ଗ୍‌ ଦାର୍ମୁଦି ପୁରସ୍କାର୍‌ ପୋଇତାର୍ ।

8 ମାପୁରୁ ଅବ୍ରାହାମଦିଙ୍ଗ୍‌ ଏମେ ଦେସ୍ ସିନା ଇଜି ମାଟା ସିତାମାରାନ୍, ଆୟା ଦେସ୍‍ତୁ ସୋନି ଉଣ୍ତିଙ୍ଗ୍‌ ୱାନ୍‌ ଏସ୍ତିୱାଲେ ୱାନିଙ୍ଗ୍‌ କୁକ୍‍ତାନ୍, ନାସ୍ତିୱାଲେ ଅବ୍ରାହାମ ବିସ୍‍ବାସ୍‍ତାନ୍ ମାପୁରୁଦି ମାଟା ମାନାତା ମାର୍ହାନ୍‍ । ୱାନ୍‌ ଏମେମାନୁ ସୋନାନ୍, ଆକା ନେସ୍‍ଏଜି ବା ନିଜେଦି ଦେସ୍ ଡ଼ିସ୍‍ତା ସର୍ହାନ୍‌ । 9 ୱାନ୍‌ ବିସ୍‍ବାସ୍‍ଦୁ ମାପୁରୁଦି ସିତିମାନି ଦେସ୍‌ତୁ ଆଇଦେସ୍‍ତିକାନ୍‍ ୱାଜା ବାସା କିତାନ୍‍ । ୱାନ୍‌ ଗୁଡ଼ାଦୁ ବାସା କିତାନ୍ ମାରି ୱାନି ୱାଜା ମାପୁରୁଦିମାଡ଼ାନ୍ ପାର୍‌ମାଣ୍‌ ଆଜି ଇସ୍‍ହାକ୍‍ ନି ଜାକୁବ ବା ଆୟାୱାଜା ଗୁଡ଼ାଦୁ ବାସା କିତାମାର୍ହାର୍‌ । 10 ଏମେ ୱିଜୁଦିନ୍‍ତି ଗାଡ଼୍‌ ମାପୁରୁଦି ମାଡ଼ାନ୍ ରସ୍‌ତିକାନ୍‌ ନି ତିଆର୍‌କିତିକାନ୍‌, ଅବ୍ରାହାମ ଆୟା ଗାଡ଼୍‌ତିଙ୍ଗ୍‌ କାପ୍‍କିଜି ମାରାନ୍‌ ।

11 ଜଦିବା ସାରା କଡ଼ର୍‌ଆଇଲି ଆନିକା ସିଲେତାତ୍, ବିସ୍‌ବାସ୍‌ତି ସାକ୍ତିଦାନ୍‌ ଅବ୍ରାହାମ ଡକ୍ରା ବୟସ୍‍ତୁ ବା ବୁବା ଆଦେଙ୍ଗ୍‌ ଆଟ୍‌ତା ମାର୍ହାନ୍‌ । ମାପୁରୁ ୱାନି ମାଟା ରକିୟା କିନାନ୍ ଇଜି ଅବ୍ରାହାମତି ବିସ୍‍ବାସ୍ ମାରାତ୍ । 12 ଅବ୍ରାହାମ ସାନି ୱାଜା ଆତିମାରିଙ୍ଗ୍‌ ବା ୱାନିମାଡ଼ାନ୍‌କୁ ବାଦଡ଼ଦି ସୁକେଙ୍ଗ୍‌ ମାରି ସାମ୍‌ଦୁରୁତି ବାଲି ୱାଜା ଲେକିସ୍‍ତେଙ୍ଗ୍‍ ଆଟ୍‍ଇ କୁଟୁମ୍‌ ଜନମ୍‌ ଆତାର୍‌ ।

13 ଇୟାୱିଜୁ ଲୋକୁ ନିଜେଦି ବିସ୍‍ବାସ୍‍ତୁ ଆଟୁୱା ତେବାଜି ସାତାସର୍ହାର୍‌ । ମାପୁରୁ ପାର୍‌ମାଣ୍‌ କିତିମାନି ବିସୟ୍‌ୱିଜୁ ୱାର୍‌ ପୋଇଦେଙ୍ଗ୍‌ ଆଟ୍ଏତିଙ୍ଗ୍‌ ବା ଆକରାନ୍ ଆକା ସୁଡ଼ିଜି କୁକ୍‌ନିକା କିତାମାର୍ହାର୍‌ ମାରି ଇୟା ଜଗତ୍‌ଦୁ ୱାର୍‌ କେବଲ ଆଇଦେସ୍‍ତିକାର୍‍ ମାରି ଆଇମାନୁବାସାନିକାର୍‍ ଇଜି ମାନାତା ମାର୍ହାର୍‌ । 14 ଏମେକାର୍ ଇୟାୱାଜା ମାଟା ଇନାର୍, ୱାର୍‌ ମାରି ଉଣ୍ତ୍ରି ନିଜେଦିବୁମିଦିଙ୍ଗ୍‌ ପୋଇଜିନାର୍ ଇଜି ନେସ୍‍ତେଙ୍ଗ୍ ଆନାତ୍‌ । 15 ୱାର୍‌ ଏମେ ଦେସ୍ ଡ଼ିସ୍‍ତା ୱାତାର୍‍ମାରାର୍, ଆୟା ଦେସ୍‍ତିଙ୍ଗ୍ ମାରି ଏତ୍‌ କିଏଜି ମାର୍ହାର୍‌ । ଜଦି ଏତ୍‌ କିତାର୍‍ମାନ୍ଦି, ଆର୍‌ତିଙ୍ଗ୍‌ ଆବେନ୍‌ ୱାର୍‌ ଡ଼େସି ସନ୍‍ଡ୍ରେଙ୍ଗ୍‌ ସୁଜୋଗ୍‌ ପୋଇତାର୍‍ମାନ୍ଦି । 16 ମାତର୍‌ ୱାର୍‌ ଉନ୍‍ଡ୍ରି ନେଗି ଦେସ୍‍ତୁ, ଅର୍ତାତ୍ ମୁସ୍‌କୁପୁର୍‌ତି ଦେସ୍‍ତୁ ସନି ଉଣ୍ତିଙ୍ଗ୍‌ ବଦା କିଜିମାରାର୍ । ଆଦେଙ୍ଗ୍‌ ୱାର୍‌ ମାପୁରୁଙ୍ଗୁଁ ନିଜେଦି ମାପୁରୁ ଇଜି ମାନାଜିନି ମାଡ଼ାନ୍ ୱାନ୍‌ ସେମାର୍ ଆଏନ୍‌ ମାର୍‌ର୍ହାନ୍‌ । ମାପୁରୁ ୱାରି ଉଣ୍ତିଙ୍ଗ୍‌ ଉନ୍‍ଡ୍ରି ଗାଡ଼୍‌ ତିଆର୍ କିଜି ଇଟ୍‌ତାମାନାନ୍‌ ।

17 ମାପୁରୁ ଅବ୍ରହାମତି ବିସ୍‍ବାସ୍ ପରିକା କିନିୱାଲେ ଅବ୍ରାହାମ ନିଜେ ମାରିନ୍‌ ଇସ୍‌ହାକ୍‌ତିଙ୍ଗ୍‌ ପୁଜାୱାଜା ସିଦେଙ୍ଗ୍‌ ତିଆର୍ ଆତାନ୍‌ । ମାପୁରୁ ଅବ୍ରାହାମତିଙ୍ଗ୍ ନେ ୱାନି ପାର୍‌ମାଣ୍‌ ମାଟା ସିତାମାର୍‌ର୍ହାନ୍‌, ମାରିବା ଅବ୍ରାହାମ ନିଜେଦି ଅରେନ୍ ମାରିନ୍‌ତିଙ୍ଗ୍‌ ପୁଜାୱାଜା ସିଦେଙ୍ଗ୍‌ ତିଆର୍ ଆତାନ୍‌ । 18 ମାପୁରୁ ୱାନିଙ୍ଗ୍‌ ଇର୍ହାମାରାନ୍, "ନାନୁ ନିଙ୍ଗିଁ ଏମେ କୁଟୁମ୍‍ ସିନା ଇଜି ମାଟା ସିତାମାନାନ୍‌, ଆକା ଇସ୍‌ହାକ୍‌ଦି ମାଡ଼ାନ୍ ନେ ଜନମ୍‍ ଆନାର୍ ।" 19 ମାପୁରୁ ଜେ ଇସ୍‌ହାକତିଙ୍ଗ୍ ସାତିମାଡ଼ାନ୍ ଜିବନ୍‌ କିଦେଙ୍ଗ୍‌ ଆଟ୍‌ନାନ୍‍, ଇୟା ବିସ୍‍ବାସ୍ ଅବ୍ରାହାମଦି ମାରାତ୍ । ସତ୍‍ତାନ୍‍, ଅବ୍ରାହାମ ଇସ୍‌ହାକ ସାତିମାଡ଼ାନ୍ ଡ଼େସି ଜିବନ୍‌ ପୋଇତାମାନାନ୍‍ ଇଜି କାତାଦି ୱାଜା ୱେର୍‍ତିଙ୍ଗ୍‍ ଇକା ବୁଲ୍‍ ଆଏତ୍‍ ।

20 ଇସ୍‍ହାକ୍‍ ନିଜେଦି ବିସ୍‍ବାସ୍‌ତି ବପୁଦାନ୍‌ ଜାକୁବ ମାରି ଏସୌଦି ଅଡ଼୍‍ବିଜି ନେଗିତାନି ଉଣ୍ତିଙ୍ଗ୍‌ ଆସିର୍ବାଦ୍‌ କିତାନ୍ ।

21 ବିସ୍‍ବାସ୍‍ତାନ୍ ନେ ଜାକୁବ ସାନି ପୁର୍ବେ ଜୋସେପ୍‌ତି ରିଏରି ମାରିସିରିଙ୍ଗ୍ ଆସିର୍ବାଦ୍‌ କିତାମାରାନ୍ । ୱାନ୍‌ ନିଜେଦି ବାଡିଗାଦି ଆଡ୍‍ଗି ପାଡ଼୍‌ଗିଜି ମାପୁରୁଦି ପାର୍‌ତନା କିତାମାର୍ହାନ୍ ।

22 ଜୋସେପ୍‌ ସାନି ୱାଲେ ୱାନି ବିସ୍‍ବାସ୍‌ତି ବପୁଦାନ୍‌ ଇସ୍ରାଏଲ୍‌ ଲୋକାଦି ମିସର ଦେସ୍‍ତାନ୍ ସର୍‌ଇ ବବିସତ୍‍ ମାଟା ଇର୍ହାମାର୍ହାନ୍‌ ମାରି ୱାନି ମାଡ଼ା ଏଣ୍ତେସ୍‌ ନେଗେନ୍‌ ପୋକ୍‌ନାର୍‌, ଆୟାଉଣ୍ତିଙ୍ଗ୍‌ ଆଦେସ୍ ୱେର୍‌ତାମାରାନ୍ ।

23 ବିସ୍‍ବାସ୍‍ତାନ୍ ମୋସାଦି ବୁବା ୟାୟା ୱାନିଙ୍ଗ୍‌ ଜନମ୍‌ତାନ୍‌ ମୁଡ୍ରି ଲେଜୁକୁ ସାନ୍ଦି ଆଡ଼ାକ୍‌ତା ଇଟ୍‍ତାମାରାର୍ । ଇସ୍ରି କଡ଼ଦିଙ୍ଗ୍‌ ସୁନ୍ଦର୍‌ ସୁଡ଼ିଜି ୱାର୍‌ ରାଜେଙ୍ଗ୍ ବା ଅମାନ୍ୟ କିଦେଙ୍ଗ୍ ତିଲାଏଜି ମାର୍ହାର୍‌ ।

24 ମୋସା ବୟସ୍‌ ଆତି ୱେନ୍‌କା ବିସ୍‍ବାସ୍‌ତି ବପୁଦାନ୍‌ ରାଜାଦି ଗାଡ଼୍‌ସିଦି ମାରିନ୍‌ ଇଜି ପରିଚୟ୍‌ ଆଦେଙ୍ଗ୍‌ ମନା କିତାନ୍‍ । 25 ପାପ୍‌ତୁ ତେବାଜି ଏସ ବେଡ଼ା ଜିବନ୍‌ ଜିନି ବାଦ୍‍ଲୁ ମାପୁରୁଦି ଲୋକା ୱାଲେ ଦୁଃକ୍‌ବୋଗ୍‌ କିଦେଙ୍ଗ୍‌ ୱାନ୍‌ ବଦାକିତା ମାର୍ହାନ୍‌ । 26 ୱାନ୍‌ ମିସର୍‍ ଦେସ୍‍ତି ୱିଜୁ ଦନ୍‌ ବାଦ୍‍ଲୁ ମସିହଦି ଉଣ୍ତିଙ୍ଗ୍‌ କାଡ଼ାୟ୍‍ଆନିକା ନେଗେତ୍‌ ଇଜି ଏତ୍‌କିତାନ୍‌, ଇରିଙ୍ଗ୍‌ ୱାନ୍‌ ପୁରସ୍କାର୍‌ତି ଉଣ୍ତିଙ୍ଗ୍ ‌ୱାନି ଆସା ମାରାତ୍ ।

27 ବିସ୍‌ବାସ୍‌ତାନ୍‌ ମୋସା ରାଜାଦି ରିସାଦିଙ୍ଗ୍ ତିଲାଏଜି ମିସର୍‍ ଦେସ୍ ଡ଼ିସ୍‍ତା ସର୍ହାନ୍‌; ସତେ ଏଣ୍ତେସ୍ ୱାନ୍‌ ସୁଡ଼ୁଇ ମାପୁରୁଙ୍ଗୁଁ ସୁଡ଼ିଜିମାରାନ୍; ଆଦେଙ୍ଗ୍‍ଁ ଡ଼େସି ସଲ୍‌ଏଣ୍‌ଗା କେଏତା ମାର୍ହାନ୍‌ । 28 ବିସ୍‍ବାସ୍‍ତାନ୍‌ ୱାନ୍‌ ନିସ୍ତାର୍‌ ପଣ୍ତୟ୍‌ କିତାମାର୍ହାନ୍‌ ମାରି ଜୁଦ୍ଧ୍‌କିନି ଦୁତ୍‌ ଏଣ୍ତେସ୍ ଇସ୍ରାଏଲ ଲୋକାରି ପେରିମାରିନ୍‌ତିଙ୍ଗ୍ ସାପିସ୍‌ କିଏତ୍‌, ଇୟାଉଣ୍ତିଙ୍ଗ୍‌ ଦୁୱାର୍‍ବନ୍ଦ୍‌ଦୁ ନେତେର୍‌ ସିଲେକ୍‌ତେଙ୍ଗ୍‌ ଆଦେସ୍ ସିତାମାରାନ୍ ।

29 ବିସ୍‍ବାସ୍‍ତାନ୍ ଇସ୍ରାଏଲଦି ଲୋକୁ ୱାରିତି ବୁମି ମୁସୁକୁ ବୁଲାତି ୱାଜା ସୁଫ୍‌ ସାମ୍‌ଦୁରୁ ଲୋଇ ସିଜି ନାତାର୍‌; ମାତର୍‌ ମିସର୍‍ତିକାର୍‌ ଆୟାୱାଜା ନାତେଙ୍ଗ୍‌ ସେସ୍ଟା କିଦେଙ୍ଗ୍ ସଲ୍‌ସି ମୁଡ଼ିଗିଜି ସାତାସର୍ହାର୍‌ ।

30 ଇସ୍ରାଏଲତିଲୋକୁ ଜିରିହୋ ଗାଡ଼୍‍ତି ବାଉଡ୍ରି ଗଡା ସାରିବେଡ଼ିତି ବିସ୍‍ବାସ୍‍ତାନ୍‌ ସାତ୍ ଦିନ୍ ବୁଲାତି ୱେନେକା, ଆକା ଦଂସ ଆତାମାର୍ହାତ୍‌ । 31 ଦାରିପାଣିକିନି ରାହାବ ତାନି ବିସ୍‍ବାସ୍‌ତି ଉଣ୍ତିଙ୍ଗ୍ ଇସ୍ରାଏଲତି ଡଙ୍ଗାଁରିଙ୍ଗ୍‌ ବାଡି ସିତାତ୍‌ ମାରି ମାପୁରୁଦି ବିରୁଦ୍‌କିନି ଲୋକା ୱାଲେ ସାଏଣ୍‌ଗା ରକ୍ଷା ପୋଇତା ମାର୍ହାତ୍‌ ।

32 ନାନ୍‌ ମାରି ଏସୋ ମାଟେଙ୍ଗ୍ ବର୍ଣ୍ଣନାକିଜି ୱେର୍‌ନା ? ଗିଦିୟୋନ, ବାରାକ, ଶାମ୍‍ଶୋନ୍, ଯିପ୍ତାହ, ଦାଉଦ, ସାମୁଏଲ୍‍ ମାରି ବାବବାଦିରି ବିସୟ୍‌ତାନ୍ ୱେର୍‌ତେଙ୍ଗ୍ ସରିଙ୍ଗ୍‍ଁ ବେଡ଼ା ସିଲେତ୍‌ । 33 ବିସ୍‍ବାସ୍‍ତାନ୍‌ ଇୟାକାର୍‌ ଆଇଆଇ ଦେସ୍‌ ବିରୁଦ୍‌ତାନ୍ ଜୁଦ୍‍ କିଜି ଜିଣାତା ମାର୍ହାର୍‌ । ଇୟାକାର୍‌ ଦାର୍ମୁ ପାଣି ପୁରା କିତାର୍, ମାପୁରୁ ପାର୍‌ମାଣ୍‌ କିତିମାନି ବିସୟ୍‌କୁୱିଜୁ ପୋଇତାର୍‌; ପାର୍ଟାନରେସ୍‌ ୱେୟୁ କେରେପ୍‍ତାର୍‍, 34 ସିସୁ ନାପ୍‍ତାର୍ ମାରି କାଣ୍ତା ଦାରାଦାନ୍ ରକିୟା ପୋଇତାର୍ । ଇୟାକାର୍‌ ସାକ୍ତିସିଲେତାତ୍, ମାତର୍‌ ସାକ୍ତି ଆତାର୍‌; ଜୁଦ୍‌ଦୁ ଜିଣାତାର୍‌, ମାରି ଆଇଦେସ୍‍ତି ସାତ୍ରୁ ସନ୍ୟରିଙ୍ଗ୍‌ ଆରା କିତାର୍ । 35 ବିସ୍‍ବାସ୍‍ତାନ୍ ଆଇମେକ୍‍ ତାମେକା ସାତି ନିଜେଦି ଲୋକାଙ୍ଗ୍‌ ଜିବନ୍‌ମାନି ଅବସ୍ଥାଦାନ୍‌ ମାରିଡ଼େସି ପୋଇତେ ।

ଆଇକାର୍‌ ଉଣ୍ତ୍ରି ନେଗି ଜିବନ୍‌ ପୋଇନି ଉଣ୍ତିଙ୍ଗ୍‌ ରକିୟା ପୋୟ୍‌ଦେଙ୍ଗ୍‌ ବଦା କିଏଣ୍‌ଗା କାସ୍ଟୁଦାନ୍ ସାତେ ସର୍ହେ । 36 ଏନ୍‌ ଏନ୍‌ କାସ୍ଟୁ ସାସ୍‌କିତାର୍‍, କରଡାମାଡ୍‍ ପୋଇତାର୍ ମାରି ସିକିଡ଼ିଦାନ୍ ତୋରାଜି ଜଇଲ୍‍ ଦଣ୍ତ୍‌ ପୋଇତାର୍ । 37 ୱାର୍‌ କାଲୁକାଣୁକୁ ଡାକ୍‍ତିଙ୍ଗ୍‌ ସାତାର୍, କରତ୍‌ଦାନ୍ ରୁଣ୍ତି ମକେଙ୍ଗ୍‌ ଆତାର୍‌ ମାରି କାଣ୍ତାଦାନ୍ ସାତାର୍ । ଏନ୍‍ ଏନ୍‍ ମେଣ୍ତା ନି ଗରିଆ ତୋଲୁ ଆରାଜି କାକୁର୍ତି ଆତାର୍‌, କାସ୍ଟୁ ନି ତାଡ଼ନା ଆଜି ଆୟାୱାଜା ବୁଲାତାର୍‍ । 38 ଇୟାୱାଜା ଲୋକା ଉଣ୍ତିଙ୍ଗ୍ ଦୁନିଆଦୁ ନେଗି ବାଡି ସିଲେତାତ୍ । ୱାର୍‌ ବୁଲାନିକାର୍‍ ୱାଜା ବାଲିବୁମିଦୁ ମାରି ଗରନ୍‌ତୁ ବୁଲାତାର୍, ସାରେଙ୍ଗ୍‌ ନି ବୁମିଦିଗୁଟେଆଙ୍ଗ୍‍ଁ ବାସାକିତାର୍ ।

39 ଇୟା ୱିଜେରେ ନିଜେ ନିଜେଦି ବିସ୍‍ବାସ୍‍ତାନ୍ ଏସ ସିନା ଇଟ୍‍ତା ସର୍ହା ମାନାର୍ । ମାରିବା ୱାର୍‌ ମାପୁରୁଦି ସିନି ବିସୟ୍‌ ପୋଇଏତାମାରାର୍, 40 ଇରିଙ୍ଗ୍‌ ମାପୁରୁ ମା ଉଣ୍ତିଙ୍ଗ୍ ଉନ୍‍ଡ୍ରି ନେଗି ଜଜନା କିତାମାର୍ହାନ୍ । ୱାର୍‌ ମା ୱାଲେ ଏଣ୍ତେସ୍ ପୁରା ଆନାର୍, ଇକାନେ ମାପୁରୁଦି ବଦା ମାରାତ୍ ।