ଏବ୍ରି 6

1 ମାରି ମାଡୁ ଏଣ୍ତେସ୍‌କି କ୍ରିସ୍ତଦାର୍ମୁଦି ପାର୍‍ତୁମ୍‍ ବିସୟ୍‌କୁୱିଜୁ ଡ଼ିସ୍‍ସି ସତ୍‌ତି ମାଟେଙ୍ଗ୍‍ୱିଜୁ ଅଜାଦେଙ୍ଗ୍‌ ଆଗ୍‍ଡ଼ି ସନିକା ମାନାତ୍ । ମାଡୁ ଦାର୍ମୁବିସ୍‍ବାସ୍‍ତି ପାର୍‍ତୁମ୍‍ ବିସୟ୍‌କୁୱିଜୁ ଆତାତ୍‍, ତାଗ୍‌ଇ ପାଣିଦାନ୍‌ ତେବାଜି ମାପୁରୁଦିମାନୁ ବିସ୍‍ବାସ୍ କିନାଟ୍‌ । 2 ଡୁବନ୍‌ ଅନି ବିସୟ୍‌ତାନ୍‌ ସିକ୍‌ୟା, କିୟୁ ମୁସ୍‌କୁ ପେର୍‌ନିକା, ପେରି ବିଚାର୍‍, ସାତିକାର୍‌ ମାରିଡ଼େସିନିଙ୍ଗିଁକା ମାରି ଏସ୍‌କାଙ୍ଗ୍‌ୱିଜିଇ ଦଣ୍ତ୍‌ ୱିଜୁ ମାଟେଙ୍ଗାଁ ନିୟମ ମାରିଡ଼େସି ତିଆର୍‍ କିଦେଙ୍ଗ୍‌ ଦରକାର୍‍ସିଲେ । 3 ମାଙ୍ଗିଁ ଇଲେଇ ଆଗ୍‌ଡ଼ି ସନ୍‌ଡ୍ରେଙ୍ଗ୍ ଆନାତ୍‌ । ମାପୁରୁଦି ମୁସୁକୁ ଆସା ଇଡ୍‍ଜି ଇକାନେ ମାଡୁ କିନାଟ୍ ।

4 ଏମେକାର୍ ବିସ୍‍ବାସ୍ ଆରାକିତାମାନାର୍, ୱାର୍‌ ଏତ୍‌କିଜି ଡ଼େସି ୱାଦେଙ୍ଗ୍‌ ଆଟ୍‍ନାର୍ ନୋ ? ୱାର୍‌ ଅର୍‍ଲେନ୍‍ ମାପୁରୁଦି ଜାୟ୍‍ତୁ ବାସାଜିମାର୍ହାର୍, ମୁସ୍‌କୁପୁର୍‌ତି ଦାନତି ସାୱି ପୋୟ୍‌ଜି, ପବିତ୍ରଆତ୍ମାଦିଙ୍ଗ୍‌ ପୋଇତା ମାର୍ହାର୍‍, 5 ୱାର୍‌ ମାପୁରୁଦି ନେଗି ବାକ୍ୟଦିଙ୍ଗ୍‍ ପୟ୍‍ତା ମାର୍ହାର୍‍ ମାରି ୱାଜିନି ଜୁଗ୍‍ତି ସାକ୍ତି ଏତ୍‌ କିତାମାର୍ହାର୍‍ । 6 ମାରିବା ୱାର୍‌ ବିସ୍‍ବାସ୍ ଆରାକିତାମାନାର୍ । ଆଦେଙ୍ଗ୍‍ଁ ମାରିଡ଼େସି ଏତ୍‌କିନି ଉଣ୍ତିଙ୍ଗ୍ ୱାରିଙ୍ଗ୍ ଡ଼େସି ୱେର୍‍ତେଙ୍ଗ୍ ଆଟ୍‌ଇକା, ଇରିଙ୍ଗ୍‌ ୱାର୍‌ ମାପୁରୁଦି ମାରିନ୍‌ତିଙ୍ଗ୍‌ ମାରିଡ଼େସି କ୍ରୁସକାଟ୍‌ଦୁ ଡାକ୍‍ସି ୱିଜେରି ଲୋକା ଆଗ୍‍ଡ଼ି ସେମାର୍‍ କିଜିନାର୍ ।

7 ଇରିଙ୍ଗ୍‌ ଆମା ବୁମି ନିଜେଦି ମୁସ୍‌କୁ ଜାରିଦିଙ୍ଗ୍‌ଜାରି ମୁଜିତି ପିରୁଏରୁ ଉଣାତ୍‌, ମାରି ଆମାୱାରି ଉଣ୍ତିଙ୍ଗ୍‌ ଆକା ପାସି କିଆୟ୍‌ଆନାତ୍‌, ୱାରି ନେଗି ପାସି ସିନାତ୍‌, ଆୟା ଭୁମିଦିଙ୍ଗ୍‌ ମାପୁରୁ ଆର୍ସିବାଦ୍‌ କିନାନ୍ । 8 ମାତର୍‌ ଆୟା ବୁମିଦୁ ଜଦି ସାମ୍‌ମାରାନ୍ ମାରି ଲାଟା ନେରିସ୍‌ କିନାତ୍‌, ଆର୍‌ତିଙ୍ଗ୍‌ ଆୟାତାନି ଇନି ପାଣି ତେବାଏତ୍‍ । ଆକା ମାପୁରୁଦି ଅବିସାପ୍‍ତିକା ଆନାତ୍‍ ମାରି ସିସୁଦୁ ନାସ୍ଟୁ ଆନାତ୍‍ । 9 ମାତର୍‌ ଏ ଲାଡ୍‍ତିଲୋକୁ, ମାପ୍‌ ଜଦି ଇୟାୱାଜା ମାଟା ୱେର୍‌ସିନା, ମାରିବା ମି ଅବସ୍ଥା ଜେ ଆୟାତାନିମାଣୁକୁ ନେଗିକା ମାରି ପରିତ୍ରାଣଦି ୱାଲେ ମିସାତାମାନାତ୍‌, ଇକା ମାପ୍‌ ଆଟ୍‌ୱାଦାନ୍‌ ବିସ୍‌ବାସ୍‌ କିଜିନାପ୍‌ । 10 ମାପୁରୁ ଅନ୍ୟାୟ କିଏନ୍ । ମି ପାଣି ସେବା, ବିସେସ୍‌ କିଜି ଆଇ ବିସ୍‌ବାସ୍‌ରିଙ୍ଗ୍‌ ସାହାଜ୍ୟ କିଜି ମାପୁରୁଦି ଉଣ୍ତିଙ୍ଗ୍‍ ମିର୍‌ ଆମା ଜିବନ୍‍ନୋନିକା ତର୍‍ସି ୱାଜିନିଦେର୍‍, ଆକା ୱାନ୍‌ ବାଣାଏନ୍‍ । 11 ମା ଉନ୍‍ଣ୍ତ୍ରି ବଦା, ସାରାସାରି ସାନ୍ଦି ଆଇୱାରି ଉଣ୍ତିଙ୍ଗ୍‌ ମି ଜିବନ୍‌ନୋନିକା ୱିଜୁଦିନ୍ ମାନିତ୍ । ଆର୍‌ତିଙ୍ଗ୍‌, ମି ଆସା କିତିମାନି ୱିଜୁ ବିସୟ୍‌ ପୁରା ଆନାତ୍‌ । 12 ଆର୍‌ତିଙ୍ଗ୍‌ ମିର୍‌ ଏସାଙ୍ଗ୍‌ ଗାଡ଼ିଆ ଆଏଣ୍‌ଗା ଆଟ୍‍ୱା ବିସ୍‍ବାସ୍‌ ମାରି ସାସ୍‍ମାନି ଲୋକା ୱେନ୍‌କାସାନ୍‍ଡ୍ରୁ ମାରି ମାପୁରୁ ପାର୍‍ମାଣ୍‍ କିତିମାନି ୱିଜୁ ବିସୟ୍‌ ପୟ୍‍ଦୁ ।

ମାପୁରୁଦି ପାର୍‍ମାଣ୍‍ ଆଟ୍‍ୱା

13 ଅବ୍ରାହାମ୍‍ତିଙ୍ଗ୍‌ ମାପୁରୁ ଏସ୍ତିୱାଲେ ଆଦେସ୍ ସିତାନ୍‌, ନାସ୍ତିୱାଲେ ୱାନ୍‌ ୱାନି ଆଦେସ୍ ରକ୍‌ୟା କିନାନ୍‌ ଇଜି ପାର୍‍ମାଣ୍‍ କିତାମାନାନ୍ । ୱାନି ବାଦ୍‍ଲୁ ପେରିକାନ୍ ଏନ୍‍ ସିଲିତିଙ୍ଗ୍‌ ୱାନ୍‌ ନିଜେଦି ଦରୁଦାନ୍‍ ପାର୍‍ମାଣ୍‍ କିତାମାର୍ହାନ୍ । 14 ୱାନ୍‌ ଇର୍ହାମାର୍ହାନ୍, "ନାନ୍‌ ମିଙ୍ଗିଁ ଆର୍ସିବାଦ୍‌ କିନା, ମି କୁଟୁମ୍‌ତିଙ୍ଗ୍‌ ନାଣ୍ତଦାନ୍ ନାଣ୍ତ ପିରିସ୍‌ କିନା ।" 15 ଅବ୍ରାହାମ ସାହାସ୍‍ ଆସ୍‌ସି କାପ୍‍କିତାନ୍ । ଆଦେଙ୍ଗ୍‍ଁ ୱାନ୍‌ ମାପୁରୁଦି ପାର୍‌ମାଣ୍‌ତି ବିସୟ୍‌କୁୱିଜୁ ପୋଇତାନ୍ । 16 ଲୋକୁ ପାର୍‌ମାଣ୍‌ କିନିୱାଲେ ନିଜେଦିମାଣୁକୁ ପେରି ଲୋକ୍‌ତି ଦରୁଦାନ୍‌ ପାର୍‍ମାଣ୍‍ କିନାର୍‌, ଇୟାୱାଜା ପାର୍‍ମାଣ୍‍ କିନିମାଡ଼ାନ୍ ୱିଜୁ ଜାଟିଜଗଡ଼ା ୱିଜିନାତ୍‌ । 17 ମାପୁରୁ ଏମେୱାରିଙ୍ଗ୍ ଆୟାୱିଜୁ ବିଷୟ ଦାନ୍ କିନାନ୍ ଇଜି ପାର୍‍ମାଣ୍‍ କିତାମାର୍ହାନ୍, ଆୟା ପାର୍‌ମାଣ୍‌ତୁ ୱାନ୍‌ ଡାଟ୍‌ ତେବାନାନ୍ ଇଜି ୱାରିଙ୍ଗ୍ ପୁରାନେସ୍‌ନିୱାଜା ୱେର୍‌ନି ଉଣ୍ତିଙ୍ଗ୍‌ ୱାନ୍‌ ୱାନି ବାଦ୍‌ତି ୱାଲେ ପାର୍‍ମାଣ୍‍ ମିସା କିତାମାର୍ହାନ୍ । 18 ୱାନି ବାଦ୍‌ ମାରି ପାର୍‍ମାଣ୍‍ ବାଦ୍‍ଲେଆଏତାତ୍‍, ଆକା ରୁକିସ୍ ମାପୁରୁ ମିସ୍‍ୱେର୍‍ନିକାନ୍‍ ଆଏନ୍ । ଆୟାମାଣୁକୁ ଆଗ୍‌ଡ଼ି ମାନି ଆସାଦିଙ୍ଗ୍‌ ଆସ୍‌ନି ଉଣ୍ତିଙ୍ଗ୍‌ ଡର୍‌ନିବାଡିଦୁ ଉରୁକ୍‌ତାପ୍‌ ଜେ ମାପ୍‌, ମାପ୍‌ ଡାଟ୍‌ ୱେଡ଼ିକା ପୋଇନାପ୍‌ । 19 ଇୟା ଆସା ମା ଜିବନ୍‌ତି ତଅକା ୱାଜା । ଇକା ଆସାସିନିକା ନି ରକିୟାକିନିକା ମାରି ମୁସ୍‌କୁପୁର୍‌ତି ମନ୍ଦିର୍‍ତି ପାର୍‌ଦାଦିଙ୍ଗ୍‌ ବରୋକିଜି ମହାପବିତ୍ର ବାଡିଦୁ ଇଦେଙ୍ଗ୍‌ ଆଟ୍‌ତାମାନାତ୍‍ । 20 ମା ପାଣିକିନିସିନି ୱାଜା ଜିସୁ ଆଗ୍‍ଡ଼ିନେ ଆବେନ୍‌ ସର୍‌ର୍ହାନ୍‍ନି । ୱାନ୍‌ ମଲ୍‍କିସେଦକତି ଉତରାଦିକାରି ୱାଜା ୱିଜୁଦିନ୍‌ତି ଉଣ୍ତିଙ୍ଗ୍ ପେରିଜାଜକ ଆତାମାନାନ୍ ।