1 ତଡ଼୍‍କୁ ନି ତାଙ୍ଗିଁକ୍‍ ଇୟାୱିଜୁ ମାଟା ମାଡ୍‌ ମାପୁରୁଦିମାଣାନ୍‍ ପୋଇତିମାନିକା । ଆଦେଙ୍ଗ୍‌ ରାଦୁ, ମେନ୍ଧଲ୍‍ ମାରି ଆତ୍ମାଦିଙ୍ଗ୍‌ ତାଗ୍‍ଇକାକିତିମାନୁ ୱିଜୁ ବିସୟତାନ୍ ନିଜେ ନିଜେଦିଙ୍ଗ୍ ନର୍‍ନାଟ୍‍ । ମାରି ମାପୁରୁଦିଙ୍ଗ୍ ତିଲାଜି ପୁରା ପବିତ୍ର ୱାଜା ଜିନାଟ୍‍ ।

2 ମି ଜିବନ୍‌ତୁ ମାଙ୍ଗିଁ ବାଡି ସିଦାଟ୍ । ମାପ୍‌ ଏମେୱାନିଙ୍ଗ୍ ଅନ୍ୟାୟ୍‌ କିଏପ୍‍, ଏମେୱାନିଙ୍ଗ୍ ନାଷ୍ଟୁକିଏପ୍‍ ଇରିଙ୍ଗ୍‌ ଏମେୱାନି ମାଡ଼ାନ୍‌କୁ ଇନିକା ଲାବ୍‍ ପୟ୍‍ଦେଙ୍ଗ୍ ଚେଷ୍ଟାକିଏପ୍‍ । 3 ମିଙ୍ଗିଁ ଦୋସ୍‌ ସିଦେଙ୍ଗ୍‌ ନାନୁ ଇୟା ବଲୁ ଇନ୍‍ଏ । ନାନୁ ଆଗ୍‍ଡ଼ିରାନ୍ ଇଜିନା, ମିର୍‌ ମା ନିସ ଲାଡ୍‍ ଜେ ମାପ୍‌ ଜିତିଙ୍ଗ୍‌ ଉଣ୍ତ୍ରେମାନୁ ଜିନାଟ୍‍ ମାରି ସାତିଙ୍ଗ୍‍ ଉଣ୍ତ୍ରେମାନୁ ସାନାଟ୍ । 4 ମି ମୁସୁକୁ ନା ବେସି ଆସା ମାନାତ୍ । ମି ଉଣ୍ତିଙ୍ଗ୍‌ ନାନୁ ଗର୍ବ ବା ନାଣ୍ତ । ଦୁକ୍ କାସ୍ଟୁ ବେଡ଼ାଦୁ ନାନୁ ସାହାସ୍ ତର୍‍ତାମାନା । ୱେଡ଼ିକାଦୁ ମୁଜିତାମାନା ।

5 ଇୟାୱାଜାକି ମାସିଦୋନିଆଦୁ ଇତିୱାଲେ ମାପୁ ରମ୍‍ଏତାପ୍‍ନି । ୱିଜୁମାନୁ ଅସାନ୍ତି ମାରି ଜାଟି ଲାଗାତାମାରାତ୍, ଆଦେଙ୍ଗ୍‍ଁ ମା ମୋନତୁ ସାନ୍ତି ସିଲେତାତ୍ । 6 ମାତର ଏମେ ନିରାସ୍‍ତି ୱାରିଙ୍ଗ୍ ସାସ୍‌ ସିଜିମାନି ମାପୁରୁ ତିତସତିଙ୍ଗ୍‌ ପୋକ୍‌ସି ମାଙ୍ଗିଁ ୱେଡ଼ିକା ସିତାମାନାନ୍‌ । 7 କେବଲ ୱାନି ୱାନିମାଣାନ୍‍ ସିଲେ, ମାତର ୱାନ୍‌ ମି ଲାକୁତୁ ସଲ୍‌ସି ଏମେ ୱେଡ଼ିକା ପୋଇତାମାନାନ୍‍, ଆୟାମାଡ଼ାନ୍ ମାପୁ ୱେଡ଼ିକା ଆତାମାନାପ୍‌ । ନାଙ୍ଗି ସୁଡ଼ୁଦେଙ୍ଗ୍‌ ମି ଏସ ୱେଡ଼ିକା, ନା ଉଣ୍ତିଙ୍ଗ୍‌ ମି ଏସ ଦୁକ୍, ନାଙ୍ଗି ସାସ୍‌ କିଦେଙ୍ଗ୍ ମିର୍‌ ଏସ ୱେଡ଼ିକା, ଇୟାୱିଜୁ ବିସୟ୍‌ ୱାନ୍‌ ନାଙ୍ଗି ୱେର୍‍ତାମାନାନ୍ । ଆବେଣାନ୍‍ ନାନୁ ନାଣ୍ତ ୱେଡ଼ିକା ଆତାମାନା ।

8 ନା ସିଟି ପୋଡ଼ାଜି ମିର୍‌ ମୁର୍ଚାଆତିମାରିଙ୍ଗ୍ ବା, ଆୟାଚିଟି ରାସ୍‌ତିମାନିଙ୍ଗ୍ ନା ମୋନତୁ ଇନି ଦୁକ୍ ସିଲେତ୍‌ । ସିଟି ମିଙ୍ଗିଁ ସାଣେକ୍‍ତିଙ୍ଗ୍‍ ଦୁକ୍ କିବିସ୍‍କିତିମାନିଙ୍ଗ୍ ନାନୁ ଦୁକ୍ ଆତାମାନ୍ଦି । 9 ମାତର ମି ମୋନତୁ ଦୁକ୍ ସିତିମାନିଙ୍ଗ୍ ସିଲେ, ମାତର ଇୟା ଦୁକ୍ ମି ଜିବନ୍‌ତି ବୁଲାସାଲା ବାଦ୍‌ଲେ କିତିମାନିଙ୍ଗ୍ ଇଲେଇ ନାନୁ ୱେଡ଼ିକା କିଜିନା । ମାପୁରୁଦି ବଦା ଇସାବ୍‍ତାନ୍‍ ମିର୍‌ ଇୟା ଦୁକ୍ ସାସ୍‌ କିଜିନିଦେର୍‌ । ଆଦେଙ୍ଗ୍‌ ମା ମାଡ଼ାନ୍ ମିର୍‌ ଇନି ରକମ୍‍ତି ନାଷ୍ଟୁ ଆଇଦେର୍‍ । 10 ମାତର ଇୟାୱାଜାଦି ଦୁକ୍ ମାପୁରୁଦି ମାଡ଼ାନ୍ ବେବହାର୍‍ ଆଜି ତାନିମାଡ଼ାନ୍ ଜିବନ୍‌ ବାଦ୍‌ଲେ ଆତିଙ୍ଗ୍‌ ରକିୟା ପୁଟ୍‍ନାତ୍ । ଇବେନୁ ଚିନ୍ତାକିନି ବିସୟ୍‌ ସିଲେତ୍‌ । ମାତର କେବଲ ଦୁନିଆଦି ଦୁକ୍ ସାନିକା ଗଟେକିନାତ୍ । 11 ଆଦେଙ୍ଗ୍‌ ସୁଡ଼ୁଦୁ, ମାପୁରୁଦି ମାଡ଼ାନ୍ ବଦାଦାନ୍ ପୟ୍‍ତିମାନିଦେର୍‍ ଇୟା ଦୁକ୍ ମିଙ୍ଗିଁ ମୋନତୁ ଏସ ୱେଡ଼ିକା, ଏସ ତିଲାନିକା, ଏସ ରିସା, ଏସ, ନିଜେଦିଙ୍ଗ୍‍ଁ ଟିକ୍‍ କିଦେଙ୍ଗ୍‍ଁ ଏସ ସିକିୟା, ତାଗ୍‍ଇ ପାଣିକିନିୱାରିଙ୍ଗ୍‍ ସାସ୍ତିସିଦେଙ୍ଗ୍‌ ଏସ ତାନ୍ଦ୍ରା ମାନାତ୍‌ । ଇୟାୱିଜୁ ବିସୟତାନ୍ ମିର୍‌ ଦୋସ୍ ସିଲିକାର୍‍ ପାର୍‍ମାଣ୍ ଆଜିନିଦେର୍ ।

12 ଜଦିବା ନାନୁ ମି ଲାକ୍‍ତୁ ରାସ୍‍ତା ସିଟି, ମି ମାଡ଼ାନ୍‌କୁ ଜେ ଅନ୍ୟାୟ୍‌ କିତାମାନାନ୍‍ ବା ଜେ ଅନ୍ୟାୟ୍‍ ସାସ୍‌ କିତାମାନାନ୍‌, ତାନି ଉଦେସ୍‍ତାନ୍ ନାନୁ ଆୟା ସିଟି ରାସ୍‍ଏମାରା । ମାତର୍‌ ମାପୁରୁଦି ଆଗ୍‍ଡ଼ି ମା ଉଣ୍ତିଙ୍ଗ୍‌ ମି ମାନାନିକା ଏସ ନାଣ୍ତ ମାରି । 13 ଆୟା ଉଣ୍ତିଙ୍ଗ୍ ମାପୁ ଏସ ୱେଡ଼ିକା, ଆକା ୱେର୍‍ନି ଉଣ୍ତିଙ୍ଗ୍‌ ନାନୁ ଆୟା ସିଟି ରାସାତା । ମାପୁ କେବଲ ୱେଡ଼ିକା ଆଏପ୍ । ମିର୍‌ ତିତସତିଙ୍ଗ୍‌ ୱିଜୁ ବିସୟ୍‌ତି ସାହାଜ୍ୟ କିଜି ଏଣ୍ତେସ୍‌ ୱେଡ଼ିକା କିଜିନିଦେର୍‌, ଆକା ମାଙ୍ଗିଁ ବେସିୱେଡ଼ିକା ସିତାମାନାତ୍ । 14 ୱାନି ଲାକୁତୁ ମି ଉଣ୍ତିଙ୍ଗ୍‌ ନାନୁ ଗର୍ବ କିଜିନା । ମାରି ଆୟାଉଣ୍ତିଙ୍ଗ୍‌ ନା ତାଲା ଆଡ୍‍ଗି ଆଏତ୍‍ । ଏଣ୍ତେସ୍‌ ମି ଲାକୁତୁ ମାପୁ ୱିଜୁଦିନ୍ ସତ୍‌ ଇଜିୱାଜିନାପ୍, ଆୟାୱାଜା ତିତସତି ଲାକୁତୁ ମାପୁ କିତିମାନି ପେରି ମାଟେଙ୍ଗ୍, ମିଚ୍‍ ପାର୍‍ମାଣ୍ ଆଏତ୍‍ । 15 ମିର୍‌ ୱିଜେରେ ଏଣ୍ତେସ୍‍ତାନ୍‍ ୱାନିଙ୍ଗ୍‍ଁ ମାନାଜି ମାରିଇଦେର୍‍ ମାରି ତିଲାଜି ମାରି ତିର୍‍ଗିଜି ମୋନତୁ ୱାନିଙ୍ଗ୍‌ କୁକ୍‍ତିମାରିଇଦେର୍‌, ଇୟା ମାଟା ଅଡ଼୍‍ବିଜି ମି ଉଣ୍ତିଙ୍ଗ୍‌ ୱାନି ଜିବନ୍‌ନୋନିକା ମାରି ନାଣ୍ତଆଜିନାତ୍ । 16 ନାନୁ ୱିଜୁ ବିସୟ୍‍ତୁ ମି ମୁସୁକୁ ପୁରା ଆସା ଇଡ୍‌ଜି ଆଟ୍‍ତିମାନିଙ୍ଗ୍ ନାନୁ ଏସ ୱେଡ଼ିକା ।