୨ କରିନ୍ତିୟ 3

ପୁନି ନିୟମ୍‌ତି ଦାସ୍‌

1 ମାଡ଼ୁ ଇନିକା ମାରି ଗର୍ବ ୱାଜା ମନେଆଜିନାତ୍ ? ଇରିଙ୍ଗ୍‌ ଆଇୱାରିୱାଜା ମାଡ଼ୁ ଇନିକା ମି ଲାକୁତୁ ବା ମି ଲାକୁତୁରାନ୍ ପରିଚୟ ଆକୁ ଦର୍‌କାର୍‌ ଇଜିନିକା । 2 ମିର୍‌ ମା ପରିଚୟ ଆକୁ, ମା ଜିବନ୍‌ଲୋଇ ପାଟାଦି ରାସାତି ସିଟି, ଏମେତାନିଙ୍ଗ୍‌ ୱିଜେରେ ନେସ୍‌ନାର୍ ମାରି ପଡ଼ାଦେଙ୍ଗ୍ ଆଟ୍‌ନାର୍ । 3 ଇୟା ସେବା ଆକୁ କ୍ରିସ୍ତଦି ମାଡ଼ାନ୍ ରାସାତାମାନାତ୍‌ ମାରି ମା ମୋନତି ଆକୁଦୁ ଲୋଇସରାମାନାତ୍ । ଇକା ସିରାଦାନ୍‍ ରାସାଏତ୍‍, ମାତର୍‌ ଜିବନ୍‌ମାନି ମାପୁରୁଦି ଆତ୍ମାଦାନ୍‌ ଲୋକା ଜିବନ୍‌ତୁ ରାସାତାମାନାତ୍‌ ।

4 କ୍ରିସ୍ତଦି ସିଜି ମାପୁରୁଦି ମୁସୁକୁ ଆସା ମାନିଙ୍ଗ୍‌ ମାଡ଼ୁ ଇଜିନିକା, 5 ଇରିଙ୍ଗ୍‌ ମାଡ଼ୁ କିତିମାନି ଦାବି କିନି ଉଣ୍ତିଙ୍ଗ୍‌ ଇନି ଜୋଗ୍ୟ ବା ସିଲେତ୍‌ । ମା ଜୋଗ୍ୟତା ମାପୁରୁଦିମାଣୁକୁ ୱାନାତ୍ । 6 ପୁନି ନିୟମ୍‍ଦି ସେବାକିନିଉଣ୍ତିଙ୍ଗ୍ ମାପୁରୁ ମାଙ୍ଗିଁ ଆସ୍‌କିତାମାନାନ୍‌ । ଇୟା ନିୟମ ରାସାଏତ୍‍, ମାତ୍ର ମାପୁରୁଦି ଆତ୍ମାଦି ଦାନ୍ ୱାତିମାନିକା, ଇରିଙ୍ଗ୍‌ ରାସାତି ନିୟମ୍‌ ସାନିକା ଗଟେକିନାତ୍, ମାତର ଆତ୍ମାଦି ନିୟମ୍‌ ଜିବନ୍‌କିନାତ୍ ।

7 ପିଡ଼୍‌ପିକାଲୁ ମୁସ୍‌କୁ ରସାତିମାନି ମୋସାଦି ବ୍ୟବସ୍ଥାଦି ସେବା ତିଆର୍‍ ବେଡ଼ାଦୁ ମାପୁରୁ ଗୌରବ୍‍ ତରାତା ମାର୍ହାତ୍‌ । ଆୟା ଗୌରବ୍‍ତି ଦିୱା ନାମିତି ମାରିଙ୍ଗ୍‍ବା ମୋସାଦି ଜାୟ୍‌ ମୋକମ୍‌ତରିନ୍‌ ଇସ୍ରାଏଲ୍‌ ଲୋକୁ ସୁଡ଼ୁଦେଙ୍ଗ୍‌ ଆଟ୍‍ଏତାମାରାର୍ । ସାନିକା ଗଟେକିନି ବ୍ୟବସ୍ଥା ଜଦି ଇୟାୱାଜା ଗୌରବ୍‌ଦି ୱାଲେ ୱେଙ୍ଗିଁତାତ୍‌ । 8 ଆର୍‌ତିଙ୍ଗ୍‌ ପବିତ୍ରଆତ୍ମାଦି ସେବା ପାଣିଙ୍ଗ୍‌ୱିଜୁ ୱାନି ମାଡ଼ାନ୍ ଏସ ନାଣ୍ତ ଗୌରବ୍‌ତାନ୍‌ ତିଆର୍‌ ଆଏତ୍ । 9 ଦଣ୍ତ୍‌ ସିନି ନିୟମ୍‌ ସେବା ପାଣି ମୋହିମାଦୁ ଜଦି ଏସ ଗୌରବ୍‍ଦୁ, ଆର୍‌ତିଙ୍ଗ୍‌ ପରିତ୍ରାଣ ଲୋକୁଦି ନିୟମ୍‍ତିଙ୍ଗ୍‌ ମାନାତିଙ୍ଗ୍ ଏସ ନାଣ୍ତ ଗୌରବ୍‍ ଆଏତେମାନାତ୍ । 10 ମାଡ଼ୁ ଇନ୍‌ଡ୍ରେଙ୍ଗ୍‌ ଆଟିନିକା, ପୁର୍ବେ ଆମାକା ଦନ୍ୟବାଦ୍‌ ମାରାତ୍, ଜାୟ୍‌ତି ଉଣ୍ତ୍ରି ମହିମାଦି ୱାତାତ୍‍ଆକା ଇଲେଇ ଆକା ୱାର୍‍ସି ସରାମାନାତ୍ । 11 ଜଦି ତେବାଇ ବିସୟ୍‌ ନିସ ଗୌରବ୍‍ ପୋଇନାତ୍, ୱିଜୁ ଦିନ୍‍ତି ବିସୟ୍‌ ୱେନିମାଡ଼ାନ୍‍କୁ ଏସ ନାଣ୍ତ ଗୁଣୁତାନ୍ ଗୌରବ୍‌ ପୋଇନାନ୍ !

12 ଆୟା ଆସା ମାନିଙ୍ଗ୍ ମାଡୁ ନାଣ୍ତ ସାହାସ୍ । 13 ମାଡ଼ୁ ମୋସାଦି ୱାଜା ଆଇକା । ୱାନ୍‌ ନିଜେ ମୋକମତୁ କାବର୍‍ ପିଡ଼ିଗିତା ମାରାନ୍‌, ଏଣ୍ତେସ୍ ନାମ୍‍ଜିମାନି ଆୟା ଦିୱେଙ୍ଗ୍ ୱିଜ୍‍ନିକା ଇସ୍ରାଏଲ୍‌ ଲୋକୁ ସୁଡ଼ୁଦେଙ୍ଗ୍‌ ଆଟ୍‍ଏର୍‍ । 14 ସତେନେ ୱାର୍‌ ବୁଜାନି ସାକ୍ତି ହାରା କିତାମାନାର୍‌ । ଇଲେଇବା ପାଡ଼୍‍ଇ ନିୟମ୍‌ ପଡ଼ାନି ୱାଲେ ୱାରି ଆଗ୍‍ଡ଼ି ଆୟା ଓଡ଼ଣି ବ୍ୟବ୍‌ହାର୍‌ ମାନାତ୍ । ଜିସୁ କ୍ରିସ୍ତଦି ୱାଲେ ମିସାନିମାଡ଼ାନ୍ କେବଲ ଆୟାୱାନିକା ଆକ ଆନାତ୍‌ । 15 ନେରୁ ବା ମୋସାଦି ବ୍ୟବସ୍ଥା ପଡ଼ାନିୱାଲେ ୱାରି ମୋନ୍‌ ମୁସୁକୁ ମାନାତ୍ ଉଣ୍ତ୍ରି କାବର୍‍ । 16 ମାତର୍‌ ଆୟା କାବର୍‍ ଗୁସାଦେଙ୍ଗ୍ ଆଟ୍‌ନାତ୍ । ଇରିଙ୍ଗ୍‌ ଦର୍ମ ସାସ୍ତ୍ର ଇନାତ୍‍, ବ୍ୟବସ୍ଥାଦୁ ମୋସାଦି ବିସୟତାନ୍‍ ରାସାତାମାନାତ୍‌, ମାପୁରୁଦି ଆଗ୍‍ଡ଼ି ମୋକମ୍ ସୁଣିଉଣ୍ତିଙ୍ଗ୍ ଆୟା କାବର୍‍ ଗୁସାତାସରାତ୍ । 17 ଇୟା ବ୍ୟବସ୍ଥାଦୁ ରାସାତିକା "ପ୍ରବୁ ଆଜିନାନ୍ ଆତ୍ମା" ଏମେନୁ ପ୍ରବୁଦି ଆତ୍ମା, ଆବେନ୍‌ ମାନାତ୍ ମୁକୁଡ଼ାନିକା । 18 ମା ୱିଜେରି କେର୍‍ବିଇ ମୋକମି ଇଲେ ପ୍ରବୁଦି ମହିମା ଜାୟ୍‍ଆନାତ୍ ମାରି ପ୍ରବୁଦି ଆତ୍ମା ମାଡ଼ାନ୍ ସସିମାନି ଆୟା ମହିମାଦି ଆଟ୍‍ନିମାଡ଼ାନ୍‍ ମାଡ଼ୁ ନାଣ୍ତ ଜାୟ୍‌ ଇସାବ୍‍ତାନ୍‍ ୱାନି ମୁର୍ତିୱାଜା ବାଦ୍‍ଲେ ଆଜିନିକା ।