1 ଇନିକା ଲାବ୍‌ ଆଏତିଙ୍ଗ୍‍ ବା ନାଙ୍ଗିଁ ଏଣ୍ତେସ୍‍ବା ଗର୍ବ କିଦେଙ୍ଗ୍‌ ଆନାତ୍‌ । ମାତର୍‌ ପ୍ରବୁ ନାଙ୍ଗି ଏମେ ୱିଜୁ ଦର୍ସନ ମାରି ତର୍‍ତା ସିତାମାନାନ୍‌, ଆୟାୱିଜୁ ଇଲେଇ ନାନୁ ଇନା । 2 କ୍ରିସ୍ତଦିମାନୁ ମାନି ଅରେନ ଲୋକ୍‍ ସଉଦ ବାର୍ସେକ୍ ଆଗ୍‍ଡ଼ି ମୁନ୍‍ଡ୍ରିରିପୁର୍‍ତୁ ସର୍ହାମାର୍ହାନ୍‍ ୱାନ୍‌ ନିଜେଦି ମେନ୍ଦଲ୍‌ତାନ୍ ସର୍ହାମାର୍ହାନ୍‍ ବା ଲବ୍‍ ସୁଡ଼ୁତାମାର୍ହାନ୍, ନାନୁ ନେସେଏ, ଆକା କେବଲ ମାପୁରୁ ନେସ୍‌ନାନ୍ । 3 ନାନୁ ନେସ୍‍ନା, ୱାନିଙ୍ଗ୍‌ ମୁସ୍‌କୁପୁର୍‌ତି ଡଡିଦୁ ଅଆୟ୍‍ଆତାମାର୍ହାତ୍‍ ୱାନ୍‌ ମେନ୍ଦଲ୍‌ତୁ ମାର୍ହାନ୍‍ ନୋ ମେନ୍ଧଲ୍‍ ଆତ୍ରେ ମାର୍ହାନ୍‌, ନାନୁ ନେସେଏ, କେବଲ ମାପୁରୁନେ ନେସ୍‍ନାନ୍‍ । 4 ଆବେନ୍‌ ୱାନ୍‌ ମାଟାଦୁ ଇନ୍‍ଏଣ୍ତା ମାରି ବଲ୍‍ କିଦେଙ୍ଗ୍‌ ଆଟ୍‍ନିନାନି ମାଟା ୱେନ୍‌ଡ୍ରେଙ୍ଗ୍‌ ଆଟ୍‍ତାମାର୍ହାନ୍‍ । 5 ଇୟା ଲୋକ୍‌ତି ଉଣ୍ତିଙ୍ଗ୍‌ ନାନୁ ଗର୍ବ କିନା । ମାତର୍‌ ନିଜେଦି ସାକ୍ତିସିଲିକା ଡ଼ିସ୍‍ତିଙ୍ଗ୍‌ ଆଇ ଇନି ବିସୟ୍‌ତୁ ନାନୁ ଗର୍ବ କିହେ । 6 ଗର୍ବ କିନିକା ନା ମାଡ଼ାନ୍‍କୁ ମୁର୍କ ଆଏତ୍‌, ଇରିଙ୍ଗ୍‌ ନାନୁ ସତ୍‌ ମାଟା ଇନା । ମାତର୍‌ ନାନୁ ଗର୍ବ କିଏଜିନା, ଇରିଙ୍ଗ୍‌ ନାନୁ ବଦାକିନା, ଲୋକୁ ନାଙ୍ଗି ଏଣ୍ତେସ୍‌ ପାଣି କିନିକା ସୁଣାର୍‍ ବା ନା ମାଡ଼ାନ୍‌କୁ ଏଣ୍ତେସ୍ ମାଟା ୱେନାର୍, ୱାନି ମାଡ଼ାନ୍‌କୁ ନାଙ୍ଗିଁ ପେରିକାନ୍ ଇଜି ମନ୍‍ତୁ ଇନ୍‍ମାକିର୍‍ ।

7 ଇୟା ଇସ୍ରି ପୁନା ତରାନିକା ଲାବ୍‌କିଜି ନାନୁ ଏଣ୍ତେସ୍ ଆକାର୍‍ ଆଏ, ଇୟାଉଣ୍ତିଙ୍ଗ୍‌ ନା ମେନ୍ଦଲ୍‌ତୁ ଉଣ୍ତ୍ରି ନନି ନୋପି ସିଆୟ୍‍ ଆତାମାନାନ୍, ଇକା ନାଙ୍ଗି ଗର୍ବ ଆଇ ଉଣ୍ତିଙ୍ଗ୍‌ ସୟ୍‌ତାନ୍‌ଦି ଦୁତ୍ ୱାଜା ପାଣିକିନାମାନାତ୍ । 8 ଇବେଟ୍‍କୁ ଆକ କିଦେଙ୍ଗ୍‌ ନାନୁ ପ୍ରବୁଦି ଲାକୁତୁ ମୁଜା ପାର୍‍ତନା ଅନୁରୋଦ କିତାମାନା । 9 ମାତର୍‌ ୱାନ୍‌ ନାଙ୍ଗି ଇର୍ହାନ୍‌, "ନା ଦୟା ନି ଉଣ୍ତିଙ୍ଗ୍‌ ନାଣ୍ତ, ନିନୁ ସାକ୍ତିସିଲିୱାଲେ ନା ସାକ୍ତି ପୁରା ଦାନ୍‍ ତରାୟ୍‍ ଆନାତ୍‌ ।" ଆଦେଙ୍ଗ୍‌ କ୍ରିସ୍ତଦି ସାକ୍ତି ନା ମାନୁ ବାସାନି ଉଣ୍ତିଙ୍ଗ୍‌ ନାନୁ ନା ସାକ୍ତିସିଲି ଉଣ୍ତିଙ୍ଗ୍‌ ନାଣ୍ତ ଗର୍ବ କିନା ମାରି ୱେଡ଼ିକା ଆନା । 10 ମାରି କ୍ରିସ୍ତଦି ଉଣ୍ତିଙ୍ଗ୍‌ ୱିଜୁ ରକମ୍‍ତି ସାକ୍ତିସିଲିକା, ଅପମାନ୍‍, କାଷ୍ଟୁ, ତାଡ଼ନା, ମାରି ସାନିଜିନିକା ନାନୁ ୱେଡ଼ିକାଦାନ୍‍ଜିନା, ଇରିଙ୍ଗ୍‌ ଏସ୍ତିୱାଲେ ନାନୁ ସାକିସିଲେ, ନାସ୍ତିୱାଲେ ନାନୁ ବପୁଦିକାନ୍‍ ।

11 ନାନୁ ବୁଦିସିଲି ୱାଜା ବ୍ୟବ୍‌ହାର୍‌ କିଜିନା । ଇକା କିନି ଉଣ୍ତିଙ୍ଗ୍‌ ମିର୍‌ ନାଙ୍ଗି ଜାସେପେଲା କିତିମାନିଦେର୍‌, ମାତର ନା ପ୍ରସଂସା କିନିକା ମି ଟିକ୍‌ ମାର୍ହାତ୍‌ । ନାନୁ ଇନିକା ଆଏତିଙ୍ଗ୍‌ ବା ମି ଆୟା ପେରି "ପ୍ରେରିତ ସିସୁରି" ମାଣ୍‌କୁ ଇନି ଗୁଣୁତାନ୍ ଇସ୍ରିକାନ୍‍ ଆଏ । 12 ମି ଲୋଇ ସାସ୍‍ତାନ୍ ନାଣ୍ତ କାବାଆନି ପାଣି ପୁରାକିଜି ନାଣ୍ତ କାବାଆନି ବିସୟତାନ୍ ନାନୁ ଯେ ସତେନେ ଅରେନ୍ ପ୍ରେରିତ ସିସୁ, ତେନି ପାର୍‍ମାଣ୍‍ ସିତାମାନା । 13 କେବଲ ଉଣ୍ତ୍ରି ବିସୟ୍‌ତୁ ଆଇ ମଣ୍ତଲିମାଣୁକୁ ମି ୱାଲେ ନାନ୍‌ ମିଙ୍ଗିଁ ଡାବୁଙ୍ଗ୍‌ ଲସ୍‌ନି ଉଣ୍ତିଙ୍ଗ୍‌ ବଜୁ ୱାଜା ଆଏ । ଜଦି ଇକା ମି ଉଣ୍ତିଙ୍ଗ୍‌ ନା ତାଗ୍‍ଇ ଜିବନ୍‌ତି ବ୍ୟବହାର୍, ଆର୍‌ତିଙ୍ଗ୍‌ ଇୟାଉଣ୍ତିଙ୍ଗ୍‌ ନାଙ୍ଗିଁ ଦୟାକିଜି କେମା କିଦୁ ।

14 ମୁଣ୍ତ୍ରି ଦେବେଙ୍ଗ୍‍ ଉଣ୍ତିଙ୍ଗ୍‌ ମି ଲାକୁତୁ ସନି ଉଣ୍ତିଙ୍ଗ୍‌ ନାନୁ ତିଆର୍ ଆଜିନା । ନାନୁ ମି ମାଡ଼ାନ୍‍କୁ ଇନି ବିସୟ୍‌ ଦାବି କିଏ । ନାନୁ ମିଙ୍ଗିଁ ଇଛାକିନା । ମି ଦନସମ୍ଫତି ସିଲେ । ଇରିଙ୍ଗ୍‌ ବୁବା ୟାୟାରି ଉଣ୍ତିଙ୍ଗ୍‌ କଡ଼କକ୍‌ରା ଉଣ୍ତା କିଏର୍‌, ବୁବା ୟାୟା କଡ଼କକ୍ରାରି ଉଣ୍ତିଙ୍ଗ୍‌ ଦନ୍ ଉଣ୍ତାକିନିକା ମାନାତ୍‌ । 15 ମିଙ୍ଗିଁ ସାହାଜ୍ୟ କିନି ଉଣ୍ତିଙ୍ଗ୍‌ ନା ୱିଜୁ, ଇୟାୱାଜାକି ନିଜେଦିଙ୍ଗ୍‌ ୱେଡ଼ିକାଦାନ୍‌ ସର୍‌ପେ କିନିସିନି ଉଣ୍ତିଙ୍ଗ୍‌ ନାନୁ ତିଆର୍ ଆତାମାନା । ନାନୁ ମିଙ୍ଗିଁ ନାଣ୍ତ ଜିବନ୍‌ନୋଜିନା ଇଜି ମିର୍‌ ଇନିକା ନାଙ୍ଗିଁ ନିସ ଉଣା ଜିବନ୍‍ନୋନିଦେର୍‍ ?

16 ନାନୁ ମି ମୁସ୍‌କୁ ବଜୁଦି ୱାଜା ଆଏ । ଇୟା ବଲୁ ମିର୍‌ ସତେନେ ମାନାନିଦେର୍‍ । ମାତର୍‌ ମି ମାଣ୍‌କୁ ଏନ୍‌ ୱେର୍‌ତେଙ୍ଗ୍‍ ଆଟ୍‍ନାନ୍‍, ନାନୁ ସାଲାକି ଆତିମାନିଙ୍ଗ୍‌ ମିଚ୍ ୱେରିସି ମିଙ୍ଗିଁ ଉରିଦୁ ପୋକ୍‍ତାମାନାନ୍‌ । 17 ମି ଲାକ୍‌ତୁ ଏମେୱାରିଙ୍ଗ୍‌ ପୋକ୍‍ତାମାନା, ୱାରିମାଣୁକୁ ବା ଏମାଣୁକୁ ନାନୁ ଇନିକା ମିମାଣୁକୁ ଇନି ସୁବିଦା ରେଲିଜିଅତାମାନା ? 18 ମି ଲାକ୍‌ତୁ ସନିଉଣ୍ତିଙ୍ଗ୍ ନାନୁ ତିତସଦିଙ୍ଗ୍‌ ଅନୁରୋଦ କିତା ମାରି ୱାନିୱାଲେ ଆଇ ତଡ଼ାନ୍‍କାଙ୍ଗ୍‌ ପୋକ୍‍ତା । ତିତସ ମି ଲୋଇରାନ୍‌ ଇନି ସୁବିଦା ପୟ୍‍ତାମାନାନ୍‍ ଇଜି ଏନ୍‌ ଇନ୍‌ଡ୍ରେଙ୍ଗ୍‌ ଆଟ୍‍ନାନ୍ ? ୱାନ୍‌ ମାରି ନାନୁ ଇନିକା ସାମାନ୍‌ ପାଣି ଅସି ମି ୱାଲେ ସାମାନ୍‌ ବ୍ୟବହାର୍ କିଏ ନୋ ?

19 ଏଣ୍ତେସାତିଙ୍ଗ୍‌ ମିର୍‌ ଅଡ଼୍‍ବିଜିନିଦେର୍‍ ଜେ, ଇୟାସାନ୍ଦି ମାପୁ କେବଲ ନିଜେଦିକା ନର୍‌ଜି ସିଜି ୱାତାମାନାପ୍‌ ନୋ ! ମାପୁରୁଦି ଆଗ୍‍ଡ଼ି କ୍ରିସ୍ତ ମାଙ୍ଗିଁ ଇର୍‍ଇ ୱାଜା ମାପ୍‌ ମିଙ୍ଗିଁ ଇଜିନାପ୍‍ । ଲାଡ୍‍ତି ତଡ଼୍‍କୁ, ମାପୁ ଏମେକା କିଜିନାପ୍ ଆକା କେବଲ ମି ନେଗି ଉଣ୍ତିଙ୍ଗ୍‌ କିଜିନାପ୍ । 20 ଇରିଙ୍ଗ୍‌ ନାନୁ ତିଏଲ୍‍ ୱାଜିନାତ୍‌, ନାନୁ ମି ଲାକ୍‌ତୁ ୱାଜି ମିଙ୍ଗିଁ ଏଣ୍ତେସ୍ ସୁଡ଼ୁଦେଙ୍ଗ୍‌ ବଦା କିଜିନା, ଆୟାୱାଜା ସୁଡ଼ୁଦେଙ୍ଗ୍‌ ଆଟ୍‍ଏ ମାରି ମିର୍‌ ନା ଆମା ରୁପ୍‌ ସୁଡ଼ୁଦେଙ୍ଗ୍‌ ବଦା କିଇଜିନିଦେର୍‌, ଆର୍‌ତିଙ୍ଗ୍‌ ଆକା ସୁଡ଼ୁଦେଙ୍ଗ୍‌ ଆଟ୍‌ନିଦେର୍‌ । ଆର୍‌ତିଙ୍ଗ୍‌ ଆବେନ୍‌ ସଲ୍‌ସି ନାନୁ ୱିଜୁ ରକମ୍‍ତି ଜାଟି, ଆକାର୍‍, ରିସା, ଗର୍ବ କିନିକା, ସୁରି, ଗର୍ବ, ମାରି ସାନ୍ତିସିଲିକା ସୁଡ଼ୁଦେଙ୍ଗ୍‌ ଆଟ୍‍ନା । 21 ଇଲେଇ ମି ଲାକ୍‌ତୁ ସନିୱାଲେ ଆୟାୱାଜା ମାପୁରୁ ମି ଆଗ୍‍ଡ଼ି ନାଙ୍ଗିଁ ସେମାର୍‍ କିନାନ୍, ଏମେକାର୍ ଆଗ୍‍ଡ଼ିରାନ୍ ପାପ କିତାମାନାର୍‌, ମାତର୍‌ ୱାରି ତାଗ୍‍ଇ ପାଣିୱିଜୁ, ଲାଲାୟ୍‍ ମାରି ଦାରିପାଣି ଉଣ୍ତିଙ୍ଗ୍‌ ମନ୍‍ବାଦ୍‍ଲେ କିଏର୍‌, ଇୟାୱାଜା ନାଣ୍ତଲୋକ୍‌ ଉଣ୍ତିଙ୍ଗ୍‌ ନାଙ୍ଗିଁ ଆଡ଼୍‍ବାଦେଙ୍ଗ୍ ଆନାତ୍‌ ।