1 ✝ଏ ତଡ଼ାନ୍‌କୁ ନି ତାଙ୍ଗିଁକ୍‍, ମାସିଦୋନିଆଦି ମଣ୍ତଲିୟାଙ୍ଗ୍ ଏଣ୍ତେସ୍ ମାପୁରୁଦି ଦୟା ପୋଇତାମାନାର୍, ଆକା ମିଙ୍ଗିଁ ୱେର୍‌ତେଙ୍ଗ୍‌ ବଦା କିଜିନା । 2 ୱାର୍‌ ନାଣ୍ତକାସ୍ଟୁ ମାଣାନ୍‌କୁ ସିଜି ପରିକା ଆତାମାନାର୍‌ ମାରି ୱାର୍‌ ବେସି କାକୁର୍ତି ଆତିଙ୍ଗ୍‌ବା, ୱିଜ୍‍ଇ ବଦାଦି ମାଡ଼ାନ୍‌କୁ ନିଜେ ମୋନତି ୱେଡ଼ିକାଦାନ୍ ୱେକ୍‍ତାମାନାର୍‍ । 3 ନାନୁ ସତ୍‍ ବାବେ ଇଜିନା ଜେ, ୱାରି ବଦାଦାନ୍ ନିଜେଦି ସାକ୍ତି ଇସାବ୍‍ତାନ୍‍ ଇୟାୱାଜାନେ ନିଜେଦି ଆଟ୍‍ନି ମାଣାନ୍‌ ନାଣ୍ତ ବା ଦାନ କିତାମାନାର୍‌ । 4 ଜିହୁଦାଦୁମାନି ମାପୁରୁଦି ଲୋକାଙ୍ଗ୍‌ ସେବାକିନି ଉଣ୍ତିଙ୍ଗ୍‌ ୱାରିଙ୍ଗ୍ ଦୟା ସିଆୟ୍‍ଆପିତ୍‍ ଇଜି ୱାର୍‌ ମାଙ୍ଗିଁ ବାତିଙ୍ଗ୍‌ଁ ମାଲିତାମାର୍ହାର୍‍ । 5 ୱାରିମାଡ଼ାନ୍‌କୁ ମାପୁ ନିସ ଆସା କିଏତା ମାରାପ୍ । ଆଗ୍‍ଡ଼ିନେ ୱାର୍‌ ନିଜେ ନିଜେଦିଙ୍ଗ୍ ମାପୁରୁଦି ମାନୁ ସିଆୟ୍‌ଆଜି ମାରାର୍ ମାରି ୱେନେକା ମାପୁରୁଦି ଇଚ୍ଛା ଇସାବ୍‌ତାନ୍‌ ନିଜେ ନିଜେଦିଙ୍ଗ୍ ମା ଉଦେସ୍‍ତାନ୍‍ ସିଆଇଆତାର୍‍ । 6 ତିତସଦି ସାହାଜ୍ୟଦାନ୍ ଇୟା ଦୟା ପାଣି ଆରାମ୍‌ ଆତାମାରାତ୍ । ତେନିଙ୍ଗ୍‌ ସାଲାକିଜି ଇଡ୍‍ଦେଙ୍ଗ୍‌ ମାରି ଇୟା ଜିବନ୍‍ନନି ଉଣ୍ତିଙ୍ଗ୍‌ ସେବାପାଣିଦୁ ମିଙ୍ଗିଁ ସାହାଜ୍ୟ କିନିଉଣ୍ତିଙ୍ଗ୍ ତିତସତିଙ୍ଗ୍‌ ଅନୁରଦ୍‌ କିତା । 7 ମିର୍‌ ୱିଜୁ ବିସୟ୍‌ତୁ ମାଜନ୍‌ ଆତିମାନିଦେର୍‍ । ମି ବିସ୍‍ବାସ୍, ମାଟା ୱାର୍‍ଗିଦେଙ୍ଗ୍‍, ଜ୍ଞାନ, ସାହାଜ୍ୟକିଦେଙ୍ଗ୍‍ ୱେଡ଼ିକା ମାରି ମା ଉଣ୍ତିଙ୍ଗ୍‌ ଜିବନ୍‍ନୋନିକା ତର୍‍ତେଙ୍ଗ୍‍ଁ ନାଣ୍ତ ପରିଚୟ ସିତିମାନିଦେର୍‍ । ଆଦେଙ୍ଗ୍‍ଁ ଇୟା ଦୟା ସେବାପାଣିଦୁ ବା ଦାନ୍‌ ସିନିକାନ୍‍ ଆଜି ଜିବନ୍‍ନୋନିକା ପରିଚୟସିଦୁ, ଇକା ନା ବଦା ।

8 ଇୟା ବିସୟ୍‌ତାନ୍‌ ମି ଉଣ୍ତିଙ୍ଗ୍‌ ନାନୁ ଇନିକା ନିତିନିୟମ୍‍ କିଏଜିନା । କେବଲ ସେବାପାଣିଦୁ ଆଇୱାରିଙ୍ଗ୍‌ ୱେଡ଼ିକାଦି କାତାସିଜି ମି ଜିବନ୍‍ନନି ସତ୍‍ ନେସିନି ଉଣ୍ତିଙ୍ଗ୍‌ ନାନୁ ଚେଷ୍ଟାକିଜିନା । 9 ମିର୍‌ ପ୍ରବୁ ଜିସୁ କ୍ରିସ୍ତଦି ଦୟା ବିସୟନେସ୍ତୁ । ୱାନ୍‌ ମାଜନ୍‌ ଆତିଙ୍ଗ୍‌ବା ମି ଉଣ୍ତିଙ୍ଗ୍‌ ଗରିବ୍‍ ଆତାନ୍‌ ୱାନି କାକୁର୍ତିମାଡ଼ାନ୍ ମିର୍‌ ବା ଏଣ୍ତେସ୍ ମାଜନ୍‌ ଆଦେଙ୍ଗ୍‍ଁ ଆଟିନିଦେର୍‌ ।

10 ଇୟା ବିସୟତାନ୍ ମିଙ୍ଗିଁ ନା ଇୟା ଆଦେସ୍, ଦରନ୍ ମିର୍‌ ଏମେକା ଆରାମ୍‌କିତିମାରିଦେର୍‌, ଆକା ଇଲେଇ ୱିଜିସି କିଦେଙ୍ଗ୍ ମି ଇଛା । ଇରିଙ୍ଗ୍‌ ପାଣି କିଦେଙ୍ଗ୍ ସିଲେ, ମାତର ପାଣିକିଦେଙ୍ଗ୍ ଟିକ୍ ୱିକ୍‌ତେଙ୍ଗ୍ ମିର୍‌ ଆଜିନିଦେର୍‌ ଆଗିଡ଼ି । 11 ଇଲେଇ ପାଣିକିଜି ସାଡ୍ରୁ ମାରି ମି ସୁଜଗ୍‌ତାନ୍ ଆକା ୱିସ୍‌ତୁ । ନେଗିକାଆସିନି ବେଡ଼ାଦୁ ମି ଏମେ ୱେଡ଼ିକା ମାରାତ୍, ପାଣି ୱିଜିନିସାନ୍ଦି ଆକା ଆସ୍‍ସ ଇଡ୍‍ଦୁ । 12 ମାତର୍‌ ଦାନ ସିଦେଙ୍ଗ୍‌ ୱେଡ଼ିକା ମାର୍ହିଙ୍ଗ୍, ଲୋକୁ ୱାନି ବଦା ଇସାବ୍‍ତାନ୍ ଆମାକା ଦାନ୍ କିନାନ୍, ମାପୁରୁ ଆସ୍‍ନାନ୍‍ । ୱାନି ସିଦେଙ୍ଗ୍‍ଆଟ୍‍ନି ଆତ୍ରେ ୱାନ୍‌ ଇନିକା ସିପିନ୍ ଇଜି ମାପୁରୁ ବଦା କିଏନ୍‌ ।

13 ମି ମୁସୁକୁ ଇୟା ବୋଜୁଦିଙ୍ଗ୍ ତିଗଜ ଆଇୱାରିଙ୍ଗ୍‌ ସୁକ୍‌ ସିଦେଙ୍ଗ୍‌ ନାନୁ ବଦା କିଏଜିନା । 14 ମାତର୍‌ ଇଲେଇ ମିଙ୍ଗିଁ ନାଣ୍ତ ମାନିଙ୍ଗ୍ ସିଲିସାତି ଲୋକାଙ୍ଗ୍‍ ସାହାଜ୍ୟ କିନିକା ମି ପାଣି । ବେଡ଼ା ୱାନାତ୍, ମିର୍‌ ସିଲିସାତି ମାର୍‍ଇୱାଲେ, ୱାରି ନାଣ୍ତ ମି ଉଣା ପୁରା କିନି ଉଣ୍ତିଙ୍ଗ୍‌ ସାହାଜ୍ୟ କିନାତ୍ । ଇୟାୱାଜା ଇସାବ୍‍ତାନ୍ ମିମାନୁ ସାମାନ୍‍ ରକ୍‌ୟା କିଦେଙ୍ଗ୍‌ ଆଟ୍‌ନାର୍ । 15 ଦର୍ମସାସ୍ତ୍ରଦୁ ରାସାତାମାନାତ୍‌, "ଏନ୍‌ ନାଣ୍ତ ଉଣ୍ତା କିତାନ୍‌, ୱାନିଦି ଇନିକା ଏଜେଏତାତ୍‌ । ଏନ୍‌ ଉଣା ଉଣ୍ତା କିତାନ୍‌, ୱାନିଦି ଉଣା ଆଏତାତ୍ ।"

16 ମାପୁରୁଦି ଦନ୍ୟବାଦ୍‌ ଆପିତ୍‌ । ଇରିଙ୍ଗ୍‌ ମା ୱାଜା ତିତସତି ଜିବନ୍‌ ବା ମିଙ୍ଗିଁ ସାହାଜ୍ୟ କିଦେଙ୍ଗ୍‌ ୱେଡ଼ିକା ମାନାନ୍‌ । 17 ୱାନ୍‌ କେବଲ ମା ଅନୁରଦଦିଙ୍ଗ୍ କୁକ୍‌ନିକା ୱେର୍‌ଏନ୍, ମାତର୍‌ ମିଙ୍ଗିଁ ସାହାଜ୍ୟ କିନି ଉଣ୍ତିଙ୍ଗ୍‌ ନିସ ୱେଡ଼ିକା ଜେ, ନିଜେଦି ବଦାଦାନ୍ ମି ଲାକ୍‌ତୁ ସନ୍‍ଡ୍ରେଙ୍ଗ୍‍ ୱାନ୍‌ ବଦା କିତାମାନାନ୍ । 18 ୱାନି ୱାଲେ ମାରି ଅରେନ୍ ତଡ଼ାନ୍‌ତିଙ୍ଗ୍‌ ମାପ୍‌ ପୋକ୍‌ତାତାମାନାପ୍ । ନେଗି କାବୁର୍‌ ପ୍ରଚାର୍‍ କିଦେଙ୍ଗ୍ ୱିଜୁ ମଣ୍ତଲିଆଙ୍ଗାଁ ୱାନ୍‌ ପୁରା ୱିଜୁତରିନ୍‌ ୱେଙ୍ଗିଁତାମାନାନ୍ । 19 ମାରି ନାସ ସିଲେ, ପ୍ରବୁଦି ଗୌରବ୍‍ ମାରି ମା ନମସ୍କାର୍‌ ୱିକ୍‌ନି ଉଣ୍ତିଙ୍ଗ୍‌ ଆମା ଉଣ୍ତାକିତି ଦାନ୍‍ତି ଅନି ସେବା ପାଣି ମାପ୍‌ ପୟ୍‍ତାମାନାତ୍‍, ଆବେନ୍‌ ମା ଅର୍‌ସେସନି ଉଣ୍ତିଙ୍ଗ୍‌ ଆଇଆଇ ମଣ୍ତଲି ୱାନିଙ୍ଗ୍‌ ଆସ୍‍ କିତାମାନାର୍‌ ।

20 ନିଜେଦି ବଦାଦାନ୍ ସିଆୟ୍‌ଆତିମାନି ଇୟା ଦାନଦିଙ୍ଗ୍ ନାଣ୍ତ ଜାଗାର୍‌ତାଦାନ୍‌ ମାପ୍‌ ବ୍ୟବହାର୍ କିଜିନାପ୍, ଏଣ୍ତେସ୍‌ ମା ମୁସ୍‌କୁ ଏନ୍‌ ଦୋସ୍‍ତିଗିଦେଙ୍ଗ୍ ଆଟ୍‌ଏନ୍ । 21 ମାତର ମାପୁରୁଦି ଆଗିଡ଼ି ସିଲେ, ମାତ୍ର ଲୋକା ଆଗିଡ଼ି ବା ସତ୍‌ ମାଡ୍ରେଙ୍ଗ୍‍ଁ ମା ବଦା ।

22 ଆର୍‌ତିଙ୍ଗ୍‌ ୱାରି ୱାଲେ ଇୟା ମା ତଡ଼ାନ୍‌ତିଙ୍ଗ୍‌ ମାପ୍‌ ପୋକ୍‌ତାତାମାନାପ୍‌ । ୱାନିଙ୍ଗ୍‌ ଗାଦି ଦେବେଙ୍ଗ୍‌ ପରିକା କିଜି ୱାନିଙ୍ଗ୍‌ ବିସ୍‍ବାସ୍‌ତି ପରିଚୟ ପୋୟ୍‌ତାମାନାପ୍‌ । ମି ମୁସ୍‌କୁ ୱାନି ଆଟ୍‌ୱା ମାନିଙ୍ଗ୍‌ ୱାନ୍‌ ମିଙ୍ଗିଁ ସାହାଜ୍ୟ କିନି ଉଣ୍ତିଙ୍ଗ୍‌ ନାଣ୍ତ ୱେଡ଼ିକା ଆତାମାନାନ୍‌ । 23 ତିତସଦି ପରିଚୟ ଇକା ୱାନ୍‌ ନା ୱାଲେମାନିକାନ୍‌ ମାରି ମିଙ୍ଗିଁ ସାହାଜ୍ୟ କିନି ଉଣ୍ତିଙ୍ଗ୍‌ ନା ୱାଲେ ପାଣିକିନିକାନ୍‌ । ମାରି ୱାନି ୱାଲେ ସଲିସ୍‍ମାନି ଆଇ ବିସ୍‌ବାସି ତଡ଼ାନ୍‌କା ପରିଚୟ ୱାର୍‌ ମଣ୍ତଲିଆଙ୍ଗାଁ ୱିଜୁ ପ୍ରେରିତ ସିସୁ ମାରି କ୍ରିସ୍ତଦି ଗୌରବ୍‍ ୱାଜା । 24 ୱାରିଙ୍ଗ୍ ମି ଜିବନ୍‍ନୋନିକା ତର୍‍ତୁ । ଆତିଙ୍ଗ୍‌ ୱିଜୁ ମଣ୍ତଲିଙ୍ଗ୍‍ଁ ଇୟା ବିସୟ୍‌ତାନ୍‌ ସେତାଆନାର୍ ମାରି ମି ଉଣ୍ତିଙ୍ଗ୍‌ କିଜିମାନି ଗର୍ବ ସତ୍‌ ଇଜି ବିସ୍‍ବାସ୍‍ କିଦେଙ୍ଗ୍ ଆଟ୍‍ନାର୍‍ ।