1 କ୍ରିସ୍ତ ବିସ୍‍ବାସି ତୋଡ଼ାନ୍‌କୁ ନି ତାଙ୍ଗିଁକ୍‍ ନିଜେନିଜେଦିଙ୍ଗ୍‌ ଜିବନ୍‍ନୋଜି ମାଣ୍ତ୍ରୁ । 2 ୱାଜିମାନି ଲୋକାଙ୍ଗ୍‌ ମି ଇଲୁତୁ କୁକ୍‍ତୁ । ଇକା କିନି ମାଡ଼ାନ୍ ଏନ୍‍ ଏନ୍‍ ନେସ୍‍ଏଣ୍‍ଗା ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ସେବାକିତାମାନାର୍‍ । 3 ଜଇଲ୍‍ତୁମାନି ଲୋକା ୱାଲେ ନିନ୍‌ ନିଜେ ଜଇଲ୍‍ତୁ ତେବାଜି ଦଣ୍ତ୍‌ ପୋଇଜିନି ୱାଜା ଅଡ଼୍‍ବିଜି ୱାରିଙ୍ଗ୍ ଏତ୍‌କିଦୁ । ଦୁଃକ୍‍କାସ୍ଟୁ ବଗ୍‌ କିଜିମାନି ଲୋକା ୱାଲେ ୱିଜୁ ଦୁଃକ୍‍ ସିନ୍ତା କିଜି ୱାରିଙ୍ଗ୍ ଏତ୍‌ କିଦୁ ।

4 ପେଡ଼ି ୱିଜେରି ଉଣ୍ତିଙ୍ଗ୍ ନେଗିକା ଆପିତ୍‌, ମେମାରି ନି ଆଇମା ନିଜେନିଜେଦି ଉଣ୍ତିଙ୍ଗ୍ ବିସ୍‍ବାସ୍‍ତାନ୍ ତେବାପିର୍‌ । ମାପୁରୁ ଲାଲାୟ୍‍ଆନି ୱାରିଙ୍ଗ୍‍ ମାରି ଦାରିପାଣିକିନିୱାରିଙ୍ଗ୍‍ ବିଚାର୍‌ କିନାନ୍ ।

5 ଦନ୍‍ସମ୍ପତି ଆସାଦାନ୍‍ ଆକତେବାଦୁ ମାରି ମି ଏମେକା ମାନାତ୍, ଆବେନ୍‌ ୱେଡ଼ିକାଦାନ୍‍ ତେବାଦୁ । ଇରିଙ୍ଗ୍‌ ମାପୁରୁ ଇର୍ହାମାନାନ୍‌, "ନାନୁ ମିଙ୍ଗିଁ ଡ଼ିସ୍‍ଏ, ନାନୁ ନିଙ୍ଗିଁ ଏସାଙ୍ଗ୍ ପେର୍‍ଏ ।" 6 ମାରି ମାଡୁ ସାହାସ୍‍ତାନ୍‍ ଇନ୍‌ଡ୍ରେଙ୍ଗ୍‌ ଆଟ୍‍ନିକା,

"ପ୍ରବୁ ନା ସାକାକିନିକାନ୍‍ ।

ନାନୁ ତିଲାଏ,

ଏନ୍‍ ନା ଅନିସ୍ଟ କିଦେଙ୍ଗ୍‍ ଆଟ୍‍ନାନ୍ ?"

7 ଏମେ ନେତାର୍ ପୁର୍ବେ ମିଙ୍ଗିଁ ମାପୁରୁଦି ବାକ୍ୟ ୱେର୍‍ତା ମାର୍ହାର୍‌, ୱାରିଙ୍ଗ୍ ଏତ୍‍କିଦୁ । ୱାରି ଜିବନ୍‌ ବା ସାନିକା ଏଣ୍ତେସ୍‌ନାନିକା ମାର୍ହାତ୍‌, ଆକା ଏତ୍‍କିଜି ୱାରି ବିସ୍‍ବାସ୍‍ତିଙ୍ଗ୍‍ ନିଜେଦି ଜିବନ୍‍ତୁ ଆସ୍‌ତୁ । 8 ଜିସୁ କ୍ରିସ୍ତ ଇଏନ୍‍, ନେରୁ ମାରି ୱିଜୁଦିନ୍‌ ସାମାନ୍ ମାନାନ୍ । 9 ଆଇ ଆଇ ବୁଲ୍‍ ଦାର୍ମୁ ସିକ୍‌ୟା ମିଙ୍ଗିଁ ସତ୍‌ ସାରିଦାନ୍ ୱେର୍‌ଏ କିମାକିତ୍‍ । ମାପୁରୁଦି ଦୟାଦାନ୍ ଜିବନ୍‌ତି ଉଣ୍ତିଙ୍ଗ୍ ସାକ୍ତି ଉଣ୍ତାକିନିକା ନେଗିକା, କାଦି ଉଣି ବିସୟତାନ୍ ନିୟମ୍‌ ମାନାନି ମାଡ଼ାନ୍ ଇକା ଆଦେଙ୍ଗ୍‍ଁ ଆଟ୍ଏତ୍ । ଆତ୍‌ରେରି ବିଦି ୱିଜୁ ମାନାଜିମାନି ଲୋକୁ ଆବେଣାନ୍‍ ଇନି ଉପକାର୍ ପୋୟ୍‍ଏର୍‍ ।

10 ମା ଏମେ ଜଜ୍ଞ ବେଦି ମାନାତ୍, ଆବେନୁ ମାନି ପୁଜାସିତିମାନି କାଦି ଉଣ୍ତେଙ୍ଗ୍‌ ଜିହୁଦି ଜାଜକରି ଅଦିକାର୍ ସିଲେତ୍‌ । 11 ଜିହୁଦି ପେରିଜାଜକ ବଲି ସିତିମାନି ଜାତୁଦି ନେତେର୍‌ ପାପ୍‌ତି ବାଦ୍‍ଲୁ ୱାଜା ପୁଜାସିଦେଙ୍ଗ ମହାପବିତ୍ର ବାଡିଦୁ ଆସ୍‌ସି ସନାର୍; ମାତର୍‌ ଆୟା ଜାତୁଦି ମେନ୍ଦଲ୍‌ ନାର୍‌ତି ଆତେରେ ଆଡ଼ାକ୍‌ନା ପୋକନାର୍ । 12 ଆୟାୱାଜା ଜିସୁ ବା ନିଜେଦି ନେତେର୍‌ତାନ୍‌ ଏଣ୍ତେସ୍‌ ଲୋକାଙ୍ଗ୍ ପାପ୍‌ଦାନ୍ ପବିତ୍ର କିନି ଉଣ୍ତିଙ୍ଗ୍‌ ଗାଡ଼୍‌ତି ଆତେରେ ସାତାନ୍ । 13 ଆଦେଙ୍ଗ୍‌ ସାଦୁ, ମାଡୁ ବା ଗାଡ଼୍‌ ଆତ୍ରେ ୱାନି ଲାକୁତୁ ସନାଟ୍ ମାରି ୱାନି ୱାଲେ ନିନ୍ଧା, ଅପମାନ୍ ସାସ୍‌ କିନାଟ୍ । 14 ଇରିଙ୍ଗ୍‌ ମା ଉଣ୍ତିଙ୍ଗ୍‌ ଇୟା ଜଗତ୍‌ଦୁ ଆମାଇନି ୱିଜୁଦିନ୍‍ତି ତେବାନି ଗାଡ଼୍‌ ସିଲେତ୍‌, ଏମେ ଗାଡ଼୍‌ ବବିସତ୍‌ଦୁ ତିଆର୍‍ ଆନାତ୍, ମାପ୍‌ ଆୟା ଗାଡ଼୍‌ତିଙ୍ଗ୍‌ କାପ୍‍କିଜିନାପ୍‌ । 15 ମାରି ରାଦୁ, ମାପ୍‌ ଜିସୁଦି ମାଣାନ୍‌ ମାପୁରୁଙ୍ଗୁଁ ମା ପ୍ରସଂସା ନାନି ବଲି ସିନାଟ୍‍ । ଇୟା ବଲି ଜିସୁଙ୍ଗୁଁ "ପ୍ରବୁ" ଇଜି ମାନାଜିମାନି ୱେୟୁଦାନ୍‌ ପୁଜା କିନାଟ୍ । 16 ଆଇୱାରି ନେଗିପାଣି କିଦେଙ୍ଗ୍‌ ମାରି ୱାରିଙ୍ଗ୍ ସାହାଜ୍ୟ କିଦେଙ୍ଗ୍‌ ବାଣାମାଟ୍, ଇରିଙ୍ଗ୍‌ ଇୟାୱିଜୁ ନେ ମାପୁରୁଦି ୱେଡ଼ିକାଦି ବଲି ୱାଜା ।

17 ମି ନେତାରି ଆଡ୍‍ଗି ଆଦୁ, ୱାରି ଆଦେସ୍‍ ଆସ୍‍ତୁ । ୱାର୍‌ କାପ୍‍କିନିଲୋକ୍‍ ୱାଜା ମି ଆତ୍ମାଦି ରକ୍ଷା ଉଣ୍ତିଙ୍ଗ୍ ରମ୍‍ଏଣ୍‍ଗା କାପ୍‌କିତାମାନାର୍, ଇରିଙ୍ଗ୍‌ ୱାରିଙ୍ଗ୍ ମାପୁରୁଦି ଲାକୁତୁ ନିଜେଦି ପାଣିଦି ଇସାପ୍ ସିଦେଙ୍ଗ୍‌ ପଡ଼ାନାତ୍‌ । ମିର୍‌ ଜଦି ୱାରି ଆଡ୍‍ଗି ଆନିଦେର୍‌, ଆର୍‌ତିଙ୍ଗ୍‌ ୱାରୁ ୱେଡ଼ିକାଦି ମୋନତାନ୍ ନିଜେଦି ପାଣି କିନାର୍, ମାତର୍‌ ଜଦି ଆକା କିଇଦେର୍‌, ଆର୍‌ତିଙ୍ଗ୍‌ ୱାର୍‌ ଦୁଃକ୍‌ ମୋନତାନ୍ ଆକା କିନାର୍ ମାରି ଇକା ମି ଉଣ୍ତିଙ୍ଗ୍‌ ନେଗିକା ଆଏତ୍‍ ।

18 ମା ଉଣ୍ତିଙ୍ଗ୍ ପାର୍‌ତନା କିଦୁ । ମା ବୁଦି ଜେ ନେଗିକା, ଇବେନୁ ନାମ୍‌ଇକା ସିଲେତ୍‌, ଇରିଙ୍ଗ୍‌ ୱିଜୁଦିନ୍ ନେଗେନ୍‍ ଜିଦେଙ୍ଗ୍‌ ମା ଉଣ୍ତ୍ରେ ବଦା । 19 ମାରି, ମାପୁରୁ ନାଙ୍ଗିଁ ମି ଲାକ୍‌ତୁ ବେଗି ପୋକିନ୍‍, ମିର୍‌ ନା ଉଣ୍ତିଙ୍ଗ୍‌ ଇୟା ପାର୍‌ତନା କିଜିମାଣ୍ତ୍ରୁ । ଇକା ମି ଲାକ୍‌ତୁ ନା ଜିବନ୍‍ତାନ୍‍ ଅନୁରୋଦ୍‌ କିଜିନା ।

20 ଏନ୍‌ ନିଜେଦି ବଲିଦାନ୍‌ ମେଣ୍ତେଆଙ୍ଗାଁ "ପେରି ମେଣ୍ତେଙ୍ଗ୍‌ସାରାକିନିକାନ୍‌" ଆତାମାନାନ୍‌, ମା ଆୟା ପ୍ରବୁ ଜିସୁଙ୍ଗୁଁ ମାପୁରୁ ସାତିମାଣାନ୍‌ ମାରିଡ଼େସି ନିକ୍‌ତାମାନାନ୍‌ । ଆୟା ଜିସୁଦି ସାତି ବଲିଦି ନେତେର୍‌ତାନ୍‌ ଉଣ୍ତ୍ରି ୱିଜୁଦିନ୍‌ତି ନିୟମ୍‌ ଆତାମାନାତ୍‌ । ସାନ୍ତିସିନି ମାପୁରୁ ୱାନି ବଦା ମାନାନି ଉଣ୍ତିଙ୍ଗ୍‌ ମି ଦର୍‌କାର୍‌ତି ଇସାବ୍‌ତାନ୍‌ ୱିଜୁ ନେଗି ବିସୟ୍‌ ସିପିନ୍‌ । 21 ମାରି ଜିସୁ କ୍ରିସ୍ତଦି ମାଣାନ୍‍ ମା ଜିବନ୍‍ତୁ ୱାନି ୱେଡ଼ିକାଦି ନେଗି ପାଣି ପୁରା କିପିନ୍‍ । ଜୁଗ୍‌ ଜୁଗ୍‍ ଗୌରବ୍‍ ୱାନିନ୍ଦି ଆପିତ୍‌ । ଆମେନ୍‍ ।

22 ଏ ତଡ଼ାନ୍‌କୁ ନି ତାଙ୍ଗିଁକ୍‍, ଅନୁରୋଦ୍‌ କିଜିନା, ନା ଇୟା ଆକୁଦି ବାକ୍ୟ ଉଣ୍ତିଙ୍ଗ୍‌ ସାସ୍ତି ୱାଲେ ମୋନଦିୟାନ୍‌ ସିଦୁ । ମିଙ୍ଗିଁ ୱେଡ଼ିକା କିନି ଉଣ୍ତିଙ୍ଗ୍ ଇକା ନାନୁ ରାସ୍‍ତାମାନା । 23 ମା ତଡ଼ାନ୍ ତିମତି ଜଇଲ୍‍ତାନ୍ ମୁକ୍‍ଡ଼ାତାମାନାନ୍ ଇଜି ନେସ୍‍ନିଦେର୍‍ । ୱାନ୍‍ ଜଦି ବେଗି ୱାନାନ୍‍, ଆର୍‌ତିଙ୍ଗ୍‌ ନାନୁ ୱାନିଙ୍ଗ୍‍ ଅର୍‌ସେ ଆସ୍‌ସି ମି ଲାକ୍‌ତୁ ୱାନା ।

24 ମି ୱିଜେରି ପେରିୱାରିଙ୍ଗ୍ ମାରି କ୍ରିସ୍ତ ବିସ୍‍ବାସିରିଙ୍ଗ୍ ମା ନମସ୍କାର୍ ଜାଣେ କିଦୁ । ଇଟାଲି ଦେସ୍‍ତାନ୍ ୱାତିମାନି ତଡ଼ାନ୍‌କୁ ମିଙ୍ଗିଁ ନମସ୍କାର୍ କିଜିନାର୍ ।

25 ମି ୱିଜେରି ଲାକ୍‌ତୁ ମାପୁରୁଦି ଦୟା ୱିଜୁଦିନ୍ ମାନିତ୍ ।