1 ମାପ୍‌ ଏଣ୍ତେସ୍ ସତ୍‌ତାନ୍‌ ୱେର୍‌ଏ ଆଏପ୍‌, ଇୟାଉଣ୍ତିଙ୍ଗ୍‌ ମାଡ୍‌ ୱେର୍‌ଇମାନି ସତ୍‌ ମାଟାଦୁ ଆଟୁୱାଆଜି ତେବାନିକା ମାନାତ୍‌ । 2 ଇରିଙ୍ଗ୍‌ ଆଗ୍‌ଡ଼ି ମାପୁରୁ ମୁସ୍‌କୁପୁର୍‌ତି ଦୁତ୍‍କାଙ୍ଗ୍‌ ଏମେ କାବୁର୍ ସିତାମାନା, ଆକା ସତ୍‍ ଇଜି ପାର୍‍ମାଣ୍‍ ଆତାମାନାତ୍, ଆମାକାର୍ ତାନିଙ୍ଗ୍‌ ଡ଼ିସ୍‌ସି ମାନାଏତାର୍, ୱାର୍‌ ସାମାନ୍‌ ଦଣ୍ତ୍‌ ପୋଇତାମାନାର୍ । 3 ଆର୍‌ତିଙ୍ଗ୍‌, ଇୟା ପେରିରକିୟାଦିଙ୍ଗ୍‌ ଡ଼ିସ୍‌ତିଙ୍ଗ୍‌, ମାଡ୍‌ ଏଣ୍ତେସ୍ ରକିୟା ପୋଇନିକା ? ଇୟା ପରିତ୍ରାଣ ନିଜେ ପ୍ରବୁ ନିଜେ ଆଗ୍‍ଡ଼ିନେ ୱେର୍‍ତାମାନାନ୍ ମାରି ୱାନିମାନୁ ୱେର୍‌ଇମାନି ଲୋକୁ ୱାନି ପେରିସତ୍‍ ମା ଲାକୁତୁ ପାର୍‌ମାଣ୍‌ କିତାମାନାର୍‍ । 4 ମାରି ବା, ମାପୁରୁ ଆଇ ଆଇ ସିନେଙ୍ଗ୍‌ ନି କାବାଆନି ପାଣି ମାରି ଏସାଙ୍ଗ୍‍ ଗଟ୍‌ନାଦାନ୍‌ ଆୟାୱିଜୁ କାବୁର୍ ସତ୍‍ ଇଜି ସାକି ସିତାମାନାନ୍‌ ମାରି ନିଜେଦି ବଦାଦାନ୍ ପବିତ୍ରଆତ୍ମାଦି ଦାନ୍‍ ୱିଜୁ ବାଟା କିତାମାନାନ୍ ।

5 ମାପୁରୁ ଆମା ପୁନି ଦୁନିଆ ତିଆର୍‌ କିନାନ୍‌ ମାରି ଆମା ଦୁନିଆଦି କାବୁର୍ ମାପ୍‌ ଇଜିନାପ୍‍, ୱାନି ଅଦିପତି ଇସାପ୍‍ତାନ୍ ୱାନ୍‌ ମୁସ୍‌କୁପୁର୍‌ତି ଦୁତ୍‍କାଙ୍ଗ୍‌ ଆସ୍‌କିଏନ୍‌ । 6 ଦାର୍ମୁସାସ୍ତ୍ରଦୁ ମାଟା ରାସାତାମାନାତ୍‌ :

"ଏ ମାପୁରୁ, ଲୋକୁ ଏନ୍‍ ଜେ, ନିନୁ ୱାନି ଉଣ୍ତିଙ୍ଗ୍‌ ସିନ୍ତା କିଜମାନ୍‌ଆ ମାରି ମନୁଷ୍ୟପୁତ୍ର ଏସ ତାଗ୍‍ଇକାନ୍ ଆତିଙ୍ଗ୍‌ବା ମିରୁ ୱାନି ଜାତୁନ୍‍ ଅସିନି ?

7 ନିନୁ ୱାନିଙ୍ଗ୍‌ ମୁସ୍‌କୁପୁର୍‌ତି ଦୁତ୍‍କା ମାଡ଼ାନ୍‍କୁ ଅଡ଼ପ୍‍ ମାତର୍‌ ଇସ୍ରିକାକିଜି ଇଟ୍‍ତିମାନି;

ନିନୁ ୱାନିଙ୍ଗ୍‌ ଗୌରବ୍‍ ମାରି ସନ୍‍ମାନ୍‍ରୁପ୍‌ତି ଟପିଦାନ୍‌ ଆରିସ୍‌କିତିମାନି,

8 ମାରି ୱିଜୁ ବିସୟ୍‌ ମୁସୁକୁ ସାସନ୍ କିଦେଙ୍ଗ୍‌ ସିତିମାନି ।"

ମାପୁରୁ ଲୋକାଙ୍ଗ୍‌ "ୱିଜୁ ବିଷୟ ମୁସୁକୁ ସାସନ୍ କିଦେଙ୍ଗ୍‌ ସିତାମାନାନ୍‌ ।" ଇବେଟ୍‍ତାନ୍‌ ପୁରାନେସ୍‌ନିକା ଜେ, ୱିଜୁ ବିଷୟ ୱାନି ଅଦିକାର୍‍ତୁ ତେବାତେମାନେ, ଏଣ୍ତେସ୍‌ବା ମାଡ୍‌ ନେସ୍‍ନିକା, ଲୋକୁ ଇଲେଇ ୱିଜୁ ବିଷୟ ମୁସୁକୁ ଅଦିକାର୍‌ କିଏର୍‌ । 9 ମାତର୍‌ ମାପ୍‌ ସୁଡ଼ୁଜିନାପ୍‌, ଏଣ୍ତେସ୍ ଜିସୁ ମୁସ୍‌କୁପୁର୍‌ତି ଦୁତ୍‍କା ମାଣୁକୁ ଅଡ଼ପ୍‍ ଇସ୍ରିକା କିଆୟ୍‍ଆତା ମାର୍ହାନ୍‍, ଏଣ୍ତେସ୍‍କି ମାପୁରୁଦି ଦୟାଦାନ୍‍ ୱାନ୍‌ ୱିଜେରି ଉଣ୍ତିଙ୍ଗ୍‌ ସାନାନ୍‍ । ୱାନି ଆୟା ସାତିଦଣ୍ତ୍‍ ଉଣ୍ତିଙ୍ଗ୍‌ ମାଡୁ ୱାନିଙ୍ଗ୍‌ ଇଲେଇ ଗୌରବ୍‍ ମାରି ସନ୍‍ମାନ୍‍ରୁପତି ଟପିଦାନ୍‌ ଆରାତିମାନିକା ସୁଡ଼ୁଜିନିକା । 10 ୱିଜେରିଙ୍ଗ୍‌ ତିଆର୍‌କିତିକାନ୍‌ ମାରି ରକିୟାକିନିକାନ୍‍ ମାପୁରୁ ୱାନି ନାଣ୍ତ କଡ଼ରିଙ୍ଗ୍‌ ଜିସୁଦି ଗୌରବ୍‌ଦୁ ମିସା କିନି ଉଣ୍ତିଙ୍ଗ୍‌, ସାତି ମାଡ଼ାନ୍‍କୁ ଜିସୁଙ୍ଗୁଁ ପୁରାନେଗିକା କିଜି ଟିକ୍ ପାଣି କିତାମାନାନ୍ । ଇରିଙ୍ଗ୍‍ଁ ଜିସୁନେ ପରିତ୍ରାଣଦି ସାରିଦୁ ୱାରିଙ୍ଗ୍ ସାଲାକିଜି ଅନାନ୍ ।

11 ୱାନ୍‌ ଲୋକାଙ୍ଗ୍‌ ପାପ୍‌ତାନ୍ ପବିତ୍ର କିନାନ୍ । ମାରି, ଆମାକାର୍‌ ଜିସୁ ମାଡ଼ାନ୍ ପବିତ୍ର ଆନାର୍‌, ୱାର୍‌ ୱିଜେରେ ଅରେନ୍‌ ବୁବାଦି କଡ଼ର୍‌ । ଆୟାଉଣ୍ତିଙ୍ଗ୍‌ ଜିସୁ ୱାରିଙ୍ଗ୍ ତଡ଼ାନ୍‍ ନି ତାଙ୍ଗିଁ ଇଜି ଇନ୍‌ଡ୍ରେଙ୍ଗ୍‌ ସେମାର୍ ଆଏନ୍‍ । 12 ୱାନ୍‌ ମାପୁରୁଙ୍ଗୁଁ ଇର୍ହାମାନାନ୍‌ :

"ନାନୁ ନି ୱିଜୁ ପାଣି ନା ତଡ଼ାନ୍‍ ନି ତାଙ୍ଗିଁକାଙ୍ଗ୍‌ ୱେର୍‍ନା ।

ନାନୁ ୱାରି ମଣ୍ତଲିଦି ନାଣ୍ତଲୋକୁ ଉଣ୍ତାତିମାନୁ ନି ପ୍ରସଂସା ପାଟା କିନା ।"

13 ୱାନ୍‌ ଇକାବା ୱେର୍‌ତାମାନାନ୍, "ନାନୁ ମାପୁରୁଦିମାନୁ ବିସ୍‌ବାସ୍‌ ତିଆର୍‌ କିନା" ମାରି ମାପୁରୁ ନାଙ୍ଗିଁ ଏମେ କଡ଼ରିଙ୍ଗ୍‌ ସିତାମାନାନ୍‌, ୱାର୍‌ ନା ୱାଲେ ମାନାର୍ ।

14 ୱାନ୍‌ ଏମେୱାରିଙ୍ଗ୍‌ କଡ଼ର୍‍ ଇଜି ମାନାତାମାନାନ୍‍, ୱାର୍‌ ନେତେର୍‍କାଣ୍ତା ମେନ୍ଦଲତି ଲୋକୁ ଆତିମାନିଙ୍ଗ୍‌ ଜିସୁ ବା ନିଜେ ୱାରି ୱାଜା ଲୋକା ମୁର୍ତି ନି ଗୁଣ୍‍ ଆସ୍‌ସି ୱାତାନ୍‌ । ୱାନ୍‌ ଇକା କିନି ମାଟା ଆଜିନାତ୍, ୱାନ୍‌ ଏଣ୍ତେସ୍ ନିଜେଦି ସାନି ମାଡ଼ାନ୍‍କୁ ସୟତାନ୍‍ତିଙ୍ଗ୍‌ ବିନାସ୍ କିନାନ୍, ଇରିଙ୍ଗ୍‍ଁ ସାନି ମୁସୁକୁ ସୟତାନ୍‍ତି ଅଦିକାର୍‌ ମାର୍‌ଆତ୍ । 15 ଇବେଟ୍‍କୁ ୱିଜୁଦିନ୍‍ ଉଣ୍ତିଙ୍ଗ୍‍ ସାନି ତିଲାନି ଦାସ୍‍ତି ଗାଟିଦୁ ମାନି ଲୋକାଙ୍ଗ୍‌ ୱାନ୍‌ ମୁକ୍‍ଡ଼ା କିତାମାନାନ୍ । 16 ଇବେଟ୍‌କୁ ଟିକ୍ ନେସ୍ତେଙ୍ଗ୍ ଆନାତ୍‌ ଜେ, ୱାନ୍‌ ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ସାହାଜ୍ୟ କିଏନ୍, ମାତର୍‌ "ୱାନ୍‌ ଅବ୍ରାହାମ୍‍ଦି କୁଟୁମ୍‌ତି ଲୋକାଙ୍ଗ୍‍ଁ ସାହାଜ୍ୟ କିନାନ୍ ।" 17 ତେନି ଅର୍ତ ଆଜିନାତ୍, ୱିଜୁ ବିସୟ୍‌ତାନ୍‌ ୱାନି ତଡ଼ାନ୍‍କା ୱାଜା ଆନିକା ୱାନି ବଦା ମାର୍ହାତ୍‌, ଏମେ ମାଣାନ୍‌ କି ୱାନ୍‌ ୱାରି ବିସ୍‍ବାସ୍ ମାରି ଦୟାକିନି ପେରିଜାଜକ ଆଜି ମାପୁରୁଦି ସେବା କିଦେଙ୍ଗ୍‌ ଆଟ୍‌ନାନ୍‍ ମାରି ଲୋକୁ ପାପ୍‌କେମା ପୋଇନାର୍‌ । 18 ଇରିଙ୍ଗ୍‌ ୱାନ୍‌ ନିଜେ ପରିକାଦୁ ଆର୍‌ଜି କାସ୍ଟୁବଗାତି ମାନିଙ୍ଗ୍‌, ପରିକାଦୁ ଆର୍‌ତିମାନି ଲୋକାଙ୍ଗ୍‌ ସାକା କିଦେଙ୍ଗ୍‌ ଆଟ୍‍ନାନ୍ ।